“Mwendelee Kuwachukua Watu wa Namna Hiyo Kuwa Wapendwa Wanaothaminika”

“Tambueni watu wa namna hiyo.”​—1 WAKORINTHO 16:18, NW

 1. Ni watu wa namna gani ambao mtume Paulo aliwachukua kihususa kuwa wapendwa wa kuthaminika, naye aliandika nini juu ya Mkristo mmoja wa jinsi hiyo?

NAMNA ya watu ambao mtume Paulo aliwachukua kuwa wapendwa wanaothaminika walikuwa wale waliokuwa na nia ya kutumia imara yao kwa ajili ya Yehova na ndugu zao bila kuweka masharti. Kuhusu mmoja wa hao wafanya kazi wenzake, Paulo aliandika hivi: “Mpeni upokezi ule wa kidesturi katika Bwana kwa shangwe yote; na mwendelee kuwachukua watu wa namna hiyo kuwa wapendwa wanaothaminika, kwa sababu yeye alikaribia sana kifo kwa ajili ya kazi ya Bwana, akiweka wazi nafsi yake kwenye hatari.”​—Wafilipi 2:29, 30, NW.

 2. Ni nani ambaye sisi tuna deni la kumwonyesha ufikirio wa pekee, na kwa nini?

² Leo, katika makundi zaidi ya 55,000 ya Mashahidi wa Yehova, kuna wanaume wengi wazuri wa Kikristo ambao tunapaswa kuthamini kihususa kwa sababu ya kazi yao ngumu miongoni mwa ndugu zao. Akionyesha kwamba inatupasa tuwachukue wanaume kama hao kuwa wapendwa wanaothaminika, Paulo alitaarifu hivi: “Ndugu, tunataka mwatambue wale wanaojitaabisha kwa ajili yenu, na kuwasimamia ninyi katika Bwana, na kuwaonyeni; mkawastahi sana katika upendo, kwa ajili ya kazi zao. Iweni na amani ninyi kwa ninyi.”​—1 Wathesalonike 5:12, 13.

 3. (a) Ni jambo gani litatusaidia sisi kuwa wenye kuamanika mtu na mwenzake? (b) Ni katika jambo gani inawapasa wazee kuweka kielelezo?

³ Uthamini unaofaa kwa ndugu na dada zetu wote, na hususa kwa wazee wenye kufanya kazi kwa bidii, pasipo shaka ni jambo moja la maana katika kuwa katika maisha yenye kuamanika pamoja na makundi yetu. Katika jambo hilo, kama vile katika maeneo yote ya maisha ya Kikristo, wazee wanapaswa wawe “vielelezo kwa lile kundi.” (1 Petro 5:2, 3) Hata hivyo, ingawa wazee wanaweza kwa kufaa kutarajia wathaminiwe na akina ndugu kwa ajili ya kazi yao ya bidii, inawapasa wao pia waweke kielelezo katika kuonyesha ufikiriano kwa mmoja na mwenzake.

“Kuonyesha Heshima kwa Mmoja na Mwenzake”

 4, 5. (a) Ni nini kinachoonyesha kwamba mtume Paulo alithamini wazee wenye kufanya kazi kwa bidii? (b) Yeye aliandika nini kwa Wakristo katika Roma, na kwa nini maneno yake yanatumika hususa kwa wazee?

⁴ Mtume Paulo aliweka kielelezo kizuri katika habari hiyo. Kama vile tulivyoona katika makala iliyotangulia, yeye alitafuta mambo mema ndani ya ndugu na dada zake. Si kwamba yeye aliwatia moyo tu Wakristo wapende na kustahi wazee wenye kufanya kazi kwa bidii bali yeye mwenyewe pia aliwaonyesha uthamini unaofaa. Ni wazi yeye alichukua watu wa namna hiyo kuwa wapendwa wanaothaminika.​—Linganisha Wafilipi 2:19-25, 29; Wakolosai 4:12, 13; Tito 1:4, 5.

