Sura 14

Kuiheshimu Zawadi ya Uhai

1, 2. Kwa sababu gani inatupasa tuonyeshe heshima yenye kina kirefu kwa zawadi ya uhai?

HESHIMA yenye kina kirefu kwa zawadi ya uhai ni msingi wa amani na usalama wa kweli. Lakini inasikitisha kwa kuwa kuna ukosefu mwingi wa heshima hiyo leo. Wanadamu wamekuwa mafundi wa kutwaa uhai kwa kuua, lakini hapana mwanadamu awezaye kurudisha uhai mara utowekapo.

² Yehova Mungu, Mpaji-uzima, anaona kuheshimu uhai kuwa wajibu mtakatifu. Mtunga zaburi alisema hivi juu yake: “Maana kwako Wewe iko chemchemi ya uzima.” (Zaburi 36:9) Sisi tunawiwa naye uhai wetu, si kwa sababu tu yeye ndiye aliyemwumba mwanadamu, bali pia kwa sababu amewaruhusu wanadamu waendelee kuwapo mpaka sasa naye ameiandaa njia ya kuendeleza uhai. (Matendo 14:16, 17) Zaidi ya hilo, amemfanya Mwanaye awe Mnunua-upya, au Mkombozi, wa jamaa ya kibinadamu, akiinunua kwa damu ya uhai wake. (Warumi 5:6-8; Waefeso 1:7) Matokeo ni kwamba, sasa yeye anawatolea wote watakaoikubali nafasi ya kuishi milele katika Mfumo Mpya wake wenye uadilifu. Kwa sababu ya hayo yote, tunaweza kuonyeshaje heshima yetu yenye kina kirefu na uthamini kwa zawadi ya Mungu ya uhai?

3. Kutazama jeuri ili kujitumbuiza kuna matokeo gani juu ya mwelekeo wa mtu kuhusu uhai?

³ Kwanza, ikiwa sisi tunalichukua kwa uzito jambo la kuheshimu uhai, hatutajiunga na wale wanaolisha akili zao vitumbuizo vinavyokazia jeuri, kwa sababu tu ya kujistarehesha. Kukubali jeuri kama “yenye kutumbuiza” kumefanya wengi wawe wagumu na wasiosikitikia kutaabika kwa wanadamu na kupotezwa kwa uhai. Lakini ikiwa sisi tu wenye shukrani kwa ajili ya wema wa Mungu na tumaini analolitoa, tutapinga sana roho hiyo. Tutasitawisha uthamini kwa uhai kama zawadi kutoka kwa Mungu. Hiyo itahusu namna tunavyotumia maisha zetu wenyewe, namna tunavyotendea watu wale wengine, hata namna tunavyowaona wale ambao hawajazaliwa bado.

Kuuheshimu Uhai wa Wasiozaliwa

4. (a) Ni wakati gani uhai unapopitishwa kwa watoto wa mtu? (b) Ni nini kinachoonyesha kama Mungu anapendezwa na uhai wa kibinadamu kabla ya kuzaliwa?

⁴ Uwezo wa kupitisha uhai ni pendeleo kubwa, lililotolewa kimungu. Uhai huo unapitishwa wakati wa kuchukua mimba, si wakati wa kuzaa. Kama vile Encyclopædia Britannica kinavyosema, wakati huo ndipo “inapoanza historia ya maisha ya mtu mwenyewe, akiwa kipumuaji kilicho tofauti na mtu mwingineye yote na chenye uhai.” Vilevile kinasema hivi: “Mtu mpya anaumbwa wakati umajimaji wa shahawa yenye nguvu unaungana na yai lililo na utayari wa kuchukua mimba.”⁶⁰ Vivyo hivyo, kupendezwa kwa Mungu na uhai wa kibinadamu kunaanza kabla ya kuzaliwa. Mtunga zaburi Daudi aliandika, akimwambia Mungu hivi: “Uliniweka nimefichwa katika tumbo la mama yangu. . . . Macho yako yaliona hata kiinitete cha mimi, na katika kitabu chako sehemu zake zote zilikuwa zimewekwa katika mwandiko.”—Zaburi 139:13-16, NW; Mhubiri 11:5.

