Kukombolewa Wakati wa Kufunuliwa kwa Yesu Kristo
“Furahini; ili katika ufunuo wa utukufu wake mfurahi kwa shangwe.”—1 PETRO 4:13.
1. Yehova amewatajirishaje watumishi wake?
YEHOVA amewatajirisha Mashahidi wake kwa zawadi nyingi. Akiwa Mfunzi wetu Mtukufu, yeye ametutia nuru kwa ujazi wa ujuzi kuhusu mapenzi na makusudi yake. Kupitia roho yake takatifu, amesitawisha ndani yetu uwezo wa kuangaza nuru kwa ujasiri. Mtume Paulo aliyepuliziwa atuambia hivi kwenye 1 Wakorintho 1:6, 7: “Kama ushuhuda wa Kristo ulivyothibitika kwenu; hata hamkupungukiwa na karama yo yote, mkikutazamia sana kufunuliwa kwake Bwana wetu Yesu Kristo.”
2. Ni taraja gani lenye shangwe linalotolewa na “kufunuliwa kwake Bwana wetu Yesu Kristo”?
2 “Kufunuliwa kwake Bwana wetu Yesu Kristo”—huko kwamaanisha nini? Kunarejezea wakati ambapo Yesu anafunuliwa akiwa Mfalme mtukufu, akichukua hatua ya kuwathawabisha wafuasi wake waaminifu na kutekeleza hasira-kisasi kwa wasiomcha Mungu. Kama vile 1 Petro 4:13 NW lionyeshavyo, utakuwa wakati wa Wakristo wapakwa kwa roho wanaoshikilia uaminifu-maadili na waandamani wao waaminifu-washikamanifu wa mkutano mkubwa “kufurahi na kushangilia mno,” kwa kuwa ni ishara ya mwisho wa mfumo wa mambo wa Shetani.
3. Ni lazima tusimameje imara, kama vile ndugu zetu katika Thesalonike walivyosimama imara?
3 Wakati huo ukaribiapo zaidi, Shetani katika hasira yake huzidi kutusonga. Kama vile simba angurumaye, yeye hujaribu kutunyafua. Ni lazima tusimame imara! (1 Petro 5:8-10) Ndugu zetu katika Thesalonike ya kale, walipokuwa wapya katika kweli, walipatwa na dhiki zinazofanana na zile zinazowapata Mashahidi wa Yehova wengi leo. Kwa hiyo, maneno ya mtume Paulo kwao ni ya maana sana kwetu. Aliandika hivi: “Kwa kuwa ni haki mbele za Mungu kuwalipa mateso wale wawatesao ninyi; na kuwalipa ninyi mteswao raha [kitulizo, NW] pamoja na sisi; wakati wa kufunuliwa kwake Bwana Yesu kutoka mbinguni pamoja na malaika wa uweza wake; katika mwali wa moto; huku akiwalipiza kisasi wao wasiomjua Mungu, na wao wasiotii Injili ya Bwana wetu Yesu.” (2 Wathesalonike 1:6-8) Naam, ni lazima kitulizo kije!
4. Kwa nini makasisi wanastahili ile hukumu itakayotekelezwa kwenye kufunuliwa kwa Yesu?
4 Katika wakati wa Paulo dhiki nyingi ililetwa na viongozi wa kidini Wayahudi. Vivyo hivyo leo, mara nyingi upinzani dhidi ya Mashahidi wa Yehova wenye kupenda amani umechochewa na wale wanaodai kumwakilisha Mungu, na hasa makasisi wa Jumuiya ya Wakristo. Hao wanajisingizia kumjua Mungu, lakini wanamkataa “Bwana [Yehova, NW] mmoja” wa Biblia, wakimbadilisha na Utatu wa kifumbo. (Marko 12:29) Wao hawatii habari njema juu ya Bwana wetu Yesu, wakitegemea utawala wa mwanadamu ili wapate kitulizo na kukataa habari njema za Ufalme wa Kristo wenye uadilifu unaokuja. Wapinzani hao wote wa kidini lazima waangamie kwenye wakati wa “kufunuliwa kwake Bwana Yesu kutoka mbinguni”!
