የሱስ ስጋዊ ኣካል ሒዙ ድዩ ተንሲኡ ወይስ መንፈሳዊ ኣካል፧

መጽሓፍ ቅዱስ፡ የሱስ “ብስጋ ሞይቱ፡ ብመንፈስ ግና ህያው ኰይኑ [ማለት፡ ተንሲኡ]” ይብል።—1 ጴጥሮስ 3:18፣ ግብሪ ሃዋርያት 13:34፣ 1 ቈረንቶስ 15:45፣ 2 ቈረንቶስ 5:16።

የሱስ ስጋን ደምን ለቢሱ ኺትንስእ ከም ዘይክእል ባዕሉ ገሊጹ እዩ። ከመይሲ፡ ‘ምእንቲ ህይወት ዓለም ስጋኡ’ በጃ ገይሩ ንደቂ ሰብ ከም ዚህብ ሓቢሩ እዩ። (ዮሃንስ 6:51፣ ማቴዎስ 20:28) ስጋ ለቢሱ እንተ ዚትንስእ ነይሩ፡ ነቲ መስዋእታዊ በጃ ምሰረዞ። እዚ ግና ኪኸውን ዚኽእል ኣይኰነን፣ ስለምንታይሲ፡ ስጋኡን ደሙን “ሓንሳእ ንሓዋሩ” ኸም ዝሰውአ መጽሓፍ ቅዱስ ይገልጽ እዩ።—እብራውያን 9:11, 12።

የሱስ መንፈሳዊ ኣካል ሒዙ እንተ ዚትንስእ ነይሩ፡ ደቀ መዛሙርቱ ደኣ ብኸመይ እዮም ኪርእይዎ ኽኢሎም፧

• መንፈሳውያን ፍጡራት ስጋ ኺለብሱ፡ ማለት ሰብ መሲሎም ኪርኣዩ ይኽእሉ እዮም። ንኣብነት፡ ስጋ ዝለበሱ መላእኽቲ ምስ ሰባት በሊዖምን ሰትዮምን እዮም። (ዘፍጥረት 18:1-8፣ 19:1-3) ኣብቲ ህሞት እቲ ግና፡ ገና መንፈሳውያን ፍጡራት እዮም ነይሮም፡ ነቲ ስጋዊ ዓለም ሓዲጎም እውን ኪኸዱ ይኽእሉ ነይሮም እዮም።—መሳፍንቲ 13:15-21።

• የሱስ ድሕሪ ምትንሳኡ፡ ከምቲ መላእኽቲ ኣቐዲሞም ዝገብርዎ፡ ንግዜኡ ስጋ ለቢሱ ነይሩ እዩ። መንፈሳዊ ፍጡር ስለ ዝነበረ ግና፡ ብሃንደበት ኪርአን ኪስወርን ይኽእል ነይሩ እዩ። (ሉቃስ 24:31፣ ዮሃንስ 20:19, 26) እቲ ዚለብሶ ዝነበረ ስጋ ግና በብግዜኡ ይፈላለ ነይሩ እዩ። በዚ ምኽንያት እዚ ድማ፡ ናይ ቀረባ ኣዕሩኹ እኳ በቲ ዚብሎ ወይ ዚገብሮ ነገር ጥራይ እዮም ኬለልይዎ ኽኢሎም።—ሉቃስ 24:30, 31, 35፣ ዮሃንስ 20:14-16፣ 21:6, 7።

• የሱስ ንሃዋርያ ቶማስ ኣብ እተራእየሉ እዋን፡ ኣሰር ቍስሉ ዝሓዘ ስጋ እዩ ለቢሱ ነይሩ። ከምኡ ዝገበረ ኸኣ፡ ቶማስ ብትንሳኤ የሱስ ተጠራጢሩ ስለ ዝነበረ፡ ንእምነቱ ኼደልድለሉ ኢሉ እዩ።—ዮሃንስ 20:24-29።