5. Kwa nini sababu za ubishi zinazotolewa katika jitihada ya kutetea kutoa mimba hazifai?

⁵ Uhai wa mamilioni ya watoto wasiozaliwa unakomeshwa makusudi kwa kutoa mimba kila mwaka. Je! jambo hilo linafaa kiadili? Wengine wanabisha kwamba mtoto asiyezaliwa hafahamu uhai ni nini naye hawezi kuishi akiwa peke yake nje ya tumbo la uzazi. Lakini hivyo ndivyo ilivyo hasa hata kwa mtoto ambaye ndipo tu amezaliwa. Wakati wa kuzaliwa hafahamu maana ya uhai, wala hawezi kuendelea kuishi bila kutunzwa daima. Chembe yenye uhai inayofanyizwa wakati wa kuchukua mimba huwa mtoto kama huyo isipozuiliwa. Kwa hiyo ikiwa kuua uhai wa mtoto ambaye ndipo tu amezaliwa kunaonwa kuwa uhalifu karibu kila mahali, na jitihada kubwa zinafanywa ili kuokoa hata watoto wanaozaliwa kabla ya wakati wao, mbona basi usionwe kuwa uhalifu kuua uhai wa mtoto asiyezaliwa? Mbona uhai uonwe kuwa mtakatifu baada tu ya kutoka katika tumbo la uzazi na si wakati unapokuwa ndani ya tumbo la uzazi pia?

6. Biblia inaonyeshaje maoni ya Mungu juu ya kuua kwa makusudi uhai wa mtoto asiyezaliwa?

⁶ Jambo la maana si vile tu wanadamu wanavyoona mambo bali vile Mungu, Mpaji-uzima, anavyosema. Uhai wa mtoto asiyezaliwa ni wenye thamani nyingi kwa Yehova, wala si wa kuchezewa-chezewa. Yeye aliwapa Israeli wa kale sheria yenye kusema waziwazi kwamba uhai huo ulindwe. Ikiwa mwanamke mwenye mimba aliumizwa au mimba ikaharibika wakati wanaume wawili walipokuwa wakipigana, sheria hiyo iliweka adhabu zilizopasa kufuatiliwa sana. (Kutoka 21:22, 23) Kutwaa uhai wa mtoto asiyezaliwa kwa makusudi lingekuwa kosa zito hata zaidi. Kulingana na sheria ya Mungu, mtu ye yote aliyetwaa uhai wa kibinadamu kwa makusudi alipaswa kuhukumiwa kufa akiwa mwuaji. (Hesabu 35:30, 31) Mungu angali anauheshimu sana uhai mpaka sasa.

7. Tunalindwa dhidi ya nini wakati tunapoheshimu mapenzi ya Mungu juu ya uhai wa mtoto asiyezaliwa?

⁷ Kuwa na heshima yenye kina kirefu kwa mapenzi ya Mungu juu ya uhai wa mtoto asiyezaliwa kunaleta manufaa kweli kweli. Kwa kufanya wazazi wawe wenye daraka kamili juu ya uhai huo, Yehova anaandaa hatamu ya kuzuia ngono za ovyo-ovyo pamoja na matokeo yote mabaya yazo. Hayo ni kutia magonjwa yanayopitishwa kwa njia ya kufanya ngono, mimba zisizotakwa, watoto wa haramu, jamaa zilizogawanyika, na hangaiko la dhamiri chafu. Hivyo, heshima kwa uhai inaweza kushiriki kuleta amani ya kijamaa sasa na ni jambo la maana katika kupata kwetu baraka za wakati ujao.

Kuuheshimu Uhai Wako Mwenyewe

8. Kwa sababu gani imetupasa tuonyeshe heshima kwa mapenzi ya Mungu kwa namna tunavyoitendea miili yetu wenyewe?

⁸ Namna gani juu ya tunavyoutumia uhai wetu wenyewe? Watu wengi wanasema: ‘Mimi sikuchagua nizaliwe. Kwa hiyo ni juu yangu kujua ninavyoutumia uhai wangu. Mimi nitafanya lo lote lile nitakalo.’ Lakini je! ni lazima zawadi iombwe ili mpokeaji aithamini? Bila shaka uhai wenyewe ni mzuri. Ni kutokamilika kwa kibinadamu na madhara tu yanayofanya maisha yasiwe yenye kufurahisha. Yehova Mungu siye wa kulaumiwa kwa jambo hilo. Naye anaahidi kurekebisha hilo kwa serikali yake ya Ufalme. Kwa hiyo, inatupasa tuishi uhai anaotupa kwa njia inayoonyesha heshima kwa mapenzi na kusudi lake.—Warumi 12:1.

