Pindua Kila Wazo Ambalo Ni Kinyume cha Ujuzi wa Mungu!

 1. Mtume Paulo aliwaandikia Wakristo watiwa-mafuta onyo gani?

“ACHENI,” mtume Paulo akaonya. Acheni nini? “Acheni kufinyangwa na mfumo huu wa mambo.” (Rom. 12:2) Paulo aliwaambia maneno hayo Wakristo wa karne ya kwanza. Kwa nini aliwapa onyo kali hivyo wanaume na wanawake waliokuwa wamejiweka wakfu kwa Mungu na kutiwa mafuta kwa roho takatifu?​—Rom. 1:7.

2-3. Shetani hujaribu jinsi gani kutufanya tumwache Yehova, lakini tunaweza kung’oa jinsi gani mambo yaliyokita mizizi akilini mwetu?

² Paulo alitoa onyo hilo kwa sababu baadhi ya Wakristo walikuwa wakiathiriwa na mawazo yasiyofaa na falsafa zilizoendelezwa na ulimwengu wa Shetani. (Efe. 4:17-19) Yeyote miongoni mwetu anaweza kuathiriwa na mambo hayo. Katika jitihada zake za kufa na kupona za kutufanya tumwache Yehova, Shetani, mungu wa mfumo huu wa mambo, hutumia mbinu mbalimbali. Kwa mfano, anaweza kutumia mwelekeo wowote tulio nao wa kutamani kuwa mashuhuri au kuonekana kuwa watu muhimu. Huenda hata akatumia malezi yetu, utamaduni wetu, au elimu yetu ili kupotosha njia yetu ya kufikiri.

³ Je, tunaweza kung’oa mambo yaliyokita mizizi akilini mwetu, yaliyo kama “ngome zenye nguvu”? (2 Kor. 10:4) Ona jibu la mtume Paulo: “Tunapindua mawazo na kila jambo lililo juu sana ambalo limeinuliwa kinyume cha ujuzi wa Mungu, nasi tunaiteka kila fikira ili kuifanya imtii Kristo.” (2 Kor. 10:5) Naam, kwa msaada wa Yehova tunaweza kupindua mawazo yasiyofaa. Kama tu dawa inavyoweza kuondoa madhara ya sumu, Neno la Mungu linaweza kuondoa madhara yenye sumu ya ulimwengu wa Shetani.

 4. Ni mabadiliko gani ambayo wengi wetu tulihitaji kufanya tulipokubali kweli?

⁴ Fikiria kuhusu mabadiliko uliyohitaji kufanya ulipokubali kweli ya Neno la Mungu na kuamua kumtumikia Yehova. Kwa wengi wetu, hilo lilihusisha kuacha mwenendo fulani usiofaa. (1 Kor. 6:9-11) Tunamshukuru sana Yehova kwa kutusaidia kushinda mazoea hayo mabaya!

 5. Ni mambo gani mawili yanayotajwa kwenye Waroma 12:2?

⁵ Hata hivyo, hatupaswi kamwe kuhisi kwamba hatuhitaji kuendelea kufanya mabadiliko. Ingawa tuliacha kufanya dhambi nzito tulizokuwa tukifanya kabla ya kubatizwa, bado tunahitaji kuendelea kujitahidi kuepuka jambo lolote linaloweza kutushawishi kurudia matendo yetu ya awali. Tunawezaje kufanya hivyo? Paulo anaeleza hivi: “Acheni kufinyangwa na mfumo huu wa mambo, bali mgeuzwe kwa kufanya upya akili yenu.” (Rom. 12:2) Hivyo, ni lazima tufanye mambo mawili. Kwanza, tunahitaji ‘kuacha kufinyangwa,’ au kuongozwa na ulimwengu huu. Pili, tunahitaji ‘kugeuzwa’ kwa kufanya upya akili yetu.

