ትምህርቲ 43

ክርስትያናት ብዛዕባ ኣልኮላዊ መስተ እንታይ ኣረኣእያ ኺህልዎም ይግባእ፧

ብወረቐት ኣብ እተሓትመ

ኣብ ብዘላ ዓለም፡ ሰባት ብዛዕባ ኣልኮላዊ መስተ በበይኑ ዓይነት ኣረኣእያ እዩ ዘለዎም። ገሊኦም ምስ ፈተውቶም ሓሓሊፎም መስተ ይሰትዩ እዮም። ገሊኦም ከኣ ፈጺሞም ኣይጥዕሙን እዮም። ገሊኦም ድማ ክሳዕ ዚሰኽሩ እዮም ዚሰትዩ። እሞ ደኣ መጽሓፍ ቅዱስ ብዛዕባ ኣልኮላዊ መስተ እንታይ ኣረኣእያ እዩ ዘለዎ፧

1. ኣልኮላዊ መስተ ምስታይ ጌጋ ድዩ፧

መጽሓፍ ቅዱስ፡ ኣልኮላዊ መስተ ምስታይ ኣይኵንንን እዩ። ብኣንጻሩ እኳ ደኣስ፡ ኣምላኽ ዝሃበና ሓያሎ ውህበታት ኪዝርዝር ከሎ፡ “ወይኒ . . . ንልቢ ሰብ ኬሐጕሶ” ኸም እተዋህበ ይጠቅስ እዩ። (መዝሙር 104:14, 15) ገሊኦም ኣብ መጽሓፍ ቅዱስ ተጠቒሶም ዘለዉ እሙናት ሰብኡትን ኣንስትን፡ ኣልኮላዊ መስተ ሰትዮም እዮም።—1 ጢሞቴዎስ 5:23።

2. መጽሓፍ ቅዱስ ነቶም ኪሰትዩ ዚውስኑ ሰባት እንታይ ምኽሪ ይህቦም፧

የሆዋ፡ ምብዛሕ መስተን ስኽራንን ይዅንን እዩ። (ገላትያ 5:21) ቃሉ፡ “ካብቶም ብዙሕ ወይኒ ዚሰትዩ . . . ኣይትኹን” ይብል። (ምሳሌ 23:20) ስለዚ፡ ክንሰቲ እንተ ወሲንና፡ ዋላ እውን በይንና ዄንና ኣብ እንሰትየሉ እዋን፡ ብንጹር ከም ዘይንሓስብ ክሳዕ እንኸውን፡ ዘረባናን ተግባርናን ክሳዕ ዘይንቈጻጸር፡ ወይ ኣካላዊ ጥዕናና ኽሳዕ ዚጕዳእ ክንሰቲ የብልናን። እንሰትዮ መጠን ክንቈጻጸር ዘይንኽእል እንተ ዄንና፡ ጠሪስና እንተ ሓደግናዮ ይሓይሽ።

3. ነቲ ኻልኦት ብዛዕባ መስተ ዚገብርዎ ውሳነታት ብኸመይ ነኽብረሎም፧

ኣልኮላዊ መስተ ምስታይ ወይ ዘይምስታይ፡ ነፍሲ ወከፍ ሰብ ባዕሉ ኺውስኖ ዚግባእ ውሳነ እዩ። ብመጠኑ ኣልኮላዊ መስተ ኺሰቲ ንዝወሰነ ሰብ ክንፈርዶ የብልናን፣ ኪሰቲ ንዘይደሊ ኸኣ ጸቕጢ ኽንገብረሉ የብልናን። (ሮሜ 14:10) ንሕና ምስታይና ንኻልኦት ጸገም ዚፈጥረሎም እንተ ዀይኑ እውን፡ ኣይንሰትን ኢና። (ሮሜ 14:21 ኣንብብ።) ነቲ፡ “ነፍሲ ወከፍ፡ ጥቕሚ ኻልእ ደኣ እምበር፡ ጥቕሚ ርእሱ ኣይድለ” ዚብል ምኽሪ ንስዕብ ኢና።—1 ቈረንቶስ 10:23, 24 ኣንብብ።

ኣዕሚቝካ ዅዓት

ክትሰቲ ወይ ከይትሰቲ ንምውሳን፡ እንተ ሰቲኻ እውን ክንደይ ከም እትሰቲ ንምውሳን ዚሕግዘካ ስርዓታት መጽሓፍ ቅዱስ ርአ። ናይ ምስታይ ጸገም እንተ ኣልዩካ እውን፡ እንታይ ክትገብር ከም እትኽእል ርአ።

4. ክትሰቲ እንተ ዄንካ ወስን

የሱስ ብዛዕባ ኣልኮላዊ መስተ እንታይ ኣረኣእያ ነይርዎ፧ መልሲ እዛ ሕቶ ንምርካብ፡ ብዛዕባ እቲ ንሱ ዝገበሮ ቐዳማይ ተኣምር ፍለጥ። ዮሃንስ 2:1-11 ኣንብብ፡ ድሕሪኡ በዚ ሕቶታት ተመያየጡ፦

ካብዚ ተኣምር እዚ፡ የሱስ ብዛዕባ ኣልኮላዊ መስተን ብዛዕባ እቶም መስተ ዚሰትዩን እንታይ ኣረኣእያ ኸም ዝነበሮ ኢና ኽንፈልጥ እንኽእል፧
የሱስ፡ ኣልኮላዊ መስተ ምስታይ ካብ ዘይኰነነ፡ ክርስትያናት ብዛዕባ ሓደ መስተ ኺሰቲ ዚውስን ሰብ እንታይ ኣረኣእያ ኺህልዎም ይግባእ፧

ኰይኑ ግና፡ ሓደ ክርስትያን ኣልኮላዊ መስተ ኺሰቲ ስለ እተፈቕደሉ ጥራይ፡ ኵሉ ሳዕ ኪሰቲ ይግባእ ማለት ኣይኰነን። ምሳሌ 22:3 ኣንብብ፡ ድሕሪኡ ኽትሰቲ ወይ ከይትሰቲ ንምውሳን እዚ ዚስዕብ ረቛሒታት ብኸመይ ከም ዚጸልወካ ርአ፦