Kunufaika kwa Usomaji wa Biblia Kila Siku

“Mwenye furaha ni mtu . . . [ambaye] furaha yake iko katika sheria ya Yehova, naye husoma sheria yake kwa sauti ya chini mchana na usiku.”—ZABURI 1:1, 2, NW.

1. (a) Ni ishara gani yenye kutokeza yaonekana katika upande mmoja wa jengo la kiwanda kwenye makao makuu ya ulimwengu ya Watch Tower Society? (b) Tutanufaikaje binafsi tukizingatia himizo hilo?

“SOMA NENO LA MUNGU BIBLIA TAKATIFU KILA SIKU.” Kwa maandishi makubwa, maneno hayo yaonekana katika upande mmoja wa jengo fulani katika Brooklyn, New York, ambako Biblia na fasihi ya Biblia huchapishwa na Watchtower Bible and Tract Society. Himizo hilo halielekezwi tu kwa watu wa kilimwengu ambao huona ishara hiyo. Mashahidi wa Yehova watambua kwamba wao pia wahitaji kuizingatia. Watu ambao husoma Biblia kwa ukawaida na kuitumia binafsi hunufaika kutokana na fundisho, karipio, usahihisho na nidhamu katika uadilifu ambayo Biblia hutoa.—2 Timotheo 3:16, 17.

2. Ndugu Russell alikaziaje umuhimu wa usomaji wa Biblia?

² Mashahidi wa Yehova huthamini sana visaidizi vyao vya kujifunza Biblia, kutia na Mnara wa Mlinzi, nao huvitumia kwa ukawaida. Lakini wao wajua kwamba hakuna kimoja chavyo kinachochukua mahali pa Biblia yenyewe. Kule nyuma katika 1909, Charles Taze Russell, msimamizi wa kwanza wa Watch Tower Bible and Tract Society, aliandikia hivi wasomaji wa gazeti la Watch Tower: “Msisahau kwamba Biblia ndiyo Kiwango chetu na kwamba hata visaidizi tulivyopewa na Mungu viwe vya namna gani, hivyo ni ‘visaidizi’ wala si vibadala vya Biblia.”

3. (a) “Neno la Mungu” lina uvutano gani kwa wale walitumiao? (b) Waberoya walikuwa wakisoma na kujifunza Maandiko mara ngapi?

³ Maandiko yaliyopuliziwa yana kina na kani ambazo hakuna kitabu kingine chochote kinazo. “Neno la Mungu li hai, tena lina nguvu, tena lina ukali kuliko upanga uwao wote ukatao kuwili, tena lachoma hata kuzigawanya nafsi na roho, na viungo na mafuta yaliyomo ndani yake; tena li jepesi kuyatambua mawazo na makusudi ya moyo.” (Waebrania 4:12) Mwanafunzi Luka aliwapongeza kwa uchangamfu Waberoya, akiwaita “waungwana.” Wao hawakupokea tu neno kama lilivyohubiriwa na mtume Paulo na mwandamani wake Sila bali pia “wakayachunguza maandiko kila siku” ili kuamua msingi wa Kimaandiko wa yale yaliyokuwa yakifundishwa.—Matendo 17:11.