9. Biblia inasema nini juu ya ulafi na ulevi?

⁹ Njia moja tunavyoweza kuonyesha uthamini huo ni kwa kula na kunywa kwa kiasi. Ulafi na ulevi vinakatazwa na Mungu. (Mithali 23:20, 21) Pia, kama vile kula kwa kiasi kunavyofaa, ndivyo na vileo vikitumiwa kwa kiasi. Hiyo inaonyeshwa na maandiko mengi.—Kumbukumbu 14:26; Isaya 25:6; Luka 7:33, 34; 1 Timotheo 5:23.

10. (a) Mlevi anaonyeshaje dharau kwa uhai? (b) Kama inavyoonyeshwa kwenye 1 Wakorintho 6:9, 10, kwa sababu gani ni jambo la maana kuepuka ulevi?

¹⁰ Kwa hiyo, kunywa vileo siko kunakokatazwa katika Biblia. Ni matumizi mabaya ya kileo. Nayo yanakatazwa kwa sababu nzuri, kwa maana yanaudhuru mwili, yanafanya wanywaji watende kipumbavu, na hata yanaweza kuwafanya wawe hatari kwa wengine. (Mithali 23:29-35; Waefeso 5:18) Katika United States pekee angalau watu milioni 10 wanataabishwa na uzoevu wa vileo tokeo moja likiwa ni vifo zaidi ya 30,000 kila mwaka kutokana na ugonjwa wa ini. Baraza la Kitaifa Kuhusiana na Uzoevu wa Vileo linasema: “Jumla ya gharama kwa taifa ni karibu dola bilioni 43 kwa mwaka kwa sababu ya watu kutokuwako kazini, kwa sababu ya huduma za afya na masilahi, uharibifu wa mali na gharama za kitiba. . . . Kati ya misiba yote ya kifo inayotukia barabarani leo, asilimia 50 inahusu vileo. Zaidi ya asilimia 80 ya vifo vya kuuawa na moto, asilimia 65 ya visa vya kufa majini, asilimia 22 ya misiba ya nyumbani, asilimia 77 ya maanguko, asilimia 36 ya misiba inayopata wanaotembea kwa miguu barabarani na asilimia 55 ya watu wenye kukamatwa inafungamanishwa na matumizi ya vileo. Kufikia asilimia 44 ya marubani wa ndege wanaohusika katika misiba wamekuwa wakinywa vileo. Tabia yenye jeuri inayohesabiwa kuwa inasababishwa na matumizi ya vileo inatokeza karibu asilimia 65 ya mauaji, asilimia 40 ya mashambulio, asilimia 35 ya visa vya kulalwa kinguvu, asilimia 30 ya uhalifu mwingine wa ngono, asilimia 30 ya visa vya kujiua, asilimia 55 ya mapigano au mashambulio katika nyumba na asilimia 60 ya visa vya kuwatenda watoto vibaya.”⁶¹ Hasara katika jamaa zilizogawanyika-gawanyika, maisha zilizoharibika na katika taabu ya kibinadamu haihesabiki. Hivyo, si ajabu kwamba Neno la Mungu linasema hivi: “Msidanganyike; waasherati hawataurithi ufalme wa Mungu, . . . wala walevi, wala watukanaji, wala wanyang’anyi.”—1 Wakorintho 6:9, 10.

