18, 19. ‘ናብ ኣኽራን ምህዳም’ ሃይማኖት ምቕያር ማለት ከም ዘይኰነ ንምምልካት እንታይ ምኽንያታት ኢዩ እተዋህበ፧

¹⁸ የሱስ ‘እቲ ርኽሰት ኣብታ ቕድስቲ ስፍራ ከም ዝቐውም’ ድሕሪ ምንባዩ: ነቶም መስተውዓልቲ ሰባት ስጕምቲ ክወስዱ ከም ዘለዎም የጠንቅቕ። እዚ ኽብል ከሎ ኣብታ ናይ መወዳእታ ህሞት ማለት ‘እቲ ርኽሰት ኣብታ ቕድስቲ ስፍራ ምስ ቈመ’ ብዙሓት ሰባት ካብ ናይ ሓሶት ሃይማኖት ሃዲሞም ናይ ሓቂ ኣምልኾ ክሕዙ ኢዮም ማለቱዶ ኢዩ ነይሩ፧ ፈጺሙ ዘይመስል ኢዩ። ነቲ ናይ መጀመርታ ፍጻሜ ንርአ። የሱስ ከምዚ በለ:- “ኣብ ይሁዳ ዘለዉ ናብ ኣኽራን ይህደሙ። ኣብ ዝባን ናሕሲ ዘሎ ኸኣ: ካብ ቤቱ ገለ ኺማላእ ኣይውረድ ኣይእቶውን። ኣብ ወፍሪ ዘሎ ኸኣ ክዳኑ ኺማላእ ንድሕሪት ኣይመለስ። በታ ቕነ እቲኣ ግና ንጥኑሳትን ንዜጥብዋን ወይለኤን። . . . ምህዳምኩም ብኽረምቲ ኸይከውንሲ ጸልዩ።”​—⁠ማርቆስ 13:⁠14-18 ሰያፍ ዝገበርናዮ ንሕና ኢና።

22. እቲ የሱስ ብዛዕባ ናብ ኣኽራን ምህዳም ዝሃቦ ምኽሪ ኣብ ግብሪ ምውዓልና እንታይ ኢዩ ከጠቓልል ዝኽእል፧

²² ኣብዚ እዋን እዚ ብዛዕባ እቲ ዓቢ ጸበባ ምሉእ ዝርዝር ክህልወና ኣይክእልን ኢዩ: ይኹን እምበር እቲ የሱስ እተዛረበሉ ምህዳም ኣባና ዝውዕል ብጂኦግራፊያዊ መልክዕ ከም ዘይኰነ ብርትዓዊ መገዲ ክንድምድም ንኽእል ኢና። ህዝቢ ኣምላኽ ድሮ ኣብ መላእ ምድሪ ዳርጋ ኣብ ኵሉ ኵርናዓት ይርከቡ ኣለዉ። ይኹን እምበር: ምህዳም ኣድላዪ ክኸውን ከሎ: ክርስትያናት ነቲ ኣብ መንጎኦምን ኣብ መንጎ ናይ ሓሶት ሃይማኖታውያን ማሕበራትን ዘለዎም ንጹር ፍልልይ ብቐጻሊ ከም ዝዕቅብዎ ርግጸኛታት ክንከውን ንኽእል ኢና። የሱስ: ሓደ ሰብ ክዳውንቲ ወይ ካልእ ኣቝሑ ክወስድ ኢሉ ናብ ቤቱ ከይምለስ ምጥንቃቑ እውን ትርጕም ዘለዎ ኢዩ። (ማቴዎስ 24:17, 18) ስለዚ እምበኣር: ንንዋታዊ ነገራት ብኸመይ ከም እንርእዮ ኣብ ቅድሜና ፈተና ክህሉ ይኽእል ኢዩ፣ እቲ ንዋታዊ ነገራት ካብ ኵሉ ንላዕሊ ዘድሊ ድዩ: ወይስ እቲ ንዅሎም ብወገን ኣምላኽ ዝዀኑ ሰባት ዝወሃብ ድሕነት ኢዩ ዝያዳ ኣገዳሲ፧ እወ: ምህዳምና ገለ ዓይነት ጸገማትን ሕድገታትን ከምጽእ ይኽእል ኢዩ። ልክዕ ከምቲ ኣብ ቀዳማይ ክፍለ-ዘበን ዝነበሩ ክርስትያናት: ዮርዳኖስ ተሳጊሮም ካብ ይሁዳ ናብ ጴርያ ዝሃደሙ: ዝዀነ ይኹን ኣገዳሲ ስጕምቲ ንምውሳድ ድልዋት ምዃን ከድልየና ኢዩ።