Yohane

11 Tsô orgen gba angev, iti na ér Lasaru; lu or u hen Betani, angar u Maria man anmgbian na u kwase Marta lu her la. 2 Ka Maria u yange va haa Ter mkurem ma human doon shin angahar shi uma un angahar sha ice na la; lu un anmgbian na Lasaru gba angev ye. 3 Nahan anmgbianev nav mba kasev mban tindi loho hen Yesu ér: “Tere, u a doo u ishima la gba angev.” 4 Kpa Yesu ongo nahan yô, a kaa ér: “Angev mbun mbua za a na ken ku ga, kpa mbua va Aôndo a icivir, sha er a na Wan u or icivir sha kwagh u mbu yô.”

5 Marta man anmgbian na u kwase kua Lasaru yange ve doo Yesu ishima. 6 Er Yesu ungwa ér Lasaru gba angev nahan kpa, hide lu hen ijiir la ayange ahar. 7 Tsô a kaa a mbahenen nav ér: “Shi se za nen ken Yudia.” 8 Mbahenen nav kaa a na ér: “Rabi, semberee ne, ior mba ken Yudia nôngo u tan we awen, nahan kpa shi u za kere?” 9 Yesu gema kaa ér: “Iyange ka i due i kuma ahwa 12 cii ve i mire gaa? Aluer or ngu zenden atetan yô, nana ta nguhar ken ma kwagh ga, sha ci u nan ngu nengen a iwanger i tar ne. 10 Kpa aluer or ngu zenden tugh yô, nana ta nguhar kera, sha ci u nan ngu a iwanger i nengen kera ga.”

11 Ôron akaa ne cii yô, shi a kaa ér: “Ijende yase Lasaru ngu yaven, kpa m ngu zan me za nder un.” 12 Nahan mbahenen kaa a na ér: “Tere, una lu yaven yô, angev nav mbua bee.” 13 Nahan kpa, lu ku na Yesu lu ôron ye. Kpa ve tôô ér ngu yaven memen di tsô. 14 Yesu maa ôr ve wang ér: “Lasaru kpe, 15 kpa saan mo iyol sha ci wen, er yange m lu her ga yô, sha er ne na jighjigh yô. Kpa se za nen ape a lu la.” 16 Nahan Toma, u i yilan ér Ahina* la, kaa a mbahenen mbagenev mbara ér: “Se kpa se za nen, nahan a lu ku kpa se za kpe a na imôngo.”

17 Yesu va nyer yô, a kav er i ii Lasaru a tse shin uwar ayange anyiin yô. 18 Betani lu ikyua a Yerusalem kuma er umai uhar* nahan. 19 Mbayuda kpishi va hen Marta man Maria u va surun ve ishima sha ku u anmgbian ve. 20 Marta ongo ér Yesu ngu van yô, a due a za u za keghen un gbenda; kpa Maria gema tema hen ya her. 21 Nahan Marta kaa a Yesu ér: “Tere, yange wea lu heen yô, anmgbian wam ma a kpe ga. 22 Hegen je kpa m fa hanma kwagh u u sen Aôndo cii yô, Aôndo una na u.” 23 Yesu kaa a na ér: “Anmgbian wou una nder.” 24 Marta gema kaa a na ér: “M fa una nder sha shighe u a va nder ior shin ku sha iyange i masetyô la.” 25 Yesu kaa a na ér: “Mo m ngu mnder u shin ku man uma.* Hanma or u nan nem jighjigh yô, nana̱ kpe je kpaa, nana va hide a lu uma; 26 shi hanma or u nan lu uma man nan nem jighjigh yô, nana kpe mayange ga. U na kwagh ne jighjigh kpa?” 27 A kaa a na ér: “Een, Tere, m na jighjigh mer u ngu Kristu, Wan u Aôndo, u a lu van shin tar la.” 28 Marta kaan nahan yô, a due a za yila Maria, anmgbian na u kwase la, a ôr a na ken to ér: “Ortesen va nyôr; ngu pinen we.” 29 Ongo nahan yô, a mough fese a gba zan pe lu la.