11. Je! ni jambo la kiakili kujaribu kuepuka matatizo ya kibinafsi kwa kunywa vileo kupita kiasi?

¹¹ Kweli, watu wengine wanahuzunishwa sana na matokeo yenye kushusha moyo ya hali ya ulimwengu. Vita vyao, uhalifu, infleshoni, umaskini, na pia taabu na mikazo inayotokana na hali hiyo vinashiriki kuleta matatizo ya kibinafsi. Lakini hakuna faida ya kujaribu kuepuka mambo hayo kupitia unywaji wa kupita kiasi unaodhuru. Kufanya hivyo kunafanyiza matatizo zaidi tu kwa mtu mwenyewe na wengine, na katika muda huo kunaharibu heshima ya mtu, kusudi katika maisha, na msimamo pamoja na Mungu.

Matumizi ya Dawa za Kulevya

12. Kwa sababu gani watu wengi wanageukia dawa za kulevya?

¹² Wanapojaribu kuyaepuka matatizo ya maisha, watu wengi wamegeukia dawa za kulevya. Watumiaji wa dawa hizo wanajaribu kubadili uhakika wa kwamba maisha ni magumu kwa kujipatia hisia ya kuwazia-wazia mambo yasiyolingana na uhakika, au kujitia katika hali ya kuduwaza fikira. Wengi wanatumia dawa za kulevya zilizo kali sana kama vile heroini na kokeni. Wengine wanameza vibonge vingi sana vya dawa mbalimbali zenye kulevya. Maisha yao yanakuwa na matokeo gani?

13. Nyingine za dawa hizo zina matokeo gani juu ya mtumiaji, na Biblia inaonyaje juu yazo?

¹³ Kutumia kwao hizo dawa za kulevya kunawafanya wapoteze kujiweza, kukileta matokeo kama yale yanayoonekana katika mlevi. (Mithali 23:29-34) Na inakubaliwa na watu kwa ujumla kwamba hizo dawa za kulevya zinaweza kuwa zenye hatari. Kwa mfano, mjini New York, uzoevu wa heroini ndiyo sababu kubwa sana ya vifo miongoni mwa watu walio na umri kati ya miaka 18 na 35. Lo! ni dharau kubwa kama nini kwa zawadi ya uhai!

14, 15. Kwa sababu gani wale wanaovuta kasumba hawaonyeshi heshima kwa zawadi ya uhai?

¹⁴ Lakini namna gani matumizi ya ile dawa ya kulevya kasumba, isiyo kali kama hizo? Nayo vilevile yaweza kuwa yenye hatari kwa njia kadha. Watumiaji wa kasumba mara nyingi huenda wakafanywa watumie dawa kali zaidi kwa kukutana na wauzaji dawa za kulevya na watumiaji wengine. Pia, watu wengi ambao wamekuja kuitegemea dawa hiyo ya kulevya, wakidhani itawaondolea wasiwasi na mshuko wa moyo, wataelekea kutumia dawa za kulevya zilizo kali zaidi.

¹⁵ Lakini hata isipotukia hivyo, kuvuta kasumba ni hatari. Ina vichocheaji vingi vya ugonjwa wa kansa kuliko sigareti, nayo ina madhara mengi zaidi kwa mapafu. Matumizi yenye kuendelea yanaweza kusababisha madhara kwa ini, kasoro za vitabia vya urithi katika watoto, na madhara ya ubongo. Shirika la Uchunguzi wa Uzoevu la Kanada linasema kwamba kasumba “ni dawa ya kulevya yenye nguvu sana iliyo na hatari nyingi mbalimbali kwa afya.”⁶² Mstadi mmoja wa dawa za kulevya alisema: “Kasumba ni dawa ya kulevya yenye kudhuru sana. Kwa muda wa miaka 10 iliyopita karibu karatasi 10,000 zimechapishwa katika jumuiya ya wanasayansi zikiionyesha hatari ya kiafya.” Alitaja “hatari kuu iliyo kubwa sana katika vijana wenye kubalehe wanapojaribu kukumbuka mambo,” kwa maana inadhoofisha nguvu za kuhifadhi kumbukumbu akilini na uwezo wa kukaza fikira kwenye jambo bila kuwayawaya. Kuhusu mtumiaji wa kasumba, alisema: “Hawezi kuendesha gari vizuri au kutumia taipureta. Matumizi yenye kuendelea yanasababisha madhara kwa mfumo wa kinga ambao unazuia mwili usipatwe na ugonjwa.”⁶³ Wanawake wanaovuta kasumba wakati wa mimba wana hatari kubwa ya kuwa na watoto wenye madhara ya ubongo. Kwa sababu ya hayo yote, je! inaweza kusemwa kwamba kutumia kasumba kunaonyesha heshima kwa zawadi ya uhai?

