Rí niʼnirámáʼ Marcos

15 Índo̱ nijtsi, xúgíinʼ ndxajkun bi̱ kuya̱ edxu̱u̱ gajmiún xabuanii mangiin bi̱ nusngáa xtángoo, xóo muʼthá xúgíinʼ xa̱bu̱ ede̱,* nigimbíin mu mbuyáá xú káʼnii gúni̱. Índo̱ niguámbu̱u̱n niruʼwa̱a̱ Jesús nigún kuya̱a̱ ga̱jma̱a̱ nixnajxi̱i̱ náa Pilato. 2 Ikhú Pilato nirajxu̱u̱: “Lá ikháán nindxa̱a̱ʼ rey ndrígu̱ún judíos ráʼ.” Ikhú Jesús niriʼña̱a̱: “Xúʼko̱, ikháán má ratá”. 3 Mú ndxajkun bi̱ kuya̱ edxu̱u̱ mbaʼa rí nini̱ tsu̱di̱i̱. 4 Ikhú Pilato nirajxu̱u̱ mbu̱júu̱ʼ: “Lá xátriʼña kayuuʼ ráʼ. Atayáá xúgíʼ rí ethi ga̱jma̱a̱ numaaʼ”. 5 Mú Jesús nánguá niriʼñuu, ga̱jma̱a̱ rúʼko̱ niʼni rí Pilato maguanúu tsiánguá.

6 Mámbá rí naʼni ndxa̱a̱, Pilato naguʼwuun naríya̱a̱ʼ mbáa bi̱ kraʼaa guʼwá e̱jua̱nʼ, asndu tsáa má gúthi xa̱bu̱ magajnáa. 7 Mbiʼi rúʼko̱ kraʼaa guʼwá e̱jua̱nʼ mbáa xa̱bu̱ bi̱ mbiʼyuu Barrabás. Nixuda̱a̱ʼ guʼwá e̱jua̱nʼ gajmíi̱n eʼwíinʼ bi̱ niradíin xa̱bu̱ índo̱ nixuximíjna̱ náa inuu xa̱bu̱ ñajunʼ. 8 Ikha jngóo xa̱bu̱ niguwáʼ náa Pilato mu munda̱ʼa̱a̱ mbá rí naguʼwuun naʼni. 9 Mú ikhaa niriʼñún: “Lá nandala ma̱ni̱ kríya̱a̱ʼ rey ndrígu̱ún judíos ráʼ.” 10 Numuu rí Pilato ndiʼyoo má rí ndxajkun bi̱ kuya̱ edxu̱u̱ nixnajxi̱i̱ numuu rí naxígu̱u̱n kuyáá. 11 Mú ndxajkun bi̱ kuya̱ edxu̱u̱ nitsudiin xa̱bu̱ rí munda̱ʼa̱ rí magajnáa Barrabás. 12 Ikhú Pilato nirajxu̱u̱n mbu̱júu̱ʼ xa̱bu̱: “Ndiéjunʼ gáni̱ ga̱jmu̱ʼ xa̱bu̱ bugi̱ bi̱ ikháanʼ nutha̱a̱nla rey ndrígu̱ún judíos rá.” 13 Ikhú ikhiin nitháán: “¡Giʼdujmaa náa ixi̱!”. 14 Pilato niʼthún: “Náá numuu rá. Ndiéjunʼ dí ra̱májánʼ niʼni xá”. Ikhú itháan gakhi̱i̱ nindxa̱ʼwa̱: “¡Giʼdujmaa náa ixi̱!”. 15 Numuu rí Pilato nindoo maguanúu májánʼ gajmíi̱n xa̱bu̱, ikha jngóo niniñuuʼ magajnáa Barrabás. Ikhú nikuʼma rí muxpajtii Jesús ga̱jma̱a̱ nixnájxi̱i̱ mu miʼdujmaa náa ixi̱.

