Sura ya 16

Serikali ya Mungu Inaanza Kutawala

 1. (a) Watu wenye imani wamekuwa wakitazamia nini kwa muda mrefu? (b) Sababu gani ufalme wa Mungu unaitwa “mji”?

KWA MAELFU ya miaka watu wenye imani katika serikali ya Mungu wametazamia wakati ambao ingeanza kutawala. Kwa mfano, Biblia inasema Abrahamu mwaminifu “alikuwa akiutazamia mji wenye misingi, ambao mwenye kuubuni na kuujenga ni Mungu.” (Waebrania 11:10) “Mji” huo ni ufalme wa Mungu. Lakini ni kwa sababu gani unatajwa hapa kuwa “mji”? Ni kwa sababu nyakati za kale ilikuwa kawaida mfalme kutawala mji. Basi mara nyingi watu walifikiria mji kuwa ufalme.

 2. (a) Ni nini kinachoonyesha kwamba Ufalme ulikuwa jambo halisi kwa wanafunzi wa kwanza wa Kristo? (b) Walitaka kujua nini juu yake?

² Ufalme huo wa Mungu ulikuwa jambo halisi kwa wafuasi wa kwanza wa Kristo. Inaonyeshwa hivyo na jinsi walivyopendezwa sana na utawala huo. (Mathayo 20:20-23) Ulizo lililokuwa katika akili zao ni hili: Ni wakati gani ambao Kristo na wanafunzi wake wangeanza kutawala? Siku moja Yesu alipowatokea wanafunzi wake baada ya kufufuliwa, waliuliza hivi: “Je! Bwana, wakati huu ndipo unapowarudishia Israeli ufalme?” (Matendo 1:6) Basi, wewe una hamu kama wanafunzi wa Kristo ya kujua wakati Kristo atakapoanza kutawala akiwa mfalme wa serikali ya Mungu?

ILE SERIKALI AMBAYO WAKRISTO WANAOMBA

 3, 4. (a) Ni nini kinachoonyesha kwamba nyakati zote Mungu ametawala akiwa Mfalme? (b) Basi ni kwa sababu gani Kristo alifundisha wafuasi wake kuomba ufalme wa Mungu uje?

³ Kristo alifundisha wafuasi wake kumwomba Mungu hivi: “Ufalme wako uje, mapenzi yako yatimizwe, hapa duniani kama huko mbinguni.” (Mathayo 6:9, 10) Lakini labda mtu fulani atauliza hivi: ‘Je! Yehova Mungu hakutawala nyakati zote akiwa mfalme? Ikiwa anatawala, sababu gani kuomba ufalme wake uje?’

⁴ Ni kweli kwamba Biblia inamtaja Yehova kuwa “Mfalme wa milele.” (1 Timotheo 1:17) Na inasema: “[Yehova] ameweka kiti chake cha enzi mbinguni, na ufalme wake unavitawala vitu vyote.” (Zaburi 103:19) Hivyo nyakati zote Yehova amekuwa Mtawala Aliye Mkuu Kabisa wa viumbe vyake vyote. (Yeremia 10:10) Walakini, kwa sababu ya ule uasi juu ya utawala wake uliotokea katika bustani ya Edeni, Mungu alipanga kuwe na serikali ya pekee. Hiyo ndiyo serikali ambayo baadaye Yesu Kristo alifundisha wafuasi wake waombe. Kusudi la serikali hiyo ni kumaliza matatizo yaliyotokezwa wakati Shetani Ibilisi na wengine walipoacha utawala wa Mungu.

 5. Ikiwa ni ufalme wa Mungu, sababu gani vilevile unaitwa ufalme wa Kristo na ufalme wa wale 144,000?

⁵ Serikali hiyo ya Ufalme iliyo mpya inapokea mamlaka na haki ya kutawala kutoka kwa Yehova Mungu, yule Mfalme Mkuu. Ni ufalme wake. Mara nyingi sana, Biblia inauita “ufalme wa Mungu.” (Luka 9:2, 11, 60, 62; 1 Wakorintho 6:9, 10; 15:50) Walakini, kwa kuwa Yehova amemweka Mwanawe awe Mtawala Mkuu wa ufalme huo, vilevile unatajwa kuwa ufalme wa Kristo. (2 Petro 1:11) Kama tulivyojifunza katika sura fulani iliyotangulia, watu 144,000 waliochaguliwa katika wanadamu watatawala pamoja na Kristo katika ufalme huo. (Ufunuo 14:1-4; 20:6) Hivyo Biblia inautaja vilevile kuwa “ufalme wao.”—Danieli 7:27, NW.

