17. (ሀ) ሓደ ካብቶም 24 ሽማግለታት እንታይ ሕቶ ኢዩ ዘልዓለ: እቲ ሽማግለ ነቲ መልሲ ክሕብር ምኽኣሉኸ እንታይ የመልክት፧ (ለ) ሕቶ ናይቲ ሽማግለ እተመለሰ መዓስ ኢዩ፧

¹⁷ ካብ ግዜ ሃዋርያ ዮሃንስ ጀሚርካ ክሳዕ መዓልቲ ጐይታ እቶም ቅቡኣት ክርስትያናት ብዛዕባ መንነት ናይቶም ዓቢ ጭፍራ ተደናጊሮም ኢዮም። ሓደ ካብቶም ድሮ ኣብ ሰማይ ንዘለዉ ቅቡኣት ዘመልክቱ 24 ሽማግለታት: ነዚ ዝምልከት ሕቶ ብምሕታቱ ነቲ ናይ ዮሃንስ ሓሳባት ከለዓዕሎ ግቡእ ኢዩ። “ካብቶም ሽማግሌታት ሓደ ድማ: እዞም ጻዕዳ ኽዳውንቲ እተኸድኑስ እንታዎት ኢዮም፧ ካበይከ መጹ፧ ኢሉ መለሰለይ። ኣነውን: ጐይታይ: ንስኻ ትፈልጥ: በልኩዎ።” (ራእይ 7:13, 14ሀ) እወ: እቲ ሽማግለ መልሲ ረኺቡ ንዮሃንስውን ክነግሮ ይኽእል ነይሩ ኢዩ። እዚ ኸኣ ሎሚ እቶም ዝተንስኡ ጕጅለ ናይቶም 24 ሽማግለታት: መለኮታዊ ሓቂ ኣብ ምንጋር ክካፈሉ ከም ዝኽእሉ ይሕብር። እቶም ኣብ ምድሪ ዘለዉ ክፍሊ ዮሃንስ ብወገኖም የሆዋ ኣብ ማእከሎም ዝገብሮ ዝነበረ ኣጸቢቖም ብምዕዛብ መንነት ናይቶም ዓቢ ጭፍራ ፈለጥዎ። ኣብቲ የሆዋ ዝመደቦ ግዜ: እቶም ክፍሊ ዮሃንስ ነቲ ብ1935 ኣብ ቲኦክራሲያዊ ግዝኣት እተራእየ ድሙቕ ነጸብራቕ ናይ መለኮታዊ ብርሃን ክግንዘብዎ ቅልጡፋት ኢዮም ነይሮም።

22. ዮሃንስ ብዛዕባ እቶም ዓቢ ጭፍራ እንታይ ተወሳኺ ሓበሬታ ኢዩ ዝረኸበ፧

²² ዮሃንስ በቲ መለኮታዊ መትረብ ኣቢሉ ብዛዕባ እዞም ዓቢ ጭፍራ እዚኣቶም ተወሳኺ ሓበሬታ ይረክብ:- “ንሱ [እቲ ሽማግለ] ኸኣ፣ እዚኣቶም ካብቲ ብርቱዕ [“ዓቢ:” NW] ጸበባ ዝመጹ እዮም: ንኽዳውንቶም ከኣ ብደም እቲ ገንሸል ሐጺቦም ኣጻዕደዉ: ስለዚ ኣብ ቅድሚ እቲ ዝፋን ኣምላኽ እዮም: ኣብታ መቕደሱውን ለይትን መዓልትን የገልግልዎ አለዉ። እቲ ኣብቲ ዝፋን ተቐሚጡ ዘሎ ኸኣ ንድንኳኑ ኣብ ልዕሊኦም ኪተኽሎ እዩ።”—ራእይ 7:14ሀ, 15

23. እቶም ዓቢ ጭፍራ ‘ዝመጽሉ’ ዓቢ ጸበባ እንታይ ኢዩ፧

²³ የሱስ ኣቐድም ኣቢሉ ኣብ ሓደ ኣጋጣሚ እቲ ብኽብሪ መንግስቱ ዝህልወሉ ግዜ ኣብ ዝለዓለ ደረጃ ክበጽሕ ከሎ “መከራ [“ዓቢ ጸበባ:” NW] ኪኸውን እዩ: ከምኡ ዝበለ ኻብ መጀመርታ ዓለም ክሳዕ ሎሚ ዘይኰነ: ከቶ ድማ ዘይከውን” ነገራት ከም ዝህሉ ተዛረበ። (ማቴዎስ 24:21, 22) ንመፈጸምታ ናይዚ ትንቢት እዚ: እቶም መላእኽቲ ነዚ ሕጂ ዘሎ ናይ ሰይጣን ዓለም ኣገባብ ንምድምሳስ: ነቶም ኣርባዕተ ንፋሳት ምድሪ ክፍንውዎም ኢዮም። ብመጀመርታ እትጠፍእ እታ ናይ ዓለም ሃጸይ ናይ ሓሶት ሃይማኖት ዝዀነት ዓባይ ባቢሎን ኢያ። እቲ ዓቢ ጸበባ ኣብ ዝለዓለ ጫፍ ምስ በጽሐ የሱስ ነቶም ኣብ ምድሪ ዘለዉ ተረፍ ናይ 144,000 ከምኡውን ነቶም ኣዝዮም ብዙሓት ዓቢ ጭፍራ ብሓደ ከድሕኖም ኢዩ።—ራእይ 7:1፣ 18:2

24. ካብቲ ዓቢ ጭፍራ ዝዀኑ ውልቀ-ሰባት ብኸመይ ኢዮም ንድሕነት ዝበቕዑ፧

²⁴ ካብቲ ዓቢ ጭፍራ ዝዀኑ ወልቀ-ሰባት ብኸመይ ኢዮም ንድሕነት ዝበቕዑ፧ እቲ ሽማግለ “ንኽዳውንቶም ከኣ ብደም እቲ ገንሸል ሐጺቦም ኣጻዕደዉ” ብምባል ንዮሃንስ ነገሮ። ብኻልእ ኣዘራርባ: የሱስ መድሓኒኦም ከም ዝዀነ እምነት ኣርእዮም: ህይወቶም ንየሆዋ ወፍዮም: ወፈይኦም ድማ ብማይ ጥምቀት ኣርእዮም: በቲ ቅኑዕ ጠባዮምውን ‘ሰናይ ሕልና ይህልዎም’ ማለት ኢዩ። (1 ጴጥሮስ 3:16, 21፣ ማቴዎስ 20:28) በዚ ኸኣ ኣብ ቅድሚ የሆዋ ጽፉፋትን ጻድቃንን ኢዮም። ንገዛእ ርእሶም ከኣ ‘ካብ ርኽሰት ዓለም ይሕልውዋ።’—ያእቆብ 1:27