‘Kuja’ kwa Yesu Kristo
5. Kufunuliwa kwa Yesu kunaelezwaje waziwazi kwenye Mathayo 24:29, 30?
5 Kufunuliwa huko kunaelezwa waziwazi na Yesu kwenye Mathayo 24:29, 30. Anaposimulia sehemu mbalimbali za ishara ya kuwapo kwake na ya umalizio wa mfumo wa mambo, yeye asema: “Jua litatiwa giza, na mwezi hautatoa mwanga wake, na nyota zitaanguka mbinguni, na nguvu za mbinguni zitatikisika.” Wakati huo “ndipo itakapoonekana ishara yake Mwana wa Adamu mbinguni.” Mataifa ya dunia “watakapoomboleza, nao watamwona Mwana wa Adamu [Mfalme wa Kimesiya wa Mungu] akija juu ya mawingu ya mbinguni pamoja na nguvu na utukufu mwingi.” Huku ‘kuja,’ er·khoʹme·non katika Kigiriki, hurejezea kutokea kwa Yesu akiwa Mteteaji wa Yehova.
6, 7. ‘Kila jicho litamwonaje,’ na ni nani wanaotiwa ndani?
6 ‘Kuja’ huku kunasimuliwa pia na mtume Yohana kwenye Ufunuo 1:7, ambapo yeye husema: “Tazama, yuaja na mawingu.” Oh, maadui hao hawatamwona Yesu kwa macho halisi, kwa kuwa “mawingu” humaanisha kwamba anakuja bila kuonekana ili kutekeleza hukumu. Iwapo binadamu duni wangeona utukufu wake wa kimbingu kwa macho yao halisi, wangepofushwa, kama vile Sauli, akiwa safarini kuelekea Dameski, alivyopofushwa wakati Yesu aliyetukuzwa alipomtokea kwa nuru nyingi yenye kumweka (kumulika).—Matendo 9:3-8; 22:6-11.
7 Masimulizi ya Ufunuo yasema kwamba “kila jicho litamwona, na hao waliomchoma; na kabila zote za dunia wataomboleza kwa ajili yake.” Hilo lamaanisha kwamba wapinzani duniani watatambua wakati wa uharibifu ambao Yesu aleta juu yao kwamba yeye amekuja na uwezo na utukufu mwingi akiwa Mfishaji wa Yehova. Kwa nini hao maadui wanasemwa kuwa “hao waliomchoma”? Ni kwa sababu mtazamo wao wa chuki kuelekea watumishi wa Yehova leo ni kama ule wa wanyanyasi wa Yesu. Wao kwa kweli, “wataomboleza kwa ajili yake.”
8. Yesu na Paulo pia wanatoa onyo jipi kuhusu uharibifu wa ghafula?
8 Siku hiyo ya kisasi cha Yehova itafikaje? Katika unabii kwenye Luka sura 21, Yesu asimulia matukio yenye msiba ambayo yamekuwa ishara ya kuwapo kwake tangu 1914. Halafu, katika mstari wa 34 na 35, Yesu aonya: “Basi, jiangalieni, mioyo yenu isije ikalemewa na ulafi, na ulevi, na masumbufu ya maisha haya; siku ile ikawajia ghafula, kama mtego unasavyo; kwa kuwa ndivyo itakavyowajilia watu wote wakaao juu ya uso wa dunia nzima.” Naam, siku hiyo ya kisasi cha Yehova huja kwa ghafula, mara moja! Mtume Paulo anathibitisha hilo kwenye 1 Wathesalonike 5:2, 3, akisema: “Siku ya Bwana [Yehova, NW] yaja kama vile mwivi ajavyo usiku. Wakati wasemapo, Kuna amani na salama, ndipo uharibifu uwajiapo kwa ghafula.” Hata sasa mataifa yanazungumzia amani na usalama na kupendekeza kuimarishwa kwa Umoja wa Mataifa ili utawale maeneo yenye taabu kupitia uwezo wa kijeshi.
9. ‘Nuru huwazukia,’ nani na kwa nini?
9 Katika mstari wa 4 na 5, mtume anaendelea kutuambia: “Bali ninyi, ndugu, hammo gizani, hata siku ile iwapate kama mwivi. Kwa kuwa ninyi nyote mmekuwa wana wa nuru, na wana wa mchana; sisi si wa usiku, wala wa giza.” Sisi tunashangilia kuwa wana wa nuru—wachukuaji nuru kwa wengine wanaotamani amani na usalama wa kweli katika ulimwengu mpya wa Mungu. Kwenye Zaburi 97:10, 11, tunasoma: “Enyi mmpendao BWANA [Yehova, NW], uchukieni uovu; huwalinda nafsi zao watauwa [waaminifu-washikamanifu, NW] wake, na kuwaokoa na mkono wa wasio haki. Nuru imemzukia mwenye haki, na furaha wanyofu wa moyo.”