⁵ Katika barua yake kwa Wakristo katika Roma, Paulo aliandika hivi: “Katika upendo wa kidugu iweni na shauku nyororo kwa mmoja na mwenzake. Katika kuonyesha heshima kwa mmoja na mwenzake iweni wa kwanza. Msitange-tange katika kazi yenu. Mpashwe moto kwa roho. Mtumikieni Yehova.” (Warumi 12:10, 11, NW) Kwa uhakika, maneno hayo yanatumika zaidi sana kwa wazee wa Kikristo. Wao, kati ya Wakristo wote, wanapaswa kuwa wa kwanza katika kuonyeshana heshima mmoja na mwenzake.

 6. (a) Ni jambo gani ambalo wazee wanapaswa kuepuka kufanya, na kwa nini? (b) Ni jinsi gani wazee wanavyoweza kuongezea kimo cha uhakika wa kundi katika baraza zima la wazee?

⁶ Hususa wazee wanapaswa kuwa waangalifu wasiseme maneno ya kuwashushia heshima waangalizi wenzao. Hakuna mzee yeyote mmoja aliye na sifa zote za Kikristo kwa kipimo kinachowazidi watu wote, kwa maana wote ni wasiokamilika. Baadhi yao wanawazidi wengine katika sifa fulani fulani, lakini wao ni dhaifu zaidi katika sifa nyinginezo. Ikiwa wazee wana upendo wa kidugu unaofaa na shauku nyororo kwa mmoja na mwenzake, wao watauona udhaifu mbalimbali wa mmoja na mwenzake kuwa usio mkubwa sana. Katika maongezi yao pamoja na akina ndugu, wataonyesha mambo bora ya wazee wenzao. Kwa kuwa wa kwanza hivyo katika kuonyeshana heshima mmoja na mwenzake, wataongezea kimo cha uhakika wa kundi katika baraza la wazee kwa ujumla.

Kufanya Kazi Pamoja Wakiwa Baraza

 7. Ni nini kitasaidia wazee kufanya kazi pamoja katika muungamano, nao wataonyesha jambo hilo jinsi gani?

⁷ Baada ya kunena juu ya “zawadi katika wanaume” ambazo Kristo alitolea kundi lake duniani kwa kusudi la kurekebisha upya akina ndugu na kwa ajili ya kazi ya kihuduma, mtume Paulo aliandika hivi: ‘Katika upendo na tukue tumfikie yeye katika yote, yeye aliye kichwa, Kristo.’ (Waefeso 4:7-15) Kutambua kwamba Kristo ndiye Kichwa cha kundi chenye kutenda, na kwamba ni lazima wazee wajiweke chini ya mkono wake wa kuume wa mamlaka, ni jambo lenye kuleta muungamano ndani ya kila baraza la wazee. (Waefeso 1:22; Wakolosai 1:18; Ufunuo 1:16, 20; 2:1) Wao watatafuta mwelekezo wake kupitia roho takatifu, kanuni za Biblia, na uongozi unaotolewa na Baraza Linaloongoza la “mtumwa mwaminifu mwenye akili.”​—Mathayo 24:45-47; Matendo 15:2, 28; 16:4, 5.

 8. Inawapasa wazee wote wakumbuke nini, na ni jinsi gani wao wataonyeshana heshima mmoja na mwenzake?

⁸ Wazee watatambua kwamba Kristo, kupitia roho takatifu, anaweza kuelekeza akili ya mzee yeyote katika baraza lile la wazee aandae kanuni ya Biblia inayohitajiwa ili kukabiliana na hali yoyote au kufanya uamuzi wowote wa maana. (Matendo 15:6-15) Hakuna mzee mmoja yeyote ambaye ndiye peke yake aliye na roho ndani ya baraza. Wazee wataonyeshane heshima mmoja na mwenzake kwa kumsikiliza kwa uangalifu yeyote kati yao anayehusisha katika habari inayozungumziwa kanuni fulani ya Biblia au agizo fulani kutoka kwa Baraza Linaloongoza.