Kuisoma Kila Siku

4. Maandiko yanaonyesha twapaswa kusoma Biblia mara ngapi?

⁴ Biblia haisemi kihususa ni mara ngapi tunahitaji kuisoma. Hata hivyo, imeandika shauri la Yehova kwa Yoshua la ‘kusoma kitabu cha sheria kwa sauti ya chini mchana na usiku’ ili aweze kutenda kwa hekima na afanikiwe atekelezapo mgawo wake aliopewa na Mungu. (Yoshua 1:8, NW) Yatuambia kwamba yeyote yule aliyetawala Israeli ya kale akiwa mfalme alipaswa kusoma Maandiko “siku zote atakazoishi.” (Kumbukumbu la Torati 17:19) Yasema hivi zaidi: “Mwenye furaha ni mtu ambaye hajatembea katika shauri la waovu . . . Lakini furaha yake iko katika sheria ya Yehova, naye husoma sheria yake kwa sauti ya chini mchana na usiku.” (Zaburi 1:1, 2, NW) Pia, Gospeli iliyoandikwa na Mathayo yatuambia kwamba Yesu Kristo alipokataa jitihada za Shetani za kumjaribu Yeye, Yeye alinukuu kutoka kwa Maandiko ya Kiebrania yaliyopuliziwa, akisema hivi: “Imeandikwa, Mtu hataishi kwa mkate tu, ila kwa kila neno litokalo katika kinywa cha Mungu.” (Mathayo 4:4) Ni mara ngapi sisi huhitaji chakula cha kiroho? Kila siku! Kutwaa chakula cha kiroho kila siku ni muhimu hata zaidi kwa sababu kunakuwa na uvutano juu ya matazamio yetu ya uhai wa milele.—Kumbukumbu la Torati 8:3; Yohana 17:3.

5. Usomaji wa Biblia kila siku unaweza kutusaidiaje ‘kuenenda kama ulivyo wajibu wetu kwa Yehova’ tupatapo majaribu ya imani?

⁵ Kila mmoja wetu huhitaji kuimarishwa kila siku na Neno la Mungu. Kila siku—nyumbani, kazini, shuleni, barabarani, tununuapo vitu, katika huduma—tunapata vipingamizi vya imani yetu. Tutashughulikaje navyo? Je, tutakumbuka haraka amri na kanuni za Biblia? Badala ya kuendeleza hisia ya kujitegemea, Biblia yatuonya hivi: “Anayejidhania kuwa amesimama na aangalie asianguke.” (1 Wakorintho 10:12) Usomaji wa Biblia kila siku utatusaidia ‘tuenende kama ulivyo wajibu wetu kwa Yehova, tukimpendeza kabisa’ badala ya kuruhusu ulimwengu utufinyange kwa namna yao.—Wakolosai 1:9, 10; Warumi 12:2.

Uhitaji wa Kusoma Biblia kwa Kurudia-Rudia

6. Kwa nini inanufaisha kusoma Biblia kwa kurudia-rudia?

⁶ Kusoma Biblia ni tofauti sana na kusoma kitabu cha hadithi ya kubuniwa. Hadithi ya ubuni ipendwayo zaidi inakusudiwa kusomwa mara moja; mara mtu ajuapo hadithi hiyo na jinsi inavyoisha, hakuna tena sababu ya kuisoma. Kwa kutofautisha, hata tuwe tumesoma Biblia mara ngapi, twanufaika sana kwa kuisoma tena. (Mithali 9:9) Kwa mtu mwenye utambuzi, Maandiko hupata maana mpya kila wakati. Unabii mbalimbali unaohusu siku za mwisho huja kumvutia hata zaidi kwa sababu ya yale ameona, amesikia, na kujionea binafsi katika miezi ya majuzi. (Danieli 12:4) Apatapo maono mengi zaidi maishani na kukabili matatizo, msomaji wa Biblia mwenye utambuzi hutambua zaidi shauri ambalo huenda alikuwa amesoma kijuu-juu tu. (Mithali 4:18) Akipatwa na ugonjwa hatari, ahadi za Biblia kuhusu kuondolewa kwa uchungu na kurudishwa tena kwa afya nzuri huwa na umaana zaidi kwake kuliko wakati mwingine wowote. Marafiki wa karibu na washiriki wa familia wafapo, ahadi ya ufufuo huja kuwa yenye thamani hata zaidi.

