Tembeeni Mkiwa Wafanya Kazi Wenzi Katika Kweli

Mambo Makuu Kutoka Yohana ya Pili na ya Tatu

MAARIFA ya kweli ni alama ya kuwatambulisha waabudu wa Yehova. (Yohana 8:31, 32; 17:17) Kutembea katika kweli ya kimungu kunahitajiwa sana kwa ajili ya wokovu. Na ni lazima watumishi wa Mungu wawe wafanya kazi wenzi katika kweli.

Barua za pili na tatu za mtume Yohana zilizoongozwa na Mungu zinanena juu ya ‘kuenenda katika kweli.’ (2 Yohana 4; 3 Yohana 3, 4) Yohana ya tatu yatia moyo pia kushirikiana tukiwa “watenda kazi pamoja na kweli.” (3 Yohana 5-8) Yaelekea sana kwamba barua zote mbili ziliandikwa katika au karibu na Efeso 98 W.K. hivi. Lakini yale zinayosema yaweza kufaidi watu wa Yehova leo.

Yohana ya Pili Hukazia Kweli

Kwanza, Yohana ya pili ilikazia kweli na upendo na ilionya dhidi ya “mpinga Kristo.” (Mistari 1-7) Barua ilielekezwa kwa “mama [bibi, NW] mteule,” labda mtu fulani. Lakini ikiwa ilipelekewa kundi fulani, “watoto” wake walikuwa Wakristo wazaliwa kwa roho walio ‘wateule’ wa Mungu kwa ajili ya maisha ya kimbingu. (Warumi 8:16, 17; Wafilipi 3:12-14) Yohana alishangilia kwamba watu fulani walikuwa ‘wakienenda katika kweli’ na kwa hiyo wakipinga uasi-imani. Hata hivyo, walihitaji kujilinda dhidi ya “mpinga Kristo,” anayekana kwamba Yesu alikuja katika mnofu. Mashahidi wa Yehova leo hutii maonyo kama hayo dhidi ya uasi-imani.

Kisha Yohana alitoa shauri juu ya kushughulika na waasi-imani ndipo akamalizia na kwa kuwatakia jambo fulani la kibinafsi na kuwasalimu. (Mistari 8-13) Kwa kazi kama kuhubiri, yeye na wengine walikuwa wametokeza matunda yaliyotokea katika kuongoka kwa wale aliowapelekea barua yake. Ni kwa ‘kujiangalia’ kiroho tu ndipo ‘wangepokea thawabu timilifu,’ inayotia ndani kwa wazi “taji” la kimbingu lililowekwa kwa ajili ya wapakwa mafuta waaminifu. (2 Timotheo 4:7, 8) Ikiwa mtu yeyote ‘asiyedumu katika mafundisho ya Kristo’ angewajia, hawangepaswa kamwe ‘kumkaribisha nyumbani mwao wala kumpa salamu’ ili waepuke kuwa washiriki katika “kazi zake mbovu.” Baada ya kuonyesha tumaini la kwamba angekuja kuongea na hao waamini wenzi uso kwa uso, Yohana alimalizia na salamu.

Yohana ya Tatu Hukazia Kushirikiana

Yohana ya tatu ilielekezwa kwa Gayo na kwanza ikatambua yale aliyokuwa akiwafanyia waamini wenzi. (Mistari 1-8) Gayo alikuwa ‘akienda katika kweli’ kwa kushikilia sana kusanyo zima la mafundisho ya Kikristo. Alikuwa pia ‘akitenda kazi ya uaminifu’ katika kusaidia ndugu wenye kuzuru. Yohana aliandika hivi: “Imetupasa sisi kuwakaribisha watu kama hao, ili tuwe watenda kazi pamoja na kweli.” Mashahidi wa Yehova hueneza ukaribishaji-wageni kama huo kwa waangalizi wasafirio leo.

Baada ya kutofautisha mwenendo mbaya wa Diotrefe na ule wa Demetrio, Yohana alimaliza barua yake. (Mistari 9-14) Diotrefe mwenye kutafuta utukufu hakuonyesha staha kwa Yohana na hata alijaribu kuondoa kutoka kundi wale waliopokea ndugu kwa ukaribishaji-wageni. Ingawaje, Demetrio fulani atajwa kuwa mfano mzuri. Yohana alitumaini kumwona Gayo karibuni na akamalizia na salamu na kumtakia Gayo kuionea shangwe amani.

[Sanduku/Picha katika ukurasa wa 30]

Kwa Karatasi, Kalamu, na Wino: Yohana alitamani kuzuru “mama [bibi, NW] mteule” na “watoto” wake badala ya kuandika mambo mengi kwao “kwa karatasi na wino.” Badala ya kuendelea kumwandikia Gayo “kwa wino na kalamu,” mtume alitumaini pia kumwona karibuni. (2 Yohana 1, 12; 3 Yohana 1, 13, 14) Neno la Kigiriki linalotafsiriwa “kalamu” (kaʹla·mos) hurejezea henzerani au tete na laweza kufasiriwa kuwa “tete la kuandikia.” Miongoni mwa Wagiriki na Waroma, kalamu ya tete ilikuwa na ncha na mpasuko kama kalamu za ubawa za nyakati za baadaye. Neno la Kigiriki meʹlan, linalotafsiriwa “wino,” ni namna ya katikati ya kivumishi cha kiume cha neno meʹlas, linalomaanisha “-eusi.” Katika wino za kale zaidi, rangi ilikuwa nyeusi ya kikaboni—ama namna ya masizi yaliyopatwa kwa kuchoma mafuta au kuni, au kaa-fuwele kutoka vyanzo vya mboga au wanyama. Kwa kawaida, wino ziliwekwa akiba zikiwa mikuo au vipande vilivyokaushwa, ambazo zilifanywa majimaji na mwandishi aliyezipaka kwa burashi au tete lake. Karatasi ya siku hizo ilikuwa kifaa chembamba kilichofanyizwa kuwa laha (shiti) kutoka miaa iliyotolewa kwenye mmea wa mafunjo. Wakristo wa mapema walitumia karatasi kama hiyo kwa ajili ya barua, hati za kufingirisha, na hati za kurasa mmoja mmoja.