Kirihi Kabisa Mwendo Wenye Aibu wa Ulimwengu
“Kwa sababu ninyi hamwendelei kukimbia pamoja nao katika mwendo huu kwenye dimbwi lile lile la chini la ufasiki, wao wanatatizwa na huendelea kunena kwa njia ya matusi juu ya ninyi.”—1 PETRO 4:4, NW.
1. Biblia inaeleza jinsi gani mwendo wa kilimwengu ambamo hapo kwanza Wakristo wengi wa karne ya kwanza walikuwa wakikimbia?
“DIMBWI la chini la ufasiki.” Hivyo ndivyo mtume Petro anavyoeleza juu ya hali yenye aibu ambamo wengi katika karne ya kwanza walikuwa kabla ya kuwa Wakristo. Tafsiri nyingine zinainena kuwa “bwawa la utope-tope wa upujufu” (The New American Bible); “dimbwi la machafu yenye kudhuru” (The New Testament, kilichotungwa na Kleist na Lilly). Ni nini yaliyokuwa katika dimbwi hili la chini la ufasiki? Mtume anataja wazi mwenendo mlegevu, ashiki, mazidio katika kunywa divai, ulevi na ulafi, mashindano ya ulevi, na ibada za sanamu zilizo haramu.—1 Petro 4:3, 4, NW.
2. Kwa nini Wakristo leo wanapasa kupongezwa?
2 Kuna tofauti kama nini kati ya ulimwengu huu na kundi la kweli la Kikristo! Petro aliwapongeza kwa uchangamfu Wakristo aliowaandikia kwa sababu ya kutoendelea kukimbia pamoja na waliokuwa waandamani wao wa kilimwengu kupitia hili bwawa la utope-tope, hili dimbwi la machafu, la ubaya. Sisi tunafurahika sana kutoa pongezi inayofanana na hiyo kwa Wakristo leo, wakati ambapo hali ni mbaya hata kuliko zilivyokuwa katika karne ya kwanza. Mashahidi wa Yehova wanatia jitihada ya bidii-endelevu ili kuzoea ile ibada safi isiyotiwa unajisi inayokubaliwa na Mungu wetu aliye Baba, ambayo inatia ndani “kujiweka mwenyewe bila doa kutokana na ulimwengu.” (Yakobo 1:27, NW) Kiwango chao cha juu kinaleta heshima kubwa kwa jina la Yehova.
3. Ni nini kilichokuwa kisababishi cha masikitiko kwa Paulo, kama kilivyo kwetu leo pia?
3 Hata hivyo, ili wadumishe kiwango chao cha juu wakiwa tengenezo safi, inakuwa lazima nyakati nyingine watu wa Mungu wawakaripie au hata wawatenge na ushirika wachache kwa kulinganishwa wanaojiruhusu washawishwe wakaingie katika mazoea ya ufasiki ya ulimwengu huu. Hiki ni kisababishi cha masikitiko, nasi tunahisi kama mtume Paulo wakati alipoona hali kama hiyo katika karne ya kwanza. Yeye aliandika hivi: “Kwa maana kuna wengi, mimi nilikuwa nikiwataja mara nyingi lakini sasa nawataja pia kwa kulia machozi, ambao wanatembea wakiwa adui za mti wa mateso wa Kristo, na mmaliziko wao ni uharibifu, na mungu wao ni tumbo lao, na utukufu wao umo katika aibu yao, na wao wameweka akili zao juu ya vitu vilivyo duniani.” (Wafilipi 3:18, 19, NW) Ni jinsi gani sisi, kama watu mmoja mmoja, tunavyoweza kuepuka jambo kama hilo lisitupate? Ni kwa kupata kujua kumwiga Yesu katika kupenda viwango vya juu vya uadilifu wa Yehova na kwa kuchukia ukosefu wa usafi wa ulimwengu huu.—Waebrania 1:9, NW.
Usitazame Nyuma
4. (a) Kwa nini kuna uwezekano wa sisi kushawishwa tugeukie mazoea ya ulimwengu huu yanayoshusha heshima? (b) Ni jambo gani litakalotusaidia tuepuke kujenga tamaa isiyofaa?
