Umati Mkubwa wa Waabudu wa Kweli—Umetoka Wapi?

“Tazama, mkutano mkubwa sana [“umati mkubwa,” “NW”] . . . wa kila taifa, na kabila, na jamaa, na lugha, wamesimama mbele ya kile kiti cha enzi, na mbele za Mwana-Kondoo.”—UFUNUO 7:9.

1. Kwa nini njozi za kiunabii za Ufunuo zatupendeza sana leo?

KUELEKEA mwisho wa karne ya kwanza W.K., mtume Yohana aliona njozi za matukio ya ajabu yanayohusika na kusudi la Yehova. Baadhi ya mambo aliyoona katika njozi yanatimizwa sasa. Mengine yatatimizwa hivi karibuni. Yote hayo yahusika na upeo wenye kutazamisha wa kusudi tukufu la Yehova la kutakasa jina lake mbele ya uumbaji wote. (Ezekieli 38:23; Ufunuo 4:11; 5:13) Na zaidi, hayo yahusu matazamio ya uhai ya kila mmoja wetu. Kwa njia gani?

2. (a) Mtume Yohana aliona nini katika njozi yake ya nne? (b) Tutafikiria maswali gani kuhusu njozi hii?

² Katika njozi ya nne kati ya mfululizo wa njozi za Ufunuo, Yohana aliona malaika wakizuia pepo za uharibifu mpaka “watumwa wa Mungu wetu” watiwe muhuri katika vipaji vya nyuso zao. Kisha akaona tukio lenye kusisimua zaidi—“mkutano mkubwa sana [“umati mkubwa,” NW] ambao hapana mtu awezaye kuuhesabu, watu wa kila taifa, na kabila, na jamaa, na lugha,” wakiungamana katika kumwabudu Yehova na kumheshimu Mwana wake. Hao, Yohana aliambiwa, walikuwa watu ambao wangetoka katika dhiki kubwa. (Ufunuo 7:1-17) Ni nani wanaosemwa kuwa “watumwa wa Mungu wetu”? Na ni nani watakaokuwa “umati mkubwa” wa waokokaji wa dhiki? Je, utakuwa mmoja wao?

Ni Nani Walio “Watumwa wa Mungu Wetu”?

3. (a) Katika Yohana 10:1-18, Yesu alitoaje kielezi juu ya uhusiano wake na wafuasi wake? (b) Yesu alifanya nini kiwezekane kwa kondoo zake kupitia kifo chake cha kidhabihu?

³ Miezi minne hivi kabla ya kifo chake, Yesu alijisema kuwa “mchungaji mwema” na wafuasi wake kuwa “kondoo” ambao yeye angetoa uhai wake kwa ajili yao. Yeye alitaja kipekee kondoo aliopata ndani ya zizi la kondoo la mfano na baadaye kuwatunza kwa njia ya kipekee. (Yohana 10:1-18)a Kwa upendo, Yesu alitoa nafsi yake kwa niaba ya kondoo zake, akiandaa bei ya fidia iliyohitajiwa ili wawekwe huru kutoka kwa dhambi na kifo.

4. Ni nani waliokuwa wa kwanza kukusanywa wakiwa kondoo kulingana na maneno ya Yesu hapa?

⁴ Lakini, kabla ya kufanya hivyo, akiwa Mchungaji Mwema, Yesu mwenyewe aliwakusanya wanafunzi wake. Wanafunzi wa kwanza walijulishwa kwake na Yohana Mbatizaji, yule “bawabu” wa kielezi cha Yesu. Yesu alikuwa akiwatafuta watu ambao wangekubali fursa ya kuwa sehemu ya ‘mbegu ya Abrahamu’ yenye sehemu nyingi. (Mwanzo 22:18; Wagalatia 3:16, 29) Yeye alisitawisha ndani ya mioyo yao uthamini wa Ufalme wa mbinguni, naye aliwahakikishia kwamba alikuwa akienda kuwatayarishia mahali katika nyumba ya Baba yake wa kimbingu. (Mathayo 13:44-46; Yohana 14:2, 3) Kwa kufaa yeye alisema hivi: “Kutoka siku za Yohana Mbatizaji mpaka sasa ufalme wa mbinguni ndio mradi ambao kuelekea huo watu hukaza mwendo, na wale wanaokaza mwendo mbele wanaukamata.” (Mathayo 11:12, NW) Hawa waliomfuata ili kupata mradi huo walikuwa ndani ya lile zizi la kondoo ambalo Yesu alitaja.