 6. Tunajifunza nini kutokana na wazo linalopatikana katika maneno ya Yesu kwenye Mathayo 12:43-45?

⁶ Kugeuzwa ambako Paulo alikuwa akizungumzia kunahusisha mengi zaidi ya kubadili mwonekano wetu wa nje. Kunahusisha kila sehemu ya utu wetu. (Tazama sanduku, “Ni Kugeuzwa au Ni Kujifanya?”) Tunahitaji kufanya upya akili yetu, yaani, mitazamo yetu ya ndani kabisa, hisia zetu, na mielekeo yetu. Hivyo, kila mmoja wetu anahitaji kujiuliza, ‘Je, mabadiliko ninayofanya ili niwe Mkristo ni ya kijuujuu tu, au ninajitahidi kuyafanya yapenye na kufika ndani kabisa ya utu wangu?’ Ni muhimu tujue tofauti kati ya mambo hayo mawili. Maneno ya Yesu kwenye Mathayo 12:43-45, yanaonyesha jambo tunalohitaji kufanya. (Soma.) Wazo tunalopata kutokana na maneno hayo linakazia ukweli huu muhimu: Haitoshi tu kuondoa mawazo yasiyofaa akilini mwetu; tunahitaji pia kujaza pengo hilo mawazo yanayompendeza Mungu.

 7. Tunawezaje kubadili jinsi tulivyo kwa ndani?

⁷ Je, inawezekana kubadili mielekeo yetu ya asili au kubadili jinsi tulivyo hasa kwa ndani? Neno la Mungu linajibu hivi: “Mnapaswa kuendelea kufanywa upya katika nguvu zinazoongoza akili zenu, na mnapaswa kuvaa utu mpya ulioumbwa kupatana na mapenzi ya Mungu katika uadilifu wa kweli na ushikamanifu.” (Efe. 4:23, 24) Ndiyo, inawezekana kubadili jinsi tulivyo kwa ndani, lakini si rahisi kufanya hivyo. Tunahitaji kufanya mengi zaidi kuliko tu kudhibiti tamaa na matendo yasiyofaa. Tunahitaji kubadili “nguvu zinazoongoza akili” yetu. Hilo linahusisha kubadili tamaa, mielekeo, na nia yetu. Kufanya hivyo kunahitaji jitihada za kuendelea.

8-9. Kisa cha ndugu mmoja kinakaziaje umuhimu wa kubadili jinsi tulivyo kwa ndani?

⁸ Acheni tuchunguze mfano wa ndugu mmoja ambaye hapo awali alikuwa mgomvi na alipenda kupigana. Alipoacha kunywa pombe na kupigana, alistahili kubatizwa, jambo lililotoa ushahidi mzuri sana katika ujirani alioishi. Lakini jioni moja, muda mfupi baada ya kubatizwa, alijaribiwa kwa njia ambayo hakutazamia. Mwanamume fulani mlevi alikuja nyumbani kwake na alitaka kupigana naye. Mwanzoni ndugu huyo alitamani kumpiga lakini alijizuia. Lakini mwanamume huyo alipolikufuru jina la Yehova, ndugu yetu aliyekuwa amebatizwa karibuni alishindwa kujizuia. Alitoka nje na kumpiga mwanamume huyo. Tatizo lilikuwa wapi? Ingawa kujifunza Biblia kulikuwa kumemsaidia kudhibiti mielekeo yake ya hasira, ndugu huyo hakuwa amebadili nguvu zinazoongoza akili yake. Kwa maneno mengine, hakuwa amebadili jinsi alivyo hasa kwa ndani.

⁹ Hata hivyo, ndugu yetu hakukata tamaa. (Met. 24:16) Kwa msaada wa wazee, aliendelea kufanya maendeleo. Hatimaye, alistahili kuwa mzee wa kutaniko. Kisha jioni moja, nje tu ya Jumba la Ufalme, alikabili moja kwa moja jaribu linalofanana na lile alilokuwa amekabili miaka kadhaa iliyopita. Mwanamume fulani mlevi alitaka kumpiga mzee mmoja wa kutaniko. Ndugu yetu alifanya nini? Kwa utulivu na upole, alizungumza na mwanamume huyo mlevi, akatuliza hali, na akamsaidia kufika nyumbani. Ni nini kilichomsaidia ndugu yetu kutenda kwa njia tofauti? Alikuwa amebadili nguvu zinazoongoza akili yake. Alikuwa amegeuza utu wake wa ndani kabisa akawa mpenda amani na mnyenyekevu, jambo lililomtukuza Yehova!

