Ipaan Ka Iyua I Hemban Cii I Aôndo A Ne Se Yô

1, 2. (a) Ka nyi ka i na ve iyua i gba u kwagha? (b) Ipaan ka iyua i hemban cii i Aôndo a ne uumace yô, sha ci u nyi?

KEN uiyua mba u zough a mi cii, ka i han i hembe doon we? Saa iyua ia taver ishe ve ia gba u kwagh ga. Or ka nana er u iyua sha kwagh u doon we shin sha kwagh u kwagh a vande gban we a mi yô, u tese wer iyua la i gba u kwagh.

² Ken uiyua mba Aôndo a ne se cii, iyua ngi ker i môm i i hembe gban se kwagh cii yô. Ka iyua i hemban cii i Aôndo a ne uumace yô. Ken ityough kin ne, se nenge er Yehova yange tindi Wan na Yesu Kristu sha u se̱ zua a uma u tsôron yô. (Ôr Mateu 20:28.) Er Yehova yange tindi Yesu shin tar va kpe sha u paan se yô, tese ér mimi je se doo un ishima.

 3. Er nan ve uumace ve lu kpene?

³ Ipaan ka kwagh u Yehova a ne sha u paan uumace sha ikyev i isholibo man ku kera yô. (Mbaefese 1:7) Cii man se fa er i hii ve yange gba u a paa se yô, saa se fa kwagh u yange za hemen ken sule u Eden anyom udubu imôngo ken ijime la. Mbamaren asev mba hiihii, Adam man Ifa, yange ve er isholibo. Nahan ve kpe sha ci u isholibo i ve er la. Se kpa se mba kpen sha ci u se ya dyako u isholibo i Adam man Ifa la.—Nenge Ngeren u Seer Tan Iwanger u sha 9, peeji 210.

 4. Adam lu nyi oro, man lu a uma u nyi?

⁴ Shighe u Yehova gba Adam, or u hiihii la, a na un kwagh u doon tsung je. Yange na Adam uma u vough. Lu a mhen u vough, shi lu a mshi sha iyol na ga. Lu u mayange una gba angev ga, shi lu u una bee iyol shin una kpe kpaa ga. Er lu Yehova gba Adam yô, Yehova hingir er ka ter na nahan. (Luka 3:38) Yehova yange lamen vea na hanma shighe cii. Yange pase Adam kwagh u soo ér a er la wang, shi na un tom u dedoo.—Genese 1:28-30; 2:16, 17.

 5. Kwagh u Bibilo i kaa ér Aôndo yange gba Adam sha “inja i mlu Na” la, inja na ér nyi?

⁵ Aôndo yange gba Adam sha “inja i mlu Na.” (Genese 1:27) Yehova yange gba un ér a lu a aeren a wen Yehova kpa un lu a mi la, er dooshima man mfe man mimi kua agee nahan. Yange na Adam ian i tsuan kwagh u a soo la. Adam lu atoki ga. Aôndo yange gba un sha gbenda u una fatyô u tsuan kwagh u dedoo shin u bo yô. Adam yange una ongo imo i Aôndo yô, ma a lu uma ken Paradiso gbem sha won.

 6. Adam yange hemba Aôndo ato nahan, lu nyi i saa unu? Man kwagh ne bende a vese nena?

⁶ Adam yange hembe Aôndo ato yô, Aôndo kaa ér Adam una kpe, kwagh ne lu injar i vesen kpishi je Adam kimbi ye. Isholibo i Adam er la na yô, mlu na vea Yehova vihi, shi uma na u vough man ya na u ken paradiso la cii saa. (Genese 3:17-19) Adam man ifa yange ve tsua u hemban Aôndo ato, nahan ve kera lu a ishimaverenkeghen sha kwagh môm môm ga. Kwagh u Adam er ne na yô, “isholibo nyôr shin tar sha or môm, man ku gema va sha ci u isholibo . . . , nahan ku va sha ior cii sha ci u ve cii ve er isholibo yô.” (Mbaromanu 5:12) Er Adam gba ken kwaghbo yô, kwagh ne tese ér a tee iyol na kua se, isholibo man ku yam. (Mbaromanu 7:14) Nahan se mba a ishimaverenkeghen jee? Een se mba a mi.

7, 8. Ipaan ka nyi?

⁷ Ipaan ka nyi? Ipaan ngi a akaa ker ahar. Hiihii yô, ipaan ka injar i or ka nan kimbi sha u paan or u nan, shin hiden a kwagh u i ker nan kwar sha mi yô. Sha uhar yô, ipaan ka ishe inyar i or ka nan kimbi sha kwagh u nan vihi yô.

⁸ Orumace môm nana fatyô u kimbin kwagh u vesen u Adam yange vihi shighe u hemba ato ve va a ku sha a vese la ga. Kpa Yehova ker gbenda u pasen se sha ikyev i isholibo man ku tuhwan. De se nenge er ipaan ne ia er kwagh ne la, man er kwagh ne una wase se la kpaa.

 9. Yange gba u a paa se nena?

⁹ Mô wase môm kpa nana fatyô u kimbin injar i paan uma u vough u Adam yange ta kera la ga. Sha ci u nyi? Sha ci u se cii se mba uumace mba vough ga. (Pasalmi 49:7, 8) Yange gba u a paa se sha uma ugen u a lu u vough yô. Lu u ipaan la ia lu kwaghmôm a uma u Adam ta kera la.

10. Yehova yange paa se nena?

¹⁰ Yehova yange paa se nena? Yehova yange tindi wan na u a hembe doon un ishima cii la shin tar. Wan ne lu Yesu. Lu un Yehova hii gban ken akaa a a gbe la cii ye. (1 Yohane 4:9, 10) Yesu yange kegh iyol u undun Ter na kua ya na u sha la van shin tar. (Mbafilipi 2:7) Yehova yange tindi Yesu shin tar, i va mar un lu orumace u vough, u lun a isholibo shio.—Luka 1:35.

11. Or môm tseegh yange nan fatyô u paan uumace jimin cii nena?

¹¹ Adam, orumace u hiihii la yange ta uma u vough u lu u uumace cii vea va lu a mi la kera, shighe u hemba Yehova ato la. Orgen lu u nana fatyô u karen a ku sha ityough ki ônov mba Adam cii kera kpa? Een. (Ôr Mbaromanu 5:19.) Yesu, u mayange je er isholibo ga la, paa uumace sha uma na u vough la. (1 Mbakorinte 15:45) Lu u a fatyô u karen a ku sha ityough ki ônov mba Adam cii kera sha uma na u vough la.—1 Mbakorinte 15:21, 22.

12. Er nan ve yange gba u Yesu una ya ican yum nahana?

¹² Bibilo pase ican i Yesu yange ya cii mase kpen la. Yange i gbidye un coholoo shi i mande un sha kon, nyoon un gbem cii mase kpen ye. (Yohane 19:1, 16-18, 30) Er nan ve gba u Yesu una ya ican yum nahana? Lu sha ci u Satan kaa ér orumace môm nana fatyô u civir Aôndo sha mimi shighe u ican i tser nan tsung ga. Nahan Yesu tese wang ér orumace u vough nana fatyô u civir Aôndo sha mimi shighe u nan lu yan ican tsung je kpaa. Yehova yange una ta ave vanger a Yesu kpen kpen!—Anzaakaa 27:11; nenge Ngeren u Seer Tan Iwanger u sha 15 , peeji 213.

13. Yange i kimbi injar i paan se la nena?

¹³ Yange i kimbi injar i paan se la nena? Ken uwer u Mbayuda u i yer ér Nisan la, ayange a u 14, ken inyom i 33 la, Yehova de mbaihyomov wua Yesu. (Mbaheberu 10:10) Ayange nga kar atar yô, Yehova nder Yesu shin ku, kpa kera lu ken iyol i orumace ga, lu or u ken jijingi. Yesu hidi yemen sha hen Ter na yô, Aôndo za lumun nagh ku Yesu na sha uma na sha u paan uumace sha ikyev i isholibo man ku kera la. (Mbaheberu 9:24) Er i ne ipaan ne yô, hegen a fatyô u yiman se sha ikyev i isholibo man ku.—Ôr Mbaromanu 3:23, 24

14, 15. Ka nyi i gbe kpee u se er ve a de se asorabo?

¹⁴ Se hii u zuan a mtsera ken iyua i Aôndo i hemban cii ne kera kpaa. De se nenge er se lu zuan a mtsera hegen la, man er se va zua a mi ken hemen la kpaa.

¹⁵ I de se asorabo ase. Ka i taver u eren kwagh u shami hanma shighe. Se mba eren akaabo, ashighe agen ka se ôr kwagh shin se er kwagh shami ga. (Mbakolose 1:13, 14) Se er nan ve a de se asorabo ase? Gba u se vaa afanyô sha kwagh u se er shami ga la sha mimi, shi se hide a iyol ijime se zamber Yehova ser a de se kwaghbo. Ka hen shighe ne se fatyô u lun a vangertiôr ser Yehova de se asorabo ase ye.—1 Yohane 1:8, 9.

16. Ka nyi i gbe kpee u se er ve se lu a imoshima i wangna?

¹⁶ Se fatyô u lun a imoshima i wang. Aluer imoshima yase ngi ôron a vese ér se er kwagh u shami ga yô, ishima ia na se ibo, shi alaghga iyol ia kpe se shi se nenge ser se gba kwagh ga je kpaa. Kpa ityôkyaa ngi i se gba uwer ga. Aluer se zamber a Yehova ser a de se kwaghbo yô, se fatyô u lun a vangertiôr ser una ungwa shi una de se kpaa. (Mbaheberu 9:13, 14) Yehova soo ér se ôron un mbamzeyol man mbamyen asev cii. (Mbaheberu 4:14-16) Kwagh ne una na se lu ken bem vea Aôndo.

17. Er Yesu a kpe sha ci wase yô, ka averen a nyi se fatyô u zuan a mini?

¹⁷ Se mba a ishimaverenkeghen i va lun uma gbem sha won. “Injar i isholibo i kimbin yô, ka ku, kpa iyua i sha mlumun u sha mhôôn u Aôndo yô, ka uma u tsôron ken Kristu Yesu Ter wase.” (Mbaromanu 6:23) Er Yesu a kpe sha ci wase yô, se fatyô u va lun uma gbem sha won shi lun gbong gbong kpaa. (Mpase 21:3, 4) Ka nyi i gbe u se er ve se zua a averen nee?

18. Er nan se fe ser se doo Yehova ishima?

¹⁸ Hen er or ka nana er u iyua sha kwagh u doon we ve i kôr u ken ishima yum yô. Ipaan ka iyua i hemban doon cii, nahan gba u se wuese Yehova tsung sha iyua ne. Yohane 3:16 kaa a vese ér: “Tar ne doo Aôndo ishima je, nahan A na Wan Na u môm môm la.” Sha kpôô yô, se doo Yehova ishima je a na se Yesu, Wan na u ishima ishima la. Shi se fa, Yesu kpa se doo un ishima, sha ci u yange kegh iyol u va kpen sha ci wase. (Yohane 15:13) Fa wer iyua i ipaan ne tese ér mimi je u doo Yehova man Yesu ishima.—Mbagalatia 2:20.

19, 20. (a) U er nan ve u ya ijende a Yehova? (b) U tese wer nagh ku ipaan ku Yesu kura gba u kwagh nena?

¹⁹ Er u fe wer u doo Aôndo ishima tsung nahan, u er nan ve u ya ijende a naa? Ka i taver u yan ijende a or u ú fe nan ga yô. Yohane 17:3 kaa ér se fatyô u fan Yehova. U fa un yô, una seer doon we ishima, shi a hemba saren we u eren kwagh u doon un, nahan u hingir ijende na. Sha nahan yô, za hemen u henen kwagh u Yehova ken Bibilo.—1 Yohane 5:3.

²⁰ Tese wer nagh ku ipaan ku Yesu kura gba u kwagh. Bibilo kaa ér “u nan ne Wan jighjigh yô, nan ngu a uma u tsôron.” (Yohane 3:36) Inja i u nan jighjigh la ér nyi? Inja na yô, ka u eren kwagh u Yesu yange tese ér se eren la. (Yohane 13:15) Se fatyô u gban kaan tsô ser se na Yesu jighjigh ga. A gba u se tese jighjigh u nan wase la sha aeren, ka nahan ve se tese ser nagh ku ipaan kura gba se kwagh ye. I ôr ken Yakobu 2:26 ér: ‘Jighjigh u nan u lun a aeren ga ngu kpenegh.’

21, 22. (a) Gba u se zaan Mkombo u Umbur Ku u Yesu la hanma inyom sha ci u nyi? (b) Ka nyi se lu timen sha mi ken Ityough ki sha 6 man 7?

²¹ Zaan mkombo u umbur ku u Kristu la. Hen tugh mbu kpernan i wua Yesu la, a tese se ér se umbur ku na. Se mba eren mkombo u umbur ku na ne kwa môm ken hanma inyom. Mba yer mkombo ne ér Mkombo u Umbur Ku u Yesu shin “kwaghyan u umbur Ter.” (1 Mbakorinte 11:20; Mateu 26:26-28) Yesu soo ér se umbur er yange un na uma na u vough la hingir ipaan sha ci wase yô. A kaa ér: “Eren nen kwagh ne sha u umbur Mo.” (Ôr Luka 22:19.) Aluer u ngu zan Mkombo u Umbur Ku u Yesu la yô, u lu tesen wer nagh ku ipaan kura gba u kwagh, shi u umbur er se doo Yehova man Yesu ishima tsung yô.—Nenge Ngeren u Seer Tan Iwanger u sha 16, peeji 214.

²² Ipaan ka iyua i hemban cii i se zough a mi yô. (2 Mbakorinte 9:14, 15) Ior umiliôn imôngo mba ve vande kpen kera la je kpa vea fatyô u zuan a mtsera ken iyua i doon tsung ne. Se va time ken Ityough ki sha 6 man 7 tsô se nenge er kwagh a fatyô u lun nahan yô.