Maoni Ya Biblia Juu Ya Amani Na Usalama

Watu wengi huangalia mambo juujuu tu kwa kuusadiki ule unaoonekana kuwa mwendo wa kuelekea kwenye mwungamano mkubwa zaidi wa ulimwengu na amani na usalama ambao ungeweza kuletwa na umoja huo. Wanatumaini kwamba mwendo kama huo utaongoza kwenye ulimwengu ulio bora zaidi. Lakini Biblia huonyesha kwamba mengi yanahusika kuliko yale yanayoonekana juujuu.

HABARI ya amani na usalama ni yenye kupendeza hasa kwa Wakristo kwa sababu ya yale ambayo kwa kupuliziwa roho mtume Paulo aliandikia kundi la Kikristo la karne ya kwanza. Maneno yake yamerekodiwa katika Biblia kwenye 1 Wathesalonike 5:3: “Wakati wasemapo, Kuna amani na salama, ndipo uharibifu uwajiapo kwa ghafula, kama vile utungu umjiavyo mwenye mimba, wala hakika hawataokolewa.” Andiko hilo latokeza maswali ya maana.

Amani na Usalama

—Utangulizi wa Nini?

Ukisoma maneno ya Paulo yaliyotangulia yale yaliyonukuliwa juu, utaona kwamba wale wasemao “amani na salama” si Wakristo walio macho, bali, ni watu mmoja mmoja walio katika hali ya usingizi kuhusu yale yanayotendeka kweli kweli. Wamo katika hali ya hatari lakini hawang’amui hivyo kwa sababu wanafikiri kwamba hali ya mambo yaonyesha kuna matazamio mazuri huko mbele. Ingawaje, Paulo alisema hivi kuhusu Wakristo: “Lakini, ndugu, kwa habari ya nyakati na majira, hamna haja niwaandikie.” (1 Wathesalonike 5:1) Naam, twapaswa kuwa macho kuhusu orodha ya wakati ya Mungu kwa matukio. Kwa nini? Kwa sababu Paulo alisema kwamba wakati wa uharibifu wa ghafula, uitwao “siku ya Bwana [Yehova, NW],” unakuja “kama vile mwivi ajavyo usiku.”—1 Wathesalonike 5:2.

Maongezi yaliyotabiriwa ya amani na usalama yanahusisha nini? Kwa wazi, ni lazima yawe zaidi ya maongezi tu. Wanadamu wamekuwa wakiongea juu ya amani kwa ambao urefu wake unakaribia kulingana na ule ambao wamekuwa wakipigana vita. Ni lazima maneno ya Paulo yawe yakielekeza kwenye wakati ambao mataifa yanaonekana kuwa yanatimiza amani na usalama katika njia yenye kutokeza. Lakini hilo linakuwa jambo la kijuujuu tu. Amani na usalama ionekanayo kuwa ya kweli iongozayo kwenye uharibifu wa ghafula kwa wazi si amani halisi wala usalama wa kweli.

Yesu pia aliongea kuhusu uharibifu huo wa ghafula. Aliuita “dhiki kubwa, ambayo haijatokea namna yake tangu mwanzo wa ulimwengu hata sasa, wala haitakuwapo kamwe.” Mamia kadhaa ya miaka kabla ya Yesu, nabii Danieli pia alisema juu yayo, naye akaieleza kuwa “wakati wa taabu, mfano wake haukuwapo tangu lilipoanza kuwapo taifa hata wakati uo huo.”—Mathayo 24:21; Danieli 12:1.

Uwe unaitwa dhiki kubwa au uwe unaitwa wakati wa taabu—katika yoyote ya hali hizo, kulingana na unabii mbalimbali, utaondolea mbali kila alama ya mfumo wa Shetani wa kidunia. Badala ya kumaanisha kibali cha kimungu, maongezi ya amani na usalama yaliyotolewa unabii yanaongoza kwenye hali ya kinyume kabisa!—Linganisha Sefania 3:8.