7. Ni nini kitakachotusaidia tuchukuapo daraka jipya maishani, na kwa nini?

⁷ Huenda wewe binafsi umepata kusoma Biblia na kutumia shauri layo kwa zaidi ya miaka kadhaa. Lakini labda sasa unapata madaraka mapya maishani. Je, unapanga kufunga ndoa? Je, utakuwa mzazi? Je, umekabidhiwa daraka katika kutaniko ukiwa mzee au mtumishi wa huduma? Je, umekuwa mweneza-evanjeli wa wakati wote, ukiwa na fursa zaidi ya kuhubiri na kufundisha? Itanufaisha kama nini kusoma Biblia nzima tena ukiwa na madaraka hayo mapya akilini!—Waefeso 5:24, 25; 6:4; 2 Timotheo 4:1, 2.

8. Hali zenye kubadilika zaweza kuonyeshaje uhitaji wa kujifunza mengi zaidi kuhusu mambo tuliyofikiri tumejua tayari?

⁸ Huenda ulikuwa umefanya vizuri katika kuonyesha matunda ya roho wakati uliopita. (Wagalatia 5:22, 23) Lakini hali zilizobadilika zaweza kukukabili na uhitaji wa kujifunza zaidi kuhusu sifa hizo za kimungu. (Linganisha Waebrania 5:8.) Mmoja aliyekuwa mwangalizi asafiriye aliyelazimika kuacha utumishi wake wa kipekee ili kutunza wazazi wake waliokuwa wakizeeka alisema: “Nilikuwa nikifikiri kwamba nilikuwa nafanya vema katika kudhihirisha matunda ya roho. Sasa nahisi kana kwamba ninaanza tena upya kabisa.” Vivyo hivyo, waume na wake ambao wenzi wao wa ndoa waugua ugonjwa mbaya wa kimwili au kiakili waweza kupata kwamba wanapowatunza binafsi, mara kwa mara mkazo hutokeza maitikio yanayowavunja moyo. Usomaji wa kawaida wa Biblia ni chanzo cha faraja na msaada mkubwa.

Wakati Usomaji wa Biblia Uwezapo Kufanywa

9. (a) Ni nini liwezalo kusaidia mtu mwenye shughuli sana kupata wakati wa kufanya usomaji wa Biblia kila siku? (b) Kwa nini kusoma Neno la Mungu ni muhimu hasa kwa wazee?

⁹ Bila shaka, kwa watu ambao tayari ni wenye shughuli mno, ni vigumu kupata wakati kufanya jambo la ziada kwa ukawaida. Hata hivyo, twaweza kunufaika kutokana na kielelezo cha Yehova. Biblia yafunua kwamba yeye hufanya mambo kwa ‘nyakati zilizowekwa.’ (Mwanzo 21:2; Kutoka 9:5; Luka 21:24; Wagalatia 4:4, NW) Kuthamini umuhimu wa kusoma Neno la Mungu kwa ukawaida kwaweza kutusaidia kuweka wakati kwa ajili ya usomaji katika ratiba yetu ya kila siku. (Waefeso 5:15-17) Wazee hasa wahitaji kuweka wakati wa usomaji wa Biblia kwa ukawaida ili shauri wanalotoa litegemee kabisa kanuni za Biblia na ili kwamba roho waonyeshayo ionyeshe “hekima itokayo juu.”—Yakobo 3:17; Tito 1:9.

10. Wale ambao ni wasomaji wa Biblia kila siku hupata lini wakati wa kusoma?

¹⁰ Wengi ambao hufaulu na programu ya usomaji wa Biblia wa binafsi husoma asubuhi mapema kabla waanze utendaji wa siku. Wengine hupata kwamba wanaweza kuifanya bora zaidi kwa ukawaida katika pindi nyingine. Kaseti za kusikiliza Biblia (mahali inapopatikana) husaidia wasafiri kutumia vizuri wakati wa kusafiri, na Mashahidi wengine huzisikiliza wanapofanya kazi za kila siku za nyumbani. Programu ambazo zimefaulu kwa Mashahidi mbalimbali katika Ulaya, Afrika, Amerika Kaskazini, Amerika Kusini, na sehemu ya Mashariki zimeonyeshwa katika kurasa 20 na 21, katika makala “Wanapoisoma na Wanavyonufaika.”