5. (a) Ni nani walio “watumwa wa Mungu wetu” wanaotajwa katika Ufunuo 7:3-8? (b) Ni nini kionyeshacho kwamba wengi zaidi wangejiunga katika ibada pamoja na Waisraeli wa kiroho?

⁵ Katika Ufunuo 7:3-8, wale wanaokaza mwendo kwa mafanikio kuelekea mradi huo wa kimbingu pia wanarejezewa kuwa “watumwa wa Mungu wetu.” (Ona 1 Petro 2:9, 16.) Je, wale 144,000 wanaotajwa hapo ni Wayahudi wa asili pekee? Je, wale walio ndani ya zizi la kondoo la mfano katika kielezi cha Yesu ni Wayahudi pekee? Bila shaka la; wao ni washiriki wa Israeli la kiroho la Mungu, wao wote washiriki na Kristo katika mbegu ya kiroho ya Abrahamu. (Wagalatia 3:28, 29; 6:16; Ufunuo 14:1, 3) Bila shaka, wakati ungefika hatimaye ambapo idadi yao kamili iliyokuwa imewekwa ingejazwa. Kisha ni nini kingetokea? Kama Biblia ilivyotabiri, wengine—wakiwa umati mkubwa—wangejiunga na Waisraeli hao wa kiroho katika kumwabudu Yehova.—Zekaria 8:23.

“Kondoo Wengine” —Je, Wao Ni Wakristo Wasio Wayahudi?

6. Yohana 10:16 yaelekezea tukio gani?

⁶ Baada ya kutaja zizi moja la kondoo katika Yohana 10:7-15, Yesu alitaja kikundi kingine, akisema: “Kondoo wengine ninao, ambao si wa zizi hili; na hao nao imenipasa kuwaleta; na sauti yangu wataisikia; kisha kutakuwako kundi moja na mchungaji mmoja.” (Yohana 10:16) Hao “kondoo wengine” ni nani?

7, 8. (a) Kwa nini wazo la kwamba kondoo wengine ni Wakristo Wasio Wayahudi lategemea hoja isiyo ya kweli? (b) Ni mambo yapi yanayohusu kusudi la Mungu kwa ajili ya dunia yapasayo kuwa na uvutano juu ya uelewevu wetu wa utambulisho wa kondoo wengine?

⁷ Waeleza-mambo wa Jumuiya ya Wakristo huwa na maoni kwamba hao kondoo wengine ni Wakristo Wasio Wayahudi na kwamba wale walio katika zizi la kondoo lililotajwa hapo awali ni wa Kiyahudi, wale waliokuwa chini ya agano la Sheria, na kwamba vikundi vyote viwili vyaenda mbinguni. Lakini Yesu alizaliwa akiwa Myahudi na kwa uzawa alikuwa chini ya agano la Sheria. (Wagalatia 4:4) Na zaidi, wale wanaoona kondoo wengine kuwa Wakristo Wasio Wayahudi ambao watathawabishwa kwa uhai wa kimbingu wanakosa kufikiria sehemu ya maana sana ya kusudi la Mungu. Yehova alipowaumba wanadamu wa kwanza na kuwaweka katika bustani ya Edeni, alielewesha wazi kwamba kusudi lake lilikuwa dunia ijazwe, na yote iwe paradiso, na pia watunzaji wayo wanadamu wafurahie maisha milele—kwa takwa la kwamba wamstahi na kumtii Muumba wao.—Mwanzo 1:26-28; 2:15-17; Isaya 45:18.