4 Usiikadirie dhambi kamwe kuwa yenye nguvu kidogo. Mavutio ya ulimwengu huu ni imara na ni mengi; Ibilisi ni mjanja na mwenye hila mbovu; moyo wa kibinadamu ni mdanganyifu. (1 Yohana 2:15-17; 1 Petro 5:8; Yeremia 17:9) Wakati moyo unaposhikilia sana tamaa yao kwa ajili ya kitu fulani, mara nyingi hausikilizi wazo lenye sababu nzuri. Hiyo ndiyo sababu sisi tunapokea vikumbusha vingi sana katika Neno la Mungu kutusaidia tuweke mioyo yetu ikiwa na bidii ya kujitolea Yehova na kufanya mapenzi yake. Ni jambo la maana sana kutoacha tamaa mbaya hata ianze kujengeka katika moyo. (Yakobo 14, 15; Mathayo 5:27-30) Ni lazima sisi tuendelee kuimarisha mioyo yetu kama ngome kwa kuona sababu ambazo inatupasa sisi tupende yanayofaa na kukirihi kabisa na kukataa njia zenye kinyaa za ulimwengu huu. Mtume Paulo alitoa muhtasari wa jambo hilo hivi “Acheni upendo wenu uwe bila unafiki. Nyarafuni kilicho kiovu, shikilieni sana kilicho chema.”—Warumi 12:9, NW.
5. Kwa sababu gani ni jambo lenye hekima kufanya uchunguzi wa uangalifu wa makusudio na tamaa zetu?
5 Kwa sababu ya hatari ya kugeukia kando kutoka kwenye mwendo wa Kikristo, ni jambo la hekima tuendelee kila mmoja wetu kuchunguza makusudio yetu, tamaa zetu, miradi yetu. Je! wewe binafsi uko kama wale Wakristo ambao Petro aliweza kuwapongeza kwa kutorudia lile lile “dimbwi la ufasiki”? Au, nyakati nyingine wewe unadhihirisha mwelekeo wa mke wa Loti aliyetazama nyuma kwa kutamani sana vitu alivyokuwa amekombolewa kutoka kwavyo?—Mwanzo 19:26; Luka 17:31-33.
Uovu Ni Mwingi Sana Katika “Siku za Mwisho”
6, 7. (a) Ni mwelekeo gani kuhusu raha ambao Biblia inasema ungezionyesha “siku za mwisho”? (b) Ni jinsi gani watu wa ulimwengu wanavyoonyesha kwa majivuno fikira na vitendo vyao visivyo safi?
6 Fikiria kidogo juu ya ulimwengu ambamo sisi tunajikuta wenyewe mwishoni mwa hii karne ya 20. Uovu ni mwingi kama nini! Kama vile mtume Paulo alivyotabiri, wanaume na wanawake ni “wapenda raha kuliko kuwa wapenda Mungu.” Kweli kweli, ‘watu waovu na walaghai wanasonga mbele kuacha kuwa wabaya na kuwa wabaya zaidi, wakiongoza vibaya na wakiongozwa vibaya.’—2 Timotheo 3:1, 4, 13, NW.
7 Uzinzi, uasherati, ugoni-jinsia-moja, kulalana kwa wanawake na kutoa mimba—maneno haya na mengineyo yamekuwa semi zinazotumiwa katika kila jamaa. Mambo hayo yananenwa kwa uhuru na kwa kukubaliwa katika redio na televisheni na katika sehemu za kidini na za elimu. Pornografia ni biashara kubwa na inafanywa iweze kupatikana kwa utayari na watu wote. Baadhi ya sinema zinazopendwa na watu wengi zaidi, michezo ya jukwaani, na mifululizo ya vitimbi vinavyotangaza bidhaa za kibiashara kwenye televisheni ni hadithi za aina fulani ya ukosefu wa adili. Sisi ni wenye shukrani kama nini kwamba sisi si sehemu ya jambo hili! Na tunahitaji kutia bidii kama nini tuhakikishe kwamba propaganda hizo zenye madhara yasiyoonekana wazi haziathiri mioyo yetu!
