Simama Imara kwa Ajili ya Uhuru wa Kupewa na Mungu
“Kristo alitupa uhuru akataka tubaki huru. Basi simameni imara wala msikubali tena kuwa china ya nira ya utumwa.”—WAGALATIA 5:1, HNWW.
1, 2. Uhuru wa kupewa na Mungu ulipotezwaje?
WATU wa Yehova wako uhuru. Hawajaribu kujitegemea wenyewe bila Mungu, kwani hiyo ingemaanisha kuwa watumwa wa Shetani. Wao wanathamini uhusiano wao wa karibu pamoja na Yehova na hushangilia katika uhuru anaowapa.
2 Wazazi wetu wa kwanza, Adamu na Hawa, walipoteza uhuru wao wa kupewa na Mungu kwa kufanya dhambi na kuwa watumwa wa dhambi, kifo, na Ibilisi. (Mwanzo 3:1-19; Warumi 5:12) Kwani, Shetani aliuweka ulimwengu wote katika barabara ya dhambi kuelekea uharibifu! Lakini wale wanaosimama imara kwa ajili ya uhuru wa kupewa na Mungu hutembea katika barabara inayoelekea uhai wa milele.—Mathayo 7:13, 14; 1 Yohana 5:19.
Kuwekwa Huru na Utumwa
3. Mungu alitoa tumaini gani katika Edeni?
3 Yehova alikusudia kwamba wanadamu wanaoheshimu jina lake wangekuwa huru na utumwa kwa Shetani, dhambi, na kifo. Tumaini hilo lilitolewa wakati Mungu alipomwambia yule nyoka aliyetumiwa na Shetani katika Edeni: “Nitaweka uadui kati yako na huyo mwanamke, na kati ya uzao wako [mbegu yako, NW] na uzao wake [mbegu yake, NW]; huo utakuponda kichwa, na wewe utamponda kisigino.” (Mwanzo 3:14, 15) Yesu Kristo, ile Mbegu iliyotoka kwa tengenezo la Yehova la kimbingu, alipondwa kisigino wakati alipokufa kwenye mti, lakini kwa njia hiyo Yehova aliandaa dhabihu ya fidia ili kuweka huru ainabinadamu yenye kuamini kutoka dhambi na kifo. (Mathayo 20:28; Yohana 3:16) Baadaye, Yesu ataponda kichwa cha Shetani, yule Nyoka wa awali.—Ufunuo 12:9.
4. Ni uhuru gani ulioonewa shangwe na Abrahamu, na Yehova alimwahidi nini?
4 Miaka 2,000 hivi baada ya ile ahadi iliyopewa katika Edeni, Abrahamu “rafiki wa Mungu [Yehova, NW]” alimtii Mungu na kuondoka jiji la Uru kwenda mahali pengine. (Yakobo 2:23; Waebrania 11:8) Hivyo akapokea uhuru wa kupewa na Mungu na hakuishi tena akiwa mtumwa wa ulimwengu wa Shetani wa dini bandia, siasa zenye ufisidi, na ubiashara wenye pupa. Kwa ule unabii wa Kiedeni, Mungu aliongeza ahadi kwamba familia na mataifa yote yangejibariki yenyewe kupitia Abrahamu na Mbegu yake. (Mwanzo 12:3; 22:17, 18) Abrahamu alikuwa huru na lawama kwa sababu ‘alimwamini Yehova, aliyemhesabia jambo hili kuwa haki.’ (Mwanzo 15:6) Leo, uhusiano wa karibu pamoja na Yehova huleta vile vile uhuru wa kupewa na Mungu kutoka lawama na kutoka utumwa kwa ulimwengu ulio katika uweza wa Shetani.
Drama ya Ufananisho Yenye Kuvutia
5. Kuzaliwa kwa Isaka kulifungamana na hali zipi?
5 Ili iwezekane kwa Abrahamu kuwa na mbegu, mke wake tasa, Sara, alimtolea Abrahamu mjakazi wake, Hagari, kuwa mwenye kuzaa watoto. Kupitia Hagari, Abrahamu alimzaa Ishmaeli, lakini Mungu hakumchagua kuwa ndiye ile Mbegu iliyoahidiwa. Bali, Abrahamu alipokuwa mwenye umri wa miaka 100 na Sara akiwa na 90, Yehova aliwawezesha kupata mwana aitwaye Isaka. Ishmaeli alipomdhihaki Isaka, Hagari na mwana wake walifukuzwa, wakimwacha mwana wa Abrahamu wa yule mwanamke huru Sara kuwa mbegu ya Abrahamu isiyopingika. Kama Abrahamu, Isaka pia alizoea imani na kuonea shangwe uhuru wa kupewa na Mungu.—Mwanzo 16:1-16; 21:1-21; 25:5-11.
