ኣምላኽ ንዓና ዘለዎ ዕላማ እንታይ እዩ፧

ህይወት ሰብ ‘ሓጻርን ሽግር ዝመልኣን’ ምዃና፡ መጽሓፍ ቅዱስ ይገልጽ እዩ። (እዮብ 14:1) እሞ ደኣ ኣምላኽ ከምዚ ዓይነት ህይወት ክንነብር ድዩ ዚደሊ፧ እንተ ዘይኰይኑ፡ ንዓና ዘለዎ ዕላማ እንታይ እዩ፧ ንምዃኑ እቲ ዕላማ እቲ ኺፍጸም ድዩ፧ ኣብ መጽሓፍ ቅዱስ ዚርከብ ዜጸናንዕ መልሲ ርአ።

1. የሆዋ እንታይ ዓይነት ህይወት ኪህልወና እዩ ዚደሊ፧

የሆዋ ብሉጽ ህይወት ኪህልወና እዩ ዚደሊ። ነቶም ቀዳሞት ሰባት ዝዀኑ ኣዳምን ሄዋንን ምስ ፈጠሮም፡ ገነት ኤደን ኣብ እትብሃል ጽብቕቲ ገነት ኣንበሮም። “ኣምላኽ ከኣ ባረኾም፣ ኣምላኽ ድማ፡ ‘ፍረዩን ተባዝሑን፡ ንምድሪ ኸኣ ምልእዋን ግዝእዋን’ . . . በሎም።” (ዘፍጥረት 1:28) ውሉዳት ኪወልዱን ንብዘላ ምድሪ ገነት ኪገብርዋን ንእንስሳታት ኪከናኸንዎምን እዩ ዚደሊ ነይሩ። ዕላማኡ፡ ኵሎም ሰባት ፍጹም ጥዕና ረኺቦም ንዘለኣለም ኪነብሩ እዩ ነይሩ።

ክሳዕ ሕጂ ኸም እቲ እተሓስበ እኳ እንተ ዘይኰነ፡a ዕላማ ኣምላኽ ግና ኣይተለወጠን። (ኢሳይያስ 46:10, 11) ሕጂ እውን እንተ ዀነ፡ እዙዛት ደቂ ሰብ ፍጹማት ኰይኖም ንዘለኣለም ኪነብሩ እዩ ዚደሊ።—ራእይ 21:3, 4 ኣንብብ።

2. ከመይ ጌርና ኢና ሕጂ ትርጉም ዘለዎ ህይወት ከነስተማቕር እንኽእል፧

የሆዋ ንዓና፡ “መንፈሳዊ ነገራት ዚሃርፉ፡” ማለት ንዕኡ ንምፍላጥን ንምምላኽን ባህጊ ዘሎና ገይሩ እዩ ፈጢሩና። (ማቴዎስ 5:3-6 ኣንብብ።) ምስኡ ናይ ቀረባ ዕርክነት ኪህልወና ይደሊ እዩ፣ ማለት “ብዅሉ መገድታቱ ኽትመላለስ፡ ከተፍቅሮ፡ ብዅሉ ልብኻ . . . ኸተገልግሎ” ይደልየካ እዩ። (ዘዳግም 10:12፣ መዝሙር 25:14) ከምኡ እንተ ጌርና፡ ጸገማት እናሃለወና ኽነሱ ብሓቂ ሕጉሳት ክንከውን ንኽእል ኢና። ንየሆዋ እነምልኽ እንተ ዄንና፡ ህይወትና ናይ ሓቂ ትርጉምን ዕላማን ይህልዎ እዩ።

3. የሆዋ ንደቂ ሰብ ዜደንቕ ዕላማ ኣለዎ

ቪድዮ ኣጻውት፡ ድሕሪኡ በዚ ሕቶ ተመያየጡ፦

ቪድዮ፦ ኣምላኽ ንምድሪ ዝፈጠራ ስለምንታይ እዩ፧—ቍንጽል (1:41)

• የሆዋ ነዛ ጽብቕቲ ምድርና ዝፈጠራ ስለምንታይ እዩ፧

መክብብ 3:11 ኣንብብ፡ ድሕሪኡ በዚ ሕቶ ተመያየጡ፦

• እዚ ብዛዕባ የሆዋ እንታይ ይምህረካ፧

4. ዕላማ የሆዋ ኣይተለወጠን

መዝሙር 37:11, 29ን ኢሳይያስ 55:11ን ኣንብብ፡ ድሕሪኡ በዚ ሕቶ ተመያየጡ፦

• የሆዋ ንዓና ዘለዎ ዕላማ ኸም ዘይተለወጠ ኸመይ ጌርና ንፈልጥ፧

5. ንየሆዋ ነምልኽ እንተ ዄንና፡ ህይወትና ናይ ሓቂ ትርጉም ይህልዋ

ቪድዮ፦ ዕላማ ህይወት ተማሂረ (5:03)

• ተሩሚ ዕላማ ህይወት ብምፍላጣ፡ ብኸመይ ተጠቒማ፧

መክብብ 12:13 ኣንብብ፡ ድሕሪኡ በዚ ሕቶ ተመያየጡ፦

• የሆዋ ብዙሕ ስለ ዝገበረልና፡ እንታይ ክንገብረሉ እዩ ግዴታ ዘሎና፧

ጽማቝ

የሆዋ ኣብዛ ምድሪ እዚኣ ኣብ ትሕቲ ፍጹም ኵነታት ንዘለኣለም ክንነብር ይደልየና እዩ። ብዅሉ ልብና እነምልኾ እንተ ዄንና፡ ሕጂ እውን እንተ ዀነ ህይወትና ናይ ሓቂ ትርጉም ይህልዋ እዩ።

ክለሳ

• የሆዋ ንኣዳምን ንሄዋንን ዝነበሮ ናይ መጀመርታ ዕላማ እንታይ እዩ፧

• ኣምላኽ ንደቂ ሰብ ዘለዎ ዕላማ ኸም ዘይተለወጠ ኸመይ ጌርና ንፈልጥ፧

• ናይ ሓቂ ትርጉም ህይወት ከመይ ጌርካ ትፈልጥ፧

ዳህስስ

ገነት ኤደን ብሓቂ ኸም ዝነበረት ዜርኢ መርትዖ መርምር።

“ገነት ኤድን—ጽውጽዋይ ወይስ ሓቂ፧” (ግምቢ ዘብዐኛ፡ 1 ጥሪ 2011)

ምድሪ ንዘለኣለም ከም እትነብር ርግጸኛታት እንዀነሉ ምኽንያት ፍለጥ።

“ምድሪ ኽትጠፍእ ድያ፧” (ዓንቀጽ ወብ)

መጽሓፍ ቅዱስ ብዛዕባ ትርጉም ህይወት እንታይ ከም ዚብል መርምር።

“ትርጉም ህይወት እንታይ እዩ፧” (ዓንቀጽ ወብ)

ሓደ ሰብኣይ ኵሉ ዘለዎ ይመስሎ እኳ እንተ ነበረ፡ ደሓር ግና ኣብ ህይወቱ ዝጐደሎ ነገር ከም ዘሎ ብኸመይ ከም ዝፈለጠ ርአ።

ሕጂ ዕላማ ዘለዎ ህይወት ኣሎኒ (3:55)