⁸ Adamu alipotenda dhambi, kusudi la Yehova halikuharibiwa. Kwa upendo Mungu alifanya andalizi kwa wazao wa Adamu kuwa na fursa ya kufurahia kile ambacho Adamu alishindwa kuthamini. Yehova alitabiri kwamba angeinua mkombozi, mbegu, ambaye kupitia kwake mataifa yote yangepata baraka. (Mwanzo 3:15; 22:18) Ahadi hiyo haikumaanisha kwamba watu wote wazuri wangechukuliwa mbinguni. Yesu aliwafunza wafuasi wake kusali hivi: “Ufalme wako uje, mapenzi yako yatimizwe, hapa duniani kama huko mbinguni.” (Mathayo 6:9, 10, italiki ni zetu.) Muda mfupi kabla ya kusema juu ya kielezi kilichoandikwa katika Yohana 10:1-16, Yesu aliwaambia wanafunzi wake kwamba ni “kundi dogo” tu ambalo Baba yake alikuwa amekubali kuwapa Ufalme wa kimbingu. (Luka 12:32, 33) Kwa hiyo tusomapo kielezi cha Yesu juu yake mwenyewe kuwa Mchungaji Mwema anayetoa nafsi yake kwa niaba ya kondoo zake, lingekuwa kosa kutowafikiria wengi wa wale ambao Yesu anawaleta chini ya utunzi wake wenye upendo, wale wanaokuwa watawalwa wa kidunia wa Ufalme wake wa kimbingu.—Yohana 3:16.

9. Mapema kama 1884, Wanafunzi wa Biblia walielewa utambulisho wa kondoo wengine kuwa nini?

⁹ Mapema kama 1884, Watch Tower lilitambua kondoo wengine kuwa watu ambao wangepewa fursa ya kuishi hapa duniani chini ya hali ambazo zingetimiza kusudi la awali la Mungu. Hao Wanafunzi wa Biblia wa mapema waling’amua kwamba baadhi ya hao kondoo wengine wangekuwa watu ambao walikuwa wameishi na kufa kabla ya huduma ya Yesu ya kidunia. Hata hivyo, kulikuwa na mambo mengine madogo-madogo ambayo hawakuelewa kwa usahihi. Kwa mfano, walifikiria kwamba kukusanywa kwa kondoo wengine kungetokea baada ya watiwa-mafuta wote kupokea thawabu yao ya kimbingu. Lakini, walikuwa wameelewa kabisa kwamba kondoo wengine hawakuwa tu Wakristo Wasio Wayahudi. Fursa ya kuwa mmoja wa kondoo wengine ilikuwapo kwa wote Wayahudi na Wasio Wayahudi, kwa watu wa mataifa yote.—Linganisha Matendo 10:34, 35.

10. Ili tuwe watu ambao Yesu awaona kikweli kuwa kondoo zake wengine, ni lazima jambo gani liwe kweli kwetu?

¹⁰ Ili wafae katika ufafanuzi uliotolewa na Yesu, ni lazima kondoo wengine wawe watu ambao, bila kujali malezi yao ya kijamii au ya kikabila, wamtambua Yesu Kristo kuwa Mchungaji Mwema. Hilo latia nini ndani? Ni lazima waonyeshe unyenyekevu na utayari wa kuongozwa, ambazo ni sifa za tabia ya kondoo. (Zaburi 37:11) Kama ilivyo na kundi dogo, ni lazima wao ‘waijue sauti ya mchungaji mwema’ na kutojiruhusu kuongozwa na wengine ambao huenda wakajaribu kuwavutia. (Yohana 10:4; 2 Yohana 9, 10) Ni lazima wao watambue umaana wa kile Yesu alifanya katika kutoa nafsi yake kwa niaba ya kondoo zake na kudhihirisha imani kamili katika andalizi hilo. (Matendo 4:12) Ni lazima ‘waisikilize’ sauti ya Mchungaji Mwema awahimizapo kutoa utumishi mtakatifu kwa Yehova pekee, kuendelea kutafuta kwanza Ufalme, kuendelea kujitenga na ulimwengu, na kuonyeshana upendo wenye kujidhabihu. (Mathayo 4:10; 6:31-33; Yohana 15:12, 13, 19) Je, unafaa katika ufafanuzi huo juu ya wale ambao Yesu awaona kuwa kondoo zake wengine? Je, wataka? Ni uhusiano wenye thamani kama nini unaopatikana kwa wale wote ambao kwa kweli huja kuwa kondoo wengine wa Yesu!

