Aerenakaa
26 Agripa kaa a Paulu ér: “I na u ian, ôr ase kwagh wou.” Paulu maa kende uwegh sha gba ôron kwagh sha u palegh iyol, a kaa ér:
2 “Tor Agripa, doom kpishi er i lu sha ishigh you m lu palegh iyol sha akaa a Mbayuda ve yerem ijir sha mi la cii nyian yô, 3 man ka er u fe aeren a Mbayuda kua anyimanakaa a ve la cii tsema tsema la je i doom yum ye. Nahan yô, m ngu zamber a we mer wa ishima, kegh ato a mo.
4 “Jighilii yô, akaa a yange m lu iyev je m hii u eren hen atô u ior av* kua ken Yerusalem la, Mbayuda kpishi fa a tsembelee, 5 ve mba ve vande fan mo la cii, aluer ve soo yô, vea er shiada er yange m lu ken annongo u a eren asenge sha kwagh u atindi a kwaghaôndo wase ga la yô; m lu Orfarishi. 6 Kpa ka sha kwagh u ityendezwa i Aôndo yange er a uter asev, i m lu veren ishima keghen la, i lu ôron mo ijir ye; 7 ka ityendezwa shon ne i môm uipyaven asev mba 12 mbara ve lu veren ishima keghen ér i kure, sha u eren un icighantom kpoghuloo, tugh man atetan ye. Ka sha kwagh u ishimaverenkeghen ne Mbayuda ve yerem ijir ye, Tor.
8 “Er nan ve i taver ne u nan jighjigh ner Aôndo nderen ior shin kuu? 9 Mo iyol yam kpa yange m na jighjigh mer gba u me hendan a Yesu, Ornasareti la sha igbenda kpishi. 10 Man lu kwagh u m er ken Yerusalem vough je ne; m wuhe uicighanmbaiorov kpishi ken purusu, gadia m tôô tahav hen upristi mba tamen; yange a gba u a wua ve kpa, m lumun mer i wua ve. 11 M lu eren ve ican ken ushinagoge hanma shighe cii sha u me nôngo yô, ve̱ nyiman jighjigh ve u nan; man shi er ishima vihim a ve je pev yô, m tôv ve a ican zan zan m yem ken agar a icaa je kpaa.
12 “Shighe u m lu eren kwagh ne la, m tôô tahav hen upristi mba tamen, m lu zan ken Damaseku, 13 ka va kom er iyange sha tembe nahan yô, Tor, m nenge iwanger due sha aôndo wanger je hemba iwanger i iyange, sen kasem kua mba ve lu zan a mo imôngo la. 14 Nahan se cii se gba inya, maa m ungwa i ôr kwagh a mo ken zwa Heberu, ér: ‘Saulu, Saulu, er nan u tôvon mo a icana? Aluer u zer hendan a or u a ker gbough ku horon zwa* yô, a yina u ga.’ 15 M gema m pine mer: ‘Ka we ana, Terem?’ Ter kaa a mo ér: ‘Ka mo Yesu, u ú lu tôvon mo a ican ne. 16 Kpa mough tile sha. M ande hen a we ka sha u me tsua u lu ortom man orshiada sha akaa a u nenge, kua sha akaa a me va tese u sha kwagh wam yô. 17 Shi me yima u sha ikyev i nongoior ne man sha ikyev i akuraior agen, a m lu tindin we hen a ve 18 mer bugh ve ashe sha u duen a ve ken ime van a ve ken iwanger, shi duen a ve sha ikyev i tahav mbu Satan kera van a ve hen Aôndo la, sha er a de ve asorabo shi a na ve dyako vea mba i tsegh ve sha jighjigh u ve nem la imôngo yô.’
19 “Sha nahan yô, Tor Agripa, m hemba mpase u sha mnenge u due sha aôndo la ato ga, 20 kpa m hii ôron loho ne hen mba ken Damaseku, maa m ôr hen mba ken Yerusalem man tar u Yudia cii, kua hen akuraior agen kpaa, mer gba u vea gema ishima vea hide hen Aôndo sha u eren ityom i tesen ér ve gema ishima. 21 Ka ityôkyaa i Mbayuda yange ve kôrom ken tempel ér vea wuam je ne. 22 Nahan kpa, er m zough a iwasen hen Aôndo yô, m ngu eren shiada hen mbagbanjime man uityaghermbaiorov cii zan zan nyian, ôron kwagh ugen ga, saa kwagh u Uprofeti man Mose ve nger ér gba u una er ne— 23 ér yange gba u Kristu una ya ican shi una lu or u hiihii u a nder nan shin ku yô, shi una pase nongoior ne kua akuraior agen loho, shi una na vea nenge a iwanger.”
24 Paulu lu ôron akaa ne sha u palegh iyol, lu zan a mi ave, maa Fesetu ôr genger genger ér: “U ngu hunden, Paulu! Takeda u u hen kpishi ne na u ihyundugh!” 25 Kpa Paulu kaa ér: “M ngu hunden ga, Orcivirigh Fesetu; akaa a m lu ôron ne ka a mimi, shi m ngu ôron a sha inja je. 26 Jighilii yô, tor u m lu ôron kwagh a na gbar gbar ne fa akaa ne tsembelee; m na jighjigh mer kwagh môm u a fe sha akaa ne ga yô, ngu ga, gadia ma kwagh ken akaa ne er ken hua ga. 27 Tor Agripa, u na Uprofeti jighjigh kpa? M fa u na jighjigh.” 28 Kpa Agripa kaa a Paulu ér: “Ken atô u anshighe u kpuaa ne nahan u ngu nôngon wer u gemam m hingir Orkristu.” 29 Ôron nahan yô, Paulu kaa ér: “A̱ lu ken atô u anshighe kpuaa shin shighe gôgônan kpa, Aôndo ma a ne ma i lu we tseegh ga, kpa ma a ne hanma or u nan lu ungwan kwaghôron wam nyian ne cii ma nan hingir er mo nahan, a ikyangenev mbi ken purusu mbin shio.”
30 Tsô tor mough, gomna kpa mough kua Benisi man ior mba ve tema vea ve la. 31 Kpa mba ngur yemen yô, ve gba ôron kwagh ayol a ve, kaan ér: “Or ne ngu eren kwagh môm u tesen ér a kuma ku shin purusu ga.” 32 Nahan Agripa kaa a Fesetu ér: “Luun er or ne kaa ér una yem a ijir ne hen Shisar ga yô, ma i pase un.”