የሱስ ክርስቶስ ኣብቲ ናይ ከረን ስብከቱ “ብመንፈስ ድኻታት [“እቶም መንፈሳዊ ድሌቶም ንምምላእ ዝነቕሑ:” NW ]: መንግስተ ሰማያት ናቶም እያ እሞ: ብጹኣን እዮም” በለ። (ማቴዎስ 5:3) ብተወሳኺ እውን የሱስ “ህይወት ሰብ ብብዝሒ ገንዘብ ኣይኰነትን እሞ: ተጠንቀቑ: ካብ ኵሉ ስስዔ ኸኣ ርእስኹም ሐልዉ” በለ።​—⁠ሉቃስ 12:​15

ካልኦት ከኣ ናይ ገዛእ ርእሶም ክብሪ ንምዕባይ ብምፍታን: ኣብ ገዛእ ርእሶም ትዅረት ብምግባር ሓጐስ ክረኽቡ ይጽዕሩ። ኣብያተ-⁠ንባብን ቤተ-⁠መጻሕፍትን ንብሕታዊ ምዕባለን ምምሕያሽን ዝሕግዙ መጻሕፍቲ ዝመልኡ ኢዮም: ከምዚኣቶም ዝበሉ ጽሑፋት ግን ንሰባት ነባሪ ሓጐስ ኣየምጽኡሎምን። እሞኸ ደኣ ናይ ሓቂ ሓጐስ ኣበይ ኢዩ ክርከብ ዝከኣል፧

ብሓቂ ሕጕሳት ንምዃን: ነቲ መፋጥርትና ዝዀነ መንፈሳዊ ድሌት ክንግንዘቦ ኣሎና። የሱስ “እቶም መንፈሳዊ ድሌቶም ንምምላእ ዝነቕሑ ሕጕሳት ኢዮም” በለ። ርግጽ ኢዩ: ነዚ ድሌት እዚ ተገንዚብና ጥራይ ዝዀነ ይኹን ነገር ከይገበርና ስቕ ምባል ዋላ ሓንቲ ረብሓ የብሉን። ንኣብነት: ሓደ ናይ ማራቶን ጐያዪ እቲ ቕድድም ምስ ተወድአ ነቲ ማይ ጸሚእዎ ዘሎ ኣካላቱ ከየርወዮ ስቕ ምስ ዝብል እንታይ ኢዩ ዘጋጥሞ፧ ሽዑ ንሽዑ ኣካላቱ ማይ ብምውድኡ ክነቅጽን ካልእ ከቢድ ሳዕቤናትን ኣይመጋጠሞንዶ፧ ብተመሳሳሊ ድማ: ነቲ ብመንፈስ ክንዕንገል ዘሎና ድሌት ሸለል ኢልና እንተድኣ ርኢናዮ: መወዳእትኡ ብመንፈስ ክንነቅጽ ኢና። እዚ ኸኣ ደስታን ሓጐስን ከም እንስእን ይገብረና።