Génesis

5 Libro rígi̱ naʼthí ga̱jma̱a̱ numuu xóo nixtáa Adán. Mbiʼi rí Dios niʼnii Adán, niʼnii xó má nindxu̱u̱ Dios. 2 Niʼnii xa̱biya̱ ga̱jma̱a̱ a̱ʼgu̱. Mbiʼi rí niʼniwíin, niʼni tsajkurámiinʼ ga̱jma̱a̱ niʼthí rí xa̱bu̱* gáʼni mbiʼñún.

3 Índo̱ Adán nigiʼdoo 130 tsiguuʼ, nixtáa mbáa a̱ʼdióo bi̱ nindxu̱u̱ xóo ikháá kayuuʼ, nixná mbiʼyuu Set. 4 Nda̱wa̱á rí nigiʼdaa Set, Adán xóó nixtáa i̱mbá 800 tsiguʼ. Nigiʼdiin mbaʼin jiámá ga̱jma̱a̱ wa̱ʼxa̱ʼ.* 5 Xúgíʼ tsiguʼ rí nixtáa Adán ninindxu̱u̱ mbá 930 tsiguʼ. Nda̱wa̱á nikháñuu.

6 Índo̱ Set nigiʼdoo 105 tsiguuʼ, nigiʼdaa Enós. 7 Nda̱wa̱á rí nigiʼdaa Enós, Set xóó nixtáa i̱mbá 807 tsiguʼ. Nigiʼdiin mbaʼin jiámá ga̱jma̱a̱ wa̱ʼxa̱ʼ. 8 Xúgíʼ tsiguʼ dí nixtáa Set ninindxu̱u̱ mbá 912 tsiguʼ. Nda̱wa̱á nikháñuu.

9 Índo̱ Enós nigiʼdoo 90 tsiguuʼ, nigiʼdaa Quenán. 10 Nda̱wa̱á rí nigiʼdaa Quenán, Enós xóó nixtáa i̱mbá 815 tsiguʼ. Nigiʼdiin mbaʼin jiámá ga̱jma̱a̱ wa̱ʼxa̱ʼ. 11 Xúgíʼ tsiguʼ rí nixtáa Enós ninindxu̱u̱ 905 tsiguʼ. Nda̱wa̱á nikháñuu.

12 Índo̱ Quenán nigiʼdoo 70 tsiguuʼ nigiʼdaa Mahalalel. 13 Nda̱wa̱á rí nigiʼdaa Mahalalel, Quenán xóó nixtáa i̱mbá 840 tsiguʼ. Nigiʼdiin mbaʼin jiámá ga̱jma̱a̱ wa̱ʼxa̱ʼ. 14 Xúgíʼ tsiguʼ dí nixtáa Quenán ninindxu̱u̱ 910 tsiguʼ. Nda̱wa̱á nikháñuu.

15 Índo̱ Mahalalel nigiʼdoo 65 tsiguuʼ, nigiʼdaa Jared. 16 Nda̱wa̱á rí nigiʼdaa Jared, Mahalalel xóó nixtáa i̱mbá 830 tsiguʼ. Nigiʼdiin mbaʼin jiámá ga̱jma̱a̱ wa̱ʼxa̱ʼ. 17 Xúgíʼ tsiguʼ rí nixtáa Mahalalel ninindxu̱u̱ 895 tsiguʼ. Nda̱wa̱á nikháñuu.

18 Índo̱ Jared nigiʼdoo 162 tsiguuʼ, nigiʼdaa Enoc. 19 Nda̱wa̱á rí nigiʼdaa Enoc, Jared xóó nixtáa i̱mbá 800 tsiguʼ. Nigiʼdiin mbaʼin jiámá ga̱jma̱a̱ wa̱ʼxa̱ʼ. 20 Xúgíʼ tsiguʼ rí nixtáa Jared ninindxu̱u̱ 962 tsiguʼ. Nda̱wa̱á nikháñuu.

21 Índo̱ Enoc nigiʼdoo 65 tsiguuʼ, nigiʼdaa Matusalén. 22 Nda̱wa̱á rí nigiʼdaa Matusalén, Enoc xóó nixtáa i̱mbá 300 tsiguʼ ga̱jma̱a̱ nijngruigo̱o̱ má xúʼko̱ ga̱jma̱a̱ Dios bi̱ gajkhun.* Ma̱ngaa nigiʼdiin mbaʼin jiámá ga̱jma̱a̱ wa̱ʼxa̱ʼ. 23 Xúgíʼ tsiguʼ rí nixtáa Enoc ninindxu̱u̱ mbá 365 tsiguʼ. 24 Enoc nijngruigo̱o̱ má xúʼko̱ ga̱jma̱a̱ Dios bi̱ gajkhun. Nda̱wa̱á nímbáa tátanga̱a̱ mbaʼyoo, numuu rí Dios ni̱jkha̱a̱ kayáa i̱mba̱ níʼkhá.

25 Índo̱ Matusalén nigiʼdoo 187 tsiguuʼ, nigiʼdaa Lamec. 26 Nda̱wa̱á rí nigiʼdaa Lamec, Matusalén xóó nixtáa i̱mbá 782 tsiguʼ. Nigiʼdiin mbaʼin jiámá ga̱jma̱a̱ wa̱ʼxa̱ʼ. 27 Xúgíʼ tsiguʼ rí nixtáa Matusalén ninindxu̱u̱ 969 tsiguʼ. Nda̱wa̱á nikháñuu.

28 Índo̱ Lamec nigiʼdoo 182 tsiguuʼ, nigiʼdaa mbáa a̱ʼdióo. 29 Nixná mbiʼyuu Noé,* niʼthí: “Ada̱ bugi̱ maʼni̱i̱ a̱jkiu̱lú náa ñajunʼ gakhii rí nuʼni numuu rí Jeobá niʼthá tsríguíi̱ ku̱ba̱ʼ”. 30 Nda̱wa̱á rí nigiʼdaa Noé, Lamec xóó nixtáa i̱mbá 595 tsiguʼ. Nigiʼdiin mbaʼin jiámá ga̱jma̱a̱ wa̱ʼxa̱ʼ. 31 Xúgíʼ tsiguʼ rí nixtáa Lamec ninindxu̱u̱ 777 tsiguʼ. Nda̱wa̱á nikháñuu.

32 Nda̱wa̱á rí Noé nigiʼdoo 500 tsiguuʼ nigiʼdaa Sem, Cam ga̱jma̱a̱ Jafet.