Mfuatano wa Mambo
10. Ni onyo gani la kimbele tunalopaswa kutii kuhusu siku ya Mungu ya kutoza hesabu? (Ufunuo 16:15)
10 Ni mfuatano gani wa mambo utakaokuwapo dhiki kubwa itakapofyatuka? Acheni tufungue Ufunuo sura ya 16. Ona, kama inavyosimuliwa kwenye mistari ya 13 hadi 16, kwamba roho wachafu wa kishetani, hukusanya mataifa ya duniani pote kwenye Har–Magedoni, vita ya siku ile kuu ya Mungu Mwenyezi. Tena, kufika kwa siku hiyo ya kisasi kwa njia ya mwivi kunakaziwa, na tunaonywa tubaki tukikesha—kuendelea kuvaa mavazi ya kiroho yanayotutia alama ya kuja kuokolewa. Wakati umewadia wa kuhukumu watu wa dunia, mataifa, na—mtu mwingineye. Nani huyo?
11. Mwanamke wa Ufunuo 17:5 amejitambulishaje?
11 Ni mwanamke wa ufananisho ambaye amejaribu kwelikweli kujifanya “mashuhuri.” Yeye anasimuliwa kwenye Ufunuo 17:5, NW kuwa “fumbo: ‘Babuloni Mkubwa, mama ya makahaba na ya vitu vya kuchukiza vya dunia.’” Lakini yeye si fumbo tena kwa Mashahidi wa Yehova. Yeye amejitambulisha mwenyewe waziwazi kuwa milki ya ulimwengu ya dini bandia, ambayo mafarakano ya Jumuiya ya Wakristo hufanyiza sehemu kubwa. Jambo lenye kuchukiza sana machoni pa Yehova ni kule kujihusisha kwake katika mambo ya kisiasa, “[kulewa kwake] kwa damu ya watakatifu” kwa kuwanyanyasa Wakristo wa kweli, na kusababisha kwake umwagaji damu “ya wale wote waliouawa juu ya nchi,” kutia ndani zaidi ya milioni mia moja waliouawa katika vita vya karne hii ya 20 pekee.—Ufunuo 17:2, 6; 18:24.
12. Kwa nini mafarakano ya Jumuiya ya Wakristo wameshutumiwa?
12 Kwa ubaya hata zaidi, mafarakano ya Jumuiya ya Wakristo yameleta suto juu ya jina la yule Mungu wanaodai kinafiki kumwakilisha. Wamefundisha falsafa za Kibabuloni na Kigiriki badala ya Neno safi la Mungu na wamechangia utovu wa maadili wa mataifa mazima-mazima kwa kukubali mitindo-maisha yenye uendekevu inayovunja kanuni za Biblia. Walaghai wenye pupa miongoni mwao hushutumiwa na maneno ya Yakobo 5:1, 5: “Haya basi, enyi matajiri! lieni, mkapige yowe kwa sababu ya mashaka yenu yanayowajia. Mmefanya anasa katika dunia, na kujifurahisha kwa tamaa; mmejilisha mioyo yenu kama siku ya machinjo.”
Babuloni Mkubwa Aharibiwa!
13. Shambulio la kwanza la dhiki kubwa linakujaje, na ni jambo gani la haraka linalokaziwa kwenye Ufunuo 18:4, 5?
13 Shambulio la kwanza la dhiki kubwa laja kwa njia ya kutekelezwa hukumu ya Yehova juu ya Babuloni Mkubwa. Ufunuo 17:15-18, husimulia waziwazi kuhusu “shauri” la Mungu—kuelekeza “pembe kumi,” majeshi yenye nguvu kutoka miongoni mwa “mnyama [hayawani-mwitu, NW]” UM wenye mataifa mengi, kumharibu Babuloni Mkubwa. “Na zile pembe kumi ulizoziona, na huyo mnyama [hayawani-mwitu, NW] hao watamchukia yule kahaba, nao watamfanya kuwa mkiwa na uchi, watamla nyama yake, watamteketeza kabisa kwa moto. Maana Mungu ametia mioyoni mwao kufanya shauri lake, na kufanya shauri moja.” Si ajabu kwamba sauti kutoka mbinguni hutoa onyo la haraka kwenye Ufunuo 18:4, 5: “Tokeni kwake, enyi watu wangu, msishiriki dhambi zake, wala msipokee mapigo yake. Kwa maana dhambi zake zimefika hata mbinguni, na Mungu amekumbuka maovu yake.” Mwito huo waendelea kutolewa: Kata uhusiano wote na dini bandia, kabla haijawa kuchelewa mno!