11. Usomaji wa Biblia kila siku unaweza kutimizwaje hata kama wakati unaopatikana ni mdogo mno?

¹¹ Jambo kuu zaidi si kadiri ya wakati unaotumia katika usomaji wa Biblia wakati wowote ule bali ni ukawaida wako wa kuufanya. Unaweza kupata ikithawabisha kusoma kwa muda wa saa moja au zaidi katika kikao kimoja, ukifanya utafiti zaidi na kuzama kabisa katika habari hiyo. Lakini je, ratiba yako yaruhusu hilo kwa ukawaida? Badala ya kuacha siku zipite bila kusoma Biblia kabisa, je, haingekuwa bora kusoma kwa dakika 15 au hata kwa dakika 5 kila siku? Azimia kufanya usomaji wa Biblia kila siku. Kisha ongezea usomaji huo na utafiti wa kina inapowezekana.

Mifikio Mbalimbali ya Usomaji wa Biblia

12. Washiriki wapya wa familia ya Betheli na wanafunzi wa Gileadi wana programu gani ya usomaji wa Biblia?

¹² Kuna njia nyingi za kusoma Biblia. Inanufaisha kusoma kuanzia Mwanzo hadi Ufunuo. Washiriki wote wa familia ya Betheli ya duniani pote wanaotumika katika makao makuu au katika mojapo ofisi za tawi za Sosaiti huhitajika kusoma Biblia nzima katika kipindi cha mwaka wa kwanza wa utumishi wao wa Betheli. (Mara nyingi hiyo huhusisha kusoma sura tatu hadi tano, ikitegemea urefu wazo, au kurasa nne hadi tano, kila siku.) Ni lazima wanafunzi wa Watchtower Bible School of Gilead wasome Biblia toka jalada hadi jalada kabla ya kuhitimu. Inatumainiwa kwamba hilo litawasaidia kufanya usomaji wao wa Biblia kila siku uwe sehemu ya maisha zao.

13. Ni mradi gani unaopendekezwa kwa Mashahidi wapya waliotoka kubatizwa?

¹³ Inanufaisha Mashahidi wapya waliotoka kubatizwa kujiwekea mradi wa kusoma Biblia nzima. Katika 1975, wakati ambapo alikuwa akijitayarisha kwa ajili ya ubatizo, kijana mmoja mwanamume katika Ufaransa aliulizwa na mzee mmoja kama alikuwa na programu hususa ya usomaji wa Biblia. Tangu wakati huo yeye amesoma Biblia nzima kila mwaka, mara nyingi akisoma kabla aende kazini. Kwa habari ya matokeo, yeye asema: “Nimekuja kumjua Yehova zaidi. Naweza kuona jinsi kila kitu afanyacho kinavyohusika na kusudi lake na jinsi yeye huitikia vizuizi vitokeapo. Naona kwamba Yehova ni mwadilifu na mwema wakati uo huo katika matendo yake yote.”

14. (a) Ili kuanzisha programu ya binafsi itakayoendelea ya usomaji wa Biblia, ni nini iliyo lazima? (b) Ni nini liwezalo kutusaidia kukumbuka muhtasari wa jumla ya kila kitabu cha Biblia tunachosoma?

¹⁴ Je, umepata kusoma Biblia nzima? Kama sivyo, huu ni wakati mzuri wa kuanza. Weka ratiba hususa, na uifuate kabisa. Amua utakuwa ukisoma kurasa ngapi au sura ngapi kila siku, au amua tu utakuwa ukitumia muda gani na wakati gani. Si kila mtu atamaliza Biblia kwa mwaka mmoja, lakini jambo la maana ni kusoma Neno la Mungu kwa ukawaida, ukifanya hivyo kila siku ikiwezekana. Usomapo kupitia Biblia, unaweza kupata kwamba matumizi ya vitabu fulani vya marejezo yatasaidia kukazia akilini mwako muundo wa jumla wa habari hiyo. Ikiwa Insight on the Scriptures inapatikana katika lugha yenu, basi kabla ya kuanza kusoma kitabu fulani hususa cha Biblia, pitia habari fupi za mambo yacho makuu kama zilivyoandaliwa katika Insight.a Hasa ona vile vichwa vyenye maandishi mazito katika muhtasari huo. Au tumia vivyo hivyo muhtasari mrefu zaidi unaoandaliwa katika kitabu “Kila Andiko, Lenye Pumzi ya Mungu, Lafaa.”b