6, 7. Walimu bandia walikuwa wamewasadikisha baadhi ya Wakristo Wagalatia juu ya nini, lakini Paulo alieleza nini?
6 Matukio hayo yalikuwa kivuli cha mambo yenye maana sana kwa wapendao uhuru wa kupewa na Mungu. Hilo lilionyeshwa katika barua ambayo mtume Paulo aliandikia makundi ya Galatia yapata 50 hadi 52 W.K. Kufikia wakati huo baraza linaloongoza lilikuwa limeamua kwamba tohara haikutakwa kwa Wakristo. Lakini walimu bandia walikuwa wamewasadikisha baadhi ya Wagalatia kwamba hiyo ilikuwa sehemu muhimu ya Ukristo.
7 Paulo aliwaambia Wagalatia: Mtu hutangazwa rasmi kuwa mwadilifu kupitia imani katika Kristo, si kwa matendo ya Sheria ya Musa. (1:1–3:14) Sheria haikubatilisha ile ahadi iliyofunganishwa na lile agano la Kiabrahamu lakini ilidhihirisha dhambi na kutumikia kuwa mfundishaji wa kuongoza kwa Yesu. (3:15-25) Kwa kifo chake, Yesu aliwaweka huru wale waliokuwa chini ya Sheria, akiwawezesha kuwa wana wa Mungu. Kwa hiyo, kurudia mpango wakuadhimisha siku, miezi, majira, na miaka kungemaanisha kurudi utumwani. (4:1-20) Kisha Paulo akaandika:
8, 9. (a) Katika maneno yako mwenyewe, eleza kwa ufupi yale ambayo Paulo alisema kwenye Wagalatia 4:21-26. (b) Katika drama hiyo ya ufananisho, ni nani au nini kilichofananishwa na Abrahamu na Sara, na nani ndiye ile Mbegu iliyoahidiwa?
8 “Niambieni, enyi mnaopenda kutawaliwa na sheria: Je, mnasikia isemavyo Sheria? Imeandikwa katika Maandiko Matakatifu kwamba Abrahamu alikuwa na watoto wawili: mmoja [Ishmaeli] kwa mwanamke mtumwa [Hagari], na wa pili [Isaka] kwa mwanamke huru [Sara]. Yule wa mwanamke mtumwa alizaliwa kama kawaida, lakini yule wa mwanamke huru alizaliwa kutokana na ahadi ya Mungu. Mambo hayo yamekuwa mfano; mama hao wawili ni mfano wa maagano mawili; la kwanza [agano la Sheria] ni lile lililofanyika mlimani Sinai [ambako Mungu alianzisha agano hilo pamoja na Waisraeli], mwakilishi wake ni Hagari, na watoto wake wanazaliwa utumwani. [Agano lile jingine lilikuwa lile lililofanywa na Abrahamu kuhusu Mbegu yake.] Hagari anawakilisha mlima Sinai ulioko Arabia, na ni mfano wa Yerusalemu ya sasa, ulio mtumwa pamoja na watoto wake [wazao wa Abrahamu, Isaka, na Yakobo]. Lakini Yerusalemu ya juu mbinguni ni mji ulio huru, nao ni mama yetu.”—Wagalatia 4:21-26, HNWW.
