Génesis

6 Índo̱ ni̱jkha̱ raʼni mbaʼin xa̱bu̱ náa tsu̱du̱u̱ ku̱ba̱ʼ, ikhiin niguáʼdiin wa̱ʼxa̱ʼ,* 2 ikhú e̱ji̱i̱n Dios bi̱ gajkhun* niguáʼdi̱i̱ ndiyáá dí ra̱ʼkhá tháán mitsiʼñíin wa̱ʼxiúnʼ xa̱bu̱. Ikha jngóo nigíʼdi̱i̱ nidiin asndu guáthíin má nindúún. 3 Ikhú Jeobá niʼthí: “Nánguá eʼngo̱o̱ a̱jkiu̱nʼ* itháan eni̱ xa̱bu̱, numuu rí i̱ndó nuni̱ rí nandoo xuñúúʼ.* Ikha jngóo, i̱ndó makuwá 120 tsiguʼ”.

4 Nákha ikhú nefilim* kúwá má náa tsu̱du̱u̱ ku̱ba̱ʼ, xúʼko̱ ma nda̱wa̱á ma̱ngaa. Nákha tiempo rúʼko̱, e̱ji̱i̱n Dios bi̱ gajkhun nubúúnʼ* gajmiún wa̱ʼxiúnʼ xa̱bu̱ ga̱jma̱a̱ ikhiin nuguáʼdiin e̱jñu̱ún. Xa̱bu̱ bugi̱ ninindxu̱ún bi̱ guáʼdáá tsiaki̱i̱ ga̱jma̱a̱ bi̱ nijmaʼniúʼ nákhá wajyúuʼ.

5 Jeobá ndiʼyoo rí mámbá mbiʼi dí ra̱májánʼ naʼni xa̱bu̱ na̱jkha̱ rani̱ itháan mba̱a̱ náa tsu̱du̱u̱ ku̱ba̱ʼ, xúgíʼ mbiʼi i̱ndó nundxaʼwamíjná muni̱ dí ra̱májánʼ. 6 Jeobá nixtáa ngíná rí niʼniwíin* xa̱bu̱ náa tsu̱du̱u̱ ku̱ba̱ʼ, ra̱ʼkhá tháán nigawúunʼ a̱jkiu̱u̱n. 7 Ikha jngóo Jeobá niʼthí: “Ma̱ni̱ gámbíin xa̱bu̱ bi̱ ni̱ni̱i̱ náa tsu̱du̱u̱ ku̱ba̱ʼ xúʼko̱ má xujkhú kraʼdiin, xujkhúʼ bi̱ nuxmajtamijná, xujkhú bi̱ nagún rijma̱a̱ numuu rí nagáwíinʼ a̱jkiu̱nʼ rí ni̱ni̱i̱”. 8 Mú Jeobá ninigu̱u̱ʼ dí naʼni Noé.

9 Rígi̱ ninindxu̱u̱ historia ndrígóo Noé.

Noé ninindxu̱u̱ mbáa xa̱bu̱ májáanʼ. Ikhaa na̱nguá nigiʼdoo aʼkhúun xó má xa̱bu̱ bi̱ nikuwa nákha mbiʼi rí nixtáa. Noé nijngruigo̱o̱ ga̱jma̱a̱ Dios gajkhun. 10 Nguáthá tsiguʼ nda̱wa̱á, Noé nigiʼdiin ajtsíin e̱ji̱i̱n: Sem, Cam ga̱jma̱a̱ Jafet. 11 Dios bi̱ gajkhun ndiʼyoo dí ku̱ba̱ʼ nichúu mbá kayuuʼ ga̱jma̱a̱ rí na̱gi̱ʼdu̱u̱n má xúʼko̱ xa̱bu̱. 12 Xúʼko̱ káʼnii, Dios niyejxi̱i̱ náa tsu̱du̱u̱ ku̱ba̱ʼ ga̱jma̱a̱ ndiʼyoo rí niguma gachíi mbá kayuuʼ. Xúgíinʼ xa̱bu̱* numbaaʼ ra̱ʼkhá tháán xkawiʼ rí eni̱.

13 Ikhú Dios niʼthúu̱n Noé: “Niraʼwíí rí ma̱ni̱ gámbíin xúgíinʼ bi̱ nduya* numuu rí náa tsu̱du̱u̱ ku̱ba̱ʼ kúwá wéñuuʼ xa̱bu̱ bi̱ ra̱míjíinʼ. Ikha jngóo ma̱ni̱ gámbáa xúgíʼ dí rígá náa tsu̱du̱u̱ ku̱ba̱ʼ. 14 Atani̱ mbá arca* ga̱jma̱a̱ ixi̱ rí gíʼdoo wájyooʼ. Atani̱ xtóo ga̱jma̱a̱ ataxtájmáá alquitrán* rexa̱a̱ ga̱jma̱a̱ awúu̱n. 15 Xígi̱ gátani̱: Rí mbaʼ mbaʼyóoʼ maʼni mbá 134 metro,* dí ma̱ja̱nʼ maʼni 22 metro* ga̱jma̱a̱ rí mitsídánʼ mbá 13 metro,* 16 gíʼmaa magiʼdoo ajtsú piso: Rí timbá, raga̱jma̱ ga̱jma̱a̱ rí ajtsú, itháan maʼni mbá tikhu metro dí makráʼáan náa xpóo magiʼma mbá ventana náa mambiʼitaʼa aguʼ* ma̱ngaa riejun magiʼma náa mbá níjniúu.

17 Ikhúún ma̱ni̱ rí maxnúu ruʼwambiʼ rí asndu majnííʼ iyaʼ náa tsu̱du̱u̱ ku̱ba̱ʼ ga̱jma̱a̱ mambíin xúgíinʼ bi̱ nduya,* bi̱ kúwá náa agoo mekhu, bi̱ nduya xi̱ʼ. Xúgíʼ dí rígá náa tsu̱du̱u̱ ku̱ba̱ʼ mambáa. 18 Xúgi̱ nambánúlú. Ikháán mbaʼyóoʼ mata̱ʼa̱ʼ náa arca gajmiáanʼ e̱jña̱a̱ʼ, a̱ʼgia̱a̱ʼ ga̱jma̱a̱ gu̱jkia̱a̱nʼ. 19 Ma̱ngaa mbaʼyóoʼ mataxuʼdíinʼ náa arca majmi̱i̱n xujkhúʼ bi̱ mámbá enii, mbáa xujkhú i̱ya̱ ga̱jma̱a̱ mbáa xujkhú e̱ʼgú, mu xúʼko̱ makáwíin. 20 Majmi̱i̱n xujkhú bi̱ guáʼdáá xniunʼ bi̱ nagún rijma̱a̱ xó má ni̱ndxu̱ún mámbíin, majmi̱i̱n xujkhúʼ bi̱ kraʼdiin xó má ni̱ndxu̱ún mámbíin, majmi̱i̱n xujkhúʼ bi̱ nuxmajtamijná xó má ni̱ndxu̱ún mambíin magún náa ikháán mu matu̱ʼu̱u̱n náa arca mu xúʼko̱ makáwíin. 21 Rí mbaʼyóoʼ matani ikháán, matagímbóó xúgíʼ enii ganitsu, mi̱dxu̱ʼ xtaaʼ mu mu̱phu̱ xujkhú ga̱jma̱a̱ dí miʼtsu ikháán”.

22 Noé niʼni xúgíʼ xó má Dios niʼtáñajunʼ maʼni. Niʼni xúgíʼ xó má ikhaa niʼthúu̱n maʼni.