“Watendaji wa Neno” Wenye Shangwe

‘Pokeeni kwa upole neno lile lililopandwa ndani, liwezalo kuziokoa nafsi zenu. Lakini iweni watendaji wa neno, wala si wasikiaji tu.’ —YAKOBO 1:21, 22.

1. Andiko letu la mwaka la 1996 lionweje?

“IWENI WATENDAJI WA NENO.” Taarifa hii sahili ina ujumbe wenye nguvu. Imetoka kwenye “Waraka wa Yakobo” katika Biblia, nayo itaonyeshwa katika Majumba ya Ufalme ikiwa andiko la mwaka la Mashahidi wa Yehova katika mwaka mzima wa 1996.

2, 3. Kwa nini ilifaa kwa Yakobo aandike barua yenye jina lake?

² Yakobo, ndugu-nusu ya Bwana Yesu, alikuwa mashuhuri katika kutaniko la mapema la Kikristo. Katika pindi moja baada ya ufufuo wa Yesu, Bwana wetu alimtokea Yakobo binafsi kisha akawatokea mitume wote. (1 Wakorintho 15:7) Baadaye, mtume Petro alipofunguliwa kimuujiza kutoka gerezani, alikiambia hivi kikundi kimoja cha Kikristo kilichokusanyika: “Kampasheni Yakobo na wale ndugu habari hizi.” (Matendo 12:17) Yaonekana kwamba Yakobo, ingawa yeye mwenyewe hakuwa mtume, alisimamia mkutano wa baraza linaloongoza katika Yerusalemu wakati mitume na wazee walipoamua kwamba haikuwa lazima wageuzwa-imani Wasio Wayahudi kutahiriwa. Yakobo alijumlisha mambo yote, na uamuzi uliothibitishwa na roho takatifu ulipelekewa makutaniko yote.—Matendo 15:1-29.

³ Kwa wazi, kusababu kwa Yakobo kwa njia ya ukomavu kulikuwa na mamlaka sana. Hata hivyo, kwa unyenyekevu alikubali kwamba yeye mwenyewe alikuwa tu “mtumwa wa Mungu, na wa Bwana Yesu Kristo.” (Yakobo 1:1) Barua yake iliyopuliziwa ina mashauri mengi mazuri na kitia-moyo kwa Wakristo leo. Ilimalizwa karibu miaka minne kabla ya shambulizi la kwanza la Waroma dhidi ya Yerusalemu lililofanywa na Jenerali Sestio Galo, baada ya habari njema kuhubiriwa kotekote “katika viumbe vyote vilivyo chini ya mbingu.” (Wakolosai 1:23) Hizo zilikuwa nyakati za hatari, na watumishi wa Yehova walijua vizuri kwamba hukumu Yake ilikuwa karibu kutekelezwa juu ya taifa la Kiyahudi.

4. Ni nini chaonyesha kwamba Wakristo wa mapema walikuwa na uhakika sana na Neno la Mungu?

⁴ Tayari Wakristo hao walikuwa na Maandiko ya Kiebrania yote na sehemu kubwa ya Maandiko ya Kigiriki. Kama ilivyoonyeshwa na marejezo yao mengi kwa maandiko ya zamani, waandikaji wa Biblia Wakristo kwa wazi walikuwa na uhakika mwingi katika Neno la Mungu. Vilevile, sisi pia twahitaji kujifunza Neno la Mungu kwa bidii na kulitumia maishani mwetu. Ili kuvumilia, twahitaji nguvu za kiroho na moyo mkuu ambao Maandiko Matakatifu huandaa.—Zaburi 119:97; 1 Timotheo 4:13.

5. Kwa nini twahitaji mwongozo wa kipekee leo, nasi tutaupata wapi?

⁵ Leo wanadamu wako ukingoni mwa “dhiki kubwa, ambayo haijatokea namna yake tangu mwanzo wa ulimwengu hata sasa, wala haitakuwapo kamwe.” (Mathayo 24:21) Kuokolewa kwetu kwategemea kuwa na mwongozo wa kimungu. Tunaweza kuupataje? Kwa kufungua mioyo yetu ipokee mafundisho ya Neno la Mungu lililopuliziwa kwa roho. Hilo litatuongoza ‘kuwa watendaji wa neno,’ kama ilivyokuwa na watumishi wa Yehova waaminifu-washikamanifu wa nyakati zilizopita. Ni lazima tusome na kujifunza Neno la Mungu kwa bidii na kulitumia kwa sifa ya Yehova.—2 Timotheo 2:15; 3:16, 17.