8. Kwa habari ya mazoea ya ulimwengu huu ya kukosa adili, Biblia inasema tunapaswa na hatupaswi kufanya nini?
8 Wakristo wenye hekima wanatii onyo la Paulo: “Acheni uasherati na ukosefu wa usafi wa kila namna au pupa hata visitajwe miongoni mwa ninyi, sawasawa na vile inavyowafaa watu watakatifu . . . Endeleeni kuhakikisha juu ya yaliyo ya kukubalika kwa Bwana . . . Kwa hiyo endeleeni kulinda kwa uangalifu sana kwamba jinsi ninyi mnatembea si kama watu wasio na hekima bali kama wenye hekima.” Badala ya hivyo, Paulo alisema kwamba inatupasa tufikirie mambo yaliyo ya kweli, ya uadilifu, ya usafi wa tabia, ya kupendeka, na ya kuwa imara katika kufuata wema.—Waefeso 5:3-16; Wafilipi 4:8, NW.
9. Ni nini linaloweza kutukia kwa urahisi ikiwa sisi tunachagua vitumbuizo vyenye kutilika mashaka?
9 Je! wewe unaweka akilini shauri hili timamu kwa uangalifu wakati unapochagua vitumbuizo? Kumbuka, kadiri ambavyo tunazidi kusikiliza mambo yenye kushusha heshima, ndivyo mtindo wa maisha ya ulimwengu unavyoelekea kuwa wenye kukubalika, kuwa si mbaya sana hivyo. Huenda hata tukaanza kuvutiwa kwa siri au kuwaiga wale walio mashuhuri katika michezo au vitumbuizo, wanaozoea mambo kama hayo. Uwe chonjo kuona elekeo lo lote kama hilo.
Usitegwe na Njia ya Kufikiri ya Ulimwengu Huu
10. Ni falsafa gani ya maisha iliyozoewa na Waepikureo wa karne ya kwanza?
10 Katika siku ya Paulo wengi walikubali kufuata ile falsafa ya Waepikureo, walioishi kwa ajili ya raha, kutosheleza hisia za mwili. Wakati kifo kinapokughafilika wewe, wao walisema, kila kitu kimekwisha kwa habari yako. Kwa hiyo, kwa nini usipate raha yote inayowezekana kutokana na maisha maadamu ungali hai, kwa kuwa kesho huenda ukafa.
11. Ni jinsi gani walimwengu wengi leo wanavyoiga Waepikureo katika fikira na vitendo vyao?
11 Wengi leo wana mwelekeo uo huo. Wao wanajitia bila aibu katika raha za kila namna, bila kufikiria sana jinsi mwenendo wao unavyoathiri wengine. Kwao, Mungu hayuko, ama ikiwa yuko, yeye hatoi ithibati yo yote ya kujali mambo ya kibinadamu. Kwa kuwa mwanadamu ni tokezo la mageuzi—kama vile wao wanavyodai—kwa kweli wao hawako chini ya wajibu wa kutoa sababu kwa mtu ye yote kwa sababu ya matendo yao, isipokuwa kwa wao wenyewe na jamii ambamo wanaishi. Hata kuna udhuru wa kutenda kama wanyama. Ikiwa mazoea yasiyo ya adili ambayo Biblia inashutumu yanaleta raha kwenye hisia za mwili, kwa uhakika hawapaswi kushutumiwa. Sababu ya kufikiria kwao ni kwamba, kwa nini waishi maisha ya kujinyima na kujivuruga akili na hali sisi sote tunaishia mahali pale pale pamoja—kaburini?
12, 13. (a) Hatari ni nini ikiwa Wakristo wanakuwa katika hali ya kuingiwa na kufikiri kwa kilimwengu? (b) Ni nini uliokuwa mzizi wa tatizo lenyewe katika Korintho? (c) Ni nini linalopasa kufanywa ili kutuzuia tusiathiriwe na maoni ya ubinafsi juu ya uhai?
