Esekiele

23 Jehofa o ne a bua le nna gape a re: 2 “Morwa motho, go ne go na le basadi ba babedi ba e neng e le barwadi ba mosadi a le mongwe.+ 3 Ba ne ba nna bagwebakammele kwa Egepeto;+ go tloga fela ba sa le basha, ba ne ba gweba ka mmele. Mabele a bone a ne a tamolwa gone koo, e bile dihuba tsa bone tsa bokgarebane di ne tsa tshwarwatshwarwa gone koo. 4 Leina la yo mogolwane e ne e le Ohola,* mme monnawe e ne e le Oholiba.* Ba ne ba nna ba me mme ba tshola bana ba basimane le ba basetsana. Leina la ga Ohola le emela Samarea,+ mme leina la ga Oholiba le emela Jerusalema.

5 “Ohola o ne a simolola go gweba ka mmele+ a sa ntse a le mo taolong ya me. O ne a nna le keletso e kgolo ya tlhakanelodikobo mo go ba ba mo ratang thata,+ e leng baagelani ba gagwe ba Baasiria.+ 6 E ne e le babusi ba ba apereng diaparo tse di botala jwa loapi le balaodi, botlhe e le makawana a mantle a a palameng dipitse. 7 O ne a tswelela a gweba ka mmele le barwa ba bantle thata ba Asiria, mme o ne a iteswafatsa+ ka medingwana e e ferosang sebete* ya batho ba a neng a eletsa go tlhakanela dikobo le bone. 8 Ga a ka a tlogela boaka jo a neng a bo dira kwa Egepeto, ka gonne ba ne ba robala le ene a sa ntse a le mosha, mme ba ne ba tshwaratshwara sehuba sa gagwe sa bokgarebane ba bo ba tlhakanela dikobo le ene ka tsela e e sa siamang le e e sa laolesegeng.+ 9 Ka jalo, ke ne ka mo tsenya mo seatleng sa ba ba mo ratang thata, barwa ba Asiria,+ ba a neng a na le keletso e kgolo ya go tlhakanela dikobo le bone. 10 Ba ne ba mo apola gore a sale a sa apara+ ba bo ba tshwara bomorwawe le bomorwadie,+ mme ba ne ba mmolaya ka tšhaka. O ne a itsege ka boitsholo jo bo sa siamang mo basading, mme o ne a otlhaiwa.

11 “E rile monnawe e bong Oholiba a bona seo, keletso ya gagwe ya tlhakanelodikobo e ne ya nna kgolo thata, e bile boaka jwa gagwe bo ne jwa nna maswe thata go feta jwa ga mogolowe.+ 12 O ne a eletsa go tlhakanela dikobo le baagelani ba gagwe, barwa ba Asiria,+ babusi le balaodi ba ba neng ba apere diaparo tse dintlentle e bile ba palame dipitse, botlhe e le makawana a mantle. 13 Fa a ne a iteswafatsa, ke ne ka lemoga gore boobabedi ba ne ba le mo tseleng e e tshwanang.+ 14 Mme o ne a nna a oketsa ditiro tsa gagwe tsa boaka. O ne a bona banna ba gabilwe mo loboteng, ditshwantsho tsa Bakaladia di gabilwe ka pente e khibidu, 15 ba ipofile ka mabanta mo dinôkeng, ba rwele dituku tse di lepelelang mo ditlhogong, ba lebega jaaka batlhabani, botlhe fela ba ne ba emela Bababelona ba ba tsholetsweng kwa lefatsheng la Bakaladia. 16 Fela fa a ba bona, o ne a simolola go nna le keletso e kgolo ya go tlhakanela dikobo le bone, mme o ne a roma barongwa kwa go bone kwa Kaladia.+ 17 Ka jalo, barwa ba Babelona ba ne ba nna ba tla go robala le ene mo bolaong jwa gagwe, mme ba ne ba mo leswafatsa ka keletso ya bone e kgolo ya tlhakanelodikobo. Fa ba sena go mo leswafatsa, o ne a kgaogana le bone a ferogile sebete.