9 Katika drama hiyo ya ufananisho, Abrahamu alikuwa ndiye ufananisho wa Yehova. “Mwanamke huru,” Sara, alifananisha “mwanamke” wa Mungu au tengenezo takatifu la ulimwengu wote mzima. Lilitokeza Kristo, ile Mbegu ya mwanamke huyo wa ufananisho na ya Abrahamu Mkubwa Zaidi. (Wagalatia 3:16) Ili kuonyesha njia ya kuwekwa huru na ibada isiyo safi, dhambi na Shetani, Yesu alifundisha kweli na kufichua dini bandia, lakini Yerusalemu na watoto wake walibaki katika utumwa wa kidini kwa sababu walimkataa. (Mathayo 23:37, 38) Wafuasi wa Yesu Wayahudi wakawa huru na Sheria, iliyoonyesha utumwa wao kwa hali ya kutokamilika, dhambi, na kifo. Wanadamu wote wanaomkubali Yesu kuwa Yule aliyetokezwa na “mwanamke” wa Mungu ili awe Mfalme wa Kimesiya na Mweka Huru ‘anayewatangazia mateka uhuru wao,’ wako huru kweli kweli!—Isaya 61:1, 2; Luka 4:18, 19.
Epuka Nira ya Utumwa
10, 11. Kristo aliwaweka wafuasi wake huru na nira gani ya utumwa, na ni milinganisho gani inayoweza kupatikana leo?
10 Kwa wale wanaofanyika kuwa mbegu ya Abrahamu pamoja na Kristo, yule Isaka Mkubwa Zaidi, Paulo asema: “Yerusalemu ya juu mbinguni ni mji ulio huru, nao ni mama yetu. . . . Ndugu zangu, ninyi ni watoto wa Mungu kutokana na ahadi yake, kama alivyokuwa Isaka. Lakini kama vile siku zile yule mtoto aliyezaliwa kwa njia ya kawaida alimdhulumu yule aliyezaliwa kwa uwezo wa Roho wa Mungu, vivyo hivyo na siku hizi. . . . Sisi si watoto wa mtumwa bali wa mama huru. Kristo alitupa uhuru [kutoka Sheria] akataka tubaki huru. Basi, simameni imara wala msikubali tena kuwa chini ya nira ya utumwa.”—Wagalatia 4:26–5:1, HNWW.
11 Wowote wa wafuasi wa Yesu wangalifungwa katika nira ya utumwa ikiwa wangalijitiisha kwa Sheria. Dini bandia ndiyo nira ya utumwa ya sasa, na Jumuiya ya Wakristo hulingana na Yerusalemu ya kale na watoto wake. Lakini wapakwa-mafuta ndio watoto wa Yerusalemu ya juu, tengenezo huru la kimbingu la Mungu. Wao na waamini wenzao walio na matumaini ya kidunia sio sehemu ya ulimwengu huu na hawamo katika utumwa wa Shetani. (Yohana 14:30; 15:19; 17:14, 16) Tukiwa tumewekwa huru kupitia kweli na dhabihu ya Yesu, acheni tusimame imara kwa ajili ya uhuru wetu wa kupewa na Mungu.
Kuchukua Msimamo Kwa Ajili ya Uhuru wa Kupewa na Mungu
12. Ni mwendo gani unaochukuliwa na waamini, na ni nini kitakachozungumziwa sasa?
12 Mamilioni sasa huonea shangwe uhuru wa kweli wakiwa Mashahidi wa Yehova. Mafunzo ya Biblia hufanywa pamoja na mamilioni wengine, wengi wao wakiwa na “mwelekeo wenye kufaa kwa ajili ya uhai wa milele.” Watakapokuwa waamini, watachukua msimamo kwa ajili ya uhuru wa kupewa na Mungu kwa kubatizwa. (Matendo 13:48; 18:8, NW) Lakini ni hatua zipi zinazotangulia ubatizo wa Kikristo?
13. Kuna uhusiano gani kati ya maarifa na ubatizo?
13 Kabla ya kubatizwa, ni lazima mtu atwae na kutenda kulingana na maarifa sahihi ya Maandiko. (Waefeso 4:13) Hivyo, Yesu aliwaambia wafuasi wake hivi: “Enendeni , mkawafanye mataifa yote kuwa wanafunzi, mkiwabatiza kwa jina la Baba, na Mwana, na Roho Mtakatifu [takatifu, NW]; na kuwafundisha kuyashika yote niliyowaamuru ninyi.”—Mathayo 28:19, 20.
