Faraja Kotoka kwa Yule Mungu wa Amani

“Endeleeni kufarijiana kwa maneno hayo.”​—1 WATHESALONIKE 4:18, NW.

 1. Ni maombi gani yaliyofanywa na Paulo yanayoonyesha alipendezwa na amani?

PAULO, mtume, alitamani sana kundi la Kikristo lifurahie amani. Hivyo, 13 za barua zake, kama zilivyohifadhiwa kwa ajili yetu katika Maandiko yaliyoongozwa na Mungu, zinaanza kwa kuwaomba wale walioandikiwa wapate kufurahia amani inayotoka kwa Mungu. Kwa mfano, kwa lile kundi changa kama kifaranga katika Thesalonike, Paulo anaandika hivi: “Na mwe na fadhili zisizostahilika na amani.” Kuelekea mwisho wa barua iyo hiyo yeye anawaomba hivi: “Yule yule Mungu wa amani na awatakase ninyi kabisa. Na roho na nafsi na mwili wenu akina ndugu vihifadhiwe vikiwa kamili kwa kila namna katika njia isiyo na lawama kwenye kuwapo kwa Bwana wetu Yesu Kristo.”​—1 Wathesalonike 1:1; 5:23, NW.

 2. (a) Ni hangaiko la namna gani ambalo Paulo alionyesha kuelekea kundi? (b) Wazee Wakristo leo wanaweza kufuataje mfano wa Paulo?

² Paulo na wenzi wake hawakuwa wamejipumzisha wasipate ‘taabu na masumbufu’ ya kufanya kazi kati ya waamini hawa wapya. Paulo alisema: “Tulikuwa wapole katikati yenu, kama vile mlezi awatunzavyo watoto mwenyewe. Vivyo hivyo nasi tukiwatumaini kwa upendo mwingi, tuliona furaha kuwapa si Injili ya Mungu tu, bali na [nafsi] zetu pia, kwa sababu mmekuwa wapendwa wetu.” Je! hatuwezi kuhisi katika maneno hayo hangaikio la ndani sana, ule upendo wa kweli wenye kina kirefu ambao Paulo alijisikia akiwa nao kuelekea kundi hilo? Kwa kweli, hicho ni kielelezo cha upendo wa namna ambayo wazee Wakristo wanaonyesha katika makundi yapatayo 50,000 ya Mashahidi wa Yehova kuzunguka dunia leo.​—1 Wathesalonike 2:7-9; Yohana 13:34, 35; 15:12-14.

 3. (a) Timotheo aliweza kulifaidije kundi la Thesalonike? (b) Jambo hilo linalingana na nini leo?

³ Yule Mjaribu, Shetani, alikuwa ameleta dhiki nyingi juu ya Wakristo hawa Wathesalonike. Kwa hiyo Paulo akawapelekea Timotheo, ili ‘kuwafanya imara na kuwafariji kwa habari ya imani yao.’ Timotheo alimrudia Paulo katika Athena akiwa na habari ya kuchangamsha moyo juu ya uaminifu na upendo wao. Wote walifaidika sana kujua kwamba kila mtu na mwenzake walikuwa na imani na ukamilifu, nao wakaendelea kumsihi sana Mungu awajazie ukosefu wo wote waliokuwa nao. (1 Wathesalonike 3:1, 2, 5-7, 10) Jambo hilo, pia, linaonyesha mpango wa kitheokrasi uliopo leo, huku waangalizi wanaosafiri wakiyajenga makundi, hata mahali ambako Mashahidi wa Yehova wanatumikia chini ya marafuku au mateso machungu.​—Isaya 32:1, 2.

“Kwenye Kuwapo Kwake”

 4, 5. (a) Ni ombi gani ambalo Paulo anafanya hapa, na kwa sababu gani litupendeze sisi kwa njia ya pekee sasa? (b) Kwa sababu gani siku zetu zina umaana wa pekee?

⁴ Mtume Paulo anamalizia sehemu hii ya barua yake kwa ombi hili: “Bwana na awaongeze na kuwazidisha katika upendo, ninyi kwa ninyi, na kwa watu wote, kama vile sisi nasi tulivyo kwenu; apate kuifanya imara mioyo yenu iwe bila lawama katika utakatifu mbele za Mungu, Baba yetu, wakati wa kuja kwake Bwana wetu Yesu pamoja na watakatifu wake wote.”​—1 Wathesalonike 3:12, 13.