Kuvumilia kwa Shangwe

6. Kwa nini twapaswa kupata shangwe tunapokabili majaribu?

⁶ Akianza barua yake, Yakobo ataja shangwe, tunda la pili la roho ya Mungu. Aandika hivi: “Ndugu zangu, hesabuni ya kuwa ni furaha kabisa [“shangwe yote,” NW], mukianguka katika majaribu mbalimbali; mukifahamu ya kuwa kujaribiwa kwa imani yenu kunaleta uvumilivu. Sharti uvumilivu utimize kazi yake, mupate kuwa wakamilifu na watimilifu pasipo kupungukiwa na kitu.” (Yakobo 1:2-4, Zaire Swahili Bible; Wagalatia 5:22, 23) Yaweza kusemwaje kwamba ni ‘shangwe yote’ kukabili majaribu mengi? Hata Yesu alisema katika Mahubiri yake ya Mlimani: “Heri ninyi watakapowashutumu na kuwaudhi na kuwanenea kila neno baya kwa uongo, kwa ajili yangu. Furahini, na kushangilia; kwa kuwa thawabu yenu ni kubwa mbinguni.” (Mathayo 5:11, 12) Kuna uradhi wenye shangwe katika kuona baraka za Yehova juu ya jitihada zetu tunapojikakamua kuelekea mradi wa uhai udumuo milele.—Yohana 17:3; 2 Timotheo 4:7, 8; Waebrania 11:8-10, 26, 35.

7. (a) Tunaweza kusaidiwaje kuvumilia? (b) Kama Ayubu twaweza kuthawabishwaje?

⁷ Yesu mwenyewe alivumilia “kwa ajili ya furaha [“shangwe,” NW] iliyowekwa mbele yake.” (Waebrania 12:1, 2) Kwa kutazama kwa makini kielelezo cha Yesu chenye moyo mkuu, sisi pia twaweza kuvumilia! Kama Yakobo atajavyo mwishoni-mwishoni mwa barua yake, Yehova huwathawabisha sana washika uaminifu wa maadili. “Tazameni! Twawatamka wenye furaha wale ambao wamevumilia,” asema Yakobo. “Mmesikia juu ya uvumilivu wa Yobu na mmeona tokeo alilotoa Yehova, kwamba Yehova ni mwenye wororo sana katika shauku na mwenye rehema.” (Yakobo 5:11, NW) Kumbuka jinsi uaminifu wa maadili wa Ayubu ulivyothawabishwa aliporudishiwa afya nzuri akafurahia maisha yenye furaha na utimilifu pamoja na wapendwa wake. Kuvumilia kwa kushika uaminifu wa maadili kwaweza kukufanya ushangilie hivyo katika Paradiso iliyoahidiwa ya ulimwengu mpya wa Mungu, hilo likiwa upeo wa shangwe ya kumtumikia Yehova sasa hivi.

Kutafuta Hekima

8. Tunaweza kupataje hekima ya kweli yenye kutumika, na sala inatimiza fungu gani katika hilo?

⁸ Kujifunza kwetu kwa bidii Neno la Mungu, pamoja na kulitumia kwa njia yenye matokeo, kutatokeza hekima ya kimungu, kukituwezesha kuvumilia majaribu kati ya ufisadi wa mfumo huu unaokwisha wa Shetani. Tunaweza kuhakikishiwaje jinsi ya kupata hekima hiyo? Yakobo atuambia: “Lakini mtu wa kwenu akipungukiwa na hekima, na aombe dua kwa Mungu, awapaye wote, kwa ukarimu, wala hakemei; naye atapewa. Ila na aombe kwa imani, pasipo shaka yo yote; maana mwenye shaka ni kama wimbi la bahari lililochukuliwa na upepo, na kupeperushwa huku na huku.” (Yakobo 1:5, 6) Twapaswa kusali kwa bidii, tukiwa na uhakika thabiti kwamba Yehova atasikia dua zetu na kwamba atazijibu kwa wakati wake mwenyewe na kwa njia yake.