 9. (a) Ni sifa gani za kiroho zitasaidia mwangalizi aepuke kushikilia sana maoni yake akiwa pamoja na wazee wenzake? (b) Ni jinsi gani mzee ataonyesha kwamba yeye mwenyewe ni “mwepesi kukubali maoni ya wengine,” na ni jinsi gani baraza lenye kuongoza la karne ya kwanza lilivyoweka kielelezo katika jambo hilo?

⁹ Kiasi cha Kikristo, usikivu, na unyenyekevu ni mambo ambayo yatazuia mzee yeyote asijaribu kutawala juu ya ndugu zake na kulazimisha maoni yake yafuatwe. (Mithali 11:2; Wakolosai 3:12) Huenda mwangalizi wa Kikristo akawa na rai zenye imara sana na za moyo mweupe juu ya jambo fulani. Lakini ikiwa yeye anaona kwamba wazee wenzake wana sababu za Kimaandiko na za kitheokrasi za kutofautiana naye, yeye ‘atajiendesha mwenyewe kuwa mdogo zaidi’ na kujionyesha mwenyewe kuwa “mwepesi kukubali maoni ya wengine” kwa kuiachia nafasi rai ya walio wengi.a (Luka 9:48; 1 Timotheo 3:3, NW) Yeye atafuata kielelezo kizuri kilichowekwa na lile baraza lenye kuongoza la karne ya kwanza, ambalo, baada ya zungumzo la Kimaandiko, na likiwa chini ya uongozi uliotolewa na Kristo kupitia roho takatifu, lilikuja kwenye ‘upatano wa moyo mmoja.’​—Matendo 15:25.

10. (a) Ni jambo gani linalothibitisha kwamba kuwekwa rasmi kwa baraza la wazee katika kila kundi ni mpango wenye msingi wa Biblia? (b) Kitabu Tumefanywa Tengenezo Tutimize Huduma Yetu kinaeleza jinsi gani faida za mpango huo?

¹⁰ Kuwekwa rasmi kwa baraza la wazee katika kila kundi ili kutwaa uongozi kunategemea msingi wa kielelezo kilichowekwa na kundi la mapema la Kikristo. (Wafilipi 1:1; 1 Timotheo 4:14; Tito 1:5; linganisha maelezo ya chini na neno “wazee” katika Tito 1:15 kwenye The Jerusalem Bible.) Kikijumlisha kwa muhtasari hekima ya mpango huo, kitabu Tumefanywa Tengenezo Tutimize Huduma Yetu (ukurasa 37) kinataarifu hivi: “Wazee fulani wataonekana wazi kuwa na sifa moja kuliko nyingine, hali wengine katika baraza watatokeza sifa hizo kuwapita wenzao. Basi, kwa ujumla, matokeo ni kwamba baraza zima litakuwa na sifa njema zote zinazohitajiwa kwa uangalizi unaofaa wa kundi la Mungu.”

Kuonyeshana Staha Miongoni mwa Baraza la Wazee

11, 12. (a) Kwa nini baraza la wazee linaweza kutimiza mengi kuliko washiriki walo wenye kutenda wakiwa mmoja mmoja? (b) Ni jinsi gani Kristo Yesu na mtume Paulo walivyoshughulika pamoja na mabaraza ya wazee yakiwa mazima-mazima, na ni shauri gani lililotolewa?

¹¹ Hivyo, baraza moja la wazee ni muungo unaopatana na Maandiko ambao kwa kujumlika wote pamoja unatimiza fungu kubwa kuliko ule wingi wa sehemu zao moja moja. Wakati wao wanapokutana na kusali wapate mwelekezo wa Yehova kupitia Kristo na roho takatifu, wanaweza kufanya maamuzi ambayo yasingalifikiwa kama wangaliombwa ushauri wakiwa mmoja mmoja. Wakati wazee wanapokusanyika pamoja, sifa zao mbalimbali zinachangamana na kutokeza matokeo yanayoonyesha mwelekezo wa Kristo juu ya mambo.​—Linganisha Mathayo 18:19, 20.

