9. ዮሃንስ ነቲ ናይታ ኸተማ ናይ ህንጻ ኣቕሑት ብኸመይ ይገልጾ፧

⁹ ዮሃንስ መግለጺኡ ብምቕጻል ከምዚ ይብል:- “እቲ ቐጽራ ድማ ብያስጲስ እተነድቀ እዩ። እታ ኸተማውን ጽሩይ ወርቂ ኸም ጽሩይ መረጸን እያ እትመስል። መሰረታት ቀጽሪ እታ ኸተማ ኸኣ ብኽቡር እምኒ ዘበለ ተሰሊሙ እዩ። እቲ ቐዳማይ መሰረት ያስጲስ እዩ: እቲ ኻልኣይ ሰፊሮስ: እቲ ሳልሳይ ከልቄዶን: እቲ ራብዓይ ስመራግዶስ: እቲ ሓምሳይ ሰርዶንክስ: እቲ ሳድሳይ ሰርድዮስ: እቲ ሳብዓይ ክሪሶሊት: እቲ ሳምናይ በሪሎስ: እቲ ታስዓይ ቶጳዝዮን: እቲ ዓስራይ ክሪሶጵራስ: እቲ መበል ዓሰርተው ሓደ ህያክንቶስ: እቲ መበል ዓሰርተው ክልተ ኣሜትስጦስ እዩ። እቲ ዓሰርተው ክልተ ደገ ኸኣ ዓሰርተው ክልተ ሉል እዩ። ነፍሲ ወከፍ ደገ ኻብ ሓደ ሉል እተገብረ እዩ። ኣደባባይ እታ ኸተማ ድማ ጽሩይ ወርቂ ኸም ጽሩይ መረጸን እዩ።”—ራእይ 21:18–21

10. እታ ከተማ ብያስጲስ: ብወርቂ: ከምኡውን “ብኽቡር እምኒ” ምንዳቓ እንታይ የመልክት፧

¹⁰ ናይታ ኸተማ ኣነዳድቓ ብሓቂ ዘንጸባርቕ ኢዩ። ኣብ ክንዲ ከም መሬት ወይ እምኒ ዝበሉ ዓለማዊ ወይ ምድራዊ ናይ ህንጻ መሳርሒ እነንብብ ብዛዕባ ያስጲስን ጽሩይ ወርቅን ‘ኽቡር እምንን’ ኢና እነንብብ። እዚኣቶም ንሰማያዊ ናይ ህንጻ መሳርሒ ከመልክቱስ ኣየ ክሳዕ ክንደይ ዝሰማማዕ ኰን ኢዩ! ካብዚኣቶም ዝዓቢ ዋላ ሓንቲ ክህሉ ኣይክእልን ኢዩ። እቲ ጥንታዊ ታቦት ኪዳን ብጽሩይ ወርቂ እተለበጠ ኢዩ ነይሩ: ኣብ መጽሓፍ ቅዱስ ከኣ እዚ ንጥረ ነገር እዚ ብዙሕ ግዜ ንጽቡቕን ክቡርን ነገራት ኢዩ ዘመልክት። (ዘጸኣት 25:11፣ ምሳሌ 25:11፣ ኢሳይያስ 60:6, 17) ሓዳስ የሩሳሌም ብምልእታ ከምኡውን እቲ ሰፊሕ ኣደባባያ ብ“ጽሩይ ወርቂ ኸም ጽሩይ መረጼን” እተነድቀ ኢዩ: እዚ ኸኣ ውኖኻ ዝምስጥ ጽባቐን ክቡር ዋጋን ከም ዘለዎ ዘመልክት ኢዩ።

12. (ሀ) ናይታ ኸተማ መሰረታት ብ12 ክቡር እምኒ እተሰለሙ ምዃኖም: (ለ) ናይታ ኸተማ ደጌታት ሉል ምዃኖም: እንታይ ኢዩ ዘመልክት፧

¹² ናይታ ኸተማ መሰረታትውን ከይተረፈ ብ12 ክቡራት ኣእማን እተሰለሙ ብምዃኖም ጽቡቓት ኢዮም። እዚ ድማ ነቲ ኣብ ግዜ በዓላት: እዚ ኣብዚ ተገሊጹ ዘሎ 12 እተፈላለየ ክቡር ኣእማን ዝጠበቖ ኤፎድ ዝኽደን ዝነበረ ናይ ጥንታውያን ኣይሁድ ሊቀ ኻህናት የዘኻኽረና። (ዘጸኣት 28:15-21) ብርግጽ እዚ ናይ ኣጋጣሚ ጉዳይ ኣይኰነን! ኣብ ክንድኡስ ናይታ የሱስ እቲ ዝዓበየ ሊቀ ኻህናት ‘መብራህታ’ ዝዀነ ሓዳስ የሩሳሌም ክህነታዊ ዕዮ ኣጕሊሑ ዘርኢ ኢዩ። (ራእይ 20:6፣ 21:23፣ እብራውያን 8:1) እቲ ካብ ናይ የሱስ ኣገልግሎት ሊቀ ኻህናት ዝርከብ ረብሓታት እውን ብሓዳስ የሩሳሌም ኣቢሉ ኢዩ ናብ ወድሰብ ዝመሓላለፍ። (ራእይ 22:1, 2) እቶም 12 ደጌታት: ነፍሲ ወከፎም ዓቢ ጽባቐ ዘለዎ ሉል ብምዃኖም ነቲ የሱስ ንመንግስቲ ኣምላኽ ምስ ሓንቲ ክቡር ዝዋግኣ ዕንቊ ከመሳስላ ኸሎ ዝሃቦ ምሳሌ የዘኻኽረና። ኵሎም እቶም በቲ ደጌታት እቲ ዝኣትዉ ንመንፈሳዊ ነገር ናይ ሓቂ ሞሳ ዘርኣዩ ሰባት ኢዮም።—ማቴዎስ 13:45, 46፣ ምስ እዮብ 28:12, 17, 18 ኣረኣእዮ።