ትምህርቲ 14

ኣምልኾና ንኣምላኽ ባህ ዜብል ኪኸውን ዚኽእል ብኸመይ እዩ፧

ብወረቐት ኣብ እተሓትመ

ኣብ ዝሓለፈት ትምህርቲ ኸም ዝረኣናዮ፡ ኵለን ሃይማኖታት ኣይኰናን ንኣምላኽ ባህ ዜብላኦ። ኰይኑ ግና፡ ንፈጣሪና በቲ ንዕኡ ዜሐጕሶ መገዲ ኸነምልኾ ንኽእል ኢና። እሞ ደኣ ንዕኡ ባህ ዜብሎ “ኣምልኾ [ወይ፡ ሃይማኖት]” እንታይ እዩ፧ (ያእቆብ 1:27፡ እግረ ጽሑፍ) መጽሓፍ ቅዱስ እንታይ ከም ዚምህር እስከ ንርአ።

1. ኣምልኾና ኣብ ምንታይ እዩ ኺምስረት ዘለዎ፧

ኣምልኾና ኣብ መጽሓፍ ቅዱስ ኪምስረት ኣለዎ። የሱስ ንኣምላኽ፡ “ቃልካ ሓቂ እዩ” ኢልዎ እዩ። (ዮሃንስ 17:17) ገሊአን ሃይማኖታት ነቲ ኣብቲ ብድራኸ መንፈስ እተጻሕፈ ቃል ኣምላኽ ዝዀነ መጽሓፍ ቅዱስ ዚርከብ ሓቂ ዕሽሽ ይብላኦ እየን። ብልምድታትን ብስርዓታትን ሰብ ይትክኣኦ እየን። የሆዋ ግና በቶም “ትእዛዝ ኣምላኽ [ዜፍርሱ]” ባህ ኣይብሎን እዩ። (ማርቆስ 7:9 ኣንብብ።) በቲ ሓደ ሸነኽ፡ ናብ መጽሓፍ ቅዱስ እንተ ለጊብናን ምኽሩ እንተ ስዒብናን፡ ንልቡ ነሐጕሶ ኢና።

2. ብኸመይ ኢና ንየሆዋ ኸነምልኾ ዘሎና፧

የሆዋ ፈጣሪና ስለ ዝዀነ፡ ንዕኡ በይኑ ተወፋይነት ይግብኦ እዩ። (ራእይ 4:11) ከምዚ ኺብሃል ከሎ፡ ጣኦት፡ ስእሊ፡ ወይ ምስሊ ኸይተጠቐምና ንዕኡ ጥራይ ከነፍቅሮን ከነምልኾን ኣሎና ማለት እዩ።—ኢሳይያስ 42:8 ኣንብብ።

ኣምልኾና “ቕዱስን ንኣምላኽ ቅቡልን” ኪኸውን ይግባእ። (ሮሜ 12:1) እዚ ኺብሃል ከሎ ኸኣ፡ ብስነ ምግባራዊ መለክዒታቱ ኽንመላለስ ኣሎና ማለት እዩ። ንኣብነት፡ እቶም ንየሆዋ ዜፍቅርዎ፡ ነቲ ብዛዕባ መውስቦ ዜውጽኦ መለክዒታቱ እውን ይፈትውዎን ይስዕብዎን እዮም። ካብ ከም ምትካኽ ትምባኾን ምውሳድ ሓሽሽን ምብዛሕ ኣልኮላዊ መስተን ዝኣመሰለ ጐዳኢ ልማዳት እውን ይርሕቁ እዮም።a

3. ንየሆዋ ምስ ክርስትያናት ብጾትና ሓቢርና ኸነምልኾ ዘሎና ስለምንታይ ኢና፧

ሰሙናዊ ኣኼባታትና፡ “ኣብ ጉባኤ” “ንየሆዋ [ኽንውድሶ]” ኣጋጣሚ ይህበና እዩ። (መዝሙር 111:1, 2) ሓደ ኻብቲ ኸምኡ እንገብረሉ መገዲ፡ ንኣምላኽ ዚውድስ መዝሙር ብምዝማር እዩ። (መዝሙር 104:33 ኣንብብ።) የሆዋ ስለ ዜፍቅረና፡ ኣብ ኣኼባታት ክንእከብ ይደልየና እዩ፣ ኣብ ኣኼባታት ምእካብ ከኣ ናይ ዘለኣለም ህይወት ክንረክብ ከም ዚሕግዘና ይፈልጥ እዩ። ንሓድሕድና ንምትብባዕ ክንእከብ ከለና፡ ንጥቀም ኢና።

ኣዕሚቝካ ዅዓት

የሆዋ፡ ኣብ ኣምልኾና ምስልታት ክንጥቀም ዘይፈቕደሉ ምኽንያት መርምር። ንኣምላኽ ክንውድሰሉ ዚግባእ ኣገዳሲ መገድታት ተምሃር።

4. ኣብ ኣምልኾና ምስልታት ክንጥቀም የብልናን

ከምኡ ምግባር ንኣምላኽ ከም ዜጕህዮ ኸመይ ጌርና ንፈልጥ፧ ቪድዮ ኣጻውት፡ ድሕሪኡ በዚ ሕቶ ተመያየጡ፦

ቪድዮ፦ ምስልታት ኣብ ኣምልኾ ምጥቃምሲ ኣምላኽ ይቕበሎ ድዩ፧ (3:26)

ስእልታት፦ 1. እስራኤላውያን ኣብ እግሪ ኸረን ሲና ምራኽ ወርቂ የምልኹ። 2. ሓደ ሰብኣይ መቝጸርያ ሒዙ ኣብ ቅድሚ ምስሊ ማርያም ይጽሊ።

ብግዜ መጽሓፍ ቅዱስ ዝነበሩ ገሊኦም ህዝቢ ኣምላኽ ብጣኦት ገይሮም ንኣምላኽ ኬምልኽዎ ምስ ፈተኑ፡ እዚ እንታይ ኣስዒቡ፧

ገሊኦም ሰባት ናብ ኣምላኽ ከም ዝቐረቡ ዀይኑ ምእንቲ ኺስምዖም ኣብ ኣምልኾኦም ምስልታት ይጥቀሙ እዮም። ከም ሓቂ ግና፡ ከምኡ ምግባር ንኣምላኽ የርሕቆ ደዀን ይኸውን፧ ዘጸኣት 20:4-6ን መዝሙር 106:35, 36ን ኣንብብ፡ ድሕሪኡ በዚ ሕቶታት ተመያየጡ፦