2 நாளாகமம்

9 சாலொமோனைப் பற்றி சேபா தேசத்து ராணி+ கேள்விப்பட்டாள்; அதனால், சிக்கலான கேள்விகளைக் கேட்டு* அவருடைய அறிவைச் சோதித்துப் பார்க்க, மிகப் பெரிய பரிவாரத்துடன் எருசலேமுக்கு வந்தாள். பரிமளத் தைலத்தையும் ஏராளமான தங்கத்தையும்+ ரத்தினக் கற்களையும் அவளுடைய ஒட்டகங்கள் சுமந்துவந்தன. அவள் சாலொமோனைச் சந்தித்து, தன் மனதில் இருந்த எல்லா விஷயங்களைப் பற்றியும் கேட்டாள்.+ 2 அவள் கேட்ட எல்லா கேள்விகளுக்கும் சாலொமோன் பதில் சொன்னார். எந்தக் கேள்வியும் அவருக்குக் கஷ்டமாக இருக்கவில்லை.

3 சாலொமோனின் ஞானம்,+ அவர் கட்டிய அரண்மனை,+ 4 அவருடைய ஊழியர்கள் உட்கார்ந்திருந்த வரிசை, மேஜையில் பரிமாறப்பட்ட உணவு,+ பரிமாறப்பட்ட விதம், பரிமாறியவர்களின் உடை, பானம் பரிமாறிய ஆட்கள், அவர்களுடைய உடை, யெகோவாவின் ஆலயத்தில் அவர் வழக்கமாகச் செலுத்திய தகன பலிகள்+ ஆகியவற்றைப் பார்த்து சேபா தேசத்து ராணி வாயடைத்துப்போனாள்.* 5 அதனால் ராஜாவிடம், “உங்களுடைய சாதனைகளையும்* ஞானத்தையும் பற்றி எங்கள் தேசத்தில் நான் கேள்விப்பட்டது அத்தனையும் உண்மை. 6 ஆனால், நேரில் வந்து பார்க்கும்வரை அதையெல்லாம் நான் நம்பவே இல்லை.+ உங்களுடைய மகா ஞானத்தைப்+ பற்றிப் பாதிகூட நான் கேள்விப்படவில்லை என்றுதான் சொல்ல வேண்டும். நான் கேள்விப்பட்டதைவிட நீங்கள் பல மடங்கு சிறந்தவராக இருக்கிறீர்கள்.+ 7 உங்களுடைய மக்கள் எவ்வளவு சந்தோஷமானவர்கள்! எப்போதும் உங்களோடு இருந்து, உங்களுடைய ஞானமான வார்த்தைகளைக் கேட்கிற உங்களுடைய ஊழியர்கள் எவ்வளவு சந்தோஷமானவர்கள்! 8 உங்கள்மீது பிரியம் வைத்து, தன்னுடைய சிம்மாசனத்தில் உங்களை உட்கார வைத்த உங்களுடைய கடவுளான யெகோவாவைப் போற்றிப் புகழ்கிறேன். இஸ்ரவேலர்கள்மீது இன்றுபோல் என்றும் அன்பு காட்ட வேண்டுமென்று யெகோவா விரும்புவதால்,+ அவர்களுக்கு நீதி நியாயம் வழங்க உங்களை ராஜாவாக ஆக்கியிருக்கிறார்” என்று சொன்னாள்.

9 பின்பு, 120 தாலந்து* தங்கத்தையும்+ பெருமளவு பரிமளத் தைலத்தையும் ரத்தினக் கற்களையும் சாலொமோன் ராஜாவுக்குக் கொடுத்தாள்.+ சேபா தேசத்து ராணி கொண்டுவந்த அளவுக்குப் பரிமளத் தைலத்தை அதன் பிறகு வேறு யாருமே கொண்டுவரவில்லை.

