ትምህርቲ 45

ገለልትነት እንታይ ማለት እዩ፧

ብወረቐት ኣብ እተሓትመ

የሱስ ንሰዓብቱ፡ “ካብ ዓለም ኣይኰንኩምን” ኢልዎም እዩ። (ዮሃንስ 15:19) እዚ ድማ ገለልተኛታት ኪዀኑ ኸም ዘለዎም፡ ማለት ኣብቲ ናይዛ ዓለም ፖለቲካን ውግእን ወገን ኪሕዙ ኸም ዘይብሎም የመልክት። ከም ሓቂ፡ ገለልተኛ ምዃን ቀሊል ኣይኰነን። ብሰንኪ እዚ ኣደዳ ላግጺ ኽንከውን ንኽእል ኢና። እሞ ደኣ ኸመይ ጌርና ኢና ገለልትነትና ኽንሕሉ፡ ንየሆዋ ኣምላኽ ከኣ እሙናት ክንከውን እንኽእል፧

1. ናይ ሓቂ ክርስትያናት ንሰብኣውያን መንግስትታት ብኸመይ ይርእይዎም፧

ክርስትያናት ንመንግስቲ የኽብሩ እዮም። ከምቲ የሱስ ዝበሎ ንገብር ኢና፣ ንሱ፡ “ናይ ቄሳር ንቄሳር . . . ሃቡ” እዩ ኢሉና፣ እዚ ማለት ከኣ፡ ከም ምኽፋል ግብሪ ዝኣመሰለ ሕግታት እታ እንነብረላ ሃገር ነኽብር ኢና። (ማርቆስ 12:17) ሰብኣውያን መንግስትታት ብኣምላኽ ተፈቒዱሎም ከም ዚገዝኡ መጽሓፍ ቅዱስ ይምህር እዩ። (ሮሜ 13:1) ስለዚ፡ ሰብኣውያን መንግስትታት ዝነኣሰ ወይ ድሩት ስልጣን ከም ዘለዎም ንፈልጥ ኢና። ካብ ኣምላኽናን ካብ ሰማያዊት መንግስቱን ጥራይ ኢና ንጸገማት ደቂ ሰብ ፍታሕ እንጽበ።

2. ገለልተኛታት ምዃንና ብኸመይ ከነርኢ ንኽእል፧

ከምቲ የሱስ ዝገበሮ፡ ኣብ ፖለቲካ ኣይንኣቱን ኢና። ሰባት ነቲ የሱስ ዝገበሮ ተኣምር ርእዮም ኣብ ምድሪ ኼንግስዎ ምስ ፈተኑ፡ ንሱ ፍቓደኛ ኣይኰነን። (ዮሃንስ 6:15) ስለምንታይ፧ ጸኒሑ ባዕሉ ምኽንያቱ ኺገልጽ ከሎ፡ “መንግስተይ ካብዛ ዓለም እዚኣ ኣይኰነትን” ኢሉ እዩ። (ዮሃንስ 18:36) ንሕና ድማ ደቀ መዛሙርቲ የሱስ ስለ ዝዀንና፡ ገለልትነትና ብእተፈላለየ መገዲ ነርኢ ኢና። ንኣብነት፡ ናብ ውግእ ኣይንኸይድን ኢና። (ሚክያስ 4:3 ኣንብብ።) ንኸም ሰንደቕ ዕላማ ዝኣመሰለ ሃገራዊ ኣርማታት ነኽብር እኳ እንተ ዀንና፡ ኣምልኾ ግና ኣይንህብን ኢና። (1 ዮሃንስ 5:21) ንሓደ ፖለቲካዊ ሰልፊ ወይ ሕጹይ ከኣ ኣይንድግፍን ወይ ኣይንቃወምን ኢና። በዚ መገድታት እዝን ብኻልእን፡ ንመንግስቲ ኣምላኽ ምሉእ ብምሉእ እሙናት ምዃንና ነርኢ ኢና።

ኣዕሚቝካ ዅዓት

ንገለልትነትካ ኺፍትን ዚኽእል ኵነታት መርምር፣ ከመይ ጌርካ ንየሆዋ ባህ ዜብሎ ውሳነታት ክትገብር ከም እትኽእል እውን ርአ።

ሓደ ሰብኣይ ገለልተኛ ይኸውን። ነቶም ንህዝቢ ዚምድሩ ዘለዉ ሕጹያት ፖለቲከኛታት እዝኒ ኣይህቦምን።

3. ናይ ሓቂ ክርስትያናት ገለልተኛታት እዮም

የሱስን ሰዓብቱን ኣብነት ሓዲጎምልና እዮም። ሮሜ 13:1, 5-7ን 1 ጴጥሮስ 2:13, 14ን ኣንብብ። ድሕሪኡ ቪድዮ ኣጻውት፡ በዚ ሕቶታት ከኣ ተመያየጡ፦

ቪድዮ፦ ናይ ሓቂ ክርስትያናት ገለልተኛታት እዮም—1ይ ክፋል (4:28)

ስለምንታይ ኢና ንዓለማውያን ሰበ ስልጣን ከነኽብሮም ዘሎና፧
ከም እንግዝኦም ከነርእየሉ እንኽእል ገለ መገድታት እንታይ እዩ፧

ብግዜ ውግእ፡ ገሊአን ሃገራት ገለልተኛታት ከም ዝዀና እኳ እንተ ተዛረባ፡ ንኽልቲኡ ወገን ግና ይድግፋ እየን። እሞ ደኣ ናይ ሓቂ ገለልትነት እንታይ እዩ፧ ዮሃንስ 17:16 ኣንብብ። ድሕሪኡ ቪድዮ ኣጻውት፡ በዚ ሕቶ ኸኣ ተመያየጡ፦