Mateu

10 Tsô a yila mbahenen nav 12, a na ve tahav mbu zendan ujijingi mba bov* ken ior kera shi been hanma inja i uange man hanma inja i mkpeyolga* cii.

2 Ka ati a mbaapostoli* mba 12 mbara je ne: Shimon, u i yilan un ér Peteru la, man anmgbian na Anderia; Yakobu man anmgbian na Yohane, ônov mba Sebedeu; 3 Filibu man Batolomiu; Toma man Mateu, u lu orngoholkpandegh la; Yakobu wan u Alefeu; man Tadeu 4 man Shimon, u i yilan ér ortseenshima la; man Yuda Isekarioti, u va nenge un mker la.

5 Yesu tindi mba 12 mban, shi ôr ve akaa a vea er yô, a kaa ér: “De kahan zaan nen ken akuraior agen ga, shi de nyer nen ken ma gar u Mbasamaria kpaa ga. 6 Kpa zaan nen hen iyôngo i ken ya u Iserael, i i saa la. 7 Nea zaan yô, pasen nen ve kwagh kaan nen ner: ‘Tartor u sha zurum.’ 8 Bee nen ior angev, nder nen mbakpenev shi wanger nen mbaamandev shi zenda nen azôv ken ior kera. Ne ngohol gbilin, nahan na nen gbilin. 9 De tôôn nen zanaria shin azurfa shin togula ken akpa a inyar* a en ga. 10 Shi de tôôn nen ikpa i wan kwaghyan sha ci u zende ne ga, shin akondo ahar* shin akôv* shin gbough kpaa ga, gadia ortom kuma u a na nan kwaghyan u nan.

11 “Hanma gar u vesen shin gar u kiriki u ne za nyôr her yô, ker nen or her u nan kom u ngohol ne kua loho wen yô, shi lu nen her zan zan ne kar moughon. 12 Nea nyôr hen ya yô, sugh nen mba hen ya la kaa nen ner, ‘Bem a lu sha ya ne.’ 13 Aluer ya la kuma u ngohol ne kua loho wen yô, bem la a lu sha ya la. Kpa aluer ya la kuma u ngohol ne kua loho wen ga yô, bem la a hide sha a ven. 14 Aluer or môm ngohol ne shin kegh ato a loho wen ga, man ne mba duen hen ya la shin ken gar la kera yô, kure nen ihyundu i shin angahar a en. 15 Mimi je me kaa ne, sha Iyange i Ijirigh la, kwagh u gar la una hemba vihin a tar u Sodom man Gomora.

16 “Nenge, m ngu tindin ne ne za lu er iyôngo hen atô u ugbaseela nahan. Yô, lu nen sulaa er iyô nahan, kpa gema lu nen wang er mkungum nahan. 17 Wa nen ikyo, sha ci u ior vea za a ven hen mbaatejir* vev, vea gbidye ne ken ushinagoge vev. 18 Shi a za a ven sha ishigh ki ugomna man utor sha ikyaa yam, sha u i lu shiada hen a ve man hen akuraior. 19 Kpa zum u ve ze a ven yô, ishima i de nyian ne sha kwagh u ne ôr man er ne ôr kwagh shon la ga. Gadia hen shighe* la je, a na ne kwagh u ne ôr yô. 20 Sha ci u ka ne ne lamen ga, kpa ka sha iwasen i jijingi u Ter wen u a lu sha la ne lamen ye. 21 Heela tseegh ga, or nana na anmgbian u nan ér i wua, ter kpaa nana na wan u nan, shi mbayev vea mough num a mbamaren vev, vea na a wua ve. 22 Shi ior cii vea kôr ne ihyom sha ci u iti yam, kpa or u nan* taver ishima zan zan mkur la a yima nan. 23 Zum u vea tôvon ne a ican hen ma gar yô, yevese yem nen hen ugen. Mimi je me kaa ne, ne lu a zende sha agar a Iserael ne tser ga je tsô Wan u or una va.

24 “Orhenen nan hembe ortesen u nan ga, shi kpan kpaa nan hembe orvesen u nan ga. 25 Á er a orhenen vough er ortesen u nan nahan, shi kpan kpaa á er a nan er orvesen u nan nahan. Aluer orvesen u nan lu ityough sha ya je kpa ior mba yilan nan ér Belesebul yô, hide mba hen ya u nan ve a yila ve nahan ga yee? 26 Nahan de cian nen ve ga, sha ci u ma kwagh u i yer, u a va pase un ken igbar ga je kpa ngu ga. Shi kwaghmyer môm u a va fa un ga je kpa ngu ga. 27 Kwagh u m ôr ne ken ime yô, gema ôr nen ken iwanger, shi kwagh u m ôr ne ivarvase yô, gema pase nen sha ityouv mbi iyoughouv je. 28 Shi de cian nen mba ka ve wua iyol tseegh, kpa uma yô ve fetyô u wuan ga la ze. Kpa cia nen un u una fatyô u timin uma kua iyol cii ken Gehena* la. 29 Ka i tee mbaatsator uhar sha an-inyar u cuku* gaa? Nahan kpa mô ve môm una gba hen inya a mfe u Ter wen u sha la shio ga. 30 Shi ice yen i sha ityou je kpa a fa iyenge i i cii. 31 Nahan de cian nen ga; ne gba kwagh hemba mbaatsator imôngo.

32 “Sha nahan yô, hanma or u nan pasen kwagh wam sha ishigh ki iorough yô, mo kpa me pase kwagh u nan sha ishigh ki Terem u a lu sha la. 33 Kpa or u nan vendam sha ishigh ki iorough yô, mo di kpa me venda nan sha ishigh ki Terem u a lu sha la. 34 De henen nen ner m va ka sha u me va na bem a lu shin tar ga; m va ka u nan bem ga, kpa ka sanker. 35 Gadia m va ka sha u nan mpav hen atô u or a ter u nan, man wan u kwase kpaa a ngô u nan, kua kwase a ngô u nom u nan. 36 Jighilii yô, mba hen ya u or vea gema a lu mbahyomov mba nan. 37 Or u ter u nan shin ngô u nan a hembe doon nan ishima a mo yô, nan kuma u lun orhenen wam ga; shi or u wan u nan u nomso shin u kwase a hembe doon nan ishima a mo yô, nan kuma u lun orhenen wam ga. 38 Shi or u nan lumun u tôôn kon* u nan dondon sha a mo ga cii, nan kuma u lun orhenen wam ga. 39 Or u nan keren ér nana war uma u nan yô, una de a saa nan, kpa or u uma u nan a saa nan sha ci wam yô, nana gema a zua a mi.

40 “Or u nan ngohol ne yô, mo kpa nan ngohol. Man or u nan ngohol mo yô, nan ngohol Un u a tindim la kpaa. 41 Or u nan ngohol ma profeti sha ci u ka profeti yô, nana zua a injar i profeti, shi or u nan ngohol orperapera sha ci u ka orperapera yô, nana zua a injar i orperapera. 42 Shi or u nan ne môm ken mba gban ijime mban kôôpu u mngerem ma ndôhôr môm tseegh ér nana ma, sha ci u ka orhenen wam yô, mimi je me kaa ne, nana zua a injar i nan kpee, a bunde ga.”