9. Yakobo afafanuaje hekima ya kimungu na matumizi yayo?

⁹ Hekima ya kimungu ni zawadi kutoka kwa Yehova. Akifafanua zawadi hizo, Yakobo asema: “Kila zawadi njema na kila upaji mkamilifu ni kutoka juu, kwa maana huteremka kutoka kwa Baba wa mianga ya kimbingu, na kwake yeye hakuna badiliko-badiliko la kugeuka kwa kivuli.” Baadaye katika barua yake, Yakobo aeleza tokeo la kupata hekima ya kweli asemapo: “N’nani aliye na hekima na ufahamu kwenu? Na aonyeshe kazi zake kwa mwenendo wake mzuri, katika upole wa hekima. . . . Hekima itokayo juu, kwanza ni safi, tena ni ya amani, ya upole, tayari kusikiliza maneno ya watu, imejaa rehema na matunda mema, haina fitina, haina unafiki.”—Yakobo 1:17, NW; 3:13-17.

10. Dini bandia yatofautianaje na dini ya kweli?

¹⁰ Katika milki ya ulimwengu ya dini bandia, iwe ni katika Jumuiya ya Wakristo au katika nchi nyinginezo, mara nyingi ni desturi ya waabudu kuimba nyimbo za kidini, kusikiliza sala zenye kurudiwa-rudiwa, na labda kusikiliza hotuba. Hakuna kitia-moyo kinachotolewa juu ya kutangaza ujumbe wa tumaini, kwa kuwa dini nyingi mno hazioni matazamio mazuri kwa wakati ujao. Tumaini tukufu la Ufalme wa Kimesiya wa Mungu ama halitajwi kamwe ama hueleweka vibaya kabisa. Yehova asema hivi kiunabii juu ya wafuasi wa Jumuiya ya Wakristo: “Watu wangu hawa wametenda maovu mawili; wameniacha mimi, niliye chemchemi ya maji ya uzima, wamejichimbia mabirika, mabirika yavujayo, yasiyoweza kuweka maji.” (Yeremia 2:13) Hawana maji ya kweli. Hawana hekima ya kimbingu.

11, 12. (a) Hekima ya kimungu yapaswa kutuchocheaje? (b) Hekima ya kimungu hutuonya dhidi ya nini?

¹¹ Hali ni tofauti kama nini miongoni mwa Mashahidi wa Yehova leo! Wakiwa na nguvu nyingi walizopewa na Mungu, wao wanajaza dunia kwa habari njema za Ufalme Wake unaokuja. Hekima waisemayo hutegemea kabisa Neno la Mungu. (Linganisha Mithali 1:20; Isaya 40:29-31.) Kwa kweli, wao hutumia vizuri ujuzi na uelewevu wa kweli katika kutangaza makusudi matukufu ya Mungu na Muumba wetu. Yapaswa kuwa tamaa yetu kwamba wote kutanikoni ‘wajazwe maarifa ya mapenzi ya Mungu katika hekima yote na ufahamu wa rohoni.’ (Wakolosai 1:9) Wakiwa na msingi huu, wote vijana kwa wazee sikuzote watachochewa ‘kuwa watendaji wa neno.’

¹² “Hekima itokayo juu” hutuonya kuhusu dhambi ziwezazo kutokeza kukataliwa kimungu. “Hayo mnajua, ndugu zangu wapenzi,” asema Yakobo. “Kila mtu na awe mwepesi wa kusikia, bali si mwepesi wa kusema; wala kukasirika; kwa maana hasira ya mwanadamu haiitendi haki ya Mungu.” Ndiyo, ni lazima tuwe wepesi, tutamani, kusikiliza shauri la kimungu na kulitumia. Hata hivyo, ni lazima tulinde dhidi ya kutumia vibaya kile “kiungo kidogo,” ulimi. Kupitia kujigamba, porojo isiyo ya hekima, au mazungumzo ya kushikilia sana maoni yako mwenyewe, kitamathali ulimi waweza kuwasha moto “msitu mkubwa sana.” Basi twahitaji kusitawisha hali ya kupendeza na kujidhibiti katika mashirika yetu yote.—Yakobo 1:19, 20; 3:5.