¹² Kwamba Kristo alishughulika na mabaraza ya wazee yakiwa mazima-mazima inaonyeshwa na ujumbe mbalimbali aliopelekea “zile nyota saba,” au “malaika wa yale makundi saba” katika Esia Ndogo. (Ufunuo 1:11, 20, NW) Wa kwanza wa ujumbe huo ulipelekwa kwa kundi katika Efeso kupitia “malaika” walo, au baraza la waangalizi waliopakwa mafuta. Yapata miaka 40 mapema, mtume Paulo aliagiza baraza la wazee katika Efeso lisafiri kwenda Mileto kwa ajili ya mkutano wa pekee pamoja naye. Yeye aliwakumbusha wajiangalie wao wenyewe na kuchunga kundi.​—Matendo 20:17, 28.

13. Kwa nini inawapasa wazee waangalie ni roho gani wanayoonyesha ndani ya baraza la wazee la kwao na katika uhusiano wao wa ujumla pamoja na mabaraza mengine ya wazee?

¹³ Mabaraza ya wazee yanapasa kujiangalia kihususa kuhusiana na kuendeleza roho nzuri, ya mwelekeo chanya miongoni mwao wenyewe na ndani ya kundi lao. (Matendo 20:30) Sawa na vile Mkristo mmoja mmoja anavyodhihirisha roho fulani, ndivyo mabaraza ya wazee na makundi mazima yanavyoweza kusitawisha roho fulani hususa. (Wafilipi 4:23; 2 Timotheo 4:22; Filemoni 25) Nyakati fulani hutukia kwamba wazee wanaoonyeshana staha ndani ya kundi lao wenyewe huonyesha ukosefu wa upatano kuhusiana na baraza jingine la wazee. Katika majiji ambako makundi kadhaa hukutana katika jumba lile lile moja, nyakati fulani kutoafikiana husitawi kati ya mabaraza ya wazee juu ya ratiba za mikutano, mipaka ya eneo, vifaa vyenye kuwekwa katika Jumba la Ufalme, na mambo kama hayo. Kanuni zile zile za kuwa na kiasi, usikivu, unyenyekevu, na wepesi wa kukubali maoni ya wengine, ambazo zinasimamia wazee walio katika kila baraza, zinapasa kusimamia uhusiano ulio kati ya mabaraza ya wazee. Mtume Paulo alishauri hivi: “Mambo yote na yatendeke kwa kusudi la kujenga.”​—1 Wakorintho 14:26.

Staha Inayofaa kwa Waangalizi Wenye Kusafiri

14. Ni kikundi gani kingine cha wazee wanaostahili kuchukuliwa kuwa wapendwa wanaothaminika, na kwa nini?

¹⁴ Mpango mwingine ulio na msingi wa Biblia ambao unafanya kazi miongoni mwa makundi ya Mashahidi wa Yehova ni kufanyiwa ziara ya ukawaida na wazee wenye kusafiri-safiri, wanaoitwa waangalizi wa mizunguko au wa wilaya. (Matendo 15:36; 16:4, 5) Hao ni “wanaume wazee wanaosimamia kwa njia nzuri” yenye kutokeza wazi. Kwa kadiri isiyopungua ya wazee wale wengine, wao wanapaswa “wahesabiwe kustahili heshima mara mbili, hasa wale wanaofanya kazi ngumu katika kusema na kufundisha.”​—1 Timotheo 5:17, NW.

15. Ni shauri gani ambalo mtume Yohana alitoa kuhusu waevanjeli wenye kusafiri?

¹⁵ Katika barua yake ya tatu, mtume Yohana alichambua Diotrefe kwa sababu alikataa ‘kupokea ndugu hao kwa staha.’ (Mstari 10, NW) Ndugu hao walikuwa Wakristo wenye kusafiri waliojitokeza kwenda nje “kwa ajili ya Jina hilo [la Yehova].” (Mstari 7) Inaonekana walikuwa wametumwa wakawe waevanjeli ili wakahubiri habari njema na kuyajenga makundi katika miji waliyozuru. Yohana aliagiza kwamba wahubiri hao wa kusafiri-safiri wakiwa na bidii nyingi wanapasa ‘kusafirishwa kama ipasavyo kwa Mungu.’ (Mstari 6) Mtume aliongezea hivi: “Kwa hiyo, sisi tuko chini ya wajibu wa kupokea watu kama hao kwa ukaribishaji, ili kwamba sisi tupate kuwa wafanya kazi wenzi katika ule ukweli.” (Mstari 8, NW) Wao walipaswa kupokewa kwa staha.