18 “Fa a ne a tswelela ka go dira boaka a sa kgathale e bile a ikapola,+ ke ne ka mo latlha ke ferogile sebete fela jaaka ke ne ka latlha mogolowe ke ferogile sebete.+ 19 Mme o ne a nna a oketsa ditiro tsa gagwe tsa boaka,+ a gakologelwa malatsi a fa a ne a sa le mosha fa a ne a nna seaka kwa lefatsheng la Egepeto.+ 20 O ne a na le keletso e kgolo ya go tlhakanela dikobo le dinyatsi tsa gagwe. O ne a tshwana le bagadingwana ba banna ba bone ba neng ba na le keletso e kgolo ya go tlhakanela dikobo jaaka ditonki le dipitse. 21 O ne wa tlhologelelwa boitsholo jo bo maswe thata jo o neng o bo dira fa o sa le mosha kwa Egepeto+ fa ba ne ba tshwaratshwara sehuba sa gago, e leng mabele a gago a bosha.+

22 “Ka jalo, wena Oholiba, seno ke se Morena Molaodimogolo Jehofa a se buang: ‘Jaanong ke tlhotlheletsa batho ba o neng o ba rata+ ba o kgaoganeng le bone o ferogile sebete, mme ke tla dira gore ba go tlhasele ba tswa mo dikarolong tse di farologaneng,+ 23 barwa ba Babelona+ le Bakaladia+ botlhe, banna ba Pekode+ le Shoa le Koa, mmogo le barwa botlhe ba Asiria. Botlhe fela ke makawana a mantle, babusi le balaodi, batlhabani le ba ba tlhophilweng ka kelotlhoko,* botlhe ba palame dipitse. 24 Ba tla go tlhasela ka dikara tsa ntwa tse di dirang modumo o mogolo, le ka mophato o mogolo wa masole, ba tshotse thebe e kgolo le thebe e nnye* e bile ba rwele tlhoro ya phemelo. Ba tla ema mo maemong a bone go go dikologa, mme ke tla ba naya taolo ya gore ba ntshe katlholo, mme ba tla go atlhola jaaka ba rata.+ 25 Ke tla dira gore go bonale gore ke go shakgaletse, mme ba tla go lwantsha ba galefile. Ba tla go kgaola nko le ditsebe, mme ba ba setseng mo go wena ba tla bolawa ka tšhaka. Ba tla tsaya bomorwao le bomorwadio, mme ba ba setseng mo go wena ba tla lailwa ke molelo.+ 26 Ba tla go apola diaparo+ ba bo ba tsaya dibenyane* tsa gago tse dintle.+ 27 Ke tla fedisa boitshwaro jwa gago jo bo maswe thata le boaka jwa gago,+ jo bo simologileng kwa lefatsheng la Egepeto.+ O tla kgaotsa go ba leba, e bile ga o kitla o tlhola o gakologelwa Egepeto.’

28 “Gonne seno ke se Morena Molaodimogolo Jehofa a se buang: ‘Jaanong ke tloga ke go tsenya mo seatleng sa ba o ba tlhoileng, ba o neng wa kgaogana le bone o ferogile sebete.+ 29 Ba tla go tlhoa ba bo ba tsaya se o se bereketseng ka natla+ mme ba tla go tlogela o sa apara gotlhelele. Ditiro tsa gago tse di tlhabisang ditlhong tsa fa o ne o dira boitsholo jo bo sa siamang jwa tlhakanelodikobo le boitshwaro jo bo maswe thata le boaka di tla senolwa.+ 30 O tla diragalelwa ke dilo tseno ka gonne o ne wa taboga fa morago ga ditšhaba jaaka seaka,+ ka gonne o ne wa iteswafatsa ka medingwana ya bone e e ferosang sebete.+ 31 O latetse tsela ya ga mogoloo,+ mme ke tla go naya senwelo se se tshwanang le se ke se mo neileng.’+

32 “Seno ke se Morena Molaodimogolo Jehofa a se buang:

“Gonne nna ke buile,” go bua Morena Molaodimogolo Jehofa.’