 6. Kulingana na watu fulani, ufalme wa Mungu ulianza kutawala wakati gani?

⁶ Watu fulani wanasema kwamba Ufalme huo ulianza kutawala mwaka ambao Yesu alirudi mbinguni. Wanasema Kristo alianza kutawala alipoimimina roho takatifu juu ya wafuasi wake wakati wa sikukuu ya Kiyahudi ya Pentekoste katika mwaka wa 33 W.K. (Matendo 2:1-4) Lakini serikali ile ya Ufalme ambayo Yehova alipanga imalize matatizo yote yaliyofanyizwa na uasi wa Shetani haikuanza kutawala wakati huo. Hakuna jambo linaloonyesha kwamba yule ‘mtoto wa kiume,’ ambaye ni serikali ya Mungu Kristo akiwa ndiye mtawala, ilizaliwa wakati huo na kuanza kutawala. (Ufunuo 12:1-10) Basi, je! kwa njia fulani Yesu alipata ufalme mwaka huo wa 33 W.K.?

 7. Kristo amekuwa akitawala nani tangu mwaka 33 W.K.?

⁷ Ndiyo, wakati huo Yesu alianza kutawala kundi lake la wafuasi ambao, baadaye, walipaswa wajiunge naye katika mbingu. Hivyo Biblia inasema kwamba, wanapokuwa wangali duniani, wanaingizwa “katika ufalme wa Mwana wa pendo [la Mungu].” (Wakolosai 1:13) Lakini utawala au “ufalme” huo unaotawala Wakristo wenye tumaini la kupata uzima wa kimbingu siyo ile serikali ya Ufalme ambayo Yesu alifundisha wafuasi wake kuomba. Ni ufalme unaotawala watu 144,000 tu watakaotawala pamoja naye mbinguni. Katika karne nyingi zilizopita wao wamekuwa ndio raia pekee wa ufalme huo. Hivyo utawala huo, au ‘ufalme wa mwana wa pendo la Mungu,’ utamalizika wakati yule wa mwisho wa raia hao wenye tumaini la kimbingu atakapokufa na kujiunga na Kristo mbinguni. Hawatakuwa tena raia za Kristo, bali wakati huo watakuwa wafalme pamoja naye katika ile serikali ya Ufalme wa Mungu iliyoahidiwa zamani sana.

KUANZA KUTAWALA KATIKATI YA ADUI

 8. (a) Ni nini kinachoonyesha kwamba baada ya kufufuliwa kwa Kristo kungekuwako wakati wa kungojea kabla hajaanza kutawala? (b) Mungu alimwambia Kristo nini ulipofika wakati wake wa kutawala?

⁸ Yesu aliporudi mbinguni baada ya kufufuliwa kwake, hakuanza kutawala wakati huo akiwa Mfalme wa serikali ya Mungu. Badala yake, kungekuwako wakati wa kungoja, kama mtume Paulo anavyoeleza: “Lakini huyu [Yesu Kristo], alipokwisha kutoa kwa ajili ya dhambi dhabihu moja idumuyo hata milele, aliketi mkono wa kuume wa Mungu; tangu hapo akingojea hata adui zake wawekwe kuwa chini ya miguu yake.” (Waebrania 10:12, 13) Ulipofika wakati wa Kristo kuanza kutawala, Yehova alimwambia hivi: “Nenda hali ukitiisha [au, ukishinda] katikati ya adui zako.”—Zaburi 110:1, 2, 5, 6, NW.

 9. (a) Kwa sababu gani si kila mtu anayetaka ufalme wa Mungu? (b) Serikali ya Mungu inapoanza kutawala, mataifa wanafanya nini?

⁹ Je! linaonekana kuwa jambo geni kwamba kungekuwa na adui ya serikali ya Mungu? Lijapoonekana kuwa hivyo, si kila mtu anataka kuishi chini ya serikali inayowataka raia zake wafanye yaliyo haki. Basi baada ya kusimulia namna Yehova na Mwanawe wangenyakua utawala wa ulimwengu, Biblia inasema, “na mataifa walikasirika.” (Ufunuo 11:15, 17, 18) Mataifa hayo hayaukaribishi ufalme wa Mungu kwa sababu Shetani anayaongoza vibaya ili yaupinge.