13. Kwa nini ni muhimu kwamba tukubali ‘kupandwa ndani kwa neno’?

¹³ “Kwa hiyo,” aandika Yakobo, “wekeeni mbali uchafu wote na ubaya uzidio, na kupokea kwa upole neno lile lililopandwa ndani, liwezalo kuziokoa roho zenu.” (Yakobo 1:21) Ulimwengu huu wenye pupa, ukiwa na mtindo wa maisha wa mimi-kwanza wenye kufuatia vitu vya kimwili na wenye maadili yaliyopotoka, u karibu kupitilia mbali. “Bali yeye afanyaye mapenzi ya Mungu adumu hata milele.” (1 Yohana 2:15-17) Basi ni muhimu kama nini kwamba tukubali ‘kupandwa ndani kwa neno’! Hekima inayoandaliwa na Neno la Mungu yatofautiana kabisa na ubaya wa ulimwengu huu unaokwisha. Hatutaki kabisa ubaya huo. (1 Petro 2:1, 2) Upendo wa ile kweli na imani yenye nguvu yahitaji kupandwa mioyoni mwetu, ili kwamba tuazimie tusikengeuke kamwe kutoka kwa njia za Yehova zenye uadilifu. Lakini, je, yatosha tu kusikia Neno la Mungu?

Kuwa “Watendaji wa Neno”

14. Tunawezaje kuwa “wasikiaji” na vilevile “watendaji” wa Neno?

¹⁴ Kwenye Yakobo 1:22, twasoma: “Iweni watendaji wa neno, wala si wasikiaji tu, hali mkijidanganya nafsi zenu.” “Iweni watendaji wa neno”! Hakika kichwa hiki chakaziwa katika barua ya Yakobo. Ni lazima tusikilize, kisha tufanye ‘vivyo hivyo’! (Mwanzo 6:22) Watu wengi leo hudai kwamba yatosha kusikia mahubiri au kushiriki katika ibada fulani ya kidesturi mara moja-moja, bila kufanya lolote zaidi. Huenda wakafikiri kwamba maadamu waishi ‘maisha mema’ kulingana na viwango vyao, hiyo yatosha. Lakini Yesu Kristo alisema: “Ikiwa yeyote ataka kunifuata, na ajikane mwenyewe na kuchukua mti wake wa mateso na kunifuata kwa kuendelea.” (Mathayo 16:24, NW) Tendo la kujidhabihu na uvumilivu katika kufuata kiolezo cha Yesu cha kufanya mapenzi ya Mungu kwa wazi zahitajika kwa Wakristo wa kweli. Kwao, mapenzi ya Mungu leo ni kama yalivyokuwa katika karne ya kwanza wakati Yesu aliyefufuliwa alipoamuru hivi: “Basi, enendeni, mkawafanye mataifa yote kuwa wanafunzi.” (Mathayo 28:19) Wewe unafanyaje kwa habari hii?

15. (a) Yakobo atoa kielelezo gani, akionyesha jinsi tuwezavyo kuwa na furaha tukiwa “watendaji wa neno”? (b) Kwa nini ibada ya kidesturi tu haitoshi?

¹⁵ Tukifuliza kuchungua ndani ya Neno la Mungu, hilo laweza kuwa kama kioo cha kuonyesha sisi ni watu wa aina gani hasa. Yakobo asema: “Aliyeitazama [“Achunguaye,” NW] sheria kamilifu iliyo ya uhuru, na kukaa humo, asiwe msikiaji msahaulifu, bali mtendaji wa kazi, huyo atakuwa heri katika kutenda kwake.” (Yakobo 1:23-25) Ndiyo, atakuwa ‘mtendaji wa neno’ mwenye furaha. Na kwa kuongezea, ni jambo muhimu kuwa “mtendaji” katika kila kijambo cha maisha zetu za Ukristo. Hatupaswi kamwe kujidanganya tufikiri kwamba ibada ya kidesturi tu yatosha. Yakobo atushauri kuona pande fulani za ibada ya kweli ambazo huenda hata Wakristo wenye bidii wamepuuza. Yeye aandika: “Dini [“Namna ya ibada,” NW] iliyo safi, isiyo na taka mbele za Mungu Baba ni hii, Kwenda kuwatazama yatima na wajane katika dhiki yao, na kujilinda na dunia pasipo mawaa.”—Yakobo 1:27.