35 “Ka jalo, seno ke se Morena Molaodimogolo Jehofa a se buang: ‘E re ka o ntebetse e bile o ntlontlolotse thata,*+ o tla rwala ditlamorago tsa boitshwaro jwa gago jo bo maswe thata le tsa ditiro tsa gago tsa boaka.’”

36 Foo Jehofa o ne a nthaya a re: “Morwa motho, a o tla bolelela Ohola le Oholiba+ molaetsa wa katlholo e bile a o tla nna le bopelokgale jwa go ba bolelela ditiro tsa bone tse di ferosang sebete? 37 Ba dirile boaka,*+ e bile diatla tsa bone di tletse madi. Ga ba a dira boaka le medingwana ya bone e e ferosang sebete fela, mme gape barwa ba bone ba ba neng ba ba ntsholetse ba ne ba ba fisa mo molelong gore e nne dijo tsa medingwana ya bone.+ 38 Mo godimo ga moo, seno ke se ba se ntirileng: Ba ne ba leswafatsa lefelo la me le le boitshepo mo letsatsing leo, e bile ba ne ba dira gore bosabata ba me ba se ka ba nna boitshepo. 39 Fa ba sena go bolaya bomorwaabone ba ntshetsa medingwana ya bone e e ferosang sebete ditlhabelo ka bone,+ ba ne ba tla mo lefelong la me le le boitshepo mo go lone letsatsi leo ba tla go dira gore le se ka la nna boitshepo.+ Seo ke se ba neng ba se dira mo teng ga ntlo ya me. 40 Ba ne ba bo ba roma morongwa gore a ye go bitsa banna ba ba tswang kgakala.+ Fa ba ne ba le mo tseleng, o ne wa tlhapa, wa penta matlho a gago o bo o ikgabisa ka mekgabisa.+ 41 Mme o ne wa nna mo setulong sa maemo,+ se go neng go beilwe tafole fa pele ga sone,+ e o neng o baya maswalo+ a me le leokwane la me mo go yone.+ 42 Go ne ga utlwala modumo wa banna ba bantsintsi ba ba sa tshwenyegeng ka sepe gone koo, ba mo gare ga bone go neng go na le matagwa a a neng a tswa kwa nageng. Ba ne ba rwesa basadi maseka mo diatleng le dirwalo tse dintle mo ditlhogong.

43 “Foo ke ne ka bua jaana ka mosadi yo o neng a onaditswe ke boaka: ‘Jaanong o tla tswelela a dira boaka jwa gagwe.’ 44 Ka jalo, ba ne ba nna ba ya kwa go ene fela jaaka fa motho a ya kwa mosading yo o gwebang ka mmele. Eo ke tsela e ba neng ba ya kwa go Ohola le Oholiba ka yone, basadi ba ba dirang boitshwaro jo bo maswe thata. 45 Le fa go ntse jalo, banna ba ba siameng ba tla mo atlhola ka katlholo e e tshwanelang boaka+ le polao;+ gonne ke basadi ba ba dirang boaka, e bile diatla tsa bone di tletse madi.+

46 “Gonne seno ke se Morena Molaodimogolo Jehofa a se buang: ‘Go tla romelwa masole gore a tle go ba tlhasela gore a ba dire selo se se tshosang le sengwe sa go gapiwa.+ 47 Masole ao a tla ba konopa ka maje+ e bile a tla ba kgemetha ka ditšhaka. A tla bolaya bomorwaabone le bomorwadiabone,+ e bile a tla fisa matlo a bone ka molelo.+ 48 Ke tla fedisa boitshwaro jo bo maswe thata mo lefatsheng leno, mme basadi botlhe ba tla ithuta thuto ya botlhokwa mme ga ba kitla ba dira boitshwaro jo bo maswe thata jo lo bo dirang.+ 49 A tla lo tlisetsa ditlamorago tsa boitshwaro jwa lona jo bo maswe thata le tsa maleo a lo a dirileng ka go obamela medingwana ya lona e e ferosang sebete; mme lo tla tshwanelwa ke go itse gore ke nna Morena Molaodimogolo Jehofa.’”+