4. ጳውሎስ ነየናይ ኣብ 1 ቈረንቶስ 10:⁠12, 13 ተመዝጊቡ ዘሎ ማዕዳ ኢዩ ዝሃበ፧

⁴ ጳውሎስ ነቶም ኣብታ ብስነ⁠-​ምግባራዊ ብዕልግናኣ ውርይቲ ዝነበረት ከተማ ቈረንቶስ ዝነበሩ ክርስትያናት ክጽሕፈሎም ከሎ ብዛዕባ ፈተናን ሓጢኣት ዘለዎ ሓይልን ኣብ ክውንነት እተመስረተ መጠንቀቕታ ንምሃቦም ከምዚ ዝስዕብ በሎም:- “እቲ ደው ኢሉ ዘሎ ዚመስሎ: ከይወድቕ ይጠንቀቕ። ሰብ ኪጾሮ ዘይኽእል ፈተና ኣይበጽሓኩምን። ኣምላኽ እሙን እዩ እሞ: ምስቲ ፈተናኹም ምጽዋሩ ምእንቲ ኽትክእሉስ: መውጽኢ ገይሩልኩም አሎ: ካብ ዓቕምኹም ንንየው ክትፍተኑ ኣይሐድገኩምን እዩ።” (1 ቈረንቶስ 10:⁠12, 13) ዓበይትናን ንኣሽቱናን: ደቂ ተባዕትዮ ንኹን ደቂ ኣንስትዮ ብዘየገድስ ኵላትና ኣብ ቤት ትምህርቲ: ኣብ ስራሕ: ወይ ኣብ ካልእ ቦታታት ብዙሕ ፈተና የጓንፈና ኢዩ። ሃየ እምበኣር ንቓላት ጳውሎስ ንመርምሮ እሞ ነቲ ንዓና ዘለዎ ትርጕም ንገንዘቦ።

7. ካልኦት ፈተና ተቓዊሞም ዕዉታት ምዃኖም ምፍላጥ ምንጪ ምጽንናዕ ዝኸውን ስለምንታይ ኢዩ፧

⁷ ካብቲ “ሰብ ኪጾሮ ዘይኽእል ፈተና ኣይበጽሓኩምን” ዝብል ቃላት ጳውሎስ ከመይ ዝበለ ምጽንናዕ ኰን ኢና ክንረክብ እንኽእል! (1 ቈረንቶስ 10:⁠13) ሃዋርያ ጴጥሮስ ከምዚ ዝስዕብ ብምባል ጽሒፉ ኢዩ:- “እዚ ሓሳረ መከራ እዚ ነቶም ኣብ ዓለም ዘለዉ ኣሕዋትኩም ይበጽሖም ከም ዘሎ እናፈለጥኩም: ብእምነት ጸኒዕኩም [ንድያብሎስ] ተቓወምዎ።” (1 ጴጥሮስ 5:⁠9) ብርግጽ ካልኦት ተመሳሳሊ ፈተናታት ኣጓኒፍዎምን ብሓገዝ ኣምላኽ ተዋጺኦምሉን ኢዮም: ስለዚ ንሕናውን ንኽእል ኢና። ይኹን እምበር: ኣብዛ ዕያግ ዝመልኣ ዓለም እንነብር ሓቀኛታት ክርስትያናት ከም ምዃንና መጠን ውዒሉ ሓዲሩ ዅላትና ፈተና ከጋጥመና ኸም ዝኽእል ክንዝንግዕ የብልናን። ኣብ ልዕሊ ስጋዊ ድኻምን ብሓጢኣት ምፍታንን ከም እንዕወት ርግጸኛታት ክንከውን እንኽእል ደኣ እሞ ከመይ ገይርና ኢና፧