ወርቃዊት ሕጊ እንታይ እያ፧

“ወርቃዊት ሕጊ” እትብል ቃል ኣብ መጽሓፍ ቅዱስ ኣይትርከብን እያ። እንተዀነ ግና፡ ብዙሓት ሰባት ነዛ መግለጺት እዚኣ፡ ነቲ የሱስ ኣብ ህይወትና ኽንስዕቦ ዝሃበና መምርሒ ንምምልካት ይጥቀሙላ እዮም። የሱስ ኣብቲ ኣብ ከረን ዝሃቦ ስብከት፡ “ከምቲ ሰባት ኪገብሩልኩም እትደልይዎ ዘበለ ዅሉ፡ ንስኻትኩም እውን ከምኡ ግበሩሎም” ኢሉ ነይሩ እዩ።—ማቴዎስ 7:12፣ ሉቃስ 6:31።

• ወርቃዊት ሕጊ እንታይ ማለት እያ፧

• ወርቃዊት ሕጊ ጠቓሚት ዝዀነት ስለምንታይ እያ፧

• ወርቃዊት ሕጊ ኣብ ‘ግበረለይ ክገብረልካ’ ዘተኰረት ድያ፧

• ንወርቃዊት ሕጊ ብኸመይ ክትትግብራ ትኽእል፧

ወርቃዊት ሕጊ፡ ከምቲ ሰባት ንዓና ኺገብሩልና እንደልዮ፡ ንሕና እውን ንሰባት ከምኡ ኽንገብረሎም ተተባብዓና እያ። ንኣብነት፡ መብዛሕትና ኻልኦት ኬኽብሩና፡ ኪልውሁልና፡ ኬፍቅሩና ንደሊ ኢና። ስለዚ እምብኣር፡ ንሕና እውን ‘ከምኡ ኽንገብረሎም’ ኣሎና።—ሉቃስ 6:31።

ወርቃዊት ሕጊ ዳርጋ ኣብ ኵሉ ዅነታት ትዓዪ እያ። ንኣብነት . . .

• ንሓዳር ተደልድሎ።—ኤፌሶን 5:28, 33።

• ንወለዲ ውሉዳት ኣብ ምዕባይ መምርሒ ትህቦም።—ኤፌሶን 6:4።

• ኣብ መንጎ ኣዕሩኽን ጐረባብትን መሳርሕትን ጽቡቕ ርክብ ከም ዚህሉ ትገብር።—ምሳሌ 3:27, 28፣ ቈሎሴ 3:13።

ወርቃዊት ሕጊ ነቲ ብልምዲ ብሉይ ኪዳን ተባሂሉ ኣብ ዚፍለጥ ክፋል መጽሓፍ ቅዱስ ዘሎ ሓሳባት እውን ተንጸባርቕ እያ። እዚ፡ “ኦሪትን [እተን ናይ መጀመርታ ሓሙሽተ መጻሓፍቲ መጽሓፍ ቅዱስ] ነብያትን [መጻሓፍቲ ነብያት]” እዩ ዜመልክት። (ማቴዎስ 7:12፡ ትርጉም 1956) ብኻልእ ኣበሃህላ፡ ወርቃዊት ሕጊ ነቲ ኣብ ብሉይ ኪዳን ዚርከብ፡ ‘ንብጻይካ ኣፍቅሮ’ ዚብል መሰረታዊ ሓቂ ዚሓቍፍ እዩ።—ሮሜ 13:8-10።

ኣይፋልን። ኣብ ክንዳኡስ፡ ወርቃዊት ሕጊ ኣብ ምሃብ እያ እተተኵር። የሱስ ብዛዕባ እዛ ሕጊ እዚኣ ኺጠቅስ ከሎ፡ ነቲ ንሰባት ብሓፈሻ ኽንገብረሎም ዘሎና ነገር ጥራይ ዘይኰነስ፡ ብዛዕባ እቲ ንጸላእትና ኽንገብረሎም ዘሎና ነገር እውን እዩ ዚዛረብ ነይሩ። (ሉቃስ 6:27-31, 35) እወ፡ ወርቃዊት ሕጊ ንዅሎም ሰባት ጽቡቕ ነገር ክንገብር እያ እተተባብዕ።

1. 1. ኣስተብሃሊ ኹን። ነቶም ኣብ ከባቢኻ ዘለዉ ኣስተብህለሎም። ንኣብነት፡ ሓደ ሰብ ኣስቤዛ ምስካም ከቢድዎ ትርኢ ትኸውን፡ ወይ ጐረቤትካ ሓሚሙ ሆስፒታል ከም ዝኣተወ ትሰምዕ ትኸውን፡ ወይ ከኣ መሳርሕትኻ ጕህዩ ትርኢ ትኸውን። ‘ንጥቕሚ ኻልኦት ትጥምት’ እንተ ዄንካ፡ ዜተባብዕ ቃላት ከተውስእ ወይ ብተግባር ኽትሕግዝ ክትድረኽ ኢኻ።—ፊልጲ 2:4።

2. 2. ደንጋጺ ኹን። ንርእስኻ ኣብ ቦታ ኻልኦት ጌርካ ሕሰብ። ተመሳሳሊ ዅነታት እንተ ዜጋጥመካ፡ ከመይ ምተሰምዓካ፧ (ሮሜ 12:15) ንስምዒት ካልኦት ትርድኣሎም እንተ ዄንካ፡ ክትሕግዞም ክትድረኽ ኢኻ።

3. 3. ተዓጻጻፊ ኹን። ነፍሲ ወከፍ ሰብ እተፈልየ ምዃኑ ኣይትረስዕ። ከመይሲ፡ እቲ ኻልኦት ኪግበረሎም ዚደልይዎ ነገር፡ ምስቲ ንስኻ ኪግበረልካ እትደልዮ ነገር፡ ሕደ ከይከውን ይኽእል እዩ። ስለዚ፡ ካብቲ ነቲ ሰብ ክትገብረሉ እትኽእል ነገራት፡ ነቲ ዝያዳ ዜሐጕሶ ነገር ሕረ።—1 ቈረንቶስ 10:24።