10, 11. (a) Serikali ya Mungu inapoanza kutawala. kunatukia nini mbinguni? (b) Kunaukia nini duniani? (c) Basi ni jambo gani la maana tunalotaka kulikumbuka?

¹⁰ Serikali ya Mungu inapoanza kutawala, Shetani na malaika zake wanakuwa bado wakiishi mbinguni. Kwa kuwa wanapinga utawala wa Ufalme, papo hapo vita vinatokea. Matokeo yanakuwa kwamba Shetani na malaika zake wanatupwa nje ya mbingu. Halafu, sauti kuu inasema: “Sasa kumekuwa wokovu, na nguvu, na ufalme wa Mungu wetu, na mamlaka ya Kristo wake.” Ndiyo, hapo utawala wa serikali ya Mungu unaanza! Na kwa vile Shetani na malaika zake wameondolewa mbinguni, kunatokea shangwe huko. “Kwa hiyo shangilieni, enyi mbingu, nanyi mkaao humo,” Biblia inasema.—Ufunuo 12:7-12.

¹¹ Je! huu ni wakati wa dunia kufurahi vilevile? Hapana! Badala yake, kunatokea wakati wa taabu kubwa sana ambayo haijapata kuwa duniani. Biblia inatuambia hivi: “Ole wao wanaokaa kwa dunia na bahari! Kwani yule Diabolo ameshuka kwenu mwenye gazabu nyingi kwa sababu anajua ana wakati mufupi tu.” (Ufunuo 12:12, ZSB) Basi hili ni jambo la maana kukumbukwa: Mwanzo wa utawala wa ufalme wa Mungu hauletei dunia amani na usalama mara hiyo. Amani ya kweli itakuja baadaye ufalme wa Mungu utakapochukua mamlaka kamili ya kutawala dunia. Itakuwa hivyo ule ‘wakati mfupi’ utakapomalizika, Shetani na malaika zake watakapoondolewa wasipate kutaabisha tena mtu ye yote.

12. Sababu gani tunaweza kutazamia kwamba Biblia ingetuambia wakati ufalme wa Mungu ungeanza kutawala?

¹² Lakini ni wakati gani Shetani anapotupwa nje ya mbingu, kisha anafanyiza taabu duniani kwa ‘wakati mfupi tu’? Ni wakati serikali ya Mungu inapoanza kutawala? Je! Biblia inatoa jibu? Imetupasa tuitazamie kujibu. Kwa sababu gani? Kwa sababu tangu zamani sana Biblia iliutabiri wakati Mwana wa Mungu angetokea akiwa binadamu mara ya kwanza hapa duniani ili awe Masihi. Kwa kweli, ilionyesha mwaka wenyewe ambao angekuwa Masihi. Basi, namna gani kule kuja kwa Masihi, au Kristo, ambalo ndilo jambo la maana zaidi, ili aanze utawala wake wa Ufalme? Bila shaka tungeitazamia Biblia ituambie vilevile wakati jambo hilo lingetukia!

13. Biblia inatabiri namna gani mwaka wenyewe ambao Masihi alitokea duniani?

¹³ Lakini labda mtu atauliza: ‘Ni wapi Biblia inapotabiri mwaka wenyewe ambao Masihi alitokea duniani?’ Kile kitabu cha Biblia cha Danieli kinasema: “Tangu kutokea kwa lile neno la kurudisha na kujenga upya Yerusalemu mpaka Masihi yule Kiongozi, kutakuwako juma saba, pia juma sitini na mbili,” au zote pamoja juma 69. (Danieli 9:25, NW) Walakini, hizo si juma halisi 69 zenye jumla ya siku 483 tu, au zinazozidi kidogo mwaka mmoja. Hizo ni juma 69 za miaka, au miaka 483. (Linganisha Hesabu 14:34.) Amri hiyo ya kurudisha na kujenga upya kuta za Yerusalemu ilitolewa mwaka 455 K.W.K.a (Nehemia 2:1-8) Hivyo juma hizo 69 za miaka zilimalizika miaka 483 baadaye, mwaka 29 W.K. Na huo ndio mwaka wenyewe ambao Yesu alimfikia Yohana iii abatizwe! Pindi hiyo alipakwa mafuta kwa roho takatifu akawa ndiye Masihi, au Kristo.—Luka 3:1, 2, 21-23.

