12. ንጳውሎስን በርናባስን ኣብ ኢቆንዩም ብትብዓት ንኽዛረቡ ዘለዓዓሎም ኵነታት እንታይ ኢዩ ነይሩ፧

¹² ናይ ጳውሎስን በርናባስን ኣብነት እውን እስከ ንርአ። ግብሪ ሃዋርያት 14:⁠1, 2 ከምዚ ትብል:- “ኣብ ኢቆንዩም ኰነ: ሐቢሮም ኣብ ቤት ጸሎት ኣይሁድ አትዮም: ካብ ኣይሁድን ጽርኣውያንን ኣዝዮም ብዙሓት ህዝቢ ኽሳዕ ዝአምኑ: ተዛረቡ። እቶም ዘይአመኑ ኣይሁድ ግና ልቢ እቶም ኣህዛብ ናብቶም ኣሕዋት ኣናቓነቑን ኣኽፍኡን።” ኣብ ዘ ኒው ኢንግሊሽ ባይብል (እንግሊዝኛ) ከምዚ ይንበብ:- “እቶም ዘይኣመኑ ኣይሁድ ግን ነቶም ኣህዛብ ኣንጻር ክርስትያን ኣለዓዓልዎም: ኣእምሮኦም ከኣ መረዙ።” እቶም ኣይሁድ ተጻረርቲ ንርእሶም ነቲ መልእኽቲ ምንጻጎም ስለ ዘየዕገቦም: እቶም ኣህዛብ ኣንጻር ክርስትያናት ብሕማቕ ኣቐዲሞም ምእንቲ ክፈርዱ ብሓሶት ናይ ምጽላም ወፈራ ጀመሩ።a እቲ ንክርስትና ምጽልኦም ኣየ ክሳዕ ክንደይ ኰን ኢዩ ዓሚቝ ዝነበረ! (ምስ ግብሪ ሃዋርያት 10:⁠28 ኣረኣእዮ።) እቶም ሓደስቲ ደቀ መዛሙርቲ በቲ ኣብ ቅድሚ ህዝቢ እተገብረ ጸርፊ መንፈሶም ምእንቲ ከየጥፍኡ: ጳውሎስን በርናባስን እዚ ናይ ‘ምዝራብ ግዜ’ ኢዩ ኢሎም ሓሰቡ። ስለዚ ጳውሎስን ባርናባስን በቲ ተኣምራት ክገብሩ ሓይሊ ብምሃብ ስምረቱ ዘርኣዮም ‘ጐይታ ተአሚኖም: ብትብዓት እናተዛረቡ ኣብኡ ነዊሕ ወርሓት ተቐመጡ።’ እዚ ኸኣ “ገሊኦም ምስ ኣይሁድ: ገሊኦም ድማ ምስ ሃዋርያት” ከም ዝዀኑ ገበረ።​—⁠ግብሪ ሃዋርያት 14:⁠3, 4