15. (a) Ni madokezo gani yaliyotolewa kwenye kurasa 16 na 17 yawezayo kuboresha usomaji wako wa Biblia? (b) Badala ya kusoma tu kurasa fulani kidesturi, tunapaswa kutoa uangalifu kwa jambo jipi muhimu?

¹⁵ Kusoma Biblia mfululizo kunanufaisha, lakini usiwe msomaji wa kidesturi tu. Usisome kurasa fulani kila siku ili tu uweze kusema kwamba ulisoma Biblia nzima kila mwaka. Kama inavyoonyeshwa katika sanduku “Madokezo ya Kuboresha Usomaji Wako wa Biblia” (kurasa 16 na 17), kuna njia nyingi unazoweza kutumia kusoma na kufurahia Biblia. Haidhuru unatumia njia gani, hakikisha kwamba unalisha akili yako na moyo wako.

Fahamu Unayosoma

16. Kwa nini ni muhimu kuchukua wakati wa kutafakari yale tusomayo?

¹⁶ Alipokuwa akifundisha wanafunzi wake, Yesu alikazia umaana wa kuelewa yale aliyoyasema. Jambo muhimu lilikuwa ‘kuelewa kwa mioyo’ bali si kushika tu mambo akilini. (Mathayo 13:14, 15, 19, 23) Jambo muhimu kwa Mungu ni jinsi mtu alivyo kindani, na ndilo jambo ambalo huwakilishwa na moyo. (1 Samweli 16:7; Mithali 4:23) Hivyo, kwa kuongezea kuhakikisha kwamba tunaelewa yale mafungu ya Biblia yasemayo, tunahitaji kuyatafakari, tukifikiria jinsi yanavyohusu maisha zetu wenyewe.—Zaburi 48:9; 1 Timotheo 4:15.

17. Ni zipi baadhi ya njia tunazoweza kutafakari yale tusomayo katika Maandiko?

¹⁷ Jaribu kutambua kanuni zinazotegemeza masimulizi ya Biblia ili kwamba uweze kutumia hizo katika hali unazokabili. (Linganisha Mathayo 9:13; 19:3-6.) Usomapo juu ya sifa za ajabu za Yehova na kuzitafakari, tumia fursa hiyo kuimarisha uhusiano wako binafsi pamoja naye, kusitawisha ndani yako hisia yenye nguvu ya ujitoaji-kimungu. Usomapo taarifa za kusudi la Yehova, fikiria jambo uwezalo kufanya ili kutenda kwa kupatana na hizo. Usomapo shauri la moja kwa moja, badala ya kujiambia tu, ‘Najua hilo,’ uliza, ‘Je, nafanya yale lisemayo?’ Ikiwa ndivyo, jiulize, ‘Ni katika njia zipi naweza kufanya hivyo “kikamili zaidi?”’ (1 Wathesalonike 4:1) Ujifunzapo juu ya matakwa ya Mungu, fikiria pia vielelezo halisi vya Biblia vya wale walioishi kwa kupatana na viwango hivyo na wale ambao hawakufanya hivyo. Fikiria sababu iliyofanya wafuatie mwendo waliochukua na matokeo yaliyotokea. (Warumi 15:4; 1 Wakorintho 10:11) Usomapo juu ya maisha ya Yesu Kristo, kumbuka kwamba ni Yesu ambaye Yehova amemkabidhi umaliki juu ya dunia yote; tumia fursa hiyo kuimarisha ndani yako tamaa ya ulimwengu mpya wa Mungu. Pia, chunguza njia ambazo unaweza kwa ukamili zaidi kuiga Mwana wa Mungu.—1 Petro 2:21.