16 Ikhú soldados nigún kuya̱a̱ náa goʼwóo xa̱bu̱ ñajunʼ ga̱jma̱a̱ ikhí nigimbíin xúgíinʼ soldados. 17 Ikhú nixnáá magíʼ mbá xtíin miʼñuu* ma̱ngaa nimbujxi̱ tsuwanʼ ga̱jma̱a̱ nigiwa̱nʼ náa edxu̱u̱. 18 Ga̱jma̱a̱ ikhú nigíʼdi̱i̱ nindxa̱ʼwa̱: “¡Wajtsaaʼ rey ndrígu̱ún judíos!”. 19 Ma̱ngaa nixnáá edxu̱u̱ ga̱jma̱a̱ mbá ixi̱ ga̱jma̱a̱ nindujtáaʼ. Nismbati̱gu̱u̱n inuu mu muni̱ mba̱a̱. 20 Índo̱ guámbu̱u̱n nini̱ májti̱i̱ʼ, niriya̱a̱ʼ xtíin miʼñuu ga̱jma̱a̱ niguwa̱a̱nʼ xtíñuu, ikhú nigún kuya̱a̱ mu miʼdujmaa náa ixi̱. 21 Ikhí enújngóo mbáa xa̱bu̱ bi̱ na̱ʼkha̱a̱ xanáá, ga̱jma̱a̱ nitsudaa magu̱ ixi̱* náa rí makhañúu Jesús. Ikhaa mbiʼyuu Simón bi̱ na̱ʼkha̱ náa Cirene, anu̱u̱ Alejandro ga̱jma̱a̱ Rufo.

22 Nigún kuya̱a̱ Jesús náa mbaaʼ rí mbiʼyuu Gólgota, rí nandoo gáʼthúu̱n, “mbaaʼ itsu̱ edxu̱u̱ wajinʼ”. 23 Ikhí nindúún muxnáá maga̱a̱n vino rí kandawo̱o̱ʼ mirra,* mú ikhaa táʼndoo gágáan. 24 Ikhú nidujmaa náa ixi̱, ga̱jma̱a̱ niri̱ya̱ʼ suerte* mu mbuyáá tsáa gáguanúu ga̱jma̱a̱ xtíñuu. 25 Naʼni xóo mbá las 9 rí miʼcha̱ índo̱ nidujmaa náa ixi̱. 26 Ga̱jma̱a̱ náa edxu̱u̱ ixi̱ rí kiʼdujmaa, ikhí niniraʼmáʼ: “Rey ndrígu̱ún judíos”, rígi̱ numuu rí nixi̱yáa. 27 Ma̱ngaa náa mámbá níjniúu nidujmaa mámbáa kuʼwáʼ, mbáa náa níjniú mújúunʼ ga̱jma̱a̱ i̱mba̱a̱ náa níjniú xti̱yu̱u̱ʼ. 28 * 29 Ga̱jma̱a̱ bi̱ nanújngúún ikhí nutawéñííʼ ga̱jma̱a̱ nubajngaa edxu̱ún ga̱jma̱a̱ nithi: “¡Tayáá! Ikháán bi̱ nirathá rí matani̱ gámbáa guʼwá rí nduyamajkuíí Dios ga̱jma̱a̱ rí káaʼ ajtsú e̱jkha̱ʼ gátani̱i̱, 30 atanikríyaminaʼ, arajta̱a̱ʼ* náa ixi̱”. 31 Xúʼko̱ má nitsijmaa ndxajkun bi̱ kuya̱ edxu̱u̱ gajmiún bi̱ nusngáa xtángoo, nithi: “¡Niʼni káwíin dí eʼwíinʼ, mú tséjmaa gáʼni kríyaminaʼ dí ikhaa! 32 Nanduxu dí Cristo rey ndrígóo Israel, gagajta̱a̱ náa ixi̱ mu xúʼko̱ munimbuxu kuya̱a̱”. Asndu bi̱ kiʼdujmiin níjniúu nitawéñííʼ.

