Luka

11 Shighe ugen la Yesu lu eren msen hen ijiir igen, va kur yô, orhenen na ugen kaa a na ér: “Tere, tese se u eren msen, er Yohane kpa yange tese mbahenen nav nahan.”

2 Tsô a kaa a ve ér: “Nea eren msen yô, kaa nen ner: ‘Tere, i tsegha iti you.* Tartor wou u̱ va. 3 Hanma iyange yô, na se kwaghyan u se ya a kuma se yô. 4 Shi de se asorabo ase er se kpa ka se de hanma or u nan lu se a injô yô. Shi de deen wer imeen i hemba se ga.’”

5 Maa a kaa a ve ér: “Aluer orgen ken a ven nan ngu a ijende, nahan nan za hen a nan ken atôutu nan za kaa a nan ér, ‘Ijende yam, nam ikpenberedi itiar, 6 sha ci u ijende yam igen due zende va nyôr hen a mo hegen, man m ngu a kwagh môm u nan un ga.’ 7 Kpa ngula kaa ken iyou ér: ‘De u zan mo iyol. I senda hunda hegen, shi ônov av mba kiriki mba yaven vea mo sha gambe. Nahan me fatyô u moughon sha nan we kwagh ga.’ 8 Me kaa ne, aluer a mough sha a na un kwagh sha ci u ka ijende na yum ga je kpa, er a gbe uwer ga yô, ka keng una mough a na un nyityôkwagh i i gbe un cii. 9 Yô me kaa ne, sônon nen her, nahan a na ne. Keren nen her, nahan ne zua a mi. Manden nen uwegh her, nahan a bugh ne. 10 Gadia hanma or u nan sônon yô, mba ne nan, shi hanma or u nan keren yô, nan zough a mi, shi hanma or u nan manden uwegh kpaa, a bugh nan. 11 Man yô, ka ter u han ken a ven wan u nan una sôn nan ishu ve, nana gema a na un iyô, a lu ishu ga ase? 12 Shin aluer a sôn nan ijikyegh yô, nana gema a na un iyesee? 13 Nahan, aluer ne mba ne lu mbaasorabo ne je kpa ne fa u nan ônov enev uiyua mba dedoo yô, Ter u sha la je yô una hemba nan mba ve sônon un icighan jijingi la cii!”

14 Shighe kar yô, a zenda jijingi u bo ken orgen, u jijingi shon kondo un ikyer yô. Jijingi la dugh yô, orkondonikyer la maa lam, nahan kpiligh ikpelaior iyol. 15 Kpa mbagenev ker kaa ér: “Ka a zenda azôv ken ior kera sha tahav mbu Belesebul,* tor u azôv.” 16 Mbagenev di soo u karen un, nahan ve gba kaan ér a er ivande ken iti i Aôndo vea nenge. 17 Yesu fe mbamhen vev mban yô, a kaa a ve ér: “Hanma tartor u u pav sha ihyom cii yô, ua gba, shi hanma ya u a pav ker sha ihyom yô, una gba. 18 Nahan aluer Satan kpa pav iyol na ker sha ihyom yô, a er nan je ve tartor na ua gba ga? Gadia ne mba kaan ner ka sha tahav mbu Belesebul m zendan azôv ken ior kera ye. 19 Man aluer ka sha tahav mbu Belesebul m zendan azôv ken ior kera yô, ônov enev di mba zendan a sha tahav mbu ana? Ka sha ityôkyaa ne je ônov enev vea va ôr ne ijir ye. 20 Kpa aluer ka sha ihyôwe i Aôndo* m zendan azôv ken ior kera yô, mimi je, Tartor u Aôndo kar ne je ve. 21 Or u taver iyol ka nana̱ kuran ya u nan a ikyav mbi utyaav yoholoo yô, akaa a nan a lu her. 22 Kpa or u hemban nan agee ka nana̱ va ta num sha a nan, nana̱ hemba nan yô, nan ngohol nan ikyav mbi utyaav mbi nan suur sha mi la cii, shi nan kar kwar sha akaa a nan ngohol her a nan la. 23 Or u nan lu ken nongo wam ga yô, nan ngu hendan a mo, shi or u nan wasen mo u kohol ga yô, nan ngu saren a sar.

24 “Jijingi u bo* ka una due ken or kera yô, a yem ken ikyôngo, ape mngerem ma lu ga yô, a za ker ijiir i memen, kpa una zuan a mi ga yô, a kaa ér, ‘Me hide me yem ken iyou yam i yange m due ker la.’ 25 Una va sôôn yô, i ese iyou shon wang, i er a i ker doo doo. 26 Maa a yem a za kua a ujijingi mbagenev utaankaruhar mba ve we ifer i hembe un yô, a va a mi. Vea va nyôron ken or la yô, ve tema ken a nan. Nahan mlu u or la u masetyô a hemba vihin a u hiihii la.”

27 Er lu ôron akaa ne la, kwase ugen ken ikpelaior genger imo kaa a na ér: “Saan kwase u a mar u shi a koso u sha atumba a na la iyol!” 28 Kpa a kaa ér: “Ei, jighilii yô, saan mba ve ungwan mkaanem ma Aôndo shi ve eren sha mi la iyol!”