30 Yesu lu a va nyôr hen angar la ga, lu hen ijiir i Marta za kohol un la her. 31 Mbayuda mba ve lu vea Maria, ve lu surun un ishima la, mba nengen er a mough fese a lu duen ken won yô, ve dondo un ijime, ve lu henen ér ngu zan hen uwar una za vaa. 32 Tsô Maria va nyôr pe Yesu lu la; nengen a na yô, a gba hen angahar a na, a kaa ér: “Tere, yange wea lu heen yô, anmgbian wam ma a kpe ga.” 33 Tsô er Yesu nenge lu vaan shi Mbayuda mba ve lu vea na la kpa lu vaan yô, sôô un ken ishima shi vihi un kpaa. 34 A pine ér: “Ka han ne ver unu?” Ve kaa a na ér: “Tere, va nenge.” 35 Yesu haa mliam ashe. 36 Tsô Mbayuda mba ve lu her la gba kaan ér: “Nenge imba la, a doo un ishima je zua ga!” 37 Kpa mbagenev ken a ve kaa ér: “Or u yange bugh orapirashe ashe ne, a kera fatyô u yangen ku u or ne gaa?”

38 Tsô shi sôô Yesu ken ishima, maa a va hen uwar la. Lu bar, i cir iwen sha mi. 39 Yesu kaa ér: “Tôô nen iwen ne sha.” Marta, anmgbian u or u kpe la, kaa a na ér: “Tere, una huma hegen, gadia ka ayange anyiin je ne.” 40 Yesu kaa a na ér: “M vande ôron we je mer aluer u na jighjigh yô, u nenge a mhembe u* Aôndo gaa?” 41 Tsô ve tôô iwen la sha. Yesu maa kende ashe sha, kaa ér: “Tere, m sugh u er u ongom yô. 42 Kera kpa m vande fan er u ungwan mo hanma shighe yô; kpa m ngu ôron nahan sha ci u ikpelaior i i kasem ne, sha er vea fa er i lu we u tindim yô.” 43 Ôron akaa ne cii yô, a ôr genger genger ér: “Lasaru, due ken won!” 44 Tsô or u kpe la due, a atsar a ikyondo a i kpelegh un shin angahar man sha ave la, shi i kange un ishigh sha ikyondo. Yesu kaa a ve ér: “Sagh un nen a yem.”

45 Nahan Mbayuda kpishi mba ve va hen Maria la mba nengen kwagh u er la yô, ve na Yesu jighjigh, 46 kpa mbagenev ken ve yem hen Mbafarishi za ôr ve kwagh u Yesu er la. 47 Nahan upristi mba tamen man Mbafarishi yila mkohol u Sanhederin,* ve kaa ér: “Ngun nahan se er nena? Gadia or ne ngu eren uivande kpishi. 48 Aluer se de un ngu eren akaa ne yô, ior cii vea na un jighjigh, nahan Mbaroma vea va ngohol se ijiir* kua tar.” 49 Kpa Kayafa, u lu môm ken ve shi lu pristi u vesen ken inyom shon la, kaa a ve ér: “Ne fa kwagh môm ga. 50 Aluer or môm kpe sha ci u ior yô, a hemba wasen ne, a u ikyurior jimin cii i tim la, kpa ne nenge a kwagh la ga.” 51 Nahan kpa, a ôr kwagh ne lu sha mnenge na ga, kpa er lu pristi u vesen ken inyom la yô, a ôr lu kwaghôron u profeti u tesen ér lu u Yesu una kpe sha ci u ikyurior la, 52 man a lu sha ci u ikyurior la tseegh ga, kpa una kohol ônov mba Aôndo mba i sambe ve wue wue la vea hingir nongo môm. 53 Nahan hii sha iyange la je, ve gba kôson ku na.

54 Nahan Yesu kera zende ken igbar hen Mbayuda ga, kpa a mough her a yem hen haregh ugen ikyua a taaikyôngo, a za lu vea mbahenen nav hen gar ugen, i yilan ér Eferaim. 55 Iniongo i Paseka i Mbayuda la va zurum yô, ior kpishi due ken agar yem ken Yerusalem cii man Paseka ye, sha u za wanger ayol a ve, er tindi tese nahan. 56 Ve lu keren Yesu, nahan ve va tile ken tempel, ve lu pinen ayol a ve ér: “Ne nenge nena? Una va iniongo ne gaa?” 57 Kpa upristi mba tamen man Mbafarishi vande nan zwa ér aluer or fa pe Yesu a lu yô, nana ôr, sha er vea kôr un yô.