16. Matumizi ya dawa za kulevya yanaweza kuweka mtu katika hatari gani nyingine, na hiyo inapasa kuwa na matokeo gani kuhusu maoni yetu juu ya jambo hilo?

¹⁶ Kuna sababu nyingine yenye nguvu ya kuepuka kutumia dawa za kulevya. Zinaweza kufungulia mtu njia ya kuja chini ya uongozi wa mashetani. Kuhusianishwa huku kwa dawa za kulevya na mafumbo ya nguvu zisizo za asili si jambo jipya. Wachawi nyakati zilizopita walitumia dawa za kulevya. Expository Dictionary of New Testament Words ya Vine kinasema hivi: “Katika uchawi, matumizi ya dawa za kulevya, ziwe zisizo kali au zenye nguvu, kwa ujumla yalifuatana na maneno ya kunuizia uchawi na maombi ya kuzisihi nguvu zisizo za asili.” Maelezo hayo yametolewa kuhusiana na neno la Kigiriki lililotafsiriwa “zoea la kuwasiliana na uliwengu wa roho” (phar·ma·kiʹa, kwa halisi “matumizi ya dawa za kulevya”) katika Wagalatia 5:20. (Ona pia Ufunuo 9:21; 18:23.) Kwa hiyo, dawa za kulevya zinaweza kuweka mtu katika hali ya kuongozwa na mashetani. Mtu ye yote aliye na heshima kwa Mpaji-uzima angewezaje kujiweka katika hatari hiyo kwa kutaka kufurahia hisia ya muda tu?

17, 18. (a) Ni matunda gani mengine mabaya yameshirikishwa na matumizi ya dawa za kulevya? (b) Kwa hiyo, Mashahidi wa Yehova Wakristo wanaonaje matumizi ya dawa za kulevya?

¹⁷ Kama ijulikanavyo sana, matumizi ya dawa za kulevya yanafungamanishwa kabisa na uhalifu na mvunjiko wa adili katika jamii. Mauzo haramu ya dawa za kulevya ni chanzo kikubwa cha mapato kwa uhalifu uliopangwa kitengenezo. Wazoevu wengi wa dawa za kulevya wanaiba ili waendeleze zoea lao. Wengine wanageukia umalaya. Jamaa zinatenganishwa wakati mshiriki mmoja anapokuwa mzoevu. Akina mama wenye mimba wanapitishia vitoto vyao vidogo uzoevu huo, ambavyo mara nyingine vinakufa kwa kupatwa na maumivu makali ya kuachishwa dawa hizo. Na katika nchi zilizo nyingi, kuwa na dawa hizo za kulevya na kuzitumia bila sababu za kitiba ni haramu.—Mathayo 22:17-21.

¹⁸ Je! wewe unataka kuhusika kwa njia yo yote na zoea linaloshirikishwa na matunda hayo yote mabaya? Mashahidi wa Yehova hawataki! Wao hawataki kuwa na sehemu yo yote ya matumizi ya dawa za kulevya ili wapate raha au waepuke magumu ya maisha. Wao wanaheshimu sana uhai na wanataka kuutumia kwa njia inayopatana na mapenzi ya Mungu.

Matumizi ya Tumbako na Bidhaa Zilizo Kama Hiyo

19. Kwa sababu gani heshima kwa zawadi ya uhai inahusika katika maoni ya mtu juu ya matumizi ya tumbako, popoo, majani ya mmea wa namna ya mtambuu, na miraa?

¹⁹ Yenye kuenea hata zaidi leo ni matumizi ya tumbako na, katika nchi nyingine, popoo na majani ya mmea wa namna ya mtambuu na miraa. Kila kimojapo kinadhuru mwili na, nyakati nyingine, akili. Serikali zimetoa maonyo ya kwamba tumbako inahusiana na magonjwa kama vile kansa ya mapafuni, maradhi ya moyo, kuwasha koo na kifua kwa muda mrefu, na kusakamwa kwa hewa katika sehemu za mwili. Je! kutumia bidhaa zenye kufanyiza mazoea mabaya na zenye kudhuru hivyo ni kuonyesha heshima kwa zawadi ya uhai?