12 Inastahiki kuangaliwa kwamba Wakristo fulani katika Korintho wanaonekana kuwa walikuwa wameathiriwa na aina hii ya kufikiri. Akiandikia kundi la huko, Paulo alikiri kwamba “ikiwa wafu hawatainuliwa juu,” basi ule usemi wa kikawaida wa siku hiyo ulifaa kwa kiasi fulani: “Acheni tule na kunywa, kwa maana kesho sisi tutakufa.” Lakini yeye anafichua haraka kufikiri huku kwenye makosa: “Msiongozwe vibaya. Mashirika mabaya yanaharibu mazoea yenye mafaa. Amkeni mwe na utimamu wa akili katika njia ya uadilifu na msizoee dhambi, kwa maana watu fulani hawana maarifa ya kujua Mungu. Mimi ninanena kusukuma ninyi kwenye aibu.”—1 Wakorintho 15:32-34, NW.
13 Angalia jinsi Paulo anavyofika kwenye mzizi wa tatizo la Wakristo hao Wakorintho. Kufikiri kwao kwenye makosa kulitokana na ushirika mbaya. Sisi tunaweza kupata somo kutokana na jambo hili. Ikiwa sisi si waangalifu, tunaweza kuanza kufikiri kwamba inatupasa tuonje raha fulani zilizokatazwa kabla hatujazeeka mno tuwe hatuwezi kuzifurahia au kabla hatujafa. Ikiwa sisi tuna elekeo fulani la kufikiri kwa njia hii, inatupasa kubadili haraka njia yetu ya kufikiri. Jinsi gani? Kumbuka kwamba maoni haya ya ubinafsi yanapuuza viwango vya Mungu vya uadilifu. Yanaonyesha ukosefu wa imani katika ahadi za Mungu zilizo hakika, kutia na tumaini la ufufuo. Hata kutokana na maoni yanayofaa, wale wanaoishi maisha ya ufasiki wanajiletea wenyewe maumivu mengi ya moyoni na matata. Ili wapate maoni yenye kulengwa vizuri, wao wanahitaji ‘kuamka wawe na utimamu wa akili katika njia ya uadilifu.’ Wao hawawezi kufikiri kwa usahihi na utimamu ikiwa “hawana maarifa ya kujua Mungu.”
14. Ni nani ambao hawatarithi baraka za Ufalme wa Mungu, na hata hivyo Paulo alikiri nini juu ya maisha ya wakati uliopita ya watu fulani?
14 Mapema katika barua yake kwa Wakorintho, mtume Paulo alionyesha wazi kwamba waasherati, wazinzi, waabudu-sanamu, wagoni-jinsia-moja, wevi, watu wenye pupa, walevi, watukanaji, na wanyakuzi, wote hao wakiwa ni watu waliokuwa wengi sana katika Korintho, hawangekuwa sehemu ya Ufalme wa Mungu. Yeye aliongezea hivi: “Na bado hivyo ndivyo baadhi yenu ninyi mlikuwa. Lakini ninyi mmeoshwa kuwa safi, lakini ninyi mmetakaswa.” Kusafishilizwa kwao kwa njia hii kulionyesha nguvu ya Neno la Mungu na dhabihu ya ukombozi. (1 Wakorintho 6:9-11, NW) Kwa uhakika, kurudia ukosefu wa usafi wa ulimwengu wa zamani kungekuwa upumbavu mtupu!
15. Ni usemi gani wa wazi sana ambao Petro alitumia kueleza msimamo wa wale wanaorudi kwenye mazoea yenye kinyaa ya ulimwengu huu?