29 Ikpelaior ngur va kohol her kpishi yô, a gba kaan ér: “Kov ne ka kov u ifer; u zer keren ivande, kpa a tese ú ivande igen ga, saa ivande i Yona la tseegh. 30 Er kwagh u Yona yange hingir ivande hen Mbaninive nahan, kape kwagh u Wan u or kpaa una lu ivande hen kov ne je la. 31 A nder torkwase u ken imbusutariyan shin ku sha shighe u ijirôron la vea ior mba ken kov ne kpa una na ve ibo. Sha ci u yange mough ken ikighir i tar je va u va ungwan kwaghfan u Solomon. Kpa nenge ase, or u a hembe Solomon ngun heen ne. 32 Ior i Ninive ia nder shin ku sha shighe u ijirôron la vea kov ne kpa vea na u ibo. Sha ci u yange ve gema ishima sha loho u Yona pase ve la. Kpa nenge ase, or u a hembe Yona ngun heen ne. 33 Or ka nana tsar imenger yô, nan za veren i ken iuv shin nan za we shin ikyese* ga, kpa ka nan penda i̱ sha tebul,* sha er ior vea nyôr ken iyou shon vea nenge a iwanger yô. 34 Ka ishe i lu imenger i iyol you ye. Ishe you ka ia lu jighilii* yô, iyol you kpa i wanger.* Kpa ka ia kenger akaa wue wue* yô, iyol you kpa i wa ime. 35 Sha nahan yô, wa ikyo sha er iwanger i i lu ken a we la ia lu ime ga yô. 36 Yô, aluer iyol you cii ngi a iwanger, ime ngi mape môm ga yô, i cii ia wanger er imenger ka ia ta iwanger ve i lu u nahan.”

37 Er kwagh ne been yô, Orfarishi ugen lôhô un iwer. Maa a nyôr a gba za yan kwagh sha tebul. 38 Nahan kpa kpiligh Orfarishi la iyol er a ee ave* ga tsô maa a gbe mi yan kwagh yô. 39 Kpa Ter kaa a na ér: “Ne Mbafarishi, ne mba er kôôpu shin gbande u i kire un ken won, kpa a lu kimi côu côu nahan. Ken atô yô, ne iv a hua man ifer. 40 Ne bume tsôô! Ka un u a er kimi la shi a er ken won kpaa ye gaa? 41 Kpa shighe u ne lu nan mbaibanave uiyua yô, na nen a ishima i môm, nahan hanma kwagh wen cii una lu wang. 42 Kpa kwagh a tser ne Mbafarishi, sha ci u ka ne na môm-ken-pue u kunguraku man rue* kua hanma ikyaiue igen cii, kpa u ôron ijir sha mimi shi tesen ner Aôndo doo ne ishima la yô, kwagh gba ne sha mi ga! Gba u ne eren akaa la, kpa ka u ne gema ne undu a a hembe lun hange hange ne ga. 43 Kwagh a tser ne Mbafarishi, sha ci u ka ne soo u teman sha mkônom ma sha hemen* ken ushinagoge, shi ne soo ner i̱ sughun ne sha icivir ken igbar!* 44 Kwagh a tser ne, sha ci u ne mba er iwar i i nengen a i ga,* i ior ka ve zende ve kar sha mi kpa ve fa ga la nahan!”

45 Tsô orgen ken mba fan Atindi tsema tsema gema kaa a na ér: “Ortesen, u ngu ôron akaa ne nahan lahan se kpaa.” 46 Maa a gema a kaa a na ér: “Kwagh a tser ne, ne mba fan Atindi tsema tsema kpaa, sha ci u ka ne wa ior ikyav mbi gande ve u tôôn, kpa ne ayol a en yô, ne mba benden ihyôwe yen i môm sha ikyav mbi shon ga!

47 “Kwagh a tser ne, sha ci u ka ne maa iwar i uprofeti, kpa lu uter enev mba tsev wua ve ye! 48 Ne fa akaa a uter enev mba tsev er la dedoo, nahan kpa ne lumun a. Yange ve wua uprofeti, kpa ne mba maan ve iwar. 49 Sha ci u kwagh ne yô, Aôndo shi ôr sha kwaghfan na la* ér: ‘Me tindi uprofeti man mbaapostoli hen a ve, vea wua mbagenev ken a ve, vea tôv mbagenev a ican, 50 sha er a va ôr kov ne ijir sha kwagh u* awambe a uprofeti cii, a i hee inya, hii shighe u i lu gban tar la je; 51 a hii sha awambe a Abel zan zan a ar sha awambe a Sekaria, u i wua un hen atô u atse a nan nagh man icighanjiir la.’ Mimi je me kaa ne, a ôr kov ne ijir sha kwagh ne.*

52 “Kwagh a tser ne mba fan Atindi tsema tsema, sha ci u ne tôô kii i bughun ior hunda u zuan a mfe sha kwagh u Aôndo la kera. Ne ayol a en ne nyôr hen u ga, shi ne yange mba ma ve nyer la kpaa!”

53 Moughon hen ijiir la kera yô, mbangerenatindi man Mbafarishi hingir a na cam ci cam, shi ve lu pinen un mbampin mbagenev kpishi. 54 Ve lu keren ér a ôr kwagh u vea kôr un a ikyaa zwa yô.