20, 21. (a) Je! uhakika wa kwamba Biblia haikatazi tabia hizo kwa kuzitaja majina una maana ya kwamba zinafaa? (b) Ni kanuni gani za Biblia zinazoonyesha kwamba tabia hizo hazina nafasi katika maisha ya mtumishi wa Mungu?

²⁰ Huenda mtu akasema kwamba vitu hivyo vyote ni uumbaji wa Mungu. Hiyo ni kweli, lakini hata uyoga ni uumbaji wa Mungu. Hata hivyo namna fulani za uyoga ni zenye hatari zikiliwa. Huenda mwingine akasema kwamba Biblia haikatazi waziwazi tabia hizo. Sivyo, lakini kama vile tumeona, yako mambo mengi yasiyokatazwa waziwazi katika Biblia ambayo kwa wazi ni mabaya. Hakuna mahali po pote ambapo Biblia inakataza waziwazi kutumia ua wa nyuma wa nyumba ya jirani yako kama mahali pa kutupia takataka. Hata hivyo amri yayo ya ‘kumpenda jirani yako kama nafsi yako’ yapasa iwe inatosha kwa ye yote kati yetu kujua lingekuwa kosa sana kufanya hivyo. Vivyo hivyo, kuvuta sigareti kunaonyesha ukosefu wa upendo, kwa kuwa huenda moshi huo ukawaudhi wengine na hata kudhuru afya yao.—Mathayo 22:39.

²¹ Kwenye 2 Wakorintho 7:1 Neno la Mungu linatuambia “tujitakase nafsi zetu na uchafu wote wa mwili na roho, huku tukitimiza utakatifu katika kumcha Mungu.” Maana ya kitu kuwa ‘kitakatifu’ ni kuwa “safi, kisicho na madoa, kisichotiwa uchafu.” Yehova anajiweka safi asiwe na uchafu, bila ya kujishusha atende kwa njia isiyo takatifu. Kwa kufaa yeye anatutazamia tuendelee ‘kukamilisha utakatifu’ kwa kadiri sisi kama wanadamu tunavyoweza. (Warumi 12:1, NW) Pia, yeye anatutazamia ‘tumpende kwa moyo wetu wote, nafsi, akili na nguvu.’ Lakini mtu ye yote anawezaje kufanya hivyo ikiwa anajitia katika mazoea yanayouchafua mwili wake, kudhuru afya yake, na kufupiza maisha yake?—Marko 12:29, 30, NW.

22. Ni nini kinachoweza kusaidia mtu avunje tabia hiyo mbaya?

²² Ingawa huenda yo yote ya tabia hizo ikaonekana kama kwamba imemkaba sana mtu, anaweza kuishinda na kupata uhuru. Maarifa ya kumjua Mungu na makusudi yake yanaandaa msukumo wenye nguvu wa kufanya hivyo. Mtu anaweza ‘kufanywa mpya katika nguvu yenye kuendesha akili yake.’ (Waefeso 4:23, NW) Kufanya hivyo kutafungua njia mpya ya maisha inayotokeza uradhi wa kibinafsi na inayomheshimu Mungu.

Kuheshimu Uhai Kama Unavyowakilishwa na Damu

23. (a) Ni matumizi gani ya pekee ya damu ambayo Mungu aliyakubali katika sheria yake kwa Israeli? (b) Kwa sababu gani maana ya dhabihu hizo inapasa itufanye tuyaangalie sana mapenzi ya Mungu katika jambo hilo?

²³ Damu yetu, pia, inastahili kufikiriwa tunaposema juu ya uhai. Mungu ameichagua damu ya mwanadamu na ya wanyama pia iwe mfano wa uhai. Jambo hilo linaonekana wazi katika sheria aliyompa Noa na baadaye akalipa taifa la Israeli. Matumizi pekee ya damu yaliyokubaliwa wakati huo yalikuwa katika dhabihu. (Mwanzo 9:3, 4; Walawi 17:10-14) Dhabihu zote hizo zilifananisha dhabihu ile moja tu ya Yesu, ambayo kwayo aliimwaga damu ya uhai wake kwa ajili ya wanadamu. (Waebrania 9:11-14) Hilo peke yalo linapasa litufanye tuyaangalie sana mapenzi ya Mungu katika jambo hili.