⁵ Hapa Paulo alikuwa akitazama mbali katika wakati ujao, kwenye wakati wa ‘kuwapo kwa Yesu na umalizio wa mfumo wa mambo’ wakati “Mwana wa mtu atakapofika katika utukufu wake, na malaika wote pamoja naye.” Mfalme wetu wa kimbingu alifika mwaka wa 1914. Akiwa katika kiti chake cha kifalme chenye utukufu kisichoonekana, sasa Yesu anahukumu mataifa na watu wa dunia, akiwatenganisha watoke kati yao wanadamu wanyenyekevu, wenye mfano wa kondoo ili wahifadhiwe kuipita ile “dhiki kubwa” na ili wapate uzima wa milele katika dunia-paradiso.​—Mathayo 24:3-21; 25:31-34, 41, 46, NW.

Maagizo kwa Faidi Yetu

 6. Ni kitia-moyo gani cha Paulo ambacho ni lazima tutii sasa?

⁶ Je! Wewe ni mmoja anayejitahidi kufikia mradi huo wa uzima wa milele? Ikiwa ndivyo, ni lazima utii yale ambayo Paulo hapa anaandikia Wathesalonike: “Iliyobaki, ndugu, tunakusihini na kuwaonya kwamba mwenende katika Bwana Yesu; kama mlivyopokea kwetu jinsi iwapasavyo kuenenda na kumpendeza Mungu, kama nanyi mnavyoenenda, vivyo hivyo mpate kuzidi sana. Kwa kuwa mnajua ni maagizo gani tuliyowapa kwa Bwana Yesu.” (1 Wathesalonike 4:1,2) Ni nini baadhi ya “maagizo” ambayo Paulo anakazia hapa?

 7. (a) Ni ‘agizo’ gani la maana linalotolewa hapa? (b) Tukiisha kuwa tumepokea roho ya Mungu, kwa sababu gani ni lazima tusije kamwe kuacha kujihadhari?

⁷ ‘Agizo’ la kwanza linahusu maadili. Paulo anasema kwa kutoboa wazi hivi: “Maana haya ndiyo mapenzi ya Mungu, kutakaswa kwenu, mwepukane na uasherati; kila mmoja wenu ajue kuuweza mwili wake katika utakatifu na heshima; si katika hali ya tamaa mbaya, kama Mataifa yasiyomjua Mungu.” Jambo la kufurahisha ni kwamba, sisi tumepata ‘kuwajua’ Mungu na Mwanaye, Yesu Kristo, na tunajitahidi kuufikia uzima wa milele. Lingekuwa jambo la kusikitisha kama nini kama tungejiacha tukokotwe turudishwe ndani ya matope ya kilimwengu ya ukosefu wa adili! Jambo la kuhuzunisha ni kwamba, wengine wameokoka miaka mingi ya kukaa katika kambi za mateso na magereza, au wakatumia muda wa maisha yao katika utumishi wa bidii wa misionari, halafu kwa kusikitisha wanakuja kumwacha Mjaribu awanase kwa kutofuata maadili. Kwa kuwa tumekwisha kupokea roho takatifu ya Mungu, na ‘tusiihuzunishe’ kamwe kupitia mwenendo mbaya wa ngono!​—1 Wathesalonike 4:3-8; Yohana 17:3; 1 Wakorintho 10:12, 13; Waefeso 4:30

 8, 9. (a) “Upendo wa kidugu” ni nini? (b) Tunaweza kusitawishaje upendo huo, na faida itakuwa nini?