14. Ni nani watakaoomboleza juu ya kuharibiwa kwa Babuloni Mkubwa, na kwa nini?
14 Ulimwengu utaonaje kuharibiwa kwa Babuloni Mkubwa? Wakiwa mbali, wanasiasa wafisadi—“wafalme wa nchi”—wanamwombolezea kwa sababu walikuwa wamepata raha ya muda wa karne nyingi pamoja naye katika uasherati wao wa kiroho. Wanaotoa machozi pia na kumwombolezea ni wafanya biashara wenye pupa, “wauza-bidhaa wasafiri . . . ambao [walikuwa] na utajiri kutokana na yeye.” (NW) Wao pia wajiweka mbali naye, wakisema: “Ole, ole, mji ule mkuu! uliovikwa kitani nzuri, na nguo ya rangi ya zambarau, na nguo nyekundu, na kupambwa kwa dhahabu, na kito cha thamani, na lulu; kwa kuwa katika saa moja utajiri mwingi namna hii umekuwa ukiwa.” Mavazi yenye madoido ya makasisi na makathedro makubwa ya ulimwengu yenye uzuri mwingi yote yatatokomea mbali milele! (Ufunuo 18:9-17) Lakini je! kila mtu ataombolezea Babuloni Mkubwa?
15, 16. Watu wa Mungu watakuwa na sababu gani ya kushangilia?
15 Ufunuo 18:20, 21 hujibu: “Furahini juu yake, enyi mbingu, nanyi watakatifu na mitume na manabii; kwa maana Mungu amehukumu hukumu yenu juu yake [kwa ajili ya ninyi, NW].” Kama jiwe kuu la kusagia linalotupwa ndani ya bahari, “kwa nguvu nyingi, [utakuwa umetupwa] Babeli, mji ule mkuu, wala hautaonekana tena kabisa.”
16 Ni sababu ya kushangilia kama nini! Ufunuo 19:1-8 huonyesha hilo. Mara nne mpazo wa, “Haleluya [msifuni Yah, enyi watu, NW]” wasikika kutoka mbinguni. Haleluya tatu za kwanza husifu Yehova kwa sababu ametekeleza hukumu yenye uadilifu juu ya kahaba mwenye sifa mbaya, Babuloni Mkubwa. Milki ya ulimwengu ya dini bandia haipo tena! Sauti yatoka kwenye kiti cha enzi cha Mungu, ikisema: “Msifuni Mungu wetu, enyi watumwa wake wote, ninyi mnaomcha, wadogo kwa wakuu.” Jinsi tutakavyopendelewa kuushiriki wimbo huo!
Ndoa ya Mwana-Kondoo
17. Kwa kulinganisha Ufunuo 11:17 na 19:6, Yehova huanza kutawala akiwa Mfalme katika muktadha zipi mbili?
17 Haleluya ya nne hutokeza jambo jingine: “Haleluya [msifuni Yah, enyi watu, NW]; kwa kuwa Bwana [Yehova, NW] Mungu wetu, Mwenyezi, amemiliki.” Lakini je, kibwagizo kilekile hakikuimbwa kwenye Ufunuo 11:17? Hapo tunasoma: “Tunakushukuru wewe, Bwana Mungu Mwenyezi, . . . kwa sababu umeutwaa uweza wako ulio mkuu, na kumiliki.” Ndiyo. Hata hivyo, muktadha wa Ufunuo 11:17 hurejezea Yehova akitokeza Ufalme wa Kimesiya katika 1914 ili ‘kuyachunga mataifa yote kwa fimbo ya chuma.’ (Ufunuo 12:5) Ufunuo 19:6 umo katika muktadha wa uharibifu wa Babuloni Mkubwa. Baada ya kuondolewa kwa dini ya kikahaba, Uungu wa Yehova wasimama umetetewa. Kumwabudu yeye akiwa Mwenye Enzi Kuu Kupita Wote na Mfalme kutadumu sasa kwa umilele wote!
