“Neno la Mungu . . . Hukazia Nguvu”

¹ “Neno la Mungu liko hai na hukazia nguvu,” akaandika mtume Paulo. (Ebr. 4:12) Alimaanisha nini kwa kusema hivyo? Neno la Mungu, au ujumbe wake, unaopatikana katika Biblia waweza kuwa na uvutano mkubwa kwa watu. Hekima ya Biblia ina nguvu ya kubadili maisha ya mtu yawe mazuri. Faraja na tumaini lake lawavuta binadamu kwa Mpaji-Uhai, Yehova Mungu. Ujumbe wake waweza kuwaongoza wenye mioyo minyofu kwenye barabara iongozayo kwenye uhai wa milele. Hata hivyo, ili kupata matokeo hayo, lazima tutumie Biblia tunapowahubiria wengine.

² Soma Andiko Upatapo Fursa: Inaonekana kwamba wahubiri wengi hawatumii sana Biblia milangoni. Wewe je? Kwa sababu yaonekana watu wengi hawana wakati wa kutosha kuwa na mazungumzo marefu, labda umezoea kutoa tu vichapo au kueleza kifupi andiko. Twawatia moyo wahubiri wote wajitahidi sana kusoma angalau mstari mmoja kutoka katika Biblia wanapohubiri habari njema, hivyo wakimruhusu mtu huyo aone kwamba ujumbe wetu kwa kweli watoka katika Neno la Mungu. Mara nyingi katika eneo letu twaweza kusoma andiko moja au mawili. Hakikisha kwamba hukai kwa muda mrefu zaidi.

³ Ijapokuwa watu wachache huzoea kusoma Biblia, ingali inaheshimiwa kwa ujumla. Hata watu wenye shughuli nyingi sana mara nyingi hukubali kusikiliza ujumbe unaosomwa moja kwa moja kutoka Neno la Mungu kwa dakika moja au mbili hivi. Andiko lifaalo likisomwa kwa uchangamfu na kuelezwa kifupi, nguvu ya neno la Yehova yaweza kuwa na matokeo mazuri kwa msikilizaji. Lakini waweza kupatanishaje mazungumzo yako ya mwanzoni pamoja na andiko la Biblia?

⁴ Jaribu Kufanya Hivyo Unapotoa Magazeti: Mwangalizi mmoja asafiriye hutumia Maandiko kwa matokeo anaposhiriki mahubiri ya kutoa magazeti. Yeye hubeba Biblia ndogo mfukoni mwake. Baada ya kutoa magazeti na kuelezea makala moja kifupi, yeye hufungua Biblia bila kukawia na kusoma mstari unaohusiana na makala hiyo. Waweza kufanya hivyo kwa kuuliza tu, “Unafikirije kuhusu ahadi hii yenye kutia moyo?” kisha uendelee kusoma andiko ulilochagua.

⁵ Weka mradi wa kumsomea kila mtu anayekusikiliza andiko moja au mawili ya Biblia. Nguvu yake yenye kuchochea yaweza kufungulia watu wengi njia ya kumkaribia Mungu.—Yn. 6:44.