15 Petro alisema: “Kwa uhakika ikiwa, baada ya kuwa wameepuka kutoka kwenye machafuo ya ulimwengu kwa maarifa sahihi ya kujua Bwana na Mwokozi Yesu Kristo, wao wanapata kuhusika tena pamoja na mambo yaya haya yenyewe na kushindwa nguvu, hali za hatimaye zimekuwa mbaya zaidi kwao kuliko zile za kwanza. Ule usemi wa ile mithali ya kweli umetukia kwao: ‘Mbwa amerudi kwenye matapiko yake mwenyewe, na nguruwe aliyeogeshwa kwenye kugaa-gaa katika matope.’” (2 Petro 2:20, 22, NW) Lo! ni usemi thabiti! Hata hivyo, maneno yenye kujaa kani yanahitajiwa kabisa nyakati nyingine ili kukaza juu yetu uzito wa shauri lenye kutolewa. Onyo hili walilopewa Wakristo katika karne ya kwanza linafaa hata zaidi kwetu leo.
Sisi Tunavuna Kile Ambacho Sisi Tunapanda
16. Ni katika njia gani mbalimbali mtu ‘anavuna kile anachopanda’ wakati anapoishi maisha ya ufasiki?
16 Wakristo wanaona uthibitisho kila mahali panapowazunguka kwamba maisha ya ufasiki wa kukosa adili ya ulimwengu huu ni yenye madhara, ya kuua. (Warumi 1:18-32) Katika eneo la mambo ya ngono tu, fikiria umivu la moyo na mtaabiko unaotokea wakati kunapokuwa hakuna staha kwa sheria ya Mungu juu ya maadili: jamaa zilizovunjika, mimba za haramu, visa vya kutoa mimba, kunajisiwa, ushikashikaji wa uchi wa watoto, na magonjwa yenye kuambukizwa kingono, kuorodhesha mambo machache tu. Halafu kuna yale matatizo ya kiafya yanayokuja wakati mwili unapotumiwa vibaya kwa kula na kunywa kupita kiasi, na kutumia dawa za kulevya kwa ajili ya msisimuko tu. Kuiachia nafasi pupa kunatokeza mara nyingi wivi na upunjaji. Ni vigumu kuwa na uvunjaji wo wote wa sheria ya Mungu usiotokeza dhara fulani la kimwili au la hisia-moyo kwa mvunjaji. Ni kama vile mtume Paulo alivyokumbusha Wakristo: “Msiongozwe vibaya: Mungu si mmoja wa kudhihakiwa. Kwa maana cho chote ambacho mtu anapanda, hiki ndicho yeye atavuna; kwa sababu yeye ambaye anapanda kwa kulingana na mnofu wake atavuna ufisadi kutokana na mnofu wake, lakini yeye ambaye anapanda kwa kulingana na roho atavuna uhai wa milele kutokana na roho.”—Wagalatia 6:7, 8, NW.
17. Kwa nini Mkristo anapaswa kusukumwa kuishi kulingana na viwango vya Mungu vya uadilifu?
17 Kwa upande ule mwingine, sababu ambazo Maandiko yanatoa za kushika viwango vya Mungu ni zenye nguvu kama nini. Ni kweli kama nini vile Neno la Mungu linavyosema: “Mtu wa vitendo vyenye imani atapata baraka nyingi!” (Mithali 28:20, NW) Wale wanaokirihi mwendo wenye aibu wa ulimwengu huu wanaepuka yale matokeo mabaya sana ya maisha ya ufasiki. Wao wanafurahia uhusiano safi pamoja na ndugu na dada zao, na pamoja na Mungu wao, Yehova. Waaidha, wao wana tumaini zuri ajabu la kupokea zawadi ya uhai wa milele katika ulimwengu mpya wa Mungu. Kwa kuwa sasa tumesonga ndani sana katika mwisho wa huu mfumo wa mambo, wale wa “kondoo wengine” hata wana lile tumaini la pekee la kuishi kuipita “dhiki kubwa” na wasife hata kidogo. Wao wana imani isiyo na mashaka ya kwamba, ikiwa kifo kinakuja kabla ya wakati huo, Mungu anaahidi kuwafufua wote wale walio katika makaburi ya ukumbusho. (Yohana 5:28, 29; 10:16; Ufunuo 7:14, NW) Kwa sababu ya yote haya, kwa nini mtu ye yote awe hata na kiwazo cha muda mfupi tu cha kujihusisha ndani ya mazoea ya kukirihisha ya ulimwengu huu?—Warumi 6:19-23; 1 Petro 4:1-3, NW.
