Familia ya Yehova Hufurahia Muungano Wenye Thamani
“Tazama, jinsi ilivyo vema, na kupendeza, ndugu wakae pamoja, kwa umoja [“muungano,” “NW”].”—ZABURI 133:1.
1. Ni nini hali ya familia nyingi leo?
LEO familia imo hatarini. Katika familia nyingi, mahusiano ya ndoa yamefikia hatua ya kuvunjika. Talaka inazidi kuwa jambo la kawaida, na watoto wengi wa waume na wake ambao wametalikana wanahuzunika sana. Mamilioni ya familia hayana furaha wala muungano. Hata hivyo, kuna familia moja iliyo na shangwe ya kweli na muungano halisi. Hiyo ni familia ya Yehova Mungu ya ulimwengu wote mzima. Katika hiyo, makumi ya maelfu ya malaika wasioonekana hufanya kazi zao mbalimbali walizogawiwa kwa upatano na mapenzi ya kimungu. (Zaburi 103:20, 21) Lakini je, kuna familia duniani inayofurahia muungano wa jinsi hiyo?
2, 3. (a) Sasa ni nani walio sehemu ya familia ya Mungu ya ulimwengu wote mzima, na twaweza kufananisha na nini Mashahidi wa Yehova wote leo? (b) Ni maswali gani tutakayozungumzia?
2 Mtume Paulo aliandika hivi: “Namkunjia Baba magoti yangu, ambaye kwake kila familia mbinguni na duniani hupata jina layo.” (Waefeso 3:14, 15, NW) Kila nasaba ya familia duniani hupata jina layo kutoka kwa Mungu kwa sababu yeye ndiye Muumba. Ingawa hakuna familia zozote za kibinadamu mbinguni, kwa njia ya kitamathali Mungu amefunga ndoa na tengenezo lake la kimbingu, na Yesu ataunganishwa na bibi-arusi wa kiroho mbinguni. (Isaya 54:5; Luka 20:34, 35; 1 Wakorintho 15:50; 2 Wakorintho 11:2) Sasa watiwa-mafuta waaminifu walio duniani ni sehemu ya familia ya Mungu ya ulimwengu wote mzima, na “kondoo wengine” wa Yesu, wenye matumaini ya kidunia, wanatazamiwa kuwa washiriki wa familia hiyo. (Yohana 10:16; Warumi 8:14-17; Mnara wa Mlinzi, Januari 15, 1996, ukurasa 31) Hata hivyo, Mashahidi wa Yehova wote leo wanaweza kufananishwa na familia yenye muungano ya ulimwenguni pote.
3 Je, wewe ni sehemu ya familia hiyo nzuri ajabu ya kimataifa ya watumishi wa Mungu? Ikiwa ni hivyo, wewe hufurahia mojapo baraka kubwa zaidi kupita zote ambazo mtu yeyote angeweza kuwa nazo. Mamilioni ya watu yatathibitisha kwamba familia ya Yehova ya tufeni pote—tengenezo lake lionekanalo—ni mahali penye rutuba pa amani na muungano katika jangwa la kilimwengu la zogo na ukosefu wa muungano. Muungano wa familia ya Yehova ya ulimwenguni pote waweza kufafanuliwaje? Na ni mambo gani yanayoendeleza muungano wa jinsi hiyo?
Jinsi Ilivyo Vema, na Kupendeza!
4. Kwa maneno yako mwenyewe, ungeelezaje yale yanayosemwa na Zaburi 133 kuhusu muungano wa kidugu?
4 Mtunga-zaburi Daudi alithamini sana muungano wa kidugu. Hata alipuliziwa kuimba juu yao! Ebu mwazie akiwa na kinubi chake huku akiimba: “Tazama, jinsi ilivyo vema, na kupendeza, ndugu wakae pamoja, kwa umoja [“muungano,” NW]. Ni kama mafuta mazuri kichwani, yashukayo ndevuni, ndevu za Haruni, yashukayo mpaka upindo wa mavazi yake. Kama umande wa Heremoni ushukao milimani pa Sayuni. Maana ndiko BWANA alikoamuru baraka, naam, uzima hata milele.”—Zaburi 133:1-3.