14. Kubatizwa katika jina la Baba, la Mwana, na la roho takatifu hunahitaji maarifa gani?
14 Kubatizwa katika jina la Baba kwamaanisha kukiri cheo na mamlaka ya Yehova akiwa Mungu, Muumba, na Bwana Mwenye Enzi Kuu ya Ulimwengu Wote Mzima. (Mwanzo 17:1; 2 Wafalme 19:15; Ufunuo 4:11) Ubatizo katika jina la Mwana wahitaji utambuzi wa cheo na mamlaka ya Kristo akiwa kiumbe wa roho aliyekwezwa, Mfalme wa Kimesiya, na yule ambaye kupitia yeye Mungu ameandaa “fidia inayolingana.” (1 Timotheo 2:5, 6, NW; Danieli 7:13, 14; Wafilipi 2:9-11) Mtu anayebatizwa katika jina la roho takatifu hutambua kwamba hiyo ni kani ya utendaji ya Mungu iliyotumiwa na Yehova katika uumbaji na katika kupulizia waandishi wa Biblia, na pia katika njia nyinginezo. (Mwanzo 1:2; 2 Petro 1:21) Pasipo shaka, kuna mengi zaidi ya kujifunza kuhusu Mungu, Kristo, na roho takatifu.
15. Kwa nini ni lazima mtu azoee imani kabla ya kubatizwa?
15 Kabla ya ubatizo, ni lazima mtu azoee imani yenye msingi wa maarifa sahihi. “Pasipo imani haiwezekani kumpendeza [Yehova].” (Waebrania 11:6) Mtu anayezoea imani katika Mungu, Kristo, na kusudi la kimungu atataka kuwa mmoja wa Mashahidi wa Yehova, anayeishi kupatana na Neno la Mungu na kushiriki sehemu ya maana katika kuhubiri habari njema. Atasema juu ya utukufu wa umaliki wa Yehova.—Zaburi 145:10-13; Mathayo 24:14.
16. Toba ni nini, na inahusianaje na ubatizo wa Kikristo?
16 Toba ni takwa jingine la ubatizo. Kutubu kunamaanisha “kubadili akili kwa mtu kuhusu kitendo, au mwenendo, wa wakati uliopita (au uliokusudiwa), kwa sababu ya kujuta au kutoona radhi,” au “kuhisi majuto, masikitiko, au uchungu kwa ajili ya yale ambayo mtu amefanya au amekosa kufanya.” Wayahudi wa karne ya kwanza walihitaji kutubu dhambi zao dhidi ya Yesu Kristo. (Matendo 3:11-26) Waamini wengine katika Korintho walitubu uasherati, ibada ya sanamu, uzinzi, ngono ya jinsia moja, wizi, ulafi, ulevi, utukanaji, na unyang’anyi. Tokeo likawa kwamba, ‘walioshwa’ katika damu ya Yesu, ‘walitakaswa’ wakiwa wale waliotengwa kwa ajili ya utumishi wa Yehova, na ‘kuhesabiwa haki’ katika jina la Yesu Kristo na kwa roho ya Mungu. (1 Wakorintho 6:9-11) Kwa hiyo toba ni hatua ya kuelekea dhamiri njema na uhuru wa kupewa na Mungu kutoka katika hatia yenye kusumbua juu ya dhambi.—1 Petro 3:21.
17. Wongofu humaanisha nini, na huo unataka nini kwa mtu anayepanga kubatizwa?
17 Ni lazima wongofu utukie kabla ya mtu kuweza kubatizwa akiwa mmoja wa Mashahidi wa Yehova. Wongofu wa mtu aliyetubu hutukia baada ya yeye kukataa mwendo wake mbaya na kuamua kufanya lililo sawa. Vitenzi vya Kiebrania na Kigiriki vinavyohusiana na wongofu humaanisha “kurudi nyuma, kugeuka au kurudi.” Kunapotumiwa katika maana ya kiroho inayofaa, huko hurejezea kugeuka kutoka njia mbaya kumwelekea Mungu. (1 Wafalme 8:33, 34) Wongofu hutaka “matunda yanayopatana na kutubu,” kwamba tufanye yale ambayo Mungu anaamuru, tuache dini bandia, na kuelekezea Yehova moyo wetu kwa uthabiti ili tumtumikie yeye peke yake. (Matendo 26:20; Kumbukumbu la Torati 30:2, 8, 10; 1 Samweli 7:3) Hilo lahitaji “moyo mpya na roho mpya,” ili kuwe na badiliko katika kufikiri, mwelekeo, na azimio maishani. (Ezekieli 18:31) Utu mpya unaotokea huweka sifa za kimungu mahali pa vitabia visivyompendeza Mungu. (Wakolosai 3:5-14) Naam, toba ya kweli humfanya mtu ‘ageuke’ kweli kweli.—Matendo 3:19, NW.