⁸ ‘Agizo’ linalofuata la Paulo linahusu phil·a·del·phiʹa, “upendo wa kidugu.” (1 Wathesalonike 4:9, 10, NW) Huo ni wonyesho wa pekee wa upendo unaoongozwa na kanuni, a·gaʹpe, ambao Paulo anapendekeza kwa uchangamfu pia hapa katika mstari wa 9, vile vile katika sura ya 3, mistari 6 na 12. Phil·a·del·phiʹa ni shauku ya kindani sana ya upendo, kama ile ambayo inaonekana ilikuwa kati ya Yesu na Petro, na kati ya Daudi na Yonathani. (Yohana 21:15-17; 1 Samweli 20:17; 2 Samweli 1:26) Shauku hiyo ya upendo inaweza kuongezwa kwenye a·gaʹpe, katika kusitawisha uenzi wa karibu, kwa mfano kama inavyoonekana katika kufurahiana ambako wengi wa Mashahidi wa Yehova wanapata kwa kushirikiana pamoja katika huduma ya painia na utendaji mwingine wa kitheokrasi.

⁹ Paulo anasema: “Mwendelee kufanya hivyo kwa kipimo kilichojaa zaidi.” Tunaweza sikuzote kupanuka katika upendo wetu wa kidugu. Sifa hiyo nzuri sana inatiririka na kufurika hasa wakati wazee na watumishi wa huduma wanapoongoza katika utumishi wenye bidii wa Ufalme. Wakati wote walio kundini wanapojishughulisha katika ‘kuutafuta kwanza Ufalme,’ tofauti zinazotokea kwa sababu ya kutokamilika kwa kibinadamu, migongano ya nyutu na matatizo kama hayo zinakuwa mambo yenye umaana mdogo. Acheni sikuzote tukaze macho yetu juu ya ule mradi.​—Mathayo 6:20, 21, 33; 2 Wakorintho 4:18.

10. Sisi kama Wakristo tunaweza ‘kuenendaje kwa adabu’?

¹⁰ Hapa Paulo anahusisha ndani ‘agizo’ jingine​—kwamba tufanye shabaha yetu iwe kuishi kwa utulivu, tushike letu wenyewe, na kufanya kazi kwa mikono yetu. ‘Tunapoenenda kwa adabu’ hivyo katika maisha zetu za kila siku, tukionyesha upendo wenye kuongozwa na kanuni na shauku ya kidugu pia, mahitaji yetu yote yatatoshelezwa.​—1 Wathesalonike 4:11, 12; Yohana 13:35; Warumi 12:10-12.

Tunafarijiwa na Tumaini la Ufufuo

11. (a) Kwa sababu gani sasa Paulo anaitokeza habari ya ufufuo? (b) Shauri hili linalotolewa na Paulo linapasa kuwa na matokeo gani juu yetu?

¹¹ Ndipo mtume anapoelekeza kwenye lile tumaini zuri sana la ufufuo. Lakini kwa sababu Paulo aingize habari hiyo katika mazungumzo? Yeye alitaka kuwatia nguvu ndugu zake wavumilie mateso yaliyokuwa yakiwajia. Walikuwa katika hatari ya kupoteza maisha zao. Inaonekana kwamba wakati huo wengine wao walikuwa wamelala usingizi wa kifo. Ndugu hao walihitaji faraja. (1 Wathesalonike 2:14-20) Wakifikiri kwamba “kuwapo” kwa Kristo kulikuwa karibu, wao walitaka kujua ni jambo gani lingepata waamini wenzao waliokuwa wamekwisha kufa. Yale ambayo sasa Paulo anaandika hayawatolei faraja tu wale wanaofiwa na wapendwa wao wa Kikristo bali yanawatolea kitia-moyo pia wavumilie mpaka “siku” ya Yehova itakapotokea kwa ghafula. Shauri la Paulo linapasa litusaidie sisi sote tuonyeshe uthabiti wa kiroho tunapoendelea kuzitangaza habari njema, tukiutazamia mwisho kamili wa mfumo huu wa mambo.​—2 Wathesalonike 1:6-10.