Staha kwa Mamlaka ya Ufalme

11. (a) Katika ishara ya kuwapo kwake, Yesu alisema nini kuhusu kondoo na mbuzi? (b) Ni nani walio ndugu ambao Yesu anawarejezea?

¹¹ Miezi kadhaa baada ya kutoa kielezi hicho kilicho juu, Yesu alirudi tena Yerusalemu. Alipokuwa ameketi kwenye Mlima wa Mizeituni juu ya eneo la hekalu, aliwapa wanafunzi wake maelezo mengi madogo-madogo ya ‘ishara ya kuwapo kwake na ya umalizio wa mfumo wa mambo.’ (Mathayo 24:3, NW) Tena alitaja kule kukusanywa kwa kondoo. Miongoni mwa mambo mengine, yeye alisema: “Hapo atakapokuja Mwana wa Adamu katika utukufu wake, na malaika watakatifu wote pamoja naye, ndipo atakapoketi katika kiti cha utukufu wake; na mataifa yote watakusanyika mbele zake; naye atawabagua kama vile mchungaji abaguavyo kondoo na mbuzi; atawaweka kondoo mkono wake wa kuume, na mbuzi mkono wake wa kushoto.” Katika mfano huu, Yesu alionyesha kwamba wale wanaoelekezewa fikira na Mfalme wangehukumiwa kwa msingi wa jinsi walivyowatendea “ndugu” zake. (Mathayo 25:31-46) Ndugu hao ni nani? Ni Wakristo wazaliwa kwa roho ambao kwa uzawa huo ni “wana wa Mungu.” Yesu ni Mwana wa kwanza wa Mungu. Kwa hiyo, wao ni ndugu za Kristo. Wao ni “watumwa wa Mungu wetu” wanaotajwa katika Ufunuo 7:3, waliochaguliwa kutoka miongoni mwa wanadamu ili kushiriki pamoja na Kristo katika Ufalme wa kimbingu.—Warumi 8:14-17.

12. Kwa nini njia ambayo watu hutendea ndugu za Kristo ni yenye umaana mkubwa?

¹² Njia ambayo wanadamu wengine huwatendea warithi hao wa Ufalme ni muhimu sana. Je, unawaona kama Yesu Kristo awaonavyo na kama Yehova awaonavyo? (Mathayo 24:45-47; 2 Wathesalonike 2:13) Mtazamo wa mtu kuelekea watiwa-mafuta hawa waonyesha mtazamo wake kuelekea Yesu Kristo mwenyewe na kuelekea Baba yake, Mwenye Enzi Kuu ya Ulimwengu Wote Mzima.—Mathayo 10:40; 25:34-46.

13. Ni kwa kadiri gani Wanafunzi wa Biblia katika 1884 walielewa mfano wa kondoo na mbuzi?

¹³ Katika toleo lalo la Agosti 1884, Watch Tower lilitaja kwa usahihi kwamba “kondoo” katika mfano huo ni wale ambao wangejiwekea matazamio ya uhai mkamilifu duniani. Pia ilieleweka kwamba mfano huo lazima utumike Kristo anapotawala kutoka kiti chake cha enzi cha kimbingu. Lakini, wakati huo hawakutambua vizuri sana wakati ambapo angeanza kazi ya kutenganisha iliyofafanuliwa hapo au muda ambao kazi hiyo ingechukua.

14. Hotuba ya mkusanyiko katika 1923 iliwasaidiaje Wanafunzi wa Biblia wakati ambapo mfano wa kiunabii wa Yesu ungetimizwa?