SERIKALI YA MUNGU INAPOANZA KUTAWALA

14. Ule “mti” unaotajwa katika Danieli sura ya 4 unafananisha nini?

¹⁴ Basi, ni wapi Biblia inapotabiri mwaka ambao Kristo anaanza kutawala akiwa mfalme wa serikali ya Mungu? Ni katika kitabu iki hiki cha Biblia cha Danieli. (Danieli 4:10-37) Humo mti mkubwa mno ambao urefu wake unafika mbinguni, unatumiwa kufananisha Mfalme Nebukadreza wa Babeli. Wakati huo ndiye aliyekuwa mtawala-mwanadamu aliye mkuu zaidi. Walakini, Mfalme Nebukadreza alilazimika kujua kwamba mtu fulani aliye juu kuliko yeye alikuwa akitawala. Huyo ni “Yeye aliye juu,” au “Mfalme wa mbinguni,” Yehova Mungu. (Danieli 4:34, 37) Kwa hiyo, kwa njia iliyo ya maana zaidi, mti huo ambao urefu wake unafika mbinguni, unafananisha ule utawala mkuu kabisa wa Mungu, hasa kuhusiana na dunia yetu. Utawala wa Yehova ulionyeshwa wakati fulani kupitia ufalme ule uliosimamishwa juu ya taifa la Israeli. Hivyo wale wafalme wa kabila la Yuda waliotawala Waisraeli walisemwa kuwa ‘waliketi katika kiti cha enzi cha [Yehova].’—1 Mambo ya Nyakati 29:23.

15. “Mti” huo ulipokatwa, sababu gani pingu ziliwekwa juu yake?

¹⁵ Kulingana na masimulizi ya Biblia yaliyo katika Danieli sura ya 4, mti huo ambao urefu wake unafika mbinguni ulikatwa. Walakini, kisiki chake kiliachwa, na pingu za chuma na za shaba nyekundu (NW) zikawekwa juu yake. Hiyo ingezuia kisiki hicho kisichipuke mpaka ufike wakati wa Mungu wa kuziondoa pingu hizo na kukiacha kianze kuchipuka tena. Lakini utawala wa Mungu ulikatwa namna gani na wakati gani?

16. (a) Utawala wa Mungu ulikatwa namna gani na wakati gani? (b) Yule mfalme wa Yuda aliyekuwa wa mwisho kuketi ‘katika kiti cha enzi cha Yehova’ aliambiwa nini?

¹⁶ Baadaye, ufalme ule wa Yuda ambao Yehova alikuwa amesimamisha ukawa wenye upotovu sana hata akaruhusu Mfalme Nebukadreza auharibu, aukate. Hilo lilitukia mwaka wa 607 K.W.K. Wakati huo Sedekia, mfalme wa mwisho wa Yuda kukaa katika kiti cha enzi cha Yehova, aliambiwa hivi: “Ivue taji; . . . hiki nacho hakitakuwa tena, hata atakapokuja yeye ambaye ni haki yake; nami nitampa.”—Ezekieli 21:25-27.

17. Ni kipindi gani cha wakati kilichoanza mwaka 607 K.W.K.?

¹⁷ Hivyo utawala wa Mungu, uliofananishwa na ‘miti huo,’ ulikatwa mwaka wa 607 K.W.K. Hakukuwako tena serikali ya kuwakilisha utawala wa Mungu duniani. Hivyo, katika mwaka 607 K.W.K. kipindi cha wakati kilianza ambacho Yesu Kristo baadaye alikitaja kuwa “nyakati zilizowekwa za mataifa,” (NW), au “majira ya Mataifa.” (Luka 21:24) Katika muda wa hizo “nyakati zilizowekwa” Mungu hakuwa na serikali ya kuwakilisha utawala wake duniani.

18. Ni nini lililotazamiwa kutukia wakati wa kumalizika kwa “nyakati zilizowekwa za mataifa”?

¹⁸ Ni jambo gani lililopasa kutukia wakati wa kumalizika kwa hizo “nyakati zilizowekwa za mataifa”? Yehova alipaswa ampe mamlaka ya kutawala Yeye “ambaye ni haki yake.” Huyo ni Yesu Kristo. Basi tukiweza kujua wakati “nyakati zilizowekwa za mataifa” zilipomalizika, tutajua wakati Kristo anapoanza kutawala akiwa mfalme.

