Maswali Kutoka kwa Wasomaji

◼ Malaika ni roho, ambao hawana miili yenye mnofu, basi kwa nini ninyi mnawaonyesha wakiwa na mabawa katika vielezi vyenu? Je, hayo ni mapokeo ya kidini tu?

Kwa kawaida sisi huonyesha malaika kuwa na mabawa kwa sababu ya maelezo ya kifananisho yaliyo ndani ya Biblia.

Wewe uko sahihi kusema kwamba viumbe wa kiroho hawana miili ya mnofu yenye mabawa ya halisi—wala nyuso, wala mikono, wala miguu, au sehemu nyinginezo za mwili. Walakini, pindi fulani, wakati malaika walipowatokea watumishi wa Mungu, ni lazima iwe walionekana kama wanadamu wa kawaida, kwa kuwa walidhaniwa kuwa hivyo.—Mwanzo 18:2, 22; 19:1; Waamuzi 6:11-22.

Hata hivyo, nyakati nyingine, wanadamu walipokea njozi za malaika na walieleza juu yao. Nabii Ezekieli aliona “viumbe hai vinne,” na katika njozi ya baadaye, yeye aliwatambulisha hawa kuwa malaika wa cheo kinachojulikana kuwa makerubi. (Ezekieli 1:5; 9:3; 10:3) Kila mmoja wa malaika hawa alikuwa na mabawa manne, ambayo yalionyesha uwezo wao wa kuitikia kwa haraka amri za Mungu kwa kwenda upande wowote. “Hawakugeuka walipokwenda, walikwenda kila mmoja kuelekea mbele . . . Roho ilikotaka kwenda ndiko walikokwenda; hawakugeuka walipokwenda.”—Ezekieli 1:6, 9, 12.

Lakini malaika walioonwa katika njozi hawakuonekana vivyo hivyo sikuzote. Viumbe wa kimalaika walioonwa na Isaya wanaoitwa maserafi walikuwa na mabawa sita. (Isaya 6:1, 2) Kulikuwa na tofauti-tofauti hata katika njozi za Ezekieli. Katika ya kwanza, malaika walikuwa na miguu, mikono chini ya kila la yale mabawa manne, na nyuso nne (kama uso wa mwanadamu, wa simba, wa ng’ombe ndume, wa tai). Katika njozi yake inayofuata, uso mmoja ulikuwa kama ule wa kerubi wala si wa ng’ombe ndume, labda kudokeza ile nguvu kubwa ya makerubi. Katika njozi ya baadaye zaidi ya mapambo ya hekalu la kifananisho, Ezekieli aliona makerubi ambao walikuwa na nyuso mbili tu, mmoja wa mwanadamu na ule mwingine wa simba. (Ezekieli 1:5-11; 10:7-17; 41:18, 19) Katika Patakatifu Zaidi pa tabenakulo (hema), na pia pa hekalu iliyojengwa na Solomoni katika Yerusalemu, palikuwa makerubi waliokuwa na mabawa mawili. Hawa walikuwa juu ya kifuniko cha dhahabu cha lile sanduku lililoitwa sanduku la agano. Wale makerubi wawili wa dhahabu walielekeana, na wote wawili walikuwa na mabawa mawili ambayo yalinyooshwa juu ya Sanduku. (Kutoka 25:10-22; 37:6-9) Makerubi wawili wenye kufunikwa na dhahabu walio wakubwa zaidi walisimama juu ya Sanduku (na kifuniko chalo) katika hekalu la Solomoni, kila mmoja akiwa na mabawa mawili yaliyonyooshwa.—1 Wafalme 8:6-8; 1 Nyakati 28:18; 2 Nyakati 5:7, 8.

Yosefo aliandika hivi: “Hakuna anayeweza kusema au kuwaza juu ya jinsi wale makerubi wenyewe walivyoonekana.” Hivyo, wanachuo na wastadi fulani huchora malaika (hasa makerubi) kwa msingi wa vile viitwavyo eti vyanzo vya kale vya Mashariki ya Karibu vya miungu iliyo na umbo la wanyama wenye mabawa. Lakini mwongozo wenye kutegemeka zaidi ni elezo la Ezekieli kwamba wale aliowaona “walikuwa na sura ya mwanadamu.” (Ezekieli 1:5) Kwa hiyo malaika wa kimbingu wanapoonyeshwa katika vielezi vya fasihi zetu, sisi kwa kawaida huwaonyesha wakiwa hasa na umbo la kibinadamu. Sisi pia huwaonyesha kuwa na mabawa kwa sababu ya maelezo mengi ya Kibiblia yanayoonesha malaika wa namna mbalimbali wakiwa na mabawa na kwa sababu ya maelezo juu ya malaika ‘wakiruka.’—Ufunuo 14:6; Zaburi 18:10.

Mwishowe, ukurasa 288 wa Ufunuo—Upeo Wao Mtukufu U Karibu! waonyesha kiumbe wa kimbingu mwenye mabawa, akiwa na taji kichwani na ufunguo mkononi mwake. Hilo ni elezo zuri la picha la Ufunuo 20:1: “Kisha nikaona malaika akishuka kutoka mbinguni, mwenye ufunguo wa kuzimu [abiso, NW], na mnyororo mkubwa mkononi mwake.” Sisi tunaelewa malaika huyu mwenye ufunguo kuwa Yesu Kristo aliyetukuzwa. Kielezi kinamwonyesha kuwa na mabawa kupatana na ukweli wa kwamba kwa kawaida malaika walioonwa katika njozi walikuwa na mabawa.