10 ஓப்பீரிலிருந்து தங்கம் கொண்டுவந்த ஈராமின் ஆட்களும் சாலொமோனின் ஆட்களும்,+ சந்தன மரங்களையும் விலைமதிப்புள்ள கற்களையும்கூட கொண்டுவந்தார்கள்.+ 11 அந்தச் சந்தன மரங்களைப் பயன்படுத்தி யெகோவாவின் ஆலயத்திலும் தன்னுடைய அரண்மனையிலும்+ படிக்கட்டுகளை+ ராஜா அமைத்தார். அதோடு, பாடகர்களுக்காக யாழ்களையும் நரம்பிசைக் கருவிகளையும் செய்தார்.+ இதற்கு முன்பு யாருமே இவ்வளவு தரமான மரங்களை யூதா தேசத்தில் பார்த்ததில்லை.

12 சாலொமோன் ராஜாவும்கூட சேபா தேசத்து ராணி ஆசைப்பட்டுக் கேட்ட எல்லாவற்றையும் கொடுத்தார். அவள் கொண்டுவந்ததைவிட அதிகமான அன்பளிப்புகளைக் கொடுத்தார்.* அதன் பின்பு, அவள் தன் ஊழியர்களோடு தன்னுடைய தேசத்துக்குத் திரும்பிப் போனாள்.+

13 ஒவ்வொரு வருஷமும் சாலொமோனுக்குக் கிடைத்த தங்கத்தின் எடை 666 தாலந்து.+ 14 இது தவிர, வியாபாரிகளும் பயண வியாபாரிகளும் அவருக்குப் பொருள்களைக் கொண்டுவந்தார்கள். அரேபியாவிலுள்ள எல்லா ராஜாக்களும் இஸ்ரவேல் ஆளுநர்களும் அவருக்குத் தங்கமும் வெள்ளியும் கொண்டுவந்தார்கள்.+

15 சாலொமோன் ராஜா கலப்புத் தங்கத்தில் 200 பெரிய கேடயங்களைச் செய்தார்+ (ஒவ்வொரு கேடயத்துக்கும் 600 சேக்கல்* கலப்புத் தங்கம் பயன்படுத்தப்பட்டது).+ 16 அதோடு, கலப்புத் தங்கத்தில் 300 சிறிய கேடயங்களையும்* செய்தார். (இவை ஒவ்வொன்றையும் செய்ய மூன்று மினா* தங்கம் பயன்படுத்தப்பட்டது). பின்பு, ‘லீபனோன் வன மாளிகையில்’+ அவற்றை வைத்தார்.

17 அதோடு, யானைத்தந்தத்தில் மிகப் பெரிய சிம்மாசனம் ஒன்றைச் செய்து, அதன்மீது சுத்தமான தங்கத்தால் தகடு அடித்தார்.+ 18 அந்தச் சிம்மாசனத்துக்கு ஏறிப் போக ஆறு படிக்கட்டுகள் இருந்தன. அதனுடன் ஒரு தங்கக் கால்மணையும் இணைக்கப்பட்டிருந்தது. இருக்கையின் இரண்டு பக்கங்களிலும் கைப்பிடிகள் இருந்தன, ஒவ்வொரு கைப்பிடியின் பக்கத்திலும் ஒரு சிங்க உருவம்+ வைக்கப்பட்டிருந்தது. 19 அதோடு, ஆறு படிக்கட்டுகளிலும் இந்தப் பக்கம் ஒரு சிங்கம், அந்தப் பக்கம் ஒரு சிங்கம் என மொத்தம் 12 சிங்க உருவங்கள்+ வைக்கப்பட்டிருந்தன. வேறெந்த ராஜ்யத்திலும் இப்படிப்பட்ட சிம்மாசனம் செய்யப்படவில்லை. 20 சாலொமோன் ராஜா குடிக்கப் பயன்படுத்திய பாத்திரங்கள் எல்லாமே தங்கத்தில் செய்யப்பட்டிருந்தன. ‘லீபனோன் வன மாளிகையில்’ இருந்த எல்லா பாத்திரங்களும் சுத்தமான தங்கத்தில் செய்யப்பட்டிருந்தன, எதுவும் வெள்ளியில் செய்யப்படவில்லை. ஏனென்றால், சாலொமோன் காலத்தில் வெள்ளி+ ஒரு பொருட்டாகவே மதிக்கப்படவில்லை. 21 ராஜாவின் கப்பல்கள் ஈராமின்+ ஆட்களோடு தர்ஷீசுக்குப்+ போய்வந்தன. மூன்று வருஷங்களுக்கு ஒருமுறை தங்கம், வெள்ளி, யானைத்தந்தம்,+ வாலில்லா குரங்குகள், மயில்கள் ஆகியவற்றை ‘தர்ஷீஸ் கப்பல்கள்’ கொண்டுவந்தன.