18. Tunaweza kusawazishaje usomaji wa Biblia na matumizi yetu ya vichapo vya funzo vinavyoandaliwa kupitia “mtumwa mwaminifu mwenye akili”?

¹⁸ Bila shaka, usomaji wa Biblia haupasi kuchukua mahali pa matumizi yako ya habari nzuri sana za funzo ambazo zimetokezwa kupitia “mtumwa mwaminifu mwenye akili.” Hilo pia ni sehemu ya andalizi la Yehova—lenye thamani kubwa sana. (Mathayo 24:45-47) Hakikisha kwamba usomaji wenyewe wa Neno la Mungu unatokeza sana katika maisha yako. Ikiwa inawezekana, “SOMA NENO LA MUNGU BIBLIA TAKATIFU KILA SIKU.”

[Maelezo ya Chini]

Ungejibuje?

◻ Kwa nini inanufaisha kufanya usomaji wa Biblia kadiri fulani kila siku?

◻ Kwa nini tunahitaji kusoma Biblia tena na tena?

◻ Katika ratiba yako mwenyewe, ni wakati gani mzuri wa kufanya usomaji wa Biblia kila siku?

◻ Usomapo Biblia kwa kurudia-rudia, ni nini kiwezacho kuongezea unamna-namna wa programu yako?

◻ Kwa nini ni muhimu sana kutafakari yale tusomayo?

[Sanduku katika ukurasa wa 16, 17]

Mapendekezo ya kuboresha usomaji wako wa Biblia

(1) Watu wengi husoma vitabu vya Biblia kwa kufuata utaratibu wa jinsi vimefuatana kwa kuchapishwa, tokea Mwanzo hadi Ufunuo. Unaweza pia kuvisoma kwa utaratibu ambao viliandikwa awali. Kumbuka kwamba Biblia ni mkusanyo wa vitabu 66 vilivyopuliziwa, maktaba ya kimungu. Kwa unamna-namna, unaweza kutaka kusoma baadhi ya vitabu vinavyozungumzia historia, kisha vingine ambavyo ni vyenye unabii sana, vikifuatwa na vingine ambavyo ni barua za shauri, badala ya kufuata tu mfuatano wa ukurasa. Kumbuka yale umeyasoma, na hakikisha kusoma Biblia nzima.

(2) Baada ya kusoma sehemu ya Maandiko, jiulize inafunua nini kuhusu Yehova, kusudi lake, njia yake ya kufanya mambo; jinsi inavyopasa kuwa na uvutano maishani mwako; jinsi uwezavyo kuitumia kusaidia mtu mwingine.

(3) Ukiitumia ikiwa kiongozi ile chati “Main Events of Jesus’ Earthly Ministry” (Matukio Makuu ya Maisha ya Kidunia ya Yesu) iliyochapishwa chini ya kichwa “Yesu Kristo” katika Insight on the Scriptures (na pia katika “Kila Andiko, Lenye Pumzi ya Mungu, Lafaa”), soma masimulizi yanayolingana na hilo katika kila sehemu ya zile Gospeli, moja baada ya nyingine. Ongezea hayo kwa kuangalia sehemu zinazolingana katika kitabu Yule Mtu Mkuu Zaidi Aliyepata Kuishi.

(4) Usomapo kutoka kitabu cha Matendo ya Mitume masimulizi ya maisha na huduma ya Paulo, soma pia zile barua zilizopuliziwa zinazohusika. Na hivyo, majiji kadhaa au maeneo alikohubiri Paulo yatajwapo, tua na usome barua alizoandikia Wakristo wenzi katika sehemu hizo. Inanufaisha pia kufuata safari zake kwenye ramani, kama ile iliyoko katika ukurasa wa mwisho wa New World Translation.