12. Ni faraja gani ya kweli tunayoweza kuwa nayo mpendwa akifa, na itatoka kwenye chanzo gani?

¹² Paulo anasema: “Ndugu, hatutaki msijue habari zao waliolala mauti, msije mkahuzunike kama na wengine wasio na matumaini.” (1 Wathesalonike 4:13) Ni faraja kama nini na amani ya akili inayopatikana katika tumaini la ufufuo! Karibu miaka mitano baadaye, Paulo angeitokeza barua yake ya pili kwa Wakristo katika Korintho kwa kusema hivi: “Na mwe na fadhili zisizostahilika na amani kutoka kwa Mungu Baba yetu na Bwana Yesu Kristo. Na awe mbarikiwa Mungu na Baba ya Bwana wetu Yesu Kristo, Baba wa rehema zilizo nyororo na Mungu wa faraja yote, ambaye hutufariji katika dhiki yetu yote, ili tuweze kufariji wale walio katika dhiki ya namna yo yote kupitia faraja ambayo kwayo sisi tunafarijiwa na Mungu.”​—2 Wakorintho 1:2-4, NW.

13, 14. (a) Kwa sababu gani Paulo alitaka Wakristo wawe wanajua maana ya kifo? (b) Maandiko yanaonyesha hali ya wafu ni nini?

¹³ Mtume hakutaka sisi tuwe hatujui hali ya wafu. Baada ya muda fulani, uasi-imani mkubwa ungeingia kati ya wenye kujiita Wakristo, hata wangerudia falsafa za Kibabuloni na za Kigiriki. Waasi-imani hao wangekubali fundisho la Plato la kwamba nafsi inakuwa imerithi kutokufa​—ambalo sasa ni fundisho la msingi katika sehemu zote za milki ya ulimwengu ya dini ya uwongo. Mawazo ya kifumbo yanayohusiana na fundisho hilo la “maisha baada ya kufa,” yawe yanasemwa yatakuwa mbinguni, katika purgatori, au mahali pa mateso ya milele, hayatoi faraja ya kweli. Zaidi ya hilo, fundisho la kurithi kutokufa linapingana na fundisho la ufufuo, kwa maana mtu anawezaje kufufuliwa awe hai ikiwa nafsi haifi?

¹⁴ Hapa Paulo anaandika “habari zao waliolala mauti.” Ndiyo, “waliolala.” Mtu aliyelala hajui jambo lo lote wala hawezi kufanya kazi zo zote. (Linganisha Mhubiri 9:5, 10.) Kuna pindi moja wakati wa huduma ya Yesu aliposema kwamba Lazaro alikuwa ‘ameenda kupumzika’ na kwamba yeye, Yesu, ‘angemwamsha kutoka usingizini.’ Wanafunzi wa Kristo walipokosa kufahamu maneno hayo, “Yesu aliwaambia waziwazi: ‘Lazaro amekufa.’” Martha na Mariamu, dada za Lazaro walifarijiwa na tumaini la ufufuo, na Yesu akawaletea faraja nyingi zaidi. Lakini imani yao bila shaka iliimarika kama nini wakati Yesu alipofufua rafiki yake, akiwa tayari amekwisha kufa kwa siku nne, akamtoa katika usingizi wa kifo!—Yohana 11:11-14, 21-25, 43-45, NW.

15. (a) Tumanini letu katika ufufuo linatiwa nguvu kwa njia gani? (b) Tunaweza kusaidiwaje tujipatanishe na hali za sasa mpendwa akifa?

¹⁵ Mwujiza huu, pamoja na kazi nyingine alizofanya Yesu kufufua wafu, na ile hatua inayopita zote hizo ya Yehova kufufua Yesu mwenyewe​—matukio hayo yote yenye uthibitisho wa kutosha yanautia nguvu uhakika wetu katika lile tumaini zuri ajabu la ufufuo. (Luka 7:11-17; 8:49-56; 1 Wakorintho 15:3-8) Ni kweli kwamba kifo kinaleta huzuni na machozi. Na ni vigumu kuzoea kukaa bila kumwona mpendwa. Lakini ni faraja na nguvu kama nini tunazopata kutokana na uhakikisho wa kwamba Bwana Mwenye Enzi Kuu Yehova ‘atameza mauti hata milele; na atafuta machozi katika nyuso zote’! (Isaya 25:8; Ufunuo 21:4) Dawa mojapo iliyo bora ya kuondoa huzuni ni kuendelea kuwa na shughuli nyingi katika utumishi wa yule Mungu wa amani, kuwapa wengine lile tumaini la Ufalme linalochangamsha moyo ambalo sisi wenyewe tumelipokea kwa shukrani nyingi.​—Linganisha Matendo 20:35.