¹⁴ Hata hivyo, katika 1923, katika hotuba ya mkusanyiko, J. F. Rutherford, aliyekuwa msimamizi wa Watch Tower Society wakati huo, alielewesha wazi utimizo wa mfano wa kondoo na mbuzi. Kwa nini? Kwa sehemu, sababu moja ikiwa kwamba mfano huo waonyesha kwamba ndugu za Mfalme—angalau baadhi yao—bado wangalikuwa duniani. Miongoni mwa wanadamu, ni wafuasi wake wenye kuzaliwa kwa roho peke yao ndio wangeweza kuitwa ndugu zake kikweli. (Waebrania 2:10-12) Wao hawangekuwa duniani wakati wa Mileani, wakiwapa watu fursa ya kuwatendea mema katika njia ambazo Yesu alifafanua.—Ufunuo 20:6.

15. (a) Ni matukio gani yaliyowasaidia Wanafunzi wa Biblia kutambua kwa usahihi kondoo wa mfano wa Yesu? (b) Kondoo wametoaje uthibitisho wa uthamini wao kwa Ufalme?

¹⁵ Katika hotuba hiyo mwaka wa 1923, jitihada ilifanywa ya kutambua wale wanaofaa katika ufafanuzi wa Bwana wa kondoo na mbuzi, lakini mambo mengine yalihitaji kueleweka kabla ya maana kamili ya mfano huo kuwa dhahiri. Katika miaka iliyofuata, Yehova alielekeza uangalifu wa watumishi wake kwenye mambo hayo madogo-madogo yenye umaana hatua kwa hatua. Hayo yalitia ndani kuelewa wazi, katika 1927, kwamba “mtumwa mwaminifu mwenye akili” ni kikundi chote cha Wakristo walio duniani ambao ni watiwa-mafuta kwa roho; kuelewa pia, katika 1932, uhitaji wa kujitambulisha bila hofu kuwa mmoja wa watumishi watiwa-mafuta wa Yehova, kama Yonadabu alivyofanya na Yehu. (Mathayo 24:45; 2 Wafalme 10:15) Wakati huo, kwa msingi wa Ufunuo 22:17, watu hao wenye mfano wa kondoo walitiwa moyo hasa kushiriki katika kupeleka ujumbe wa Ufalme kwa wengine. Uthamini wao kwa Ufalme wa Kimesiya haungewasukuma tu kuonyesha fadhili ya kibinadamu kwa watiwa-mafuta wa Bwana bali pia ungewasukuma kuweka maisha zao wakfu kwa Yehova kupitia Kristo na kushirikiana kwa ukaribu na watiwa-mafuta wake, wakishiriki kwa bidii katika kazi wanayofanya. Je, unafanya hivyo? Kwa wale wanaofanya hivyo, Mfalme atasema hivi: “Njoni, mliobarikiwa na Baba yangu, urithini ufalme mliowekewa tayari tangu kuumbwa ulimwengu.” Wao watakuwa na tazamio tukufu mbele yao la uhai wa milele katika ukamilifu katika kao la kidunia la Ufalme.—Mathayo 25:34, 46.

“Umati Mkubwa” —Unaenda Wapi?

16. (a) Ni maoni gani yenye makosa ambayo Wanafunzi wa Biblia wa mapema walikuwa nayo kuhusu utambulisho wa umati mkubwa wa Ufunuo 7:9? (b) Ni lini na kwa msingi gani maoni yao yalisahihishwa?