5. Kwa msingi wa Zaburi 133:1, 2, ni ulinganifu gani uwezao kufanywa kati ya Waisraeli na watumishi wa Mungu wa siku ya sasa?
5 Maneno hayo yalihusu muungano wa kidugu uliofurahiwa na watu wa Mungu wa kale, Waisraeli. Walipokuwa Yerusalemu kwa ajili ya sikukuu zao tatu za kila mwaka, kwa kweli wao walikaa pamoja kwa muungano. Ingawa walitoka makabila mbalimbali, walikuwa familia moja. Kuwa kwao pamoja kulikuwa na matokeo mazuri, kama mafuta ya kupaka yenye kuburudisha yaliyokuwa na harufu ya kupendeza. Mafuta hayo yalipomwagwa juu ya kichwa cha Haruni, yalitiririka chini ndevuni mwake na kushuka kwenye ukosi wa vazi lake. Kwa Waisraeli, kuwa kwao pamoja kulikuwa na uvutano mzuri uliopenya kati ya watu hao wote waliokusanyika. Hali za kutoelewana zilisuluhishwa, na muungano uliendelezwa. Muungano huohuo umo katika familia ya Yehova ya tufeni pote leo. Kushirikiana kwa ukawaida kunaleta matokeo mazuri ya kiroho juu ya washiriki wayo. Hali zozote za kutoelewana au magumu yoyote yanaondoshwa kadiri shauri la Neno la Mungu linavyotumiwa. (Mathayo 5:23, 24; 18:15-17) Watu wa Yehova huthamini sana kule kutiana moyo kunakotokana na muungano wao wa kidugu.
6, 7. Muungano wa Israeli ulikuwaje kama umande wa Mlima Heremoni, na baraka za Mungu zaweza kupatikana wapi leo?
6 Kukaa pamoja kwa Israeli kwa muungano kulikuwaje pia kama umande wa Mlima Heremoni? Kwa kuwa kilele cha mlima huo ni zaidi ya meta 2,800 juu ya usawa wa bahari, kina theluji karibu mwaka mzima. Kilele cha Heremoni chenye theluji husababisha utoneshaji wa mivuke ya usiku na hivyo hutokeza umande mwingi unaohifadhi mimea wakati wa ule msimu mkavu ulio mrefu. Mikondo ya hewa baridi kutoka safu ya milima ya Heremoni yaweza kuichukua mivuke hiyo kuelekea kusini hadi kufikia eneo la Yerusalemu, ambako inatoneka kuwa umande. Kwa hiyo mtunga-zaburi alisema kwa usahihi juu ya ‘umande wa Heremoni ukishuka juu ya Mlima Sayuni.’ Ni kikumbusha kizuri kama nini cha ule uvutano wenye kuburudisha unaoendeleza muungano wa familia ya waabudu wa Yehova!
7 Kabla ya kutaniko la Kikristo kuanzishwa, Sayuni, au Yerusalemu, lilikuwa kitovu cha ibada ya kweli. Basi, hapo ndipo mahali ambapo Mungu aliamuru baraka iwepo. Kwa kuwa Chanzo cha baraka zote kilikaa hekaluni Yerusalemu, baraka zingetoka huko kwa njia ya ufananisho. Basi, kwa sababu ibada ya kweli haitegemei tena mahali popote pamoja, baraka, upendo, na muungano wa watumishi wa Mungu zaweza kupatikana kotekote duniani leo. (Yohana 13:34, 35) Ni baadhi ya mambo gani yanayoendeleza muungano huu?