(5) Pamoja na usomaji wako wa Kutoka hadi Kumbukumbu la Torati, soma barua kwa Waebrania upate maelezo mengi ya violezo vya kiunabii. Chini ya “Law” (Sheria) katika Insight on the Scriptures, ona ile chati “Some Features of the Law Covenant” (Sehemu Fulani za Agano la Sheria).

(6) Unaposoma vitabu vya kiunabii, chukua wakati wa kupitia habari za kihistoria zinazohusika katika Biblia. Mathalani, usomapo kitabu cha Isaya, pitia pia yale yasemwayo mahali pengine kuhusu wafalme Uzia, Yothamu, Ahazi, na Hezekia, wanaotajwa kwenye Isaya 1:1. (2 Wafalme, sura 15-20; 2 Mambo ya Nyakati, sura 26-32) Au usomapo Hagai na Zekaria, chukua muda upitie yale yapatikanayo katika kitabu cha Ezra.

(7) Chagua kitabu kimoja cha Biblia, soma sehemu yayo (labda sura moja), kisha fanya utafiti, ukitumia Watch Tower Publications Index au Watchtower Library katika kompyuta ikiwa inapatikana katika lugha yako. Tumia habari hizo maishani mwako mwenyewe. Uzitumie katika hotuba na katika huduma ya shambani. Kisha soma sehemu nyingine.

(8) Ikiwa kuna kichapo cha Watch Tower kinachoandaa maelezo ya kitabu fulani cha Biblia au sehemu yacho, ukitumie mara nyingi unaposoma sehemu hiyo ya Biblia. (Mathalani: kwa Wimbo Ulio Bora, Mnara wa Mlinzi, Desemba 1, 1957, kurasa 720-734, (Kiingereza); kwa Ezekieli, “The Nations Shall Know That I Am Jehovah”—How?; kwa Danieli, “Your Will Be Done on Earth” au Our Incoming World Government—God’s Kingdom; kwa Hagai na Zekaria, Paradise Restored to Mankind—By Theocracy!; kwa Ufunuo, Ufunuo—Upeo Wao Mtukufu U Karibu!)

(9) Usomapo, tazama baadhi ya marejezo-milinganisho. Ona mafungu 320 kutoka Maandiko ya Kiebrania ambayo yamenukuliwa moja kwa moja katika Maandiko ya Kigiriki ya Kikristo na mamia ya mafungu mengine ambayo yamefanyiwa marejezo, pamoja na matumizi yatolewayo. Marejezo-milinganisho huelekezea utimizo wa unabii uliorekodiwa katika Biblia, kwa mambo madogo-madogo ya kibiografia au kijiografia, na mawazo yafananayo yawezayo kuelewesha wazi maneno ambayo huenda ukapata kuwa magumu kuelewa.

(10) Ukitumia Toleo la Marejezo ya New World Translation, ikiwa inapatikana katika lugha yako, chunguza vielezi-chini na makala za nyongeza zinazohusika na yale unayosoma. Hizo zaonyesha msingi wa tafsiri zilizotumiwa na njia nyinginezo ambazo maneno makuu yaweza kutafsiriwa. Huenda pia ukataka kulinganisha tafsiri ya mistari fulani katika tafsiri nyinginezo za Biblia.

(11) Baada ya kusoma kila sura, andika muhtasari mfupi wa jambo kuu katika sura hiyo. Uutumie ukiwa msingi wa pitio la baadaye na utafakari.

(12) Usomapo Biblia, weka alama maandiko yaliyochaguliwa ambayo unataka hasa kukumbuka, au uyanakili katika kadi na kuziweka mahali utakapokuwa ukiziona kila siku. Uyakariri; uyatafakari; uyatumie. Usijaribu kukariri mengi pamoja, labda moja tu au mawili kila juma; kisha chagua mengine zaidi wakati mwingine usomapo Biblia.

[Picha katika ukurasa wa 15]

Je, unasoma Biblia au kusikiliza kaseti zayo kila siku?