1 కొరింథీయులు

13 నేను మనుషుల భాషల్లో, దేవదూతల భాషల్లో మాట్లాడినా ప్రేమ లేకపోతే నేను గణగణ మోగే గంటతో, టంగ్‌టంగ్‌మనే తాళంతో* సమానం. 2 ఒకవేళ నాకు ప్రవచించే వరం ఉన్నా, పవిత్ర రహస్యాలన్నీ నేను అర్థంచేసుకున్నా, నాకు సర్వజ్ఞానం ఉన్నా, కొండల్ని జరిపేంత* బలమైన విశ్వాసం ఉన్నా ప్రేమ లేకపోతే నేను పనికిరానివాణ్ణే. 3 ఇతరుల్ని పోషించడానికి నాకున్నవన్నీ ఇచ్చేసినా, గొప్పలు చెప్పుకోవచ్చని నా శరీరాన్ని బలి కోసం అప్పగించినా ప్రేమ లేకపోతే నాకు ఏ ఉపయోగమూ ఉండదు.

4 ప్రేమ ఓర్పు* కనబరుస్తుంది, దయ చూపిస్తుంది. ప్రేమ ఈర్ష్యపడదు, గొప్పలు చెప్పుకోదు, గర్వంతో ఉబ్బిపోదు, 5 మర్యాద లేకుండా* ప్రవర్తించదు, స్వార్థం చూసుకోదు, త్వరగా కోపం తెచ్చుకోదు. హానిని* మనసులో పెట్టుకోదు. 6 అది అవినీతి విషయంలో సంతోషించదు కానీ, సత్యం విషయంలో సంతోషిస్తుంది. 7 అది అన్నిటినీ భరిస్తుంది, అన్నిటినీ నమ్ముతుంది, అన్నిటినీ నిరీక్షిస్తుంది, అన్నిటినీ సహిస్తుంది.

8 ప్రేమ శాశ్వతంగా ఉంటుంది. ప్రవచించే వరాలైనా, భాషలు మాట్లాడడమైనా,* అద్భుతరీతిలో జ్ఞానం పొందడమైనా ఆగిపోతాయి. 9 మన జ్ఞానం అసంపూర్ణం, మనం ప్రవచిస్తున్నది కూడా అసంపూర్ణ స్థాయిలోనే. 10 కానీ సంపూర్ణమైనది వచ్చినప్పుడు అసంపూర్ణమైనది ఆగిపోతుంది. 11 నేను పిల్లవాడిగా ఉన్నప్పుడు పిల్లవాడిలా మాట్లాడేవాణ్ణి, పిల్లవాడిలా ఆలోచించేవాణ్ణి, పిల్లవాడిలా విషయాల్ని పరిశీలించేవాణ్ణి; కానీ ఇప్పుడు నేను పెద్దవాణ్ణి అయ్యాను కాబట్టి పిల్లచేష్టలు మానుకున్నాను. 12 ఎందుకంటే మనకిప్పుడు విషయాలు లోహపు అద్దంలో కనిపించినట్టు మసకగా కనిపిస్తున్నాయి. కానీ భవిష్యత్తులో స్పష్టంగా కనిపిస్తాయి. ప్రస్తుతం నాకు కొంతవరకే తెలుసు, కానీ భవిష్యత్తులో నాకు విషయాలు పూర్తిగా* తెలుస్తాయి. దేవునికి నా గురించి పూర్తిగా తెలిసినట్టే, నాకు విషయాలు పూర్తిగా తెలుస్తాయి. 13 ఏదేమైనా విశ్వాసం, నిరీక్షణ, ప్రేమ ఈ మూడు నిలుస్తాయి; కానీ వీటిలో గొప్పది ప్రేమే.