Mambo Yanayoendeleza Muungano
8. Twajifunza nini kuhusu muungano kwenye Yohana 17:20, 21?
8 Muungano wa waabudu wa Yehova unategemea utii wa Neno la Mungu lililoeleweka kwa usahihi, kutia na mafundisho ya Yesu Kristo. Kwa Yehova kumtuma Mwanae ulimwenguni ili kushuhudia kweli na kufa kifo cha kidhabihu, njia ilifunguliwa ili kutaniko la Kikristo lenye muungano liweze kufanyizwa. (Yohana 3:16; 18:37) Jambo la kwamba muungano wa kweli ulipaswa kuwa miongoni mwa washiriki walo lilidhihirishwa wakati Yesu aliposali hivi: “Si hao tu ninaowaombea; lakini na wale watakaoniamini kwa sababu ya neno lao. Wote wawe na umoja [“muungano,” NW]; kama wewe, Baba, ulivyo ndani yangu, nami ndani yako; hao nao wawe ndani yetu; ili ulimwengu upate kusadiki ya kwamba wewe ndiwe uliyenituma.” (Yohana 17:20, 21) Wafuasi wa Yesu kwa kweli walipata muungano uliokuwa sawa na ule ulioko kati ya Mungu na Mwanae. Hilo lilitendeka kwa sababu walitii Neno la Mungu na mafundisho ya Yesu. Mtazamo huohuo ndio jambo kuu katika muungano wa familia ya Yehova ya ulimwenguni pote leo.
9. Roho takatifu ina sehemu gani katika muungano wa watu wa Yehova?
9 Jambo jingine linalowaunganisha watu wa Yehova ni kwamba sisi tuna roho takatifu, au kani ya utendaji ya Mungu. Hiyo hutuwezesha kuelewa kweli iliyofunuliwa ya Neno la Yehova na kwa njia hiyo kumtumikia kwa muungano. (Yohana 16:12, 13) Roho hutusaidia tuepuke kazi za mwili zenye kuleta ukosefu wa muungano kama zogo, wivu, hasira za ghafula, na magomvi. Badala ya hivyo, roho ya Mungu hutuwezesha kusitawisha matunda yenye kuunganisha ya upendo, shangwe, amani, ustahimilivu, fadhili, wema, imani, upole, na kujidhibiti.—Wagalatia 5:19-23.
10. (a) Ni ulinganifu gani uwezao kufanywa kati ya upendo ulioko katika familia ya kibinadamu yenye muungano na upendo ulio dhahiri miongoni mwa wale waliojitoa kwa Yehova? (b) Mshiriki mmoja wa Baraza Linaloongoza alielezaje hisia zake kuhusu kukutana pamoja na ndugu zake wa kiroho?
10 Washiriki wa familia yenye muungano hupendana na hufurahia kuwa pamoja. Kwa kulinganisha, wale walio katika familia yenye muungano ya waabudu wa Yehova humpenda yeye, Mwanae, na waamini wenzao. (Marko 12:30; Yohana 21:15-17; 1 Yohana 4:21) Sawa na vile familia ya asili yenye upendo hufurahia kula milo pamoja, wale ambao wamejitoa kwa Mungu wanafurahia kuwapo kwenye mikutano ya Kikristo, makusanyiko, na mikusanyiko ili kunufaishwa na ushirika mzuri na chakula cha kiroho kilicho bora sana. (Mathayo 24:45-47; Waebrania 10:24, 25) Mshiriki mmoja wa Baraza Linaloongoza la Mashahidi wa Yehova alisema hivi wakati mmoja: “Kwangu, kukutana na ndugu ni mojapo mambo yenye kupendeza zaidi ya yote maishani na ni chanzo cha kitia-moyo. Napenda kuwa kwenye Jumba la Ufalme miongoni mwa wale wa kwanza kufika, na kuwa miongoni mwa wale wa mwisho kuondoka, ikiwezekana. Nahisi shangwe ya kindani ninapoongea na watu wa Mungu. Ninapokuwa miongoni mwao nahisi nikiwa starehe pamoja na familia yangu.” Je, hivyo ndivyo unavyohisi?—Zaburi 27:4.
11. Mashahidi wa Yehova hupata furaha hasa katika kazi ipi, na kuna matokeo gani katika kufanya utumishi wa Mungu kuwa jambo la kukaziwa maishani mwetu?
