Koʼalia liuhusi karta

KARTA sira neʼebé ema hakerek ajuda duni ema rihun ba rihun nia moris no troka sira-nia hahalok. Livru barak iha Eskritura Lia-Gregu nian mak karta sira neʼebé hakerek-naʼin haruka ba ninia maluk kristaun sira. Ohin loron, ita mós bele hakerek karta hodi hametin ema foun nia fiar, hodi kontaktu ita-nia belun sira, hodi fó laran-manas ba irmaun no irmán sira neʼebé simu knaar espesiál, hodi hametin ema neʼebé hasoru susar, no hodi hatoʼo informasaun neʼebé presiza atu tau matan ba atividade kongregasaun nian.—1 Tesalónika 1:1-7; 5:27; 2 Pedro 3:1, 2.

Karta mós sai nuʼudar dalan ida atu fó sasin ho didiʼak. Iha rai balu, ita la bele haklaken ho livre iha knua ka área ruma. Ema balu dala barak liu nunka iha uma, entaun ita la bele hasoru sira kuandu ita haklaken husi uma ba uma. Ema seluk hela iha fatin neʼebé dook husi ema seluk.

Dala ruma ita hela deʼit iha uma tanba moras, udan ka anin-boot, ka governu bandu ema atu la sai husi uma iha kalan. Entaun, diʼak atu hakerek karta hodi fó sasin ba ita-nia família ka ema neʼebé ita haklaken bá iha dalan la formál. Ka ita-nia estudante Bíblia nian ida muda tiha ona ba fatin seluk ka lae? Karik karta husi ita bele duni ajuda nia atu kontinua haburas ninia relasaun ho Maromak. Karik ita bele fahe informasaun kona-ba Bíblia ba sira neʼebé foin kaben, foin sai inan-aman, ka foin lakon ema neʼebé sira hadomi tanba mate.

Kuandu hakerek karta atu fó sasin ba ema neʼebé ita seidauk hasoru, diʼak atu fó koñese ita-nia an. Ita bele esplika katak ita hola parte iha serbisu voluntáriu neʼebé halaʼo iha mundu tomak. Se bele, diʼak atu fó sai katak ita mak Testemuña ba Jeová. Esplika ba ema kona-ba tansá mak ita hakerek deʼit karta duké vizita nia. Hakerek iha dalan neʼebé hanesan ita koʼalia ho ema oin ba oin. Maibé, hodi halo tuir matadalan atu “matan moris bá hanesan samea, . . . laran-moos bá hanesan manu-pombu”, ita mós presiza hanoin kona-ba informasaun hira mak ita bele fó sai ba ema seluk kona-ba ita-nia an.—Mateus 10:16.

Iha ita-nia karta, diʼak atu temi informasaun neʼebé ita hakarak atu hatoʼo ba ema neʼe se ita vizita. Karik ita bele uza informasaun iha Ita-nia Serbisu Kristaun neʼebé foun. Karik ita bele husu pergunta no fó laran-manas ba ema neʼe atu hanoin kona-ba pergunta neʼe. Haklaken-naʼin balu esplika kedas katak ita prontu atu estuda Bíblia gratis hodi fó resposta ba pergunta sira kona-ba Bíblia, no tuirmai sira temi kapítulu balu iha livru neʼebé ita uza atu estuda ho ema. Ita bele haree ezemplu kona-ba oinsá ita bele hakerek karta atu fó sasin ba ema iha pájina 73. Karik ida-neʼe sei fó ita ideia balu, maibé diʼak liu atu hakerek informasaun oioin. Selae, ema sei hetan beibeik karta ho informasaun neʼebé hanesan.

Ema balu ladún gosta atu lee karta neʼebé naruk husi ema neʼebé sira la koñese. Entaun, ita bele hatudu matenek hodi hakerek karta neʼebé badak. Ramata karta neʼe hodi ema la sai baruk atu lee. Karik diʼak atu tau mós konvite ba reuniaun sira neʼebé halaʼo iha ita-nia Reuniaun-Fatin. Ita mós bele tau tratu, broxura, ka Livru Haklaken no Matan-moris bá! no esplika katak sira bele simu beibeik informasaun neʼe se sira hakarak. Ka ita bele husu se ita bele vizita ema neʼe iha ninia uma hodi koʼalia liután kona-ba informasaun neʼe.