18. (a) Ni jinsi gani Yehova ataonyesha kwenye dhiki kubwa hukumu yake dhidi ya “watu wasiotii Mungu”? (b) Kwa habari ya hukumu, Yehova anajieleza jinsi gani katika maneno yake ya mwisho yaliyoandikwa katika kumbukumbu ya Biblia?
18 Biblia inaonyesha wazi kwamba sisi tunaishi katika sehemu ya hatimaye ya ule ambao inauita “umalizio wa mfumo wa mambo.” (Mathayo 24:3, NW) Petro alisema “mbingu na dunia ambayo sasa ipo zimewekwa akibani kwa ajili ya moto na zinahifadhiwa mpaka kwenye ile siku ya hukumu na ya uharibifu wa watu wasiotii Mungu.” (2 Petro 3:7, NW) Wakati itakapotukia siku hii ya mhesabiano iliyongojewa kwa muda mrefu, lile dai la kwamba mwanadamu anaweza kutenda bila kumtegemea Mungu na kwamba njia yake ya kujiendesha kwa ukosefu wa adili na kwa jeuri ni zao la mageuzi tu, litatokomea kama moshi. (Wakolosai 3:5, 6) Sikiliza jinsi Mungu mwenyewe anavyoeleza, katika maneno yake ya mwisho yaliyoandikwa katika kumbukumbu ya Biblia, tokeo kwa wale wanaomtumikia yeye na kwa wale wasiomtumikia: “Tazama! Mimi ninakuja haraka, na thawabu ambayo mimi natoa ipo pamoja na mimi, kutolea kila mmoja kama kazi yake ilivyo. . . . Wenye furaha ni wale ambao wanaosha kanzu zao, kwamba mamlaka ya kwenda kwenye ile miti ya uhai ipate kuwa yao na kwamba wao wapate kuwa na mwingio ndani ya lile jiji kwa kupita kwenye malango yalo. Nje wako mbwa na wale ambao wanazoea uwasiliano na ulimwengu wa roho na waasherati na wauaji na waabudu-sanamu na kila mmoja anayependa na kuendesha uwongo.”—Ufunuo 22:12-15, NW.
19. Azimio letu linapasa kuwa nini tunapoelekeana na wakati ujao?
19 Kadiri ukosefu wa adili wa ulimwengu huu unapozidi kuwa mbaya, azimia kwa uthabiti kumfurahisha Yehova kwa kufanya yaliyo safi ya kuheshimika, na yanayofaa. Endelea kujitahidi kuifikia zawadi ya uhai. Kataa kufyonzwa ndani ya “dimbwi la chini la ufasiki” la ulimwengu huu, ambalo ni shimo la kifo. Wewe unaweza kushinda lile pigano dhidi ya fikira za ufasiki ikiwa unakirihi kabisa mwendo wenye aibu wa ulimwengu huu!
Wewe Ungejibu Jinsi Gani?
◻ Kwa nini kuna hatari ya kuhusika ndani ya mazoea yenye aibu ya ulimwengu huu?
◻ Kwa nini sisi tunahitaji kuwa waangalifu sana katika kuchagua vitumbuizo?
◻ Ni njia gani hatari ya kufikiri inayoweza kutuvuta kwa urahisi tukishirikiana na Waepikureo wa ki-siku-hizi?
◻ Hukumu ya Yehova ni nini dhidi ya wale ambao bila kutubu wanageukia mwendo wenye aibu wa ulimwengu huu?
◻ Ni baraka gani zilizoko mbele kwa ajili ya wale wanaoendelea kuwa huru na mwenendo wa kukirihika wa ulimwengu huu?
[Picha katika ukurasa wa 16, 17]
Kukirihi kabisa mwendo wenye aibu wa ulimwengu huu kutasaidia watumishi wa Mungu wapate mwingio ndani ya ulimwengu mpya wa uadilifu
[Picha katika ukurasa wa 18]
Vitumbuizo vya ulimwengu vyenye aibu vinaweza kutega Mkristo asiye chonjo