Ezequiel

21 Jeová koʼalia tan mai haʼu, hodi dehan: 2 “Oan-mane husi ema, fila oin hodi hateke ba Jeruzalein, no fó avizu kontra fatin santu sira, no fó sai profesia hodi kontra rai-Izraél. 3 Hatete ba rai-Izraél: ‘Jeová dehan nuneʼe: “Haʼu sei kontra ó. Haʼu sei losu sai haʼu-nia surik husi ninia fatin+ no oho tiha ema laran-loos no ema aat iha ó-nia leet. 4 Haʼu sei losu haʼu-nia surik husi ninia fatin hodi kontra hasoru ema hotu, husi parte súl toʼo parte norte. Haʼu sei oho tiha ema laran-loos no ema aat iha ó-nia leet. 5 Ema hotu sei hatene duni katak haʼu, Jeová, haʼu mak losu sai surik husi ninia fatin. Haʼu sei la hatama fali surik neʼe.”’+

6 “Oan-mane husi ema, sai triste bá no nakdedar,* sin, halerik bá iha sira-nia oin.+ 7 Se sira husu ó: ‘Tanbasá mak ó halerik?’ Ó tenke dehan: ‘Tanba lia-menon ida.’ Lia-menon neʼe sei sai loos duni, no ema hotu nia laran sei taʼuk* no sira-nia liman sei sai fraku no ema hotu sei neon-susar no sira hotu nia ain-tuur sei turuk ho bee.*+ ‘Susar neʼe sei akontese duni’, Jeová, Naʼi Ukun-Naʼin Boot Liu, mak dehan.”

8 Jeová koʼalia tan mai haʼu, hodi dehan: 9 “Oan-mane husi ema, fó sai profesia bá, no hatete: ‘Jeová dehan nuneʼe: “Iha surik ida! Surik ida+ kadi kroʼat ona, no halo nabilan ona. 10 Surik neʼe kadi kroʼat atu oho ema barak. Neʼe halo nabilan ona hanesan rai-lakan.”’”

Povu husu: “Ita tenke haksolok ka lae?”

Maibé Maromak hatán: “‘Surik neʼe* sei kontra haʼu-nia oan-mane nia ai-tonka liurai nian,+ hanesan nia kontra ai-hun sira hotu ka lae?

11 “‘Surik neʼe fó ona ba ema atu halo nabilan hodi bele uza. Surik neʼe kadi kroʼat no halo nabilan ona, atu entrega ba ema hodi fó kastigu-mate.+

12 “‘Oan-mane husi ema, tanis halerik bá,+ tanba surik neʼe mai ona atu kontra haʼu-nia povu no kontra Izraél nia xefe hotu.+ Sira hamutuk ho haʼu-nia povu sei sai vítima ba surik neʼe. Tan neʼe, baku ó-nia kelen bá ho triste. 13 Ema koko tiha ona surik neʼe,+ entaun saida mak sei akontese se surik neʼe kontra liurai nia ai-tonka? Ai-tonka neʼe sei la iha tan’,+ Jeová, Naʼi Ukun-Naʼin Boot Liu, mak dehan.

14 “Oan-mane husi ema, fó sai profesia bá no basa liman no koʼalia dala tolu, hodi dehan: ‘Iha surik ida!’ Neʼe mak surik neʼebé halo ema mate, surik neʼebé oho ema barak neʼebé haleʼu sira.+ 15 Sira-nia laran sei taʼuk*+ no ema barak sei mate iha sira-nia sidade nia portaun. Haʼu sei oho sira ho surik. Sin, surik neʼe halo nabilan ona hanesan rai-lakan atu oho ema! 16 Oh surik, taa iha ó-nia sorin loos! Taa iha ó-nia sorin karuk! Taa iha fatin naran deʼit neʼebé ó-nia naʼin dirije ó! 17 Haʼu mós sei basa liman ho hirus no depois neʼe haʼu sei la hirus tan.+ Haʼu, Jeová, mak fó sai liafuan sira-neʼe.”