18. Kuondolewa kwa Babuloni Mkubwa kunafungulia njia tangazo jipi lenye furaha nyingi sana?
18 Kwa hiyo, tangazo hili lenye furaha nyingi laweza kufanywa: “Na tufurahi, tukashangilie, tukampe [Yah] utukufu wake; kwa kuwa arusi ya Mwana-Kondoo imekuja, na mkewe amejiweka tayari. Naye amepewa kuvikwa kitani nzuri, ing’arayo, safi; kwa maana kitani nzuri hiyo ni matendo ya haki ya watakatifu.” (Ufunuo 19:7, 8) Wakati barabara ambapo wapakwa kwa roho ambao bado wamebaki duniani watapokea ufufuo wao wa kimbingu hauonyeshwi. Lakini tunahakikishiwa katika muktadha hapa kwamba kushiriki kwao katika ndoa ya Mwana-Kondoo, Kristo Yesu, kutakuwa ni wakati wenye furaha, hasa kwa sababu watakuwa wameshuhudia kwa macho yao wenyewe kutwezwa kwa kahaba mwenye sifa mbaya, Babuloni Mkubwa.
Ulimwengu wa Shetani Waharibiwa
19. Ni tukio jipi jingine linalosimuliwa kwenye Ufunuo 19:11-21?
19 Farasi mweupe aliyetajwa mara ya kwanza kwenye Ufunuo 6:2 aonekana tena. Tunasoma kwenye Ufunuo 19:11: “Na yeye aliyempanda [farasi mweupe], aitwaye Mwaminifu na Wa-kweli, naye kwa haki ahukumu na kufanya vita.” Hivyo ndivyo “Mfalme wa Wafalme, na Bwana wa Mabwana” aendavyo kwa farasi na kupiga mataifa na kukanyaga shinikizo la “mvinyo ya ghadhabu ya hasira ya Mungu Mwenyezi.” Ni kazi bure tu kwamba “wafalme wa nchi, na majeshi yao” wamekutana kufanya vita ya Har–Magedoni. Mpandaji-farasi mweupe akamilisha ushindi wake. Hakuna kitu kinachobaki katika tengenezo la kidunia la Shetani.—Ufunuo 19:12-21.
20. Ni nini kinachompata Ibilisi mwenyewe?
20 Lakini namna gani Ibilisi mwenyewe? Kwenye Ufunuo 20:1-6, Kristo Yesu anasimuliwa kuwa “malaika akishuka kutoka mbinguni, mwenye ufunguo wa kuzimu [abiso, NW], na mnyororo mkubwa mkononi mwake.” Yeye amkaba yule drakoni, Nyoka wa zamani, ambaye ni Ibilisi na Shetani, amfunga, amvurumisha ndani ya abiso, na kufunga na kuweka kalafati (kuziba) juu yayo. Shetani akiwa ameondolewa na akiwa bila uwezo wa kuongoza vibaya mataifa tena, Utawala wa Mileani wenye utukufu wa Mwana-Kondoo na bibi-arusi wake waanza. Hakuna tena machozi ya huzuni! Hakuna tena kifo cha Kiadamu! Hakuna kuomboleza, hakuna kilio, hakuna maumivu! “Mambo ya kwanza yamekwisha kupita.”—Ufunuo 21:4.
21. Tunapongojea kwa hamu kule kufunuliwa kwa Yesu Kristo, azimio letu lapasa kuwa nini?
21 Tukiwa tunangoja kwa hamu kufunuliwa kwa Bwana wetu Yesu Kristo, acheni sisi tuonyeshe bidii katika kuwaambia wengine juu ya ahadi za Ufalme wa Mungu zenye upendo. Kukombolewa kuko karibu! Na twende mbele, mbele nyakati zote, tukiwa watoto waliotiwa nuru wa Yehova yule Bwana Mwenye Enzi Kuu!
Kwa Kurudia
◻ Ni nini kinachoonyesha kwamba kufunuliwa kwa Yesu Kristo kuko karibu sana?
◻ Siku ya hasira-kisasi ya Mungu itafikaje?
◻ ‘Wampendao Yehova’ wanapaswa kuonaje hali ya ulimwengu iliyopo?
◻ Ni mfuatano gani wa mambo utakaokuwapo dhiki kubwa itakapofyatuka?
[Picha katika ukurasa wa 23]
Yesu ‘aja juu ya mawingu,’ bila kuonekana, ili kutekeleza hukumu
[Picha katika ukurasa wa 25]
Punde tu dini bandia, Mfumo mbovu wa Shetani, na Shetani mwenyewe wote wataharibiwa