22 இப்படி, உலகத்திலிருந்த வேறெந்த ராஜாவையும்விட செல்வத்திலும் ஞானத்திலும்+ சாலொமோன் ராஜா தலைசிறந்தவராக இருந்தார். 23 சாலொமோனைச் சந்தித்து, உண்மைக் கடவுள் தந்த ஞானத்தால்+ அவர் பேசிய வார்த்தைகளைக் கேட்க உலகத்திலிருந்த எல்லா தேசத்து ராஜாக்களும் ஆசைப்பட்டார்கள். 24 அவரைச் சந்திக்க வந்த ஒவ்வொருவரும் தங்கப் பொருள்கள், வெள்ளிப் பொருள்கள், உடைகள்,+ ஆயுதங்கள், பரிமளத் தைலம், குதிரைகள், கோவேறு கழுதைகள்* ஆகியவற்றை அன்பளிப்பாகக் கொண்டுவந்தார்கள்; வருஷா வருஷம் இப்படிச் செய்துவந்தார்கள். 25 சாலொமோனிடம் 4,000 குதிரை லாயங்களும், ரதங்களும், 12,000 குதிரைகளும்*+ இருந்தன; ரதங்களுக்கான நகரங்களிலும் எருசலேமில் ராஜா குடியிருந்த இடத்துக்குப் பக்கத்திலும் அவற்றை நிறுத்தி வைத்தார்.+ 26 ஆறு* தொடங்கி பெலிஸ்தியர்களின் தேசம் வரையிலும் எகிப்தின் எல்லை வரையிலும் இருந்த எல்லா அரசர்களையும் அவர் ஆட்சி செய்தார்.+ 27 வெள்ளியைக் கற்களைப் போலவும், தேவதாரு மரங்களை சேப்பெல்லாவிலுள்ள காட்டத்தி மரங்களைப்+ போலவும் சாலொமோன் ராஜா எருசலேமில் ஏராளமாகக் கிடைக்கச் செய்தார். 28 எகிப்திலிருந்தும் மற்ற தேசங்களிலிருந்தும் சாலொமோனுக்காகக் குதிரைகள் கொண்டுவரப்பட்டன.+

29 ஆரம்பம்முதல் முடிவுவரை சாலொமோனின் வாழ்க்கையில் நடந்த மற்ற விஷயங்கள்+ எல்லாம் நாத்தான்+ தீர்க்கதரிசி எழுதிய புத்தகத்திலும், சீலோனியரான அகியா+ எழுதிய தீர்க்கதரிசனப் புத்தகத்திலும் உள்ளன. தரிசனக்காரரான இத்தோ+ எழுதிய தரிசனப் புத்தகத்திலும் உள்ளன; இவர் நேபாத்தின் மகன் யெரொபெயாமைப்+ பற்றியும் எழுதினார். 30 இஸ்ரவேல் முழுவதையும் எருசலேமிலிருந்து சாலொமோன் 40 வருஷங்கள் ஆட்சி செய்தார். 31 பின்பு, சாலொமோன் இறந்ததும், அவருடைய அப்பாவான ‘தாவீதின் நகரத்தில்’ அடக்கம் செய்யப்பட்டார்;*+ அவருக்குப் பிறகு, அவருடைய மகன் ரெகொபெயாம் ராஜாவானார்.+