Mbafilipi

4 Nahan yô, ne anmgbianev av mba ne doom ishima shi i sarem a ven tsung, ne ne m lu ember shi ne lum er ka iyua nahan la, tile nen dông ken Ter, er m vande ôron ne nahan, ne mba doon mo ishima.

2 M ngu kaan a Yuodia shi m ngu kaan a Suntuki mer, ve̱ lu a mhen môm ken Ter. 3 We ortom u mimi u u eren tom a mo imôngo kpaa, m ngu kaan a we mer wasen kasev mba ve er tom u pasen loho u dedoo kpoghuloo vea mo ikyooso ikyooso mban, ve kua Kelementi man mbagenev mba ve eren tom a mo imôngo cii, mba ati a ve a lu ken takeda u uma la.

4 Ember nen ken Ter hanma shighe cii. Shi me kaa mer, Ember nen! 5 Na nen ior cii ve nenge er ne lu mba norom sha kwagh ga yô. Ter zurum. 6 Ishima i̱ de nyian ne sha ma kwagh ga, kpa ken hanma mlu cii, pasen nen Aôndo akaa a a gbe ne la ken mbamsen mba zamber man mbamsen mba sughun un; 7 nahan bem u Aôndo u a hembe hanma mkav la una kura asema a en kua mbamhen enev ken Kristu Yesu.

8 U masen yô, anmgbianev, za nen hemen u henen* sha akaa a a lu a mimi cii, man akaa a a lu a hange hange cii, man akaa a a lu a vough cii, man akaa a a lu a wang cii, man akaa a van a dooshima cii, man akaa a i lu wuese a cii, man akaa a a lu a dedoo cii, kua akaa a a kom iwuese cii. 9 Akaa a ne hen shi ne ngohol shi ne ongo hen a mo, man a ne nenge m er la cii, eren nen a, nahan Aôndo u bem una lu a ven.

10 Saan mo iyol kpishi ken Ter er hegen ne hide ne hii u tesen gbashima sha kwagh wam nahan. Yange kwagh wam gba ne ishima ase je, kpa ne zua a ian i tesen gbashima la ga. 11 M ngu ôron kwagh ne ka sha ci u kwagh banem yum ga, gadia m hen u eren kwagh sha gbenda u kwagh u m lu a mi la una kumam yô, ken hanma mlu u m nyer ker cii. 12 M fa er me er zum u m lu a akaa kpuaa, man er me er zum u m lu a mi kpishi yô. Sha hanma gbenda man ken hanma mlu cii, m fa kwagh u ior kpishi ve fe ga ne: M fa er me er zum u m ide, man er me er zum u m lu ijen yô; m fa er me er zum u m lu a kwagh kpishi, man er me er zum u m lu a kwagh ga yô. 13 Ka sha ikyev i un u a nan mo tahav la m zough a agee a eren akaa cii ye.

14 Nahan kpa, ne er doo kpishi er ne wasem ken atsan a am yô. 15 Jighilii yô, ne Mbafilipi, fa nen kpaa ner, zum u ne hii ungwan loho u dedoo, shighe u m mough ken Masedonia m va la, tiônnongo ugen môm nam iwasen shin ngohol iwasen hen a mo ga, saa ne tseegh; 16 gadia shighe u m lu ken Tesalonika la, ne tindim a kwagh sha ci u gbayol wam, lu kwa môm tseegh ga, kpa lu kwa har. 17 U ngu wer m ngu keren mer i nam iyua ga, kpa m soo mer ume nen ityamegh ki kia seer van ne a mtsera yô. 18 Nahan kpa, m ngu a hanma kwagh u kwagh a gbem a mi cii, je neer a neer. Er Epafroditu a va nem kwagh u ne tindi la hegen yô, akaa a m lu a mi la kumam gbing; iyua yen la ngi er kwagh u human doon, nagh ku i lumun ku, ku doo Aôndo tsung nahan. 19 Nahan Aôndo wam u a lu a akaa a icivirigh kpishi la di una gema a na ne akaa a kwagh a gbe ne a mi la cii, sha ikyev i Yesu Kristu. 20 Yô, i̱ wuese Aôndo Ter wase gbem sha won. Amen.

21 Sugh nen hanma icighanor ken Kristu Yesu sha ci wam. Anmgbianev mba ve lu vea mo mban mba sughun ne. 22 Uicighanmbaiorov cii, kpa hemban je yô mba ve lu hen ya u Shisar la, mba sughun ne.

23 Ter Yesu Kristu a̱ za hemen u tesen ne erdoo u sha mhôôn sha gbashima u ne lu tesen la.