16. Wakristo wote leo wanaweza kufuata jinsi gani kielelezo cha Gayo katika ile “kazi ya uaminifu” aliyofanya kwa ajili ya waevanjeli wa karne ya kwanza, na kwa nini jambo hilo linafaa?

¹⁶ Vivyo hivyo leo, waangalizi wanaosafiri ambao wanatumwa nje na Baraza Linaloongoza wakahubiri habari njema na kusaidia makundi wanapasa kupokewa kwa ukaribishaji na kwa staha. Ndugu hao na wake zao (ikiwa wamefunga ndoa, na wengi ndivyo walivyo) wamekuwa na nia ya kuacha kuishi katika kao moja la daima. Wao wanasafiri mahali mahali, mara nyingi wakitegemea ukaribishaji wa akina ndugu ili wapate chakula na kitanda cha kulalia. Yohana aliandika hivi kwa Gayo, ambaye aliwapokea kwa upendo waevanjeli wenye kusafiri katika karne ya kwanza W.K.: “Mpendwa, wewe unafanya kazi ya uaminifu katika lolote lile ambalo unafanya kwa ajili ya akina ndugu, tena watu usiowajua.” (3 Yohana 5, NW) Vilevile leo, wale wanaosafiri ‘kwa ajili ya jina la Yehova’ wanastahili kuchukuliwa kuwa wapendwa wanaothaminika na kuonyeshwa upendo na staha.

17. Wazee wa kundi wanapaswa kuonyesha jinsi gani staha inayofaa kwa wawakilishi wenye kuzuru wa Baraza Linaloongoza?

¹⁷ Wazee, hususa, wanapaswa kuwaonyesha staha inayofaa wawakilishi hawa wanaozuru wa Baraza Linaloongoza. Wao wanatumwa kwenye makundi kwa sababu ya sifa zao za kiroho na ujuzi wao, ambao kwa kawaida unafika mbali kuliko ule wa wazee wengi wenyeji. Baadhi ya hao waangalizi wenye kusafiri huenda wakawa ni wachanga zaidi katika miaka kuliko wazee fulani katika makundi wanayozuru. Lakini hiyo si sababu inayofaa ya kukataa kuwapa staha inayowapasa. Huenda wao wakahisi uhitaji wa kupoesha haraka-haraka ya wazee wenyeji katika kupendekeza ndugu awe mtumishi wa huduma au mzee, kwa kukumbuka onyo la Paulo kwa Timotheo. (1 Timotheo 5:22) Ingawa mwangalizi anayesafiri anapaswa kufikiria kwa njia inayofaa hoja zinazotokezwa na wazee wenyeji, wao wanapaswa kuwa na nia ya kumsikiliza yeye na kunufaika kutokana na ujuzi wake mpana. Ndiyo, wanapaswa ‘kuendelea kuwachukua watu wa namna hiyo kuwa wapendwa wanaothaminika.’​—Wafilipi 2:29, NW.

‘Watambueni Watu Kama Hao’

18, 19. (a) Ni jinsi gani Paulo alionyesha uthamini wake kwa wafanya kazi wenzake? (b) Ni kielelezo gani kinachoonyesha kwamba Paulo hakufungia uchungu moyoni dhidi ya ndugu zake?

¹⁸ Katika barua yake ya kwanza kwa Wakorintho, Paulo aliandika hivi: “Tena ndugu, nawasihi; (mnawajua watu wa nyumbani mwa Stefana kwamba ni malimbuko ya Akaya, nao wamejitia katika kazi ya kuwahudumu watakatifu); watiini watu kama hawa, na kila mtu afanyaye kazi pamoja nao, na kujitaabisha. Nami nafurahi kwa sababu ya kuja kwao Stefana na Fortunato na Akaiko; maana hawa wamenikirimia kwa wingi yale niliyopungukiwa kwenu. Maana wameniburudisha roho yangu, na roho zenu pia; basi wajueni [watambueni, W] watu kama hao.”​—1 Wakorintho 16:15-18.