33 Índo̱ niʼni mbá las 12 rí wakhaʼ asndu xóo mbá las 3 rí wakíʼ niʼni krína náa xúgíʼ ku̱ba̱ʼ rúʼko̱. 34 Índo̱ niʼni mbá las 3 rí wakíʼ, Jesús nindxa̱ʼwá gakhi̱i̱: “Éli, Éli, ¿láma sabakhtháni?”, rí nandoo gáʼthúu̱n, “Dios ndrígóʼ, Dios ndrígóʼ, náá numuu nitatsíñúʼ rá.” 35 Índo̱ tikhuun xa̱bu̱ bi̱ kúwá ikhí nidxawíín rí niʼthí, ikhú nithi: “¡Gudxawíín, Elías endxa̱ʼwóo!”. 36 Ikhú mbáa ni̱jkha̱ ragáyúu gármajan mugu̱ ga̱jma̱a̱ vino rí miga̱ʼ, nigrígu náa inuu ixi̱ ga̱jma̱a̱ ni̱jkha̱ kayóo mu maxnúu maga̱a̱n, niʼthí: “¡Guniʼñánʼla! Mbuʼyáá á mu na̱ʼkha̱ Elías gáríguíi”. 37 Mú Jesús nindxa̱ʼwá gakhi̱i̱ ga̱jma̱a̱ ikhú nikháñuu. 38 Ga̱jma̱a̱ cortina rí frájkha náa guʼwá rí nduyamajkuíí Dios, nitungaa rijma̱a̱ asndu mbayííʼ. 39 Índo̱ bi̱ naʼtáñajúúnʼ soldado bi̱ wíji̱ náa mijngii frájkhaa ndiʼyoo rí xúgi̱ kaʼnii nikháñuu, ikhú niʼthí: “Gajkhun rí xa̱bu̱ bugi̱ nindxu̱u̱ A̱ʼdióo Dios”.

40 Ma̱ngaa nikúwá tikhuun gu̱ʼu̱ bi̱ wájun ruyáá tsínguánʼ, náa majñúnʼ ikhiin wíji̱ María Magdalena, María ru̱dúu̱ Santiago bi̱ gi̱ʼta̱ ga̱jma̱a̱ Josés ma̱ngaa ikhí wíji̱ Salomé. 41 Gu̱ʼu̱ bugi̱ nigún kidxuuʼ mu muni̱ mbáʼwi̱i̱ nákha ikhaa xtáa náa Galilea. Ma̱ngaa ikhí kúwá mbaʼin gu̱ʼu̱ bi̱ nitsimún gajmiún náa Jerusalén.

42 Numuu rí wakíʼ má, mbiʼi rí nagumaratáá, xóo muʼthá, inu mbayáa mbiʼi sábado.* 43 José bi̱ na̱ʼkha̱ Arimatea, mbáa xa̱bu̱ ede̱, bi̱ ma̱ngaa gíʼthúu̱n rí maʼtáñajunʼ Xa̱bu̱ Ñajunʼ ndrígóo Dios,* nigíʼ níjníí gamíi mu maʼga gáʼyoo Pilato mu manda̱ʼa̱a̱ xuyuuʼ Jesús. 44 Mú Pilato nindoo mbaʼyoo á mu nikháñuu má Jesús, ikha jngóo nindxa̱ʼóo bi̱ naʼtáñajúúnʼ soldados ga̱jma̱a̱ nirajxu̱u̱. 45 Índo̱ bi̱ naʼtáñajúúnʼ soldados niʼthúu̱n rí nikháñuu má, ikhú niniñuuʼ rí José maʼga̱a̱ kayóo xuyuuʼ Jesús. 46 José ni̱ʼtsi̱ xtíin lino rí májánʼ ga̱jma̱a̱ nirígúu xuyuuʼ Jesús ga̱jma̱a̱ nimbráʼaa xtíin. Niʼdi̱i̱ náa iñúnʼ itsí, ikhú nirmbíjxi mbá itsí mu marúguáa ga̱jma̱a̱ iñá wajinʼ. 47 Mú María Magdalena ga̱jma̱a̱ María ru̱dúu̱ Josés niguanún niyejxi̱ má xúʼko̱ náa nijuaʼdi̱i̱ Jesús.