Kahaba Mkubwa Afichuliwa

MFUMO wa sasa wa ulimwengu unaoongozwa na Shetani una sehemu tatu kuu zinazotumiwa na “mungu wa ulimwengu huu.” Hizo ni utawala wa kisiasa, maongozi na uvutano wa biashara kubwa-kubwa, na dini. Muda wa mileani zilizopita za historia, vitu vitatu hivyo vimekuwa vya kawaida katika karibu kila mfumo wa utawala. Ni ipi kati ya kani hizo zenye nguvu inayofananishwa na “mama ya makahaba”?—2 Wakorintho 4:3, 4, The Jerusalem Bible; Ufunuo 12:9; 17:5, NW.

Kulingana na njozi ya Yohana inayozungumziwa hapa, watawala, “wafalme wa dunia,” wameenda kwenye kitanda cha uasherati wake kwa kupenda kwao wenyewe. (Ufunuo 18:3, NW) (Ushuhuda wa kihistoria utatokezwa katika kurasa zinazofuata ili kuonyesha hivyo.) Hivyo, Babuloni Mkubwa hawezi kuwa anafananisha ile sehemu ya kisiasa katika mfumo wa ulimwengu.

Namna gani ile sehemu ya biashara kubwa-kubwa yenye fungu muhimu sana katika mambo ya mwanadamu leo? Kwa uhakika ina uvutano mwingi katika mataifa mengi na, kwa kweli, hiyo ndiyo huamua ni nani atakuwa tajiri na ni nani atakuwa maskini. Je! ingeweza kuwa ndiyo Babuloni Mkubwa? Malaika alimtolea Yohana kidokezi muhimu kinachojibu swali hilo. Alitangaza tukio la kugutusha​—kuanguka kwa Babuloni kutoka kwenye neema! Yeye anapoteza wanunuzi na hawara zake, wanaomwona kwa ghafula kuwa mwenye kuchukiza sana. Ni nani wengine, mbali na “wafalme wa dunia,” ambao wamekuwa miongoni mwa wenye kumtembelea kwa ukawaida? Malaika anataarifu hivi: “Kwa sababu ya divai yenye kuamsha harara ya uasherati wake mataifa yote yameanguka yakiwa majeruhi, na wafalme wa dunia walifanya uasherati na yeye, na wauzabidhaa wasafiri wa dunia wakawa na utajiri kwa sababu ya nguvu za anasa yake isiyo ya aibu.” Ndiyo, wauzabidhaa wa ulimwengu wamenufaika kwa kufanya biashara kwa kuendeshana naye kirafiki na kuongezea “anasa yake isiyo ya aibu.” Hivyo, yeye hawezi kuwa anafananisha biashara kubwa-kubwa kwa kadiri ya ulimwenguni pote.​—Ufunuo 18:3, NW.

Kwa hiyo, hatua hizo za kuchunguza mhusika huyo zimeondoa nje utawala wa kisiasa na maongozi na uvutano wa biashara kubwa-kubwa. Iliyobaki ni nini? Ni lazima iwe ni sehemu yenye mamlaka ambayo inapatana pia na lile shtaka halali, “kwa maana kwa zoea lako la uwasiliano na ulimwengu wa roho mataifa yote yaliongozwa vibaya.” Hiyo ndiyo ile sehemu iliyokuwa yenye nguvu nyingi lakini zinazopungua sasa, ambayo imekuwa na uvutano wa kina kirefu kwa fikira na vitendo vya mataifa muda wote tangu siku za Babuloni ya kale. Ni yule ambaye amekuwa na “ufalme juu ya wafalme wa dunia”—yaani, dini bandia!​—Ufunuo 17:18; 18:23, NW.

Ndiyo, ingawa huenda jambo hili likaelekea kushtusha watu fulani wanaofuata dini kwa moyo mweupe, Babuloni Mkubwa, aliye mama ya makahaba, ni ufananisho wa milki ya Shetani ulimwenguni ya dini bandia. Yeye ni ufananisho wa dini za ulimwengu ambazo kwa njia moja au nyingine zimekubaliana msimamo pamoja na sehemu za utawala wa kisiasa na wa kifedha muda wote wa historia.

Babuloni Mfanyiza Vita

Kulingana na njozi ya kiunabii, Babuloni Mkubwa ndiye mkware mkubwa ambaye ameongoza mataifa, vikundi vya watu, na makabila ndani ya vita vya umwagaji damu, vita vya kidini, na mizozano yenye uhasama mwingi, wakivibariki kwa maombi yenye kuimbwa-imbwa, maji matakatifu, sala, na hotuba moto-moto za kizalendo.a​—Ufunuo 18:24.

Makasisi wake, hasa wale wa vitani, wamekubali kutumiwa na watawala kukusanya halaiki za watu wakafyekwe-fyekwe na mizinga ya vita vya ulimwengu viwili na mapigano mengine makubwa-makubwa. Mkatoliki ameua Mkatoliki, na Mprotestanti amefanya wajibu wake wa kumchinja Mprotestanti mwenzake bila huruma, zikapotea maisha kama milioni 50 hadi 60 katika vita vya ulimwengu viwili tu.

Katika karne hii ya 20 yenye nuru ya elimu, makasisi wa dini wanazidi tu kuzalisha miongoni mwa watu ile kawaida ya kidini ya kuchukiana na kuuana​—si katika makao ya Jumuiya ya Wakristo tu yenye mapambano baina ya Wakatoliki na Waprotestanti bali pia katika ulimwengu wa wasio Wakristo, huku Uislamu ukipambana na Uyahudi, Uhindu na Uislamu, Ubuddha na Uhindu, Ukalasinga na Uhindu, na kadhalika.

Zaidi ya hilo, sikuzote dini imetaka kutokeza uvutano wenye nguvu nyingi juu ya “wafalme wa dunia,” ikijaribu kuamua ni mambo gani yatawapata mwishowe na ni nani watarithi vyeo vyao. Acheni tufikirie kifupi vielelezo vichache.

[Maelezo ya Chini]

[Picha katika ukurasa wa 4]

Ni kipi kati ya vitu hivi​—siasa, biashara kubwa-kubwa, au dini—​kinachowakilishwa na “Babuloni Mkubwa”?