18. Ni kwa nini ujiweke wakfu kwa Mungu katika sala, na ni nini maana ya hatua hiyo?
18 Ni lazima wakfu kwa Mungu katika sala utangulie ubatizo. (Linganisha Luka 3:21, 22.) Wakfu humaanisha kutenga kwa ajili ya kusudi takatifu. Hatua hiyo ni ya maana sana hivi kwamba twapaswa kumwambia Mungu katika sala uamuzi wetu wa kumpa utoaji wa pekee na kumtumikia milele. (Kumbukumbu la Torati 5:8, 9; 1 Mambo ya Nyakati 29:10-13) Pasipo shaka, wakfu wetu si kwa kazi fulani bali ni kwa Mungu mwenyewe. Jambo hilo lilieleweshwa wazi kwenye maziko ya msimamizi wa kwanza wa Watch Tower Society Charle Taze Russel. Katika pindi hiyo mwaka 1916, katibu mweka-hazina, W. E. Van Amburgh, alisema: “Kazi hii kubwa ya ulimwenguni pote si kazi ya mtu mmoja. Ni kazi iliyo kubwa mno kuwa hivyo. Hiyo ni kazi ya Mungu na haibadiliki. Mungu ametumia watumishi wengi katika wakati uliopita na bila shaka atatumia wengi katika wakati ujao. Wakfu wetu si kwa mtu, au kwa kazi ya mtu, bali kwa kufanya mapenzi ya Mungu, kama atakavyoyafunua kwetu kupitia Neno Lake na miongozo yake ya kimungu. Mungu angali aelekeza mambo.” Lakini ni jambo gani jingine lipaswalo kufanywa kuhusu wakfu kwa Mungu?
19. (a) Watu mmoja mmoja hutoaje ushuhuda wa peupe wa kujiweka wakfu kwa Yehova? (b) Ubatizo wa maji ni ufananisho wa nini?
19 Ushuhuda wa waziwazi wa wakfu kwa Yehova huandaliwa wakati mtu anapobatizwa. Ubatizo ni ufananisho unaoonyesha kwamba mtu anayezamishwa majini amejiweka wakfu bila masharti kwa Yehova Mungu kupitia Yesu Kristo. (Linganisha Mathayo 16:24.) Mtaka kubatizwa anapozikwa chini ya maji na kisha kuinuliwa, yeye afa kwa ufananisho kwa mwendo wake wa maisha wa zamani na huinuliwa kwa njia mpya ya maisha, sasa afanye mapenzi ya Mungu bila masharti. (Linganisha Warumi 6:4-6.) Yesu alipobatizwa, alijitoa mwenyewe kwa Baba yake wa kimbingu kwa njia isiyo na masharti. (Mathayo 3:13-17) Na Maandiko huonyesha tena na tena kwamba waamini wanaostahili hubatizwa. (Matendo 8:13; 16:27-34; 18:8) Kwa hiyo, ili kuwa mmoja wa Mashahidi wa Yehova leo, ni lazima mtu awe mwamini anayezoea imani kwa kweli na kubatizwa.—Linganisha Matendo 8:26-39.
Simama Imara!
20. Ni baadhi gani ya mifano ya Kibiblia inayothibitisha kwamba tutabarikiwa kwa kuchukua msimamo kwa ajili uhuru wa kupewa na Mungu tukiwa Mashahidi wa Yehova waliobatizwa?