16. Ni katika njia zipi Abrahamu alikuja kuwa “rafiki wa Mungu,” nasi twaweza kupataje urafiki Wake?

¹⁶ Haitoshi tu kusema, ‘Namwamini Mungu,’ na kuachia mambo hapo. Kama Yakobo 2:19 lionyeshavyo: “Wewe waamini ya kuwa Mungu ni mmoja; watenda vema. Mashetani nao waamini na kutetemeka.” Yakobo akazia kwamba “imani, isipokuwa ina matendo, imekufa nafsini mwake,” naye arejezea Abrahamu, akisema: “Imani ilitenda kazi pamoja na matendo yake, na ya kwamba imani ile ilikamilishwa kwa njia ya matendo yale.” (Yakobo 2:17, 20-22) Matendo ya Abrahamu yalitia ndani kuandaa kitulizo kwa watu wake wa ukoo, kuonyesha ukaribishaji-wageni, kutayarisha kumdhabihu Isaka, na “kutangaza hadharani” (NW) imani yake thabiti katika ahadi ya Mungu ya “mji wenye misingi,” ule Ufalme wa Kimesiya wa wakati ujao. (Mwanzo 14:16; 18:1-5; 22:1-18; Waebrania 11:8-10, 13, 14; 13:2) Kwa kufaa, Abrahamu “aliitwa rafiki wa Mungu.” (Yakobo 2:23) Sisi pia twaweza kuonwa kuwa ‘rafiki za Yehova’ tutangazapo kwa bidii imani yetu na tumaini letu juu ya Ufalme wake wenye uadilifu unaofika.

17. (a) Kwa nini Rahabu ‘alitangazwa kuwa mwadilifu,’ naye alithawabishwaje? (b) Biblia yaandaa orodha gani ndefu ya wale ambao ‘waliokuja kuwa watendaji wa neno’? (c) Ayubu alithawabishwaje, na kwa nini?

¹⁷ Wale wanaokuja kuwa “watendaji wa neno” kwa kweli ‘hutangazwa kuwa waadilifu kwa matendo na si kwa imani pekee.’ (Yakobo 2:24, NW) Rahabu alikuwa mfano wa mtu aliyeongeza matendo kwenye imani yake katika “neno” ambalo alikuwa amesikia kuhusu matendo makubwa ya Yehova. Aliwaficha wapelelezi wa Israeli na kuwasaidia kutoroka, kisha akakusanya familia ya baba yake ili ihifadhiwe hai. Katika ufufuo, atashangilia kama nini kujua kwamba imani yake, ikitegemezwa na matendo, ilimfanya awe mzazi wa kale wa Mesiya! (Yoshua 2:11; 6:25; Mathayo 1:5) Waebrania sura ya 11 huandaa orodha ndefu ya wengine waliokuja ‘kuwa watendaji’ katika kuonyesha imani yao, nao watathawabishwa sana. Wala hatupaswi kumsahau Ayubu, ambaye akiwa katika majaribu makali alisema: “Jina la BWANA na libarikiwe.” Kama ambavyo tayari tumeona, matendo yake yalitokeza thawabu tukufu. (Ayubu 1:21; 31:6; 42:10; Yakobo 5:11) Vivyo hivyo, uvumilivu wetu leo tukiwa “watendaji wa neno” utaleta kibali cha Yehova.

18, 19. Ndugu ambao wamekandamizwa kwa muda mrefu ‘wamekuwaje watendaji wa neno,’ na utendaji wao umeleta baraka gani?