19. Utawala wa Mungu juu ya dunia ungekatizwa kwa muda wa “nyakati” ngapi?

¹⁹ Kulingana na Danieli sura ya 4, hizo “nyakati zilizowekwa” zingekuwa “nyakati saba.” Danieli anaonyesha kwamba kungekuwako “nyakati saba” ambazo katika hizo utawala wa Mungu, ukifananishwa na ule “mti,” haungekuwa ukiisimamia dunia. (Danieli 4:16, 23) “Nyakati saba” hizo zingekuwa muda gani?

20. (a) “Wakati” mmoja ni muda gani? (b) “Nyakati saba” ni muda gani? (c) Sababu gani tunahesabu siku moja kuwa mwaka?

²⁰ Katika Ufunuo sura ya 12, mistari 6 na 14, tunajifunza

kwamba siku 1,260 zinalingana na “wakati [yaani, wakati 1] na nyakati [yaani, nyakati 2] na nusu ya wakati.” Hiyo ni jumla ya nyakati 3 ¹/₂. Basi “wakati” ungelingana na siku 360. Kwa hiyo, “nyakati saba” zingekuwa 7 mara 360, au siku 2,520. Basi tukihesabu siku moja kuwa mwaka, kulingana na kanuni moja ya Biblia, zile “nyakati saba” zinakuwa miaka 2,520.—Hesabu 14:34; Ezekieli 4:6.

21. (a) “Nyakati zilizowekwa za mataifa” zinaanza na kumalizika lini? (b) Serikali ya Mungu inaanza kutawala wakati gani? (c) Sababu gani bado inafaa tuombe ufalme wa Mungu uje?

²¹ Tumekwisha kujifunza kwamba “nyakati zilizowekwa za mataifa” zilianza mwaka wa 607 K.W.K. Hivyo kwa kuhesabu miaka 2,520 tangu tarehe hiyo, tunafikia mwaka wa 1914 W.K. Huo ndio mwaka ambao hizo “nyakati zilizowekwa” zilimalizika. Mamilioni ya watu ambao bado wanaishi wanayakumbuka matukio ya mwaka wa 1914. Katika mwaka huo, Vita ya Ulimwengu ya Kwanza ilianzisha kipindi cha taabu kubwa sana ambacho kimeendelea mpaka wakati wetu. Maana yake ni kwamba Yesu Kristo alianza kutawala akiwa mfalme wa serikali ya Mungu ya kimbingu katika mwaka wa 1914. Na kwa sababu ufalme huo umekwisha kuanza kutawala, sasa inafaa sana tuombe “uje” na kufuta taratibu (mfumo) mbovu ya mambo ya Shetani itoke katika dunia hii!—Mathayo 6:10; Danieli 2:44.

22. Ni ulizo gani ambalo huenda watu fulani wakauliza?

²² Hata hivyo labda mtu atauliza: ‘lkiwa Kristo amekwisha kurudi ili atawale katika ufalme wa Baba yake, sababu gani hatumwoni?’

[Maelezo ya ziada]

[Chati katika ukurasa wa 140, 141]

Katika mwaka wa 607 K.W.K. ufalme wa Mungu wa Yuda ulianguka. Katika mwaka wa 1914 W.K. Yesu Kristo alianza kutawala akiwa mfalme wa serikali ya Mungu ya kimbingu

607 K.W.K.—1914 W.K.

Oktoba, 607 K.W.K.—Oktoba, 1 K.W.K. = MIAKA 606

Oktoba, 1 K.W.K.—Oktoba, 1914 W.K. = MIAKA 1,914

NYAKATI SABA ZA MATAIFA = MIAKA 2,520

[Picha katika ukurasa wa 134]

“Wakati huu ndipo unapowarudishia Israeli ufalme?”

[Picha katika ukurasa wa 139]

Ule mti mrefu unaotajwa katika Danieli sura ya 4 unafananisha utawala wa kimungu. Kwa muda fulani ulitenda kazi kupitia ufalme wa Yuda

[Picha katika ukurasa wa 140, 141]

Ule mti ulikatwa wakati ufalme wa Yuda ulipoharibiwa