Haree toʼok ba ezemplu kona-ba oinsá atu hakerek karta iha pájina 73. Hanoin buat tuirmai neʼe: (1) Karta neʼe hakerek ho momoos no la runguranga. (2) Maski se envelope lakon, maibé ema neʼebé simu karta neʼe bele hatene diresaun husi ema neʼebé hakerek. (3) Objetivu husi karta neʼe tenke hakerek ho klaru no simples iha parágrafu primeiru. (4) Pontu importante ida-idak esplika iha parágrafu neʼebé ketaketak. (5) Karta neʼe presiza uza liafuan neʼebé respeitu, maibé laʼós aas liu.

Iha karta formál sira, hanesan karta neʼebé kongregasaun nia sekretáriu haruka ba sukursál, ida-neʼe tenke inklui kongregasaun nia naran, sekretáriu nia naran, ninia diresaun, no data. No karta neʼe tenke inklui naran no diresaun husi ema ka organizasaun neʼebé simu karta neʼe. No karta neʼe inklui mós liafuan atu kumprimenta. Iha língua balu, atu ramata karta hanesan neʼe, sira uza liafuan hanesan “Ho respeitu” ka “Ita-nia belun”. Ida-neʼe baibain hakerek iha asinatura nia leten. No diʼak atu asina ho liman.

Iha karta naran deʼit, ita tenke tau atensaun hodi hakerek liafuan sira ho loloos no tuir gramátika, no mós labele runguranga. Se halo nuneʼe, ema sei hafolin mensajen iha karta neʼe nia laran.

Iha envelope nia liʼur, diʼak atu sempre tau ita-nia diresaun rasik. Se ita sente katak ladún diʼak atu tau ita-nia diresaun kuandu hakerek karta hodi haklaken ba ema neʼebé ita la koñese, ita bele husu katuas sira hodi fó lisensa ba ita atu uza diresaun ba Reuniaun-Fatin nian. Maibé, keta uza diresaun husi ita-nia sukursál, tanba ida-neʼe halo ema hanoin sala katak ita-nia karta haruka husi ita-nia sukursál no sei halo ema bilán. No mós, se la tau diresaun husi ema neʼebé haruka karta neʼe, no karta neʼe inklui ita-nia livru sira, ida-neʼe bele halo ema iha hanoin neʼebé sala katak ita-nia sukursál mak haruka karta neʼe ba sira.

Keta haluha atu taka selus ka perangko iha ita-nia envelope ho folin neʼebé loos, liuliu se ita tau livru ruma hamutuk karta neʼe. Kuandu selus neʼe la tuir folin neʼebé loos, ema neʼebé simu karta neʼe karik presiza selu osan neʼebé kuran, no ida-neʼe sei halo sira la hafolin ita-nia mensajen. Hanoin-hetan katak iha nasaun barak kuandu ita tau broxura ka majalah ruma hamutuk ita-nia karta, ita presiza selu osan neʼebé boot liu fali kuandu haruka deʼit karta.

Kuandu ita hakerek tiha ita-nia karta, lee fali atu haree ninia liafuan sira. Karta neʼe rona oinsá? Neʼe hatudu respeitu ka lae? Kuandu ita koʼalia ho ema seluk ita presiza hatudu domin no hahalok diʼak. (Galásia 5:22, 23) Entaun, se ita haree katak iha liafuan ruma neʼebé la diʼak ka halo ema duvida, hadiʼa liafuan sira-neʼe.

Karta bele toʼo ba fatin sira neʼebé ita rasik la bele bá. Tanba razaun neʼe mak karta mós bele sai nuʼudar dalan diʼak atu haklaken. Ita-nia karta reprezenta ita no mós buat neʼebé ita fiar, entaun hanoin didiʼak kona-ba saida mak ita koʼalia, karta neʼe haree oinsá, no ida-neʼe sei rona oinsá. Hodi halo nuneʼe, ita-nia karta bele hametin no fó laran-manas ba ema atu laʼo iha dalan neʼebé lori ba moris.