Utaratibu wa Hatua za Ufufuo

16, 17. (a) “Adui ya mwisho” atafanywaje awe si kitu? (b) Sasa ni utaratibu gani wa hatua za ufufuo ambao Paulo anaeleza?

¹⁶ Imani yetu ni yenye nguvu kwamba Yesu Kristo, ambaye ndiye “limbuko” la ufufuo na sasa ametawazwa kwenye mkono wa kuume wa Mungu katika mbingu, atayaendeleza makusudi matukufu ya Ufalme wa Yehova mpaka yakatimilie. (Waebrania 6:17, 18; 10:12, 13) Ni kama vile Paulo anavyosema katika barua nyingine: “Yeye [Yesu Kristo] ni lazima atawale akiwa mfalme mpaka Mungu awe ameweka adui wote chini ya miguu yake. Kikiwa ndicho adui wa mwisho, kifo kitafanywa kiwe si kitu.” Jinsi gani? Kwa sehemu moja itakuwa ni kupitia ufufuo na kuondolewa kwa matokeo ya kifo kilichotokana na Adamu. Mtume alikuwa ametoka tu kueleza jambo hilo kwa njia hii: “Kwa kuwa kifo ni kupitia mtu, ufufuo wa wafu ni kupitia mtu. Kwa maana kama vile katika Adamu wote wanakufa, hivyo pia katika yule Kristo wote watafanywa hai. Lakini kila mtu katika daraja lake mwenyewe: Kristo yule malimbuko, baada ya hapo wale walio wa Kristo wakati wa kuwapo kwake.” (1 Wakorintho 15:20-26, NW) Utaratibu huu wa hatua za ufufuo ndiyo ambao sasa Paulo anautaja katika barua yake ya Kwanza kwa Wathesalonike, akisema:

¹⁷ “Ikiwa imani yetu ni kwamba Yesu alikufa akainuka tena, vivyo, pia, wale ambao wamelala usingizi katika kifo kupitia Yesu Mungu atawaleta pamoja naye. Kwa maana hivi ndivyo sisi tunawaambia kwa neno la Yehova, kwamba sisi tulio hai tutakaookoka mpaka kuwapo kwa Bwana hatutawatangulia kwa vyo vyote wale ambao wamelala usingizi katika kifo; kwa sababu Bwana mwenyewe atashuka kutoka mbinguni akiwa na mwito wenye kuamuru akiwa na sauti ya malaika mkuu na akiwa na tarumbeta ya Mungu, na wale walio wafu katika muungano pamoja na Kristo watainuka kwanza.”​—1 Wathesalonike 4:14-16, NW.

18. Ni wakati gani walipofufuliwa wapakwa-mafuta “ambao wamelala usingizi katika kifo”?

¹⁸ Baada ya mwaka 1914, wakati wa “kuwapo” kwa Yesu katika mamlaka ya Ufalme, yeye, akiwa ndiye malaika mkuu, anatoa amri ya kimbingu ili wale “walio katika muungano pamoja na Kristo” wakusanyike. Kwa habari ya wapakwa-mafuta hao “ambao wamelala usingizi katika kifo,” mwito huo ulio kama tarumbeta unaagiza wapate ufufuo wa kiroho katika mbingu. Gazeti Mnara wa Mlinzi limetokeza kwa muda mrefu maoni ya kwamba ufufuo huo wa Wakristo wapakwa-mafuta kutoka kifoni ulianza mwaka 1918.