¹⁹ Ni mwelekeo mzuri na wa ukarimu kama nini ambao Paulo alikuwa nao kuelekea ndugu zake, baadhi yao wakiwa ni wasiojulikana mahali pengi. Lakini Paulo aliwapenda kwa sababu wao walikuwa ‘wakifanya kazi pamoja’ na ‘kujitaabisha’ sana katika jitihada zao za kuhudumia watakatifu. Pia Paulo aliweka kielelezo bora sana cha kusahaulia mbali makosa ya zamani. Ingawa Yohana Marko alikuwa amemtamausha wakati wa safari yake ya kwanza ya umisionari, baadaye Paulo alimpendekeza yeye kwa uchangamfu kwa lile kundi katika Kolosai. (Matendo 13:13; 15:37, 38; Wakolosai 4:10) Alipotiwa gerezani katika Roma, Paulo aliomba kwamba Marko awepo kwa sababu, kama yeye alivyosema, “[Marko] anifaa kwa utumishi.” (2 Timotheo 4:11) Hapo haionekani hali ya kufungia uchungu moyoni!

20. Wakristo kwa ujumla, na hususa wazee, wanapaswa kuonyesha jinsi gani kwamba wao wanathamini waangalizi waaminifu na kwamba ‘wanaendelea kuwachukua watu wa namna hiyo kuwa wapendwa wanaothaminika’?

²⁰ Leo miongoni mwa watu wa Mungu, kuna waangalizi wengi wenye bidii ya kujitoa ambao, kama Stefana, wanahudumia ndugu zao. Kwa uhakika, wao wana dosari na mapungukiwa yao. Hata hivyo, wao ‘wanafanya kazi pamoja’ wakiwa na ushirikiano na “mtumwa mwaminifu mwenye akili” na Baraza Linaloongoza lake, na ‘kujitaabisha’ sana katika ile kazi ya kuhubiri na katika kusaidia ndugu zao. Inatupasa sisi tuendelee ‘kuwatii watu kama hawa,’ tukiwathamini kwa ajili ya sifa zao, si kutafuta-tafuta makosa ya kupungukiwa kwao. Wazee wanapaswa kutwaa uongozi katika kuonyesha uthamini na staha inayofaa kwa wazee wenzao. Wazee sharti wafanye ushirikiano wao kwa wao katika roho ya upendo na muungamano. Wote watatambua thamani ya ndugu hao waaminifu na ‘kuendelea kuwachukua watu wa namna hiyo kuwa wapendwa wanaothaminika.’​—Wafilipi 2:29, NW.

[Maelezo ya Chini]

Mambo ya Kupitia

◻ Ni watu wa namna gani hususa ambao Paulo aliwachukua kuwa wapendwa wanaothaminika, na ni nani wanaostahili ufikirio wetu wa pekee leo?

◻ Ni jinsi gani inawapasa wazee waonyeshe kwamba wanaheshimiana mmoja na mwenzake?

◻ Kwa nini baraza la wazee linaweza kutimiza mengi kuliko washiriki walo wenye kutenda wakiwa mmoja mmoja?

◻ Ni katika maeneo gani baraza la wazee litaonyesha kwamba wao wanaheshimu baraza jingine la wazee?

◻ Ni kikundi gani cha waangalizi kinachostahili kuchukuliwa kuwa wapendwa wanaothaminika kihususa, na staha hiyo inayofaa inaweza kuonyeshwa jinsi gani?

[Picha katika ukurasa wa 15]

Wazee wanapaswa kuonyesha uthamini unaofaa kwa mmoja na mwenzake

[Picha katika ukurasa wa 18]

Onyesha upendo na staha kwa waangalizi wenye kusafiri