24. Matendo 15:28, 29 linasema nini juu ya maoni ambayo Wakristo wanapaswa kuwa nayo juu ya matumizi ya damu?

²⁴ Je! kizuizi kilichowekwa na Mungu juu ya matumizi ya damu kingali kina uzito kwa Wakristo wa kweli? Ndiyo, kama inavoonyeshwa na taarifa rasmi ya mitume na wazee wengine wa kundi la Kikristo katika karne ya kwanza. Wakiwa chini ya mwongozo wa roho ya Mungu, waliandika hivi: “Roho takatifu na sisi wenyewe tumependelea tusiongeze mzigo zaidi kwenu ninyi, isipokuwa mambo haya ya lazima, kuendelea kushika mwiko wa vitu vinavyotolewa dhabihu kwa sanamu na wa damu na wa vitu vinavyonyongwa [na kwa hiyo, visivyoondolewa damu] na wa uasherati. Ikiwa kwa uangalifu mnajiepusha ninyi wenyewe na vitu hivyo, mtafanikiwa.”—Matendo 15:28, 29, NW.

25. Ni kwa mazoea gani ulimwengu unaonyesha dharau kwa mapenzi ya Mungu kuhusu matumizi ya damu?

²⁵ Watu wengi wanaonyesha dharau kwa mapenzi ya Mungu kuhusu damu. Wanaitumia katika chakula, kwa makusudi ya kitiba, hata katika bidhaa zao za kibiashara. Lakini hilo halipasi kutushangaza, kwa kuwa ulimwengu unadharau sana zawadi ya uhai wenyewe. Hata hivyo, ikiwa sisi tunathamini uhai na namna tulivyo na wajibu wa kumtolea Mungu hesabu, hatutayapuuza mapenzi yake na kumvunjia heshima kwa kuvunja amri zake.

26, 27. Kwa sababu gani jitihada za kuhifadhi uhai wa mtu wa sasa kwa kutokumtii Mungu zisingeonyesha heshima kwake?

²⁶ Hivyo, ingawa inatupasa tuhangaikie afya yetu na kujaribu kulinda uhai wetu, kuna mipaka fulani inayopasa kufuatwa. Yesu alionyesha wazi hilo aliposema hivi: “Yeye aipendaye nafsi yake [au, uhai] ataiangamiza; naye aichukiaye nafsi yake katika ulimwengu huu ataisalimisha hata uzima wa milele.”—Yohana 12:25.

²⁷ Ikiwa mtumishi wa Mungu atakufa akimtii Mungu au akose kufa asipomtii, yeye atapendelea kufa badala ya kutokutii. Kwa kutokumtii Mungu, Yesu mwenyewe angaliweza kuepuka kifo. Lakini yeye hakukiepuka. Na watu wengine kabla yake walikuwa wamekwisha kuonyesha hali isiyovunjika ya kujitolea Mungu. (Mathayo 26:38, 39, 51-54; Waebrania 11:32-38) Wao hawakuuacha uhai wao wa wakati huo uwazuie wasistahili kupata uzima wa milele.

28. Kwa kusitawisha uthamini kwa maoni ya Biblia juu ya uhai, sisi tunajitayarisha kwa ajili ya nini?

²⁸ Je! ndivyo na wewe unavyouona uhai? Je! unathamini kwamba ni lazima uishi kupatana na mapenzi ya Mungu ili maisha yawe yenye kusudi? Kusitawisha maoni hayo sasa ni sehemu ya kujitayarisha kwa ajili ya uzima katika Mfumo Mpya wa Mungu. Wakati huo tutahisi tukiwa na hifadhi na usalama kama nini, mahali po pote na wakati wo wote, tukijua kwamba wale wote watakaokuwa wakiishi duniani watakuwa na heshima ya kweli kwa zawadi ya Mungu ya uhai!