Josué

20 Ikhú Jeobá niʼthúu̱n Josué: 2 “Arathún rígi̱ israelitas: ‹Guraʼwi̱i̱ xuajin náa muni̱ káwumijnála náa dí ikhúún ni̱thu̱u̱n Moisés maʼthála, 3 mu xúʼko̱ bi̱ xáxíyáa gajuunʼ ndxájuu o maʼni gawúunʼ ma̱ndoo magáyúu ikhí. Xuajin rígi̱ mambáyala mu̱ni̱ káwúmijná náa ñawúunʼ bi̱ kaʼyoo maru̱ma̱a̱ eʼdiuu bi̱ nikháñuu. 4 Ga̱jma̱a̱ bi̱ nixíyáa ndxájuu ma̱ndoo maʼga̱ náa mbá xuajin rígi̱, magiʼthu̱u̱n náa riejuun xkrugoo xuajin ga̱jma̱a̱ maʼthúún bi̱ kuya̱ edxu̱u̱ náa xuajin rúʼko̱ dí nirígá. Ikhiin gíʼmaa mundriguíi náa xuajin rúʼko̱ ga̱jma̱a̱ muxnáá mbá náa maguanúu, ma̱ngaa maxtáa náa kúwá ikhiin. 5 Á mu bi̱ nandoo maru̱ma̱a̱ eʼdiuu bi̱ nikháñuu na̱jkha̱ gáyáaʼ, ragíʼmaa muxnajxi̱i̱ bi̱ nixíyáa xa̱bu̱, numuu rí ikhaa taxíyáa gajuunʼ ndxájuu ga̱jma̱a̱ rí nákha ginii na̱nguá nigiʼdaa sia̱nʼ. 6 Gíʼmaa rí maxtáa náa xuajin rúʼko̱ asndu índo̱ gaxnájximinaʼ náa inún bi̱ nunimbaníí xkujndu mu mambanúu numuu, gíʼmaa maguanúu ikhí asndu índo̱ gakháñuu ndxajkun bi̱ phú kayá edxu̱u̱. Ikhú xa̱bu̱ bi̱ nixíyáa ndxájuu ma̱ndoo matanga̱a̱ náa xuajñuu ga̱jma̱a̱ náa goʼwóo›”.

7 Xuajin rígi̱ ni̱jkha̱nú ninindxu̱u̱ mitsúʼkháan, Quedes, Galilea, náa kúbá Neftalí, Siquem, náa kúbá Efraín ga̱jma̱a̱ Quiryat-Arbá, xóo muʼthá Hebrón náa kúbá Judá. 8 Mbaaʼ dí rígá xígií náa mañu Jordán, náa nagájnuu a̱jkha̱ʼ* náa Jericó, ikhiin niraʼwi̱i̱ náa Bézer, náa ku̱ba̱ʼ mijxooʼ* náa kaʼmuuʼ dí nigruigúu xuajin chíʼgíiʼ* ndrígóo Rubén, Ramot, Galaad, dí nigruigúu xuajin chíʼgíiʼ ndrígóo Gad ga̱jma̱a̱ Golán, Basán dí nigruigúu xuajin chíʼgíiʼ* ndrígóo Manasés.

9 Xuajin rúʼko̱ nindxu̱u̱ dí nixtaʼwíí náa ma̱ndoo magún xúgíinʼ israelitas ga̱jma̱a̱ xa̱bu̱ naguwaáʼ bi̱ kúwá gajmiún ikhiin, mu xúʼko̱ bi̱ xáxíyáa gajuunʼ ndxájuu ma̱ndoo maʼga ikhí, mu xúʼko̱ bi̱ kaʼyoo maru̱ma̱a̱ eʼdiuu bi̱ nikháñuu xáxíyáa nákhá xóó tsémbánúu numuu náa inún xa̱bu̱ xuajin.*