18 Jeová koʼalia tan mai haʼu, hodi dehan: 19 “Oan-mane husi ema, marka ba dalan rua atu liurai Babilónia nia surik bele liu. Dalan rua neʼe komesa husi rai ida deʼit, no ó tenke tau sinál* iha dalan neʼebé fahe ba rua hodi bá sidade rua. 20 Ó tenke marka dalan ida atu surik bele liu hodi kontra hasoru sidade Rabá+ iha ema Ammon nia rai, no marka dalan ida seluk atu surik bele liu hodi kontra hasoru sidade Jeruzalein+ neʼebé seguru iha rai-Judá. 21 Tanba liurai Babilónia sei para iha dalan klaran hodi siʼik futuru, iha fatin neʼebé dalan fahe rua. Nia doko rama-oan sira. Nia husu matadalan ba ninia estátua sira.* Nia haree animál nia aten. 22 Rezultadu iha ninia liman-loos hatudu ba Jeruzalein. Entaun nia sei bá tau ekipamentu funu nian* haleʼu Jeruzalein, nia sei haruka ninia tropa sira atu oho ema, hakilar lian funu nian, ataka portaun sira, ateru rai hodi halo aas no halo serku hodi harii moru haleʼu sidade neʼe atu ataka.+ 23 Maibé sira* neʼebé jura ona ba ema sira-neʼe*+ sei haree katak sira-nia siʼik futuru mak falsu. Maski nuneʼe, liurai Babilónia sei hanoin-hetan sira-nia sala no sei kaer sira.+

24 “Tan neʼe, Jeová, Naʼi Ukun-Naʼin Boot Liu, dehan nuneʼe: ‘Imi halo nia hanoin-hetan imi-nia sala tanba imi hatudu sai imi-nia hahalok kontra no hahalok sala hotu. Agora nia hanoin-hetan ona imi, tan neʼe nia sei lori imi bá ho forsa.’*

25 “Oh Izraél nia xefe neʼebé aat no hetan kanek todan,+ ó-nia loron toʼo ona, tempu toʼo ona ba ó atu simu kastigu ikus. 26 Jeová, Naʼi Ukun-Naʼin Boot Liu, dehan nuneʼe: ‘Hasai tiha turbante* husi ó-nia ulun, no hasai ó-nia koroa.+ Buat sira-neʼe sei la hanesan ona uluk.+ Foti aas ema neʼebé kiʼik,+ no hatún ema neʼebé iha pozisaun aas.+ 27 Haʼu sei halo rahun ó-nia koroa, halo rahun, sin, halo rahun koroa neʼe. No koroa neʼe sei la sai ema ida nian toʼo ida neʼebé iha direitu tuir lei toʼo mai,+ no haʼu sei fó ida-neʼe ba nia.’+

28 “Oan-mane husi ema, fó sai profesia bá, hodi dehan: ‘Jeová, Naʼi Ukun-Naʼin Boot Liu, dehan nuneʼe kona-ba ema Ammon no kona-ba sira-nia liafuan sadik.’ Hatete ba sira: ‘Iha surik ida! Surik neʼe losu sai ona atu oho ema. Surik neʼe halo nabilan ona atu tolan ema no surik neʼe sei lakan hanesan rai-lakan. 29 Maski ema haree vizaun la loos no siʼik futuru neʼebé bosok kona-ba ó,* maibé ó-nia ema sira neʼebé mate iha sidade laran sei butuk hamutuk ho ema aat sira neʼebé mate ona, sira-nia loron toʼo ona, tempu toʼo ona ba sira atu simu kastigu ikus. 30 Hatama fali surik ba ninia fatin. Haʼu sei tesi-lia ba ó iha fatin neʼebé ó moris,* iha ó-nia rai rasik. 31 Haʼu sei fakar sai haʼu-nia laran-nakali ba ó. Haʼu-nia hirus sei sai hanesan ahi neʼebé sunu ó, no haʼu sei entrega ó ba ema sira neʼebé brutál, neʼebé matenek atu oho ema.+ 32 Ahi sei han ó.+ Ó-nia raan sei suli iha rai neʼe, no ema sei la hanoin-hetan tan kona-ba ó, tanba haʼu, Jeová, mak fó sai liafuan sira-neʼe.’”