Mga Mensahero ng Kapayapaan sa Silangang Europa

NAKARIRINIG ang bingi! Ang mga bilanggo ay nakalaya! Halos wala nang ginagawa ang mga pulis! Ano ba ang ating pinag-uusapan? Tinutukoy natin kung ano ang naganap sa kamakailang internasyonal na kombensiyon ng mga Saksi ni Jehova na ginanap sa Silangang Europa noong Hulyo at Agosto nang nakaraang taon.

“Mga Mensahero ng Maka-Diyos na Kapayapaan” ang tema ng programa, at nakita ng maraming tao na sa kabila ng pagsulsol sa gulo dahil sa panunulsol ng mga klero sa Romania,a totoong taglay ng mga Saksi ni Jehova ang kapayapaan mula sa pagkaalam tungkol sa Diyos at kay Kristo Jesus.​—Isaias 26:2, 3; Filipos 4:7.

Ang mga kombensiyon ay ginanap sa Prague, Czech Republic; Budapest, Hungary; Warsaw at Lodz, Poland; Tallinn, Estonia; at Brasov at Cluj-Napoca, Romania.

Ang mga delegado mula sa maraming banyagang lugar ay dumalo sa mga kombensiyong ito at nagbigay ng tunay na internasyonal na kapaligiran sa okasyong ito. Sa Prague ay nagkaroon ng malalaking grupo mula sa Alemanya, Hapon, Poland, at sa Estados Unidos. Isang ulat mula sa opisina ng sangay ng Watch Tower Society sa Czech ang nagsabi: “Kami’y talagang napatibay-loob ng napakaraming nag-iingat ng katapatan na mga mananamba ng Diyos na Jehova mula sa ibang bansa. Halimbawa, karamihan sa mga delegado mula sa Hapon ay mga payunir, at ang kanilang masinop na pananamit at kaayusan ang kitang-kitang nagpaganda sa kanilang seksiyon sa istadyum. Napansin din namin ang pagiging masigla ng mga delegadong Polako, ang mapagpasalamat na saloobin ng mga kapatid sa Slovakia, ang pagkabukas-palad ng mga Aleman, at ang pagiging mapagmahal ng mga Amerikano. Silang lahat ay nagbigay ng aral sa amin.”

Paano naapektuhan ng kombensiyong ito ang bagong mga kaugnay? Isang 85-taóng-gulang na iskolar, manunulat, at dalubhasa sa wika ang dumalo, sa kabila na siya’y may diyabetis at may kapansanan sa binti. Siya’y nag-aaral ng Bibliya sa tulong ng aklat na Kaalaman sa loob ng mga anim na buwan. Noong panahon ng programa, siya’y nagtutuon ng pansin, hindi sa wika at balarila ng mga pahayag, kundi sa ibang bagay. “Napakahusay nito!” ang bulalas niya. “Ang pag-ibig at konsiderasyon na nasa gitna ninyo ang higit na nangungusap kaysa mga salita.”​—Juan 13:34, 35; 1 Corinto 13:1-8.

Ang mga banyagang panauhin sa Prague ay nasiyahan sa pamamasyal sa makasaysayang mga lugar at nagbigay ng di-pormal na patotoo sa bawat pagkakataon. Sa isang kastilyo sa timog ng Prague, isang Amerikanang Saksi, asawa ng isang abogado, ay naghihintay sa tore ng kastilyo upang mamigay ng mga tract sa wikang Czech sa lahat ng pumapanhik. Ang iba naman ay namigay ng mga tract nang masalubong nila ang mga estudyanteng batang babae na bumibisita sa matandang sementeryo ng mga Judio. At, mangyari pa, lahat ng propesyonal na giya ng mga turista at mga tsuper ng bus ay nakatanggap ng literatura.​—1 Pedro 3:15.

Isang giya ng mga turista na nagpahayag ng pagpapahalaga sa mga Saksi at sa kanilang paggawi ang sumulat: “Wala pa ako kailanmang nakilala sa buong buhay ko na napakaraming tao na lubos na palakaibigan at mapagmahal. Bagaman ako’y isang Katoliko, humanga ako sa inyong espirituwal na saloobin. Lahat kayo’y nagbigay sa akin ng pag-asa na may maganda pang kinabukasan ang daigdig. Hayaan ninyong pasalamatan ko kayo dahil sa inyong kabaitan. Pagpalain nawa kayo ng Diyos!”

Bagaman napakalakas ng ulan noong Biyernes sa Prague, pami-pamilya ang naupo sa labas ng istadyum, na kumukuha ng espirituwal na pagkain na ipinahahayag ng lokal at banyagang mga tagapagsalita. Napakaraming sanggol ang naroroon anupat upang maiwasan ang mga aksidente sa daanan, isang pantanging paradahan para sa stroller, o de-tulak na lalagyan ng mga sanggol, ang itinayo sa labas ng istadyum.

Ang kombensiyon sa Prague ay dinaluhan ng mahigit na 22,000, at 432 bagong nag-alay na mga Saksi ang nabautismuhan, kasali na ang dalawang tao na nasa silyang de-gulong gayundin ang lima pang may kapansanan.

“Nakarinig” ang Bingi sa Budapest

Matatagpuan sa ibayo ng Danube River ang magandang lunsod ng Budapest, na naging lunsod na nag-asikaso sa internasyonal na kombensiyon noong Hulyo. Ang pinakamataas na bilang ng dumalo ay 23,893, kasali na ang 3,341 delegado mula sa 11 bansa maliban pa sa Hungary.

Sa isang tolda na malapit sa entablado, ang buong programa ay ininterprete para sa mga bingi, na may halos 100 ang dumalo. Sa pahayag ng pagtanggap sa lahat ng delegado na ginagamit ang ibang wika maliban sa Hungaryo, ang mga bingi ay nagkaroon ng pantanging pagtanggap, na may mga pananalitang: “Ang isang wika na hindi natin ibig malimutang banggitin kung saan maiinterprete ang buong programa ay ang sign language. Nagagalak tayong makasama ang mga may kapansanan sa pandinig.”

Pagbabahagi ng Katotohanan sa Iba

Inilabas sa mga kombensiyong ito ang bagong literatura sa Bibliya, kasali na ang aklat na Ang Lihim ng Kaligayahan sa Pamilya. Pagkatapos na matanggap ang publikasyong ito, isang grupo ng Pranses na mga delegado ang sumakay ng bus at bumalik sa kanilang otel. Sa daan ay nakakita sila ng bagong kasal kasama ng kanilang mga panauhin. Nakiusap ang mga kapatid na ihinto ng tsuper ang bus. Isa sa mga Saksi ang lumabas at iniabot sa mag-asawa ang bagong aklat sa wikang Hungaryo. Pinasalamatan nila ito at agad na sinuri ang aklat. Marahil ay isa iyan sa unang mga kopya na naipasakamay pagkatapos na ilabas ito!

Mula sa Katoliko Tungo sa Komunista at sa Pagiging Saksi

Ang 510 nabautismuhan sa kombensiyong ito ay kumatawan sa mahigit na 2 porsiyento ng mga dumalo. Tatlo sa bagong mga Saksi na ito ay nasa bilangguan pa, na nakapiit dahil sa mga krimen na kanilang nagawa bago nila natutuhan ang katotohanan ng Bibliya. Ang mga kapatid doon ay laging dumadalaw at nagdaraos ng pag-aaral sa Bibliya sa iba. Sa isang bilangguan sa Budapest, halos 50 pag-aaral sa Bibliya ang isinasagawa sa mga bilanggo.

Isang lalaki na pinalaki sa paaralang Katolikong Benedictine ang nawalan ng pananampalataya sa Simbahang Katoliko at, sa edad na 20, ay naging miyembro ng Partidong Komunista. Sa kalaunan, siya’y sumali sa hukbo at tumaas ang kaniyang ranggo sa pagiging tenyente. Bilang isang miyembro ng Workers’ Militia, itinuro niya ang Marxismo-Leninismo sa pamantasan. Siya’y naintriga sa sawikain ng Komunismo na “kalayaan, kapatiran, pagkakapantay-pantay.” Gayunman, ang maling paggamit ng mga nasa kapangyarihan sa sawikain na “pamahalaan ng mga tao” ang nagpangyaring mag-alinlangan siya sa Komunismo. Sa palagay niya’y may bagay na kulang. Sa wakas, siya’y nagretiro. Nang kumatok ang mga Saksi sa kaniyang pinto, handa na siyang makinig. Ang sabi niya: “Sa unang pagpunta ko sa Kingdom Hall, nakumbinsi ako na sa wakas ito ang tunay na kapatiran. Ako’y napuspos ng pag-ibig mula sa tunay na mga tagasunod ni Kristo. Ang pagbabago ko mula sa Komunista tungo sa pagiging Saksi ay tumagal nang apat na taon. Subalit pinili ko ang katotohanan.” Siya’y nabautismuhan sa kombensiyon.

Para sa mga pulis, ang pagtatrabaho sa kombensiyon ay karaniwang isang bagong kalagayan. Isang pulis na inatasan sa pasukan ng istadyum ang nagsabi na ang pagbabantay sa mga kombensiyon ng mga Saksi ay napakahirap. Bakit? Sapagkat ang lahat ay napakaayos anupat nahihirapang manatiling gising ang pulis!

Mabubuting Ulat ng Pamahayagan sa Poland

Dalawang internasyonal na kombensiyon ang ginanap sa Poland, na mahigit na 20,000 ang dumalo sa Warsaw, ang kabiserang lunsod, at halos 12,000 sa Lodz, ang pangalawa sa pinakamalaking lunsod sa Poland.

Ang nangungunang pahayagan sa Warsaw, ang Życie Warszawy, ay naghatid ng ganitong balita: “ ‘May mabuting balita na ipahahayag! Ito’y balita tungkol sa kapayapaan, ang tunay na kapayapaan. Ang ating pag-ibig kay Jehova at sa ating kapuwa ang nag-uudyok sa atin na patuloy na mangaral nang walang humpay hanggang sabihin ng Diyos na tapos na ang gawain,’ ang sabi ni Carey Barber, isang miyembro ng Lupong Tagapamahala ng mga Saksi ni Jehova.”

Isang manunulat sa pahayagang Sztandar Młodych ang nagsabi: “Sa loob ng dalawang araw mga 12,000 o mahigit pang mga Saksi ni Jehova ang nagtipun-tipon sa isang relihiyosong asamblea sa Legia Stadium, sa Warsaw. May kaayaayang kaayusan ito, at kahit na nagmatyag akong mabuti, wala akong nakitang kotse ng pulis o nag-iikot na mga iskuwad.

“Ang Poland, ayon sa kanila, ay halos isang bansang Katoliko sa kabuuan. Subalit nang magtipun-tipon ang ating mga Katolikong kabataan sa istadyum ding iyon, napakaraming pulis ang laging nakabantay, nakahanda sa anumang mangyayari.

“Totoong nakababahala na ang mga tumalikod sa Katolisismo, mga sekta, o kung anuman ang tawag sa kanila [mga Saksi ni Jehova] ay nakapagtitipon sa isang malaking grupo at hindi nagdudulot ng panganib sa kaayusan at katiwasayan ng publiko, samantalang nagiging mapanganib naman ang ating mga kabataang Katoliko kapag nasa isang malaking grupo, at kailangan ang pagtatanggol ng pulisya laban sa kaguluhan ng mga kabataang ito. Maraming bagay na dapat nating pag-isipan.”

Naganap din dito ang bautismo sa bagong mga mananampalataya, na may 462 nabautismuhan sa Warsaw at 278 sa Lodz. Isa rito ang 19-na-taóng-gulang na si Sylwia, na noo’y may maling akala sa mga Saksi. Isang araw na maulan ay nilapitan siya ng isang Saksi sa daan. “Ipinagtabuyan ko siya, at umalis ako. Subalit pinasukob ko ang isang babae na nababasa ng ulan. Siya pala ay isa ring Saksi! Nag-alok siya na magdadala sa akin ng aklat na Ang mga Kabataan ay Nagtatanong​—Mga Sagot na Lumulutas. Bilang pagpapaunlak ay ibinigay ko ang direksiyon ng aking tirahan, at . . . nabautismuhan ako ngayong araw na ito!”

Nabigyan ng Malaking Patotoo ang Munting Estonia

Ang Estonia, Latvia, at Lithuania ang bumubuo sa mga Estado ng Baltic. Ang populasyon ng Estonia ay halos 1.5 milyon lamang, at ang kabisera ay may halos 450,000 mamamayan. Dalawang kombensiyon ang ginanap doon noong Agosto 1996.

Gayon na lamang ang epekto ng malalaking pagtitipon na ito anupat isang pahayagan ang nagsabi: “Talagang napuno ang Tallinn ng pagsamba ng mga Saksi ni Jehova. Ang kanilang kombensiyon na ginanap sa Linnahall ay sinasabing dinaluhan ng may pinakamaraming tao sa lahat ng relihiyong nagdaos kailanman sa Estonia.” Ang lahat ng otel ay napuno ng mga Saksi.

Pagkatapos, si Brother Carey Barber ay nag-ulat na ang kaniyang sabi: “Hindi nakapagtataka kung bakit gustung-gusto ng mga kapatid na taga-Finland at ng iba na naatasan sa Estonia na mapunta roon. Ang munti subalit magandang bansang ito ay sinakop at inapi ng mas malalaking bansa at ito’y nagtitiis ng matinding paghihirap. Ngayon ang mga taga-Estonia . . . ay sabik na sabik sa pagkakaroon ng namamalaging kapayapaan at katiwasayan sa hinaharap mula kay Jehova.” Mahigit na 3,100 ang aktibong Saksi sa Estonia, ang kalahati sa mga ito ay nagsasalita ng wikang Ruso.

Naglingkod ang mga kombensiyon sa mga taga-Estonia, sa mga nagsasalita ng Ruso na taga-Estonia at taga-Latvia, taga-Lithuania, at sa dumadalaw na mga delegado mula sa 15 bansa, kasali na ang 155 mula sa Britanya at 300 mula sa Finland.

“Nakarinig” Din ang mga Bingi sa Estonia

Tatlong taon na ang nakalipas isang elder na bingi mula sa Finland ang nagpunta sa Tallinn, Estonia, upang tingnan kung ano ang kaniyang magagawa para sa mga bingi sa bansang iyon. Wala siyang kilalang bingi kahit isa man doon, kaya nagpunta siya sa isang bahay-pulungan ng mga bingi sa Tallinn, na dala-dala ang talaksan ng magasing Bantayan at iba pang literatura. Malugod siyang tinanggap ng mga bingi na taga-Estonia at nag-usisa sila kung ano ang kaniyang dala. Naipasakamay niya ang lahat ng literatura sa kaniyang unang pagdalaw at isinulat niya ang mga pangalan at tirahan ng mga interesado, na lahat-lahat ay 70.

Halos lahat ay nagnanais ng isang pag-aaral sa Bibliya, at natanto ng kapatid na hindi niya kayang pagdausan ng pag-aaral ang lahat. Kaya kinailangan niyang piliin yaong mga totoong interesado lamang. Hindi nagtagal pagkatapos ng kaniyang unang pagdalaw sa Estonia, nagkaroon siya ng 30 pinagdarausan ng pag-aaral sa Bibliya at may 40 naghihintay pa na pagdausan ng pag-aaral! May apat na ngayong tagainterprete sa sign language para sa mga bingi sa Tallinn.

“Isang Bagong Kabanata sa Dula ng Bagong Tipan”

Isang Saksi ang nagtatrabaho sa himpilan ng ferry na sumasalubong sa mga delegado ng kombensiyon. Nilapitan niya ang isang giya sa paglalakbay na taga-Estonia at tinanong ito kung ano ang palagay nito sa napakalaking kombensiyon na ito. Sinabi ng giya sa kaniya na ilang grupo na ng mga Saksi ang kaniyang nasamahan mula sa iba’t ibang bansa sa Europa at napansin niya na ang mga Saksi ay laging may mabuting pag-uugali, mababait na tao. Naanyayahan na siyang magtungo sa opisina ng Watch Tower Society sa Puhangu Street, at siya’y nagulat na makita ang napakahusay na kaayusan at ang mababait at masasayang kabataan. Hindi niya maintindihan kung bakit nakakaharap ng mga Saksi ang malupit na pagsalansang at maling mga akusasyon samantalang pinatutunayan ng tunay na mga pangyayari na mali ang mga akusasyon. Aniya: “Sa aking palagay ang inyong trabaho, ang inyong paglilingkod, ay gaya ng isang bagong kabanata sa dula ng Bagong Tipan.”

Tiyak naman, bilang mga mensahero ng maka-Diyos na kapayapaan, inaasahang magtatatag ang mga Saksi ni Jehova ng mabuting reputasyon sa buong mundo dahil sa kanilang mapitagang paggawi at kabaitan sa mga estranghero. (1 Pedro 3:16) Ipinakikita ng mga kombensiyong ito sa Silangang Europa na sa kabila ng paninirang-puri at maling paratang mula sa relihiyosong mga kaaway at mga apostata, ang mga Saksi ni Jehova ay nagtataglay ng pagpapala ng Diyos samantalang kanilang ipinahahayag ang mensahe ng kapayapaan na kailangang-kailangan ng ating daigdig na ginigiyagis ng digmaan at tigib ng pagkapoot.​—Isaias 2:2-4; Marcos 13:10.

[Talababa]

[Larawan sa pahina 23]

Sa kabila ng pag-ulan, matamang nakinig sa programa ang mga pamilya

[Larawan sa pahina 24]

Masasayang Polakong Saksi na tangan ang kanilang bagong labas na mga literatura

[Larawan sa pahina 25]

Masasayang Saksi na taga-Estonia na nakasuot ng karaniwang damit na katutubo