¹⁸ Miongoni mwa wale ambao wamevumilia sana katika miaka ambayo imepita ni ndugu zetu katika Ulaya Mashariki. Kwa kuwa sasa vizuizi vingi vimeondolewa, kwa kweli hawa ‘wamekuwa watendaji wa neno’ katika mazingira yao mapya. Wamishonari na mapainia kutoka nchi za ujirani wamehamia huko kusaidia katika kufundisha na kupanga mambo kitengenezo. Ofisi ya tawi ya Finland na ofisi nyinginezo za tawi zilizoko karibu za Watch Tower Society zimepeleka wajenzi stadi, na udugu wa ulimwenguni pote wenye ukarimu umegharamia kifedha ujenzi wa ofisi mpya za tawi na Majumba ya Ufalme mapya.—Linganisha 2 Wakorintho 8:14, 15.

¹⁹ Hao ndugu ambao kwa muda mrefu wamenyanyaswa wameitikia kwa bidii kama nini shambani! Wao ‘wanafanya kazi kwa bidii na kujikakamua’ kana kwamba wanalipia fursa walizokosa katika “majira ya taabu.” (1 Timotheo 4:10, NW; 2 Timotheo 4:2, NW) Kwa kielelezo, Aprili huu uliopita katika Albania, ambako mgandamizo ulikuwa umekuwa wenye ukatili sana, ugavi wote wa Habari za Ufalme yenye kichwa “Kwa Nini Maisha Yamejaa Matatizo Sana” uligawanywa kwa siku tatu pekee. Huo ulikuwa mfuatio mzuri sana wa Ukumbusho wa kifo cha Yesu, uliohudhuriwa na watu 3,491—wengi zaidi kuliko wahubiri watendaji 538.

20. Mahudhurio ya majuzi ya ukumbusho yaonyesha nini, na wengi waweza kusaidiwaje?

²⁰ Nchi nyinginezo vilevile zimetoa mchango mkubwa kwenye mahudhurio ya Ukumbusho, ambayo yameongezeka katika miaka ya majuzi kupita 10,000,000. Katika sehemu nyingi, imani yao ikiwa imeimarishwa kwa kuhudhuria na kuadhimisha Ukumbusho, wapya ‘wanakuwa watendaji wa neno.’ Je, twaweza kuwatia moyo wengi wa hao washiriki wapya kustahili kupata pendeleo hilo?

21. Kwa kupatana na andiko letu la mwaka, twapaswa kufuata mwendo gani, tukiwa na mradi gani?

²¹ Kama ilivyokuwa kwa wale Wakristo wenye bidii katika karne ya kwanza, na wengine wengi tangu wakati huo, na tuazimie kujikakamua katika ‘kukaza mwendo, kuifikilia mede ya thawabu’ ya uhai udumuo milele, iwe itakuwa katika Ufalme wa kimbingu ama katika makao yao ya kidunia. (Wafilipi 3:12-14) Kufikia mradi huo kwastahili jitihada zetu zote. Huu si wakati wa kurudi nyuma na kuwa wasikiaji tu, bali kati ya nyakati zote huu ndio wakati wa ‘kuwa na nguvu na kufanya kazi.’ (Hagai 2:4, NW; Waebrania 6:11, 12) Baada ya ‘kukubali kupandwa ndani kwa neno,’ na ‘tuwe watendaji wa neno wenye shangwe’ sasa na kuendelea hadi umilele ujao.

Ungejibuje?

◻ Twaweza kuvumiliaje kwa shangwe?

◻ “Hekima itokayo juu” ni nini, nasi twaweza kuifuatiaje?

◻ Kwa nini ni lazima ‘tuwe watendaji wa neno, wala si wasikiaji tu’?

◻ Ni ripoti zipi zapaswa kutuchochea kuwa “watendaji wa neno”?

[Picha katika ukurasa wa17]

Na tufungue mioyo yetu sisi pia ili kupokea ufundishaji wa kimungu

[Picha katika ukurasa wa18]

Uaminifu wa maadili wa Ayubu ulithawabishwa kwa kurudishiwa maisha yenye furaha na utimilifu pamoja na wapendwa wake