11 Familia yenye muungano hupata furaha katika kufanya mambo pamoja. Vivyo hivyo, wale walio katika familia ya waabudu wa Yehova hupata shangwe katika kufanya kwa muungano kazi yao ya kuhubiri Ufalme na kufanya wanafunzi. (Mathayo 24:14; 28:19, 20) Kushiriki katika hiyo kwa kawaida hutufanya tuwe karibu zaidi na Mashahidi wengine wa Yehova. Kufanya utumishi wa Mungu kuwa jambo la kukaziwa maishani mwetu na kuunga mkono utendaji wote wa watu wake huendeleza pia miongoni mwetu roho ya kuwa familia.
Utaratibu wa Kitheokrasi Ni wa Maana
12. Ni nini sifa za familia yenye furaha na muungano, na ni mpango gani ulioendeleza muungano katika makutaniko ya Kikristo ya karne ya kwanza?
12 Familia iliyo na uongozi thabiti bali wenye upendo na ambayo ni yenye utaratibu inaelekea kuwa yenye muungano na furaha. (Waefeso 5:22, 33; 6:1) Yehova ni Mungu wa utaratibu wenye amani, na wale wote walio katika familia yake humwona kuwa “Aliye juu.” (Danieli 7:18, 22, 25, 27; 1 Wakorintho 14:33) Wao hutambua pia kwamba amemweka rasmi Mwanae, Yesu Kristo, kuwa mrithi wa vitu vyote naye amemkabidhi mamlaka yote mbinguni na duniani. (Mathayo 28:18; Waebrania 1:1, 2) Kristo akiwa ndiye Kichwa, kutaniko la Kikristo ni tengenezo lenye utaratibu na lenye muungano. (Waefeso 5:23) Ili kusimamia utendaji mbalimbali wa makutaniko ya karne ya kwanza, kulikuwa na baraza linaloongoza ambalo washiriki walo walikuwa mitume na “wazee” wengine waliokuwa wakomavu kiroho. Makutaniko moja-moja yalikuwa na waangalizi, au wazee, na watumishi wa huduma waliowekwa rasmi. (Matendo 15:6; Wafilipi 1:1) Kuwatii wale walioongoza kuliendeleza muungano.—Waebrania 13:17.
13. Yehova huvutaje watu, na ni nini matokeo ya kufanya hivyo?
13 Lakini je, utaratibu huo wote unadokeza kwamba muungano wa waabudu wa Yehova unaweza kusemwa kuwa tokeo la uongozi thabiti, wenye ubaridi? Bila shaka la! Hakuna ukosefu wowote wa upendo kwa habari ya Mungu au tengenezo lake. Yehova huvuta watu kwa kuonyesha upendo, na kwa hiari na shangwe mamia ya maelfu kila mwaka hupata kuwa sehemu ya tengenezo la Yehova kwa kubatizwa kwa ufananisho wa kujiweka wakfu kwao kwa Mungu kwa moyo wote. Mtazamo wao wa akilini ni kama ule wa Yoshua, aliyewahimiza Waisraeli wenzake hivi: “Chagueni hivi leo mtakayemtumikia; . . . lakini mimi na nyumba yangu tutamtumikia BWANA.”—Yoshua 24:15.
14. Kwa nini twaweza kusema kwamba tengenezo la Yehova ni la kitheokrasi?
14 Tukiwa sehemu ya familia ya Yehova, sisi ni wenye shangwe na pia tuna usalama. Ni hivyo kwa sababu tengenezo lake ni la kitheokrasi. Ufalme wa Mungu ni theokrasi (kutokana na Kigiriki the·osʹ, mungu, na kraʹtos, utawala). Ni utawala wa Mungu, wenye kuagizwa rasmi na kusimamishwa naye. “Taifa takatifu” la Yehova lenye kutiwa mafuta linanyenyekea utawala wake na basi hilo pia ni la kitheokrasi. (1 Petro 2:9) Yule Theokrati Mkuu, Yehova, akiwa Hakimu, Mtoa-Sheria, na Mfalme wetu, twapaswa kuhisi tukiwa salama. (Isaya 33:22) Hata hivyo, namna gani ikiwa bishano fulani lingetokea na kutisha shangwe yetu, usalama wetu, na muungano wetu?