Hali ya Wakati Yafunuliwa

Je! miendo ya hivi majuzi inayoonekana kuelekea kwenye mwungamano mkubwa zaidi wa ulimwengu na matumaini ya amani na usalama yanayotokana nayo ni utimizo wa onyo la Paulo la kiunabii? Kama vile gazeti hili limeonyesha mara nyingi, tangu 1914 tumeshuhudia utimizo wa unabii mwingi wa Biblia unaohusu kuwapo kwa Yesu kwa kimbingu katika mamlaka ya Ufalme. (Mathayo, sura za 24, 25; 2 Timotheo 3:1-5; Ufunuo 6:1-8) Yesu alionyesha kwamba siku ya Yehova, wakati uharibifu wa ghafula utawajilia waovu, itafika wakati washiriki wa kizazi cha watu walioshuhudia mwanzo wa wakati huu wangali hai.—Luka 21:29-33.

Mtume Paulo pia alionyesha hali ya wakati. Alisema hivi: “Wanapokuwa wakiongea juu ya amani na usalama, mara moja pigo lawajia.” Fasiri hiyo ya maneno ya Paulo katika The New English Bible inaonyesha kwa wazi kwamba dhiki kubwa yatokea “wanapokuwa wakiongea.” Kama vile mwivi usiku—asivyotazamiwa—uharibifu utakuja wakati usipotazamiwa hata kidogo, wakati fikira za wanadamu wengi ziko kwenye amani na usalama wao wanaotumainia. Kwa hiyo, ingawa wakati huu hatuwezi kusema kwa kukata maneno kwamba hali iliyopo ya amani na usalama inatimiza maneno ya Paulo—au ni kwa kadiri gani maongezi ya amani na usalama bado yatapasa kusitawi—uhakika wa kwamba maongezi hayo yanasikika sasa kwa kadiri isiyo na kifani unaweka Wakristo chonjo kwa uhitaji wa kuendelea kukesha nyakati zote.

‘Msukumano’ Kati ya Mamlaka Kubwa za Ulimwengu

Aliposema kuhusu wakati wa taabu, nabii Danieli pia alionyesha hali ya wakati. Alionyesha kwamba wakati wa taabu ungetukia mwishoni mwa mpambano ambao umekuwako kwa muda mrefu kati ya vikundi viwili vya mamlaka, kimoja kiitwacho “mfalme wa kaskazini” na kile kingine, “mfalme wa kusini.” (Danieli 11:5-43) Tangu mwisho wa Vita ya Ulimwengu 2, vikundi vya mamlaka hivyo vimekuwa vikiwakilishwa na “mfalme wa kusini” wa kibepari na “mfalme wa kaskazini” wa kiujamaa.

Danieli alitabiri kwamba ushindani huo mkali kati ya vikundi hivyo viwili, kama vile ulivyoonwa pindi ya miaka 45 iliyopita, ungekuwa kama “msukumano,” kama wapigana mweleka wawili wakijitahidi kushinda. Hivi majuzi, msukumano waonekana kana kwamba umepungua. Hivyo, katika Mei mwaka uliopita, waziri wa nchi za kigeni wa Urusi alitangaza rasmi mwisho wa Vita Baridi. Katika Juni, gazeti la Time lilirejezea mkutano wa mazungumzo kati ya United States na Urusi likasema hivi: “Baadhi ya mapatano juu ya udhibiti wa kuunda silaha na kuzijaribu silaha za nyukilia yangalionekana kuwa utimilizo wenye kushtua miaka michache iliyopita. Sasa, hata yanapoangaliwa yote pamoja, huonekana kuwa hafifu.”

Kupita kwa wakati kutadhihirisha kama urafiki huo kati ya mamlaka kubwa mbili hizo ni wa muda au ni wa kudumu. Ingawaje, jambo moja ni wazi. Kipindi cha wakati kilichotajwa na Yesu kimesonga mbele sana na mambo yanayotukia ulimwenguni leo yanaonyesha kwamba tuko karibu na matukio yaliyotabiriwa na mtume Paulo na nabii Danieli. Hata ingawa matukio ya kisiasa ya hivi majuzi yamesababishwa kwa kadiri fulani na makanisa ya Jumuiya ya Wakristo, hayataongoza kwenye amani ya kudumu. Ushuhuda ni kwamba yataongoza kwenye hali ya kinyume kabisa kwa mataifa ya ulimwengu huu.

[Picha katika ukurasa wa 6]

Kupita kwa wakati kutadhihirisha ni muda gani

urafiki unaoonekana kuwako

kati ya zile mamlaka mbili kubwa utadumu

[Hisani]

USSR Mission to the UN