19. Ni wakati gani na jinsi gani wale waliobaki ‘watanyakuliwa katika mawingu,’ na kwa kusudi gani?

¹⁹ Lakini, namna gani juu ya Wakristo wapakwa-mafuta waliobaki duniani, ambao sasa ni kikundi kinachoendelea kupungua cha watu ambao hesabu yao ni chini ya 10,000? Hao, pia, ni lazima wamalize mwendo wa maisha yao ya kidunia wakiwa na uaminifu. Kama kwamba yeye alikuwa pamoja nao wakati wa kuwapo kwa Kristo, Paulo anaandika hivi: “Baadaye sisi tulio hai ambao tungali tupo tutanyakuliwa katika mawingu, pamoja na hao, tukakutane na Bwana hewani; na hivyo sikuzote tutakuwa pamoja na Bwana.” (1 Wathesalonike 4:17, NW; linganisha Ufunuo 1:10.) Hivyo, baada ya muda unaofaa, wale wote 144,000 watafufuliwa wakatumikie wakiwa makuhani na wafalme katika Mlima Sayuni wa kimbingu pamoja na Mwana-Kondoo, Yesu Kristo. “Huo ndio ufufuo wa kwanza.” (Ufunuo 14:1, 4; 20:4, 5) Lakini ni jambo gani linalongoja mabilioni ya wanadamu ambao sasa wamo makaburini?

20, 21. (a) Ni jambo gani lililo mbele ya mabilioni ya wanadamu walio katika makaburi yao? (b) Ni kikundi gani ambacho hakika hakitahitaji kamwe kufa kitoke duniani, na kwa sababu gani? (c) Watu mmoja mmoja wa kikundi hicho wakifa, kuna taraja gani la kufurahisha kwa ajili yao?

²⁰ Ingawa Paulo hawataji hao waziwazi katika barua yake ya kwanza kwa Wathesalonike, Ufunuo 20:12 unatuhakikishia kwamba “wafu, wakubwa kwa wadogo,” watafufuliwa wasimame mbele za kiti cha kifalme cha hukumu ya Mungu. (Ona pia Yohana 5:28, 29.) Lakini, leo “mkutano mkubwa” ambao una mamilioni ya watu umekwisha tayari kukusanywa mbele za kiti cha Ufalme hicho. Wakiwa kikundi. wao wataokolewa wakiwa hai waipite “dhiki kubwa” inayokaribia. Wao wanachungwa na yule Mwana-Kondoo na kuongozwa kwenye “chemchemi za maji yenye uhai,” ili wasihitaji kamwe kufa watoke duniani. Lakini kwa sababu ya uzee au tukio lisilotazamiwa, huenda wengine wao wakafa wakati wa “kuwapo” kwa Bwana. (Ufunuo 7:9, 14, 17; Mhubiri 9:7, NW) Itakuwaje kwa hao?

²¹ Lile tumaini lenye kufurahisha la ufufuo wa mapema liko mbele ya “kondoo wengine” wote hao, (Yohana10:16) Imani na kazi zao kama zile za Abrahamu wa kale zimekwisha kuwaingiza katika hali ya urafiki pamoja na Mungu. Kama wale wanaume na wanawaka wenye imani wanaosimuliwa katika Waebrania sura ya 11, “kondoo wengine” hao wa kisasa wamevumilia majaribu. Kufikiri kuzuri kunaonyesha kwamba wao, pia, watapata “ufufuo ulio bora,” na bila shaka wataupata mapema katika kipindi kitakachoifuata Har–Magedoni. (Waebrania 11:35: Yakobo 2:23) Kwa kweli, kila mmoja ambaye kwa imani ‘ameula mwili wa Yesu na kunywa damu yake’ ataushiriki utimizo wa ahadi hii yake: “Aulaye . . . anao uzima wa milele; nami nitamfufua siku ya mwisho.”​—Yohana 6:54; Warumi 5:18, 21; 6:23.

22. Tunaweza kufarijianaje?

²² Baada ya kulizungumza tumaini tukufu la ufufuo, Paulo anaonya hivi kwa upole: “Endeleeni kufarijiana kwa maneno hayo.” (1 Wathesalonike 4:18, NW) Halafu anazungumza mambo mengine ya maana kuhusu “kuwapo kwa Bwana wetu Yesu.” Hayo ni mambo gani? Ona makala inayosema “Amani Kutoka kwa Mungu​—Wakati Gani?”

Kwa Muhtasari—

◻ Ni maombi gani ambayo Paulo anafanya kwa ajili ya Wakristo?

◻ Ni“maagizo”gani ambayo mtume anatoa kwa faida yetu?

◻ Neno la Mungu linatufariji kwa njia gani kwa habari ya wafu?

◻ Ni utaratibu gani wa hatua za ufufuo ambayo Paulo anaeleza?