ትምህርቲ 42

መጽሓፍ ቅዱስ ብዛዕባ ምምርዓውን ዘይምምርዓውን እንታይ ይብል፧

ብወረቐት ኣብ እተሓትመ

ኣብ ገሊኡ ባህልታት፡ ሓደ ሰብ እንተ ዘይተመርዕዩ ሕጉስ ኪኸውን ከም ዘይክእል ይእመን እዩ። ኰይኑ ግና፡ ኵሎም ምርዑዋት ኣይኰኑን ሕጉሳት፣ ኵሎም ዘይተመርዓዉ እውን ኣይኰኑን ዘይሕጉሳት። መጽሓፍ ቅዱስ ንምምርዓው ኰነ ንዘይምምርዓው ከም ውህበት ገይሩ ጠቒስዎ ኣሎ።

1. ዘይምምርዓው እንታይ ጥቕምታት ኣለዎ፧

መጽሓፍ ቅዱስ፡ “እቲ ዚምርዖ፡ ጽቡቕ ይገብር፣ እቲ ዘይምርዖ ግና፡ ዝሓሸ ይገብር” ይብል። (1 ቈረንቶስ 7:32, 33, 38 ኣንብብ።) ብኸመይ ደኣ እዩ ዘይተመርዓወ ሰብ ‘ዝሓሸ ዚገብር፧’ ዘይተመርዓዉ ክርስትያናት ብናይ መጻምድቶም ኪሓልዩ ኣየድልዮምን እዩ። ስለዚ፡ ብሓፈሻኡ ዝያዳ ናጽነት ኣለዎም። ንኣብነት፡ ገሊኦም ብስራት መንግስቲ ኣምላኽ ንምስባኽ ናብ ካልእ ዓዲ ብምኻድ ወይ ብኻልእ መገድታት ኣገልግሎቶም ኬስፍሑ ይኽእሉ እዮም። ልዕሊ ዅሉ ኸኣ፡ ንየሆዋ ንምቕራብ ዝያዳ ግዜ ኼሕልፉ ይኽእሉ እዮም።

2. ብሕጊ ምምርዓው እንታይ ጥቕምታት ኣለዎ፧

ከምቲ ዘይምምርዓው ጥቕምታት ዘለዎ፡ ምምርዓው እውን ፍሉይ ጥቕምታት ኣለዎ። መጽሓፍ ቅዱስ፡ “ካብ ሓደስ ክልተ ምዃን ይሓይሽ” ይብል። (መክብብ 4:9) ምናዳ እቶም ንስርዓታት መጽሓፍ ቅዱስ ኣብ ሓዳሮም ዚትግብሩ ክርስትያናት፡ ነዚ ሓቂ ዀይኑ ረኺቦምዎ እዮም። ብሕጊ ዚመራዓዉ ሰብ ሓዳር፡ ንሓድሕዶም ኪፋቐሩን ኪከባበሩን ቃል ኪዳን ይተኣታተዉ እዮም። ከም ውጽኢቱ፡ ካብቶም ከይተመራዓዉ ብሓደ ተኣኻኺቦም ዚነብሩ መጻምድቲ ንላዕሊ ቕሳነት ይስምዖም እዩ። መርዓ ኸኣ ስድራ ንምዕባይ ውሑስ መሰረት የንጽፍ እዩ።

3. የሆዋ ንመውስቦ ብኸመይ ይርእዮ፧

የሆዋ ነቲ ቐዳማይ ስነ ስርዓት መርዓ ኣብ ዝፈጸመሉ እዋን፡ “ሰብኣይ ኣቦኡን ኣዲኡን ይሓድግ፡ ምስ ሰበይቱ ኸኣ ይጠብቕ” ኢሉ ተዛሪቡ እዩ። (ዘፍጥረት 2:24) የሆዋ ንሰብኣይን ንሰበይትን ብህይወት ክሳዕ ዘለዉ ብሓደ ኺጣበቑ እዩ ዚደልዮም። ብምኽንያት ዝሙት ጥራይ እዩ ፍትሕ ዚፈቅድ። ከምኡ ኼጋጥም ከሎ፡ የሆዋ ነቲ ንጹህ መጻምድቲ፡ ኪፋታሕ ወይ ከይፋታሕ ናይ ምውሳን መሰል ይህቦ እዩ።a (ማቴዎስ 19:9) የሆዋ ንክርስትያናት፡ ድርብ መውስቦ ኣይፈቕደሎምን እዩ።—1 ጢሞቴዎስ 3:2።

ኣዕሚቝካ ዅዓት

ምርዑው ኩን ዘይምርዑው ብኸመይ ሕጉስ ከም እትኸውንን ብኸመይ ንየሆዋ ኸም እተሐጕሶን ተምሃር።

4. ንዘይምምርዓውካ ጽቡቕ ጌርካ ተጠቐመሉ

የሱስ ንዘይምምርዓው፡ ከም ውህበት ገይሩ እዩ ርእይዎ። (ማቴዎስ 19:11, 12) ማቴዎስ 4:23 ኣንብብ፡ ድሕሪኡ በዚ ሕቶ ተመያየጡ፦

የሱስ ንውህበት ዘይምምርዓው፡ ንኣቦኡን ንሰባትን ንምግልጋል ብኸመይ ተጠቒሙሉ፧

ዘይተመርዓዉ ክርስትያናት ከም የሱስ ንህይወቶም ኣብ ጽቡቕ መዓላ ብምውዓል ኪሕጐሱ ይኽእሉ እዮም። ቪድዮ ኣጻውት፡ ድሕሪኡ በዚ ሕቶ ተመያየጡ፦

ቪድዮ፦ ኣቱም ዘይተመርዓኹም እሙናት (3:11)

ዘይተመርዓዉ ክርስትያናት ንህይወቶም ኣብ ምንታይ ጽቡቕ መዓላ እዮም ኬውዕልዋ ዚኽእሉ፧

ትፈልጥዶ፧

መጽሓፍ ቅዱስ ካብ ክንደይ ዕድመ ንላዕሊ ኽትምርዖ ኸም ዚግባእ ኣይገልጽን እዩ። ይኹን እምበር፡ ሓደ ሰብ ‘ብጽሕናኡ ኽሳዕ ዜሕልፍ፡’ ማለት እቲ ንምምዝዛኑ ኺጸሉ ዚኽእል ብርቱዕ ጾታዊ ስምዒታት ክሳዕ ዚሓልፍ እንተ ጸንሐ ኸም ዚሓይሽ ይመክር እዩ።—1 ቈረንቶስ 7:36።