10. Ni nini kinachohusika ili tufanye mabadiliko yanayohitajika?

¹⁰ Mabadiliko hayo hayatendeki ghafla; wala hayatokei kimuujiza. Huenda tukahitaji ‘kujitahidi kabisa’ kwa kipindi cha miaka mingi. (2 Pet. 1:5) Mabadiliko hayo hayaji eti kwa kuwa tumekuwa “katika kweli” kwa muda mrefu. Tunahitaji kufanya yote tuwezayo ili kubadili jinsi tulivyo kwa ndani. Kuna hatua kadhaa za msingi zinazoweza kutusaidia kufanya mabadiliko hayo. Acheni tuchunguze baadhi ya hatua hizo.

11. Sala hutusaidiaje kubadili nguvu zinazoongoza akili yetu?

¹¹ Sala ndiyo hatua ya kwanza muhimu tunayopaswa kuchukua. Tunahitaji kusali kama mtunga zaburi alivyosali aliposema: “Umba moyo safi ndani yangu, Ee Mungu, na uweke roho mpya ndani yangu, iliyo imara.” (Zab. 51:10) Ni lazima tutambue kwamba tunahitaji kubadili nguvu zinazoongoza akili yetu na tumwombe Yehova atusaidie. Kwa nini tunaweza kuwa na uhakika kwamba Yehova atatusaidia tufanye mabadiliko yanayohitajika? Ahadi ya Yehova kuhusu Waisraeli waliokuwa na moyo mgumu inaweza kututia moyo. Alisema hivi: “Nitawapa moyo wenye umoja, nami nitatia roho mpya ndani yao . . . na kuwapa moyo wa nyama, [yaani, moyo ulio mwepesi kutii mwongozo wa Mungu].” (Eze. 11:19; maelezo ya chini) Yehova alikuwa tayari kuwasaidia Waisraeli hao wabadilike, na yuko tayari kutusaidia sisi pia.

12-13. (a) Kulingana na Zaburi 119:59, tunahitaji kutafakari kuhusu nini? (b) Unapaswa kujiuliza maswali gani?

¹² Kutafakari ndiyo hatua ya pili muhimu. Tunapochunguza Neno la Mungu kila siku, tunahitaji kutenga wakati wa kutafakari, au kufikiria kwa kina ni mawazo na hisia gani tunazohitaji kubadili. (Soma Zaburi 119:59; Ebr. 4:12; Yak. 1:25) Ni lazima tutambue mawazo na hisia zozote tulizo nazo zinazotokana na falsafa za wanadamu. Tunahitaji kukubali kwa unyoofu kwamba tuna udhaifu fulani na kisha tujitahidi sana kuuondoa.

¹³ Kwa mfano, jiulize hivi: ‘Je, nina hisia zozote za wivu, hata kama ni kwa kiwango kidogo sana?’ (1 Pet. 2:1) ‘Je, nina hisia zozote za kujiona kuwa bora kuliko wengine kwa sababu ya malezi yangu, elimu, au uwezo wangu wa kifedha?’ (Met. 16:5) ‘Je, ninawadharau wengine kwa kuwa hawana vitu nilivyo navyo au kwa kuwa wametoka katika jamii tofauti na yangu?’ (Yak. 2:2-4) ‘Je, ninavutiwa na vitu vilivyo katika ulimwengu wa Shetani?’ (1 Yoh. 2:15-17) ‘Je, ninavutiwa na burudani zenye upotovu wa maadili na ukatili au jeuri?’ (Zab. 97:10; 101:3; Amo. 5:15) Kujiuliza maswali hayo kibinafsi kutakusaidia kuona mambo unayohitaji kurekebisha. Tutakapofanikiwa kushinda mawazo na hisia za moyo wetu zilizo kama “ngome zenye nguvu,” tutamfurahisha Baba yetu wa mbinguni.​—Zab. 19:14.

