Baatlhodi

20 Foo Baiseraele botlhe go tloga kwa Dana+ go ya go fitlha kwa Beere-sheba, le go tswa kwa lefatsheng la Gileade+ ba ne ba tla, mme phