ትምህርቲ 05

መጽሓፍ ቅዱስ ካብ ኣምላኽ እተላእከልና መልእኽቲ እዩ

ብወረቐት ኣብ እተሓትመ

የሆዋ ዜደንቕ ውህበት ሂቡና ኣሎ። እዚ ውህበት እዚ 66 መጻሕፍቲ ዝሓዘ መጽሓፍ ቅዱስ እዩ። ኰይኑ ግና፡ ‘መጽሓፍ ቅዱስ ካበይ እዩ መጺኡ፧ መን እዩ ደራሲኡ፧’ ኢልካ ትሓትት ትኸውን። ነዚ ሕቶታት እዚ ንምምላስ፡ ኣብ መጽሓፍ ቅዱስ ዚርከብ ኣምላኽ ዝለኣኾ መልእኽቲ ብኸመይ ናባና ኸም ዝበጽሐ ንርአ።

1. ሰባት ንመጽሓፍ ቅዱስ ካብ ጸሓፍዎ፡ ከመይ ኢሉ ደኣ እዩ ኣምላኽ ደራሲኡ ዚኸውን፧

መጽሓፍ ቅዱስ ብኣስታት 40 ጸሓፍቲ እዩ ተጻሒፉ፣ ንሳቶም ከኣ ካብ 1513 ቅ.ክ. ክሳዕ ከባቢ 98 ድ.ክ. ኣብ ዝነበረ 1,600 ዓመት እዮም ጽሒፎምዎ። እቶም ጸሓፍቲ እቲኦም፡ እተፈላለየ ድሕረ ባይታ እዩ ነይርዎም። ኰይኑ ግና፡ ኵሉ ኽፋላት መጽሓፍ ቅዱስ ንሓድሕዱ ይሰማማዕ እዩ። ስለምንታይ እዩ ኸምኡ ኪኸውን ክኢሉ፧ ምኽንያቱ፡ ደራሲ መጽሓፍ ቅዱስ፡ ኣምላኽ እዩ። (1 ተሰሎንቄ 2:13 ኣንብብ።) እቶም ጸሓፍቲ፡ ሓሳባቶም ኣይኰነን መዝጊቦም። የግዳስ፡ “ብመንፈስ ቅዱስa ተደሪኾም ካብ ኣምላኽ እተዛረብዎ እዩ።” (2 ጴጥሮስ 1:21) ኣምላኽ ብመንፈስ ቅዱሱ ገይሩ ሓሳባቱ ኺጽሕፉ ደሪኽዎም እዩ።—2 ጢሞቴዎስ 3:16።

2. ካብ መጽሓፍ ቅዱስ መን ኪጥቀም ይኽእል፧

“ኵሎም ኣህዛብን ነገዳትን ቋንቋታትን ህዝብታትን” ካብቲ ኣብ መጽሓፍ ቅዱስ ዚርከብ ብስራት ኪጥቀሙ ይኽእሉ እዮም። (ራእይ 14:6 ኣንብብ።) ኣምላኽ ንመጽሓፍ ቅዱስ ካብ ዝዀነ ይኹን ካልእ መጽሓፍ ብዝበዝሐ ቛንቋታት ከም ዚትርጐም ገይሩ እዩ። ዳርጋ ዅሉ ሰብ፡ ዓዱ ወይ ቋንቋኡ ብዘየገድስ ካብ መጽሓፍ ቅዱስ ኪጥቀም ይኽእል እዩ።

3. የሆዋ ንመጽሓፍ ቅዱስ ብኸመይ ዓቂብዎ፧

መጽሓፍ ቅዱስ ኣብ ከም ብራናን ጳጲሮስን ዝኣመሰለ ኺበላሾ ዚኽእል ናውቲ እዩ ተጻሒፉ ነይሩ። ንመጽሓፍ ቅዱስ ዚፈትዉ ሰባት ከኣ ነቲ ጽሑፍ ተጠንቂቖም ይቐድሕዎ ነይሮም እዮም። ብርቱዕ ጽልዋ ዘለዎም ሰባት ንመጽሓፍ ቅዱስ ኬጥፍእዎ እኳ እንተ ፈተኑ፡ ገሊኦም ግና ህይወቶም ኣብ ሓደጋ ኣእትዮም ዓቂቦምዎ እዮም። የሆዋ ሓሳቡ ንምምሕልላፍ፡ ዝዀነ ይኹን ነገር ኪዓግቶ ኣይፈቐደን። መጽሓፍ ቅዱስ፡ “ቃል ኣምላኽና . . . ንዘለኣለም ይነብር” ይብል።—ኢሳይያስ 40:8።

ኣዕሚቝካ ዅዓት

ኣምላኽ ብመንፈሱ ደሪኹ ንመጽሓፍ ቅዱስ ብኸመይ ከም ዘጽሓፎ፡ ነቲ መጽሓፍ ብኸመይ ከም ዝዓቀቦ፡ ከምኡ እውን ደቂ ሰብ ካብኡ ምእንቲ ኺጥቀሙ እንታይ ከም ዝገበረ ፍለጥ።

4. መጽሓፍ ቅዱስ ደራሲኡ መን ከም ዝዀነ ይገልጽ

ቪድዮ ኣጻውት። ድሕሪኡ 2 ጢሞቴዎስ 3:16 ኣንብብ፡ በዚ ዚስዕብ ሕቶታት ከኣ ተመያየጡ፦

ቪድዮ፦ ደራሲ መጽሓፍ ቅዱስ መን እዩ፧—ቍንጽል (2:48)

ንመጽሓፍ ቅዱስ ሰባት ካብ ጸሓፍዎ፡ ስለምንታይ እዩ ቓል ኣምላኽ ዚብሃል፧
ኣምላኽ ንሓሳባቱ ናብ ሰባት ኬመሓላልፍ ዚኽእልዶ ይመስለካ፧

ሓደ ኣስራሒ ንጸሓፊኡ ሓሳባቱ እናነገረ የጽሕፎ፡ ጸሓፊኡ ድማ ነቲ ሓሳባት ኣብ ደብዳበ ይጽሕፎ። — ሓደ ጸሓፊ፡ ደብዳበ እኳ እንተ ጸሓፈ፡ ኣብኣ ዘሎ መልእኽቲ ግና ናይቲ ዜጽሕፎ እዩ። ብተመሳሳሊ፡ ሰባት ንመጽሓፍ ቅዱስ እኳ እንተ ጸሓፍዎ፡ ኣብኡ ዘሎ መልእኽቲ ግና ናይ ኣምላኽ እዩ

5. መጽሓፍ ቅዱስ መጥቃዕታት ሰጊሩ

መጽሓፍ ቅዱስ ካብ ኣምላኽ እንተ ዀይኑ፡ ንሱ ኺዕቅቦ ኢና እንጽበ። ኣብ ታሪኽ ወዲ ሰብ ሓያል ጽልዋ ዘለዎም ሰባት ንመጽሓፍ ቅዱስ ኬጥፍእዎ ፈቲኖም እዮም። መራሕቲ ሃይማኖት ከኣ ኪሓብእዎ ፈቲኖም እዮም። ኰይኑ ግና፡ ብዙሓት ሰባት ተጻብኦታት እናኣጋጠሞም ክነሱ፡ ንህይወቶም ኣብ ሓደጋ ኣእትዮም ንመጽሓፍ ቅዱስ ዓቂቦምዎ እዮም። ብዛዕባ ሓደ ኻብዞም ሰባት እዚኦም ንምፍላጥ፡ ቪድዮ ኣጻውት፡ ድሕሪኡ በዚ ሕቶታት ተመያየጡ፦