20 Ikiwa umechukua msimamo imara kwa ajili ya uhuru wa kupewa na Mungu kwa kuwa Shahidi wa Yehova aliyebatizwa, atakubariki kama vile ambavyo amebariki watumishi wake katika wakati uliopita. Kwa mfano, Yehova alimbariki Abrahamu na Sara waliokuwa wamezeeka kuwa na mwana mwenye kumhofu Mungu, Isaka. Kwa imani nabii Musa alichagua kuteswa na watu wa Mungu “kuliko kujifurahisha katika dhambi kwa kitambo; akihesabu ya kuwa kushutumiwa kwake [akiwa ufananisho wa kale wa] Kristo [au Mpakwa-Mfuta wa Mungu] ni utajiri mkuu kliko hazina za Misri.” (Waebrania 11:24-26) Musa alikuwa na pendeleo la kutumiwa na Yehova kuwaongoza Waisraeli kutoka utumwa wa Misri. Isitoshe, kwa sababu alimtumikia Mungu kwa uaminifu, yeye atafufuliwa na atatumikia akiwa mmoja wa wale “wakuu katika dunia yote” chini ya Musa Mkubwa Zaidi, Yesu Kristo.—Zaburi 45:16, NW; Kumbukumbu la Torati 18:17-19.
21. Ni mifano gani yenye kutia moyo inayotolewa kuhusu wanawake wenye kumtii Mungu wa nyakati za kale?
21 Wakristo waliojiweka wakfu leo waweza pia kutiwa moyo kwa kuchunguza wanawake waliopata kuwa huru kweli kweli na kuwa na shangwe. Miongoni mwao alikuwa yule Mmoabi Ruthu, aliyepatwa na uchungu wa kuwa mjane na shangwe ya uhuru wa kupewa na Mungu kutoka katika dini bandia. Akiacha watu na miungu yake, alishikamana na mama-mkwe wake mjane, Naomi. “Uendako nitakwenda,” akasema Ruthu, “na wewe ukaapo nitakaa. Watu wako watakuwa watu wangu, na Mungu wako atakuwa Mungu wangu.” (Ruthu 1:16) Akiwa mke wa Boazi, Ruthu alikuwa mama Obedi babu wa Daudi. (Ruthu 4:13-17) Kwani, Yehova alimpa mwanamke huyo mnyenyekevu asiye Myahudi “thawabu kamili” kwa kumruhusu awe nyanya wa kale wa Yesu aliye Mesiya! (Ruthu 2:12) Ruthu atakuwa na shangwe kama nini anapofufuliwa na kupata kujua kwamba alikuwa na pendeleo la jinsi hiyo! Shangwe hiyo hiyo bila shaka itajaza mioyo ya Rahabu kahaba wa zamani atakayefufuliwa, aliyewekwa huru na ukosefu wa adili na dini bandia, pamoja na Bath-Sheba aliyekosea lakini akatubu, kwani wao pia watajifunza kwamba Yehova aliwaruhusu kuwa nyanya za kale za Yesu Kristo.—Mathayo 1:1-6, 16.
22. Ni nini kitakachochunguzwa katika makala inayofuata?
22 Ufikirio wa wale waliopokea uhuru wa kupewa na Mungu waweza kuendelea zaidi na zaidi. Kwa mfano, idadi yao inatia ndani wale wanaume na wanawake wa imani wanaotajwa katika Waebrania sura 11. Walipatwa na majaribu na mateso, na “ulimwengu haukustahili kuwa nao.” Ongeza kwenye idadi yao wale wafuasi wa Yesu waaminifu-washikamanifu wa karne ya kwanza na wengine waaminifu tangu wakati huo, kutia na wale mamilioni wanaomtumikia Yehova sasa wakiwa Mashahidi wake. Kama tutakavyoona halafu, ikiwa umechukua msimamo pamoja nao kwa ajili ya uhuru wa kupewa na Mungu, una sababu nyingi za shangwe.
Ungejibuj?
◻ Mungu alitoa tumaini gani wakati uhuru wa kupewa na Mungu ulipopotezwa?
◻ Kristo aliwaweka wafuasi wake huru na “nira ya utumwa” gani?
◻ Ni hatua zipi zinazotangulia ubatizo ili kuwa mmoja wa Mashahidi wa Yehova?
◻ Ni mifano gani ya Kimaandiko inayothibitisha kwamba tutabarikiwa kwa kuchukua msimamo kwa ajili ya uhuru wa kupewa na Mungu?
[Picha katika ukurasa wa 16]
Je! wewe wajua ni hatua zipi zinazotangulia ubatizo ili kuwa mmoja wa Mashahidi wa Yehova?