14. Kwa nini ni muhimu sana kuchagua marafiki wazuri?

¹⁴ Kuchagua marafiki wazuri ndiyo hatua ya tatu muhimu tunayopaswa kuchukua. Iwe tunatambua au la, sisi huathiriwa sana na watu tunaoshirikiana nao. (Met. 13:20) Tunapokuwa kazini au shuleni, mara nyingi tumezungukwa na watu ambao hawawezi kutusaidia kusitawisha njia ya Mungu ya kufikiri. Hata hivyo, tunaweza kupata marafiki bora katika mikutano yetu ya Kikristo. Hapo ndipo tunapoweza kuchochewa au kuhimizwa, katika “upendo na matendo mazuri.”​—Ebr. 10:24, 25, maelezo ya chini.

15-16. Shetani hujaribu kubadili njia yetu ya kufikiri jinsi gani?

¹⁵ Kumbuka kwamba Shetani ameazimia kubadili njia yetu ya kufikiri. Anatumia kila aina ya mafundisho au mawazo ili kuvuruga njia ya kufikiri tuliyositawisha kupitia kweli ya Neno la Mungu.

¹⁶ Shetani bado anaendelea kuuliza swali lilelile alilomuuliza Hawa katika bustani ya Edeni: “Je, ni kweli kwamba Mungu alisema . . . ?” (Mwa. 3:1) Katika ulimwengu huu unaoongozwa na Shetani, mara nyingi sisi husikia maswali yanayoweza kutufanya tuwe na shaka, kama vile: ‘Je, ni kweli kwamba Mungu anakataa ndoa kati ya watu wa jinsia moja? Je, ni kweli kwamba Mungu hataki usherehekee Krismasi na sikukuu za kuzaliwa? Je, ni kweli kwamba Mungu wenu hataki mtiwe damu mishipani? Je, ni kweli kwamba Mungu mwenye upendo hataki ushirikiane na wapendwa wako waliotengwa na ushirika?’

17. Tunapaswa kufanya nini iwapo tuna maswali yanayofanya tutilie shaka mambo tunayoamini, na tutapata matokeo gani kama inavyotajwa kwenye Wakolosai 2:6, 7?

¹⁷ Tunapaswa kusadiki kabisa kwamba mambo tunayoamini ni ya kweli. Tusiposhughulikia maswali yoyote yenye kutatanisha yanayotusumbua, tunaweza kuanza kutilia shaka mambo tunayoamini. Hatimaye, shaka hizo zinaweza kupotosha njia yetu ya kufikiri na kufanya tupoteze imani yetu. Hivyo basi, tunahitaji kufanya nini? Neno la Mungu linatuambia tugeuze akili zetu, ili tujihakikishie wenyewe “mapenzi ya Mungu yaliyo mema na yenye kukubalika na makamilifu.” (Rom. 12:2) Ikiwa tutajifunza Biblia kwa ukawaida, tutajithibitishia wenyewe kweli tulizojifunza katika Biblia. Tutasadiki kikamili kwamba viwango vya Yehova ni sahihi. Kisha tutakuwa kama mti wenye mizizi imara, mizizi iliyokita kabisa, naam, tutakuwa ‘imara katika imani.’​—Soma Wakolosai 2:6, 7.

18. Ni nini kitakachotusaidia kuondoa madhara yenye sumu ya ulimwengu wa Shetani?

¹⁸ Hakuna mtu anayeweza kuimarisha imani yako kwa niaba yako, kwa hiyo endelea kufanywa upya katika nguvu zinazoongoza akili yako. Sali kwa ukawaida; msihi Yehova akupatie roho yake takatifu. Tafakari kwa kina; endelea kuchunguza njia yako ya kufikiri na nia yako. Tafuta marafiki wazuri; shirikiana na watu watakaokusaidia ugeuze njia yako ya kufikiri. Ukifanya hivyo, utaondoa madhara yenye sumu ya ulimwengu wa Shetani na kufanikiwa kupindua “mawazo na kila jambo lililo juu sana ambalo limeinuliwa kinyume cha ujuzi wa Mungu.”​—2 Kor. 10:5.