¹⁶ Kwa muda fulani watumishi wa Yehova waliamini kwamba umati mkubwa wa Ufunuo 7:9, 10 ulikuwa tofauti na kondoo wengine wa Yohana 10:16 na kondoo wa Mathayo 25:33. Kwa sababu Biblia yasema kwamba “wamesimama mbele ya kile kiti cha enzi,” ilifikiriwa kwamba wao wangekuwa mbinguni, si katika viti vya enzi, wakitawala wakiwa warithi-wenzi pamoja na Kristo, bali wakiwa katika cheo cha chini mbele ya kiti cha enzi. Wao walionwa kuwa Wakristo ambao hawakuwa waaminifu sana, wale ambao hawakuonyesha roho ya kujidhabihu kwa kweli. Katika 1935 maoni hayo yalisahihishwa.b Uchunguzi wa Ufunuo 7:9 kwa kufikiria maandiko kama Mathayo 25:31, 32 waonyesha wazi kwamba watu walio hapa duniani waweza kuwa “mbele ya kile kiti cha enzi.” Ilitajwa pia kwamba Mungu hana viwango viwili vya uaminifu. Ni lazima watu wote ambao wangekubaliwa naye wadumishe uaminifu wa maadili kwake.—Mathayo 22:37, 38; Luka 16:10.

17, 18. (a) Ni nini kilichotokeza ongezeko kubwa, tangu 1935, katika idadi ya wale waliotazamia uhai wa milele duniani? (b) Wale wa umati mkubwa wanashiriki kwa bidii katika kazi gani muhimu?

¹⁷ Kwa miaka mingi watu wa Yehova walikuwa wamesema juu ya ahadi za Mungu kuhusu dunia. Kwa sababu ya kile walichotazamia kitendeke huko nyuma katika miaka ya 1920, wao walitangaza kwamba “Mamilioni Wanaoishi Sasa Hawatakufa Kamwe.” Lakini hakukuwa na mamilioni waliokubali maandalizi ya Mungu kwa ajili ya uhai wakati huo. Kwa walio wengi waliokubali kweli, roho takatifu iliwatokezea tumaini la uhai wa kimbingu. Hata hivyo, badiliko kubwa lilitokea hasa baada ya 1935. Haikuwa kwamba Mnara wa Mlinzi lilikuwa limepuuza tumaini la uhai wa milele duniani. Kwa miongo mingi watumishi wa Yehova walikuwa wamezungumza juu ya jambo hilo nao walikuwa wametafuta watu wanaofaa katika ule ufafanuzi wa Biblia. Ingawa hivyo, katika wakati uliowekwa wa Yehova, alihakikisha kwamba wao walijitokeza.

¹⁸ Rekodi zinazopatikana zaonyesha kwamba kwa miaka mingi walio wengi kati ya wenye kuhudhuria Ukumbusho walishiriki mifano. Lakini kwa miaka 25 baada ya 1935, hudhurio la Ukumbusho wa kifo cha Kristo liliongezeka sana kufikia zaidi ya mara mia moja kushinda idadi ya wale waliokuwa wakishiriki. Hao wengine walikuwa nani? Wale waliotazamia kuwa washiriki wa umati mkubwa. Kwa wazi, wakati wa Yehova ulikuwa umefika wa kuwakusanya na kuwatayarisha kwa ajili ya dhiki kubwa iliyo mbele tu. Kama ilivyotabiriwa, wao walikuwa wametoka katika “kila taifa, na kabila, na jamaa, na lugha.” (Ufunuo 7:9) Wao ni wenye bidii ya kushiriki katika kazi ambayo Yesu alitabiri aliposema hivi: “Habari njema ya ufalme itahubiriwa katika ulimwengu wote, kuwa ushuhuda kwa mataifa yote; hapo ndipo ule mwisho utakapokuja.”—Mathayo 24:14.

[Maelezo ya Chini]

Una Maelezo Gani

◻ Kwa nini njozi katika Ufunuo sura ya 7 ni yenye upendezi wa kipekee?

◻ Kwa nini kondoo wengine wa Yohana 10:16 si Wakristo Wasio Wayahudi pekee?

◻ Ni nini lazima kiwe kweli kuhusu wale wanaofaa katika ufafanuzi wa Biblia wa kondoo wengine?

◻ Mfano wa kondoo na mbuzi wakaziaje staha kwa mamlaka ya Ufalme?

◻ Ni nini kionyeshacho wakati wa Yehova ulipofika wa kukusanya umati mkubwa wa Ufunuo 7:9?