Baraza Linaloongoza Lachukua Hatua
15, 16. Ni bishano gani lililotokea katika karne ya kwanza, na kwa nini?
15 Ili kuhifadhi muungano wa familia, mara kwa mara huenda bishano likapasa kusuluhishwa. Basi, tuseme kwamba tatizo fulani la kiroho lilipasa kusuluhishwa ili kuhifadhi muungano wa familia ya waabudu wa Mungu katika karne ya kwanza W.K. Jambo gani lifanywe? Baraza linaloongoza lilichukua hatua, likifanya maamuzi juu ya mambo ya kiroho. Tuna rekodi ya Kimaandiko ya kuchukuliwa kwa hatua kwa jinsi hiyo.
16 Karibu mwaka wa 49 W.K., baraza linaloongoza lilikutana Yerusalemu ili kusuluhisha tatizo zito na kwa njia hiyo kuhifadhi muungano wa ‘nyumba ya Mungu.’ (Waefeso 2:19) Miaka ipatayo 13 mapema, mtume Petro alikuwa amemhubiri Kornelio, na Wasio Wayahudi, au watu wa mataifa wa kwanza, wakawa waamini waliobatizwa. (Matendo, sura ya 10) Wakati wa safari ya umishonari ya kwanza ya Paulo, Wasio Wayahudi wengi walikubali Ukristo. (Matendo 13:1–14:28) Kwa kweli, kutaniko la Wakristo Wasio Wayahudi lilikuwa limeanzishwa Antiokia, Siria. Wayahudi fulani Wakristo walihisi kwamba wageuzwa-imani Wasio Wayahudi walipaswa kutahiriwa na kushika Sheria ya Kimusa, lakini wengine hawakukubali. (Matendo 15:1-5) Bishano hilo lingaliweza kuongoza kwenye hali ya kukosa muungano kabisa, hata kwenye kufanyizwa kwa makutaniko yaliyotengana ya Wayahudi na ya Wasio Wayahudi. Kwa hiyo baraza linaloongoza lilichukua hatua ya haraka ili kuhifadhi muungano wa Kikristo.
17. Ni utaratibu gani wa kitheokrasi wenye upatani unaofafanuliwa katika Matendo sura ya 15?
17 Kulingana na Matendo 15:6-22, ‘mitume na wazee walikusanyika wapate kulifikiri neno hilo.’ Wengine pia walikuwapo, kutia na wajumbe kutoka Antiokia. Kwanza Petro alieleza kwamba ‘kwa kinywa chake mataifa yalisikia neno la habari njema na kuliamini.’ (NW) Kisha “mkutano wote” ukasikiliza huku Barnaba na Paulo “wakiwapasha habari za ishara na maajabu, ambayo Mungu aliyafanya kwa ujumbe wao katika Mataifa,” au Wasio Wayahudi. Halafu Yakobo akadokeza jinsi swali hilo lingeweza kusuluhishwa. Baada ya uamuzi kufanywa na baraza linaloongoza, tunaambiwa: “Ikawapendeza mitume na wazee na kanisa lote kuwachagua watu miongoni mwao na kuwapeleka Antiokia pamoja na Paulo na Barnaba.” ‘Watu hao waliochaguliwa’—Yuda na Sila—walipelekea waamini wenzao barua yenye kitia-moyo.
18. Baraza linaloongoza lilifanya uamuzi gani uliohusisha Sheria ya Kimusa, na huo uliathirije Wakristo Wayahudi na Wasio Wayahudi?
18 Hiyo barua iliyotangaza uamuzi wa baraza linaloongoza ilianza kwa maneno haya: “Mitume na ndugu wazee, kwa ndugu zetu walioko Antiokia na Shamu na Kilikia, walio wa Mataifa; Salamu.” Wengine walihudhuria mkutano huo wenye maana sana, lakini ni wazi kwamba baraza linaloongoza lilitia ndani “mitume na wazee.” Roho ya Mungu iliwaongoza, kwa maana barua yataarifu hivi: “Ilimpendeza Roho Mtakatifu [“roho takatifu,” “NW”] na sisi, tusiwatwike mzigo ila hayo yaliyo lazima, yaani, mjiepushe na vitu vilivyotolewa sadaka kwa sanamu, na damu, na nyama zilizosongolewa, na uasherati.” (Matendo 15:23-29) Wakristo hawakutakwa watahiriwe na kushika Sheria ya Kimusa. Uamuzi huo uliwasaidia Wakristo Wayahudi na Wasio Wayahudi watende na kusema kwa muungano. Makutaniko yalishangilia, na muungano wenye thamani ukaendelea, sawa na unavyoendelea leo katika familia ya Mungu ya duniani pote chini ya mwongozo wa kiroho wa Baraza Linaloongoza la Mashahidi wa Yehova.—Matendo 15:30-35.
Tumikia kwa Muungano wa Kitheokrasi
19. Kwa nini muungano umesitawi katika familia ya waabudu wa Yehova?
19 Muungano husitawi washiriki wa familia wanaposhirikiana. Ndivyo ilivyo katika familia ya waabudu wa Yehova. Kwa kuwa watu wa kitheokrasi, wazee na wengine katika kutaniko la karne ya kwanza walimtumikia Mungu kwa kushirikiana kikamili na baraza linaloongoza, wakakubali maamuzi yalo. Kwa msaada wa baraza linaloongoza, wazee ‘walilihubiri neno’ na washiriki wa makutaniko kwa ujumla ‘wakanena mamoja.’ (2 Timotheo 4:1, 2; 1 Wakorintho 1:10) Kwa hiyo kweli zilezile za Kimaandiko zilitolewa katika huduma na kwenye mikutano ya Kikristo, iwe ni katika Yerusalemu, Antiokia, Roma, Korintho, au kwingineko. Muungano wa kitheokrasi wa aina hiyo uko leo.
20. Ili kuhifadhi muungano wetu wa Kikristo, ni lazima tufanye nini?
20 Ili kuhifadhi muungano wetu, sisi sote tulio sehemu ya familia ya Yehova ya tufeni pote twapaswa kujitahidi kuonyesha upendo wa kitheokrasi. (1 Yohana 4:16) Twahitaji kunyenyekea mapenzi ya Mungu na kuonyesha staha yenye kina kuelekea ‘mtumwa mwaminifu’ na Baraza Linaloongoza. Bila shaka utii wetu ni wa hiari na wenye shangwe, sawa na wakfu wetu kwa Mungu. (1 Yohana 5:3) Mtunga-zaburi alifungamanisha shangwe na utii kwa njia ifaayo kama nini? Aliimba hivi: “Haleluya. Heri [“Mwenye furaha ni,” NW] mtu yule amchaye BWANA, apendezwaye sana na maagizo yake.”—Zaburi 112:1.
21. Twaweza kujithibitishaje kuwa watu wa kitheokrasi?
21 Yesu, Kichwa cha kutaniko, ni mtu wa kitheokrasi kikamili na sikuzote hufanya mapenzi ya Baba yake. (Yohana 5:30) Basi, acheni tufuate Kielelezo chetu kwa kufanya mapenzi ya Yehova kwa njia ya kitheokrasi na kwa muungano tukishirikiana kikamili na tengenezo Lake. Ndipo kwa shangwe na shukrani ya kuhisiwa moyoni, twaweza kurudia wimbo huu wa mtunga-zaburi: “Tazama, jinsi ilivyo vema, na kupendeza, ndugu wakae pamoja, kwa umoja [“muungano,” NW].”
[Ungejibuje?
◻ Muungano wetu wa Kikristo waweza kuhusianaje na Zaburi 133?
◻ Ni baadhi ya mambo gani yanayoendeleza muungano?
◻ Kwa nini utaratibu wa kitheokrasi ni wa maana kwa muungano wa watu wa Mungu?
◻ Baraza linaloongoza la karne ya kwanza lilitendaje ili kuhifadhi muungano?
◻ Kutumikia kwa muungano wa kitheokrasi kwamaanisha nini kwako?
[Picha katika ukurasa wa 13]
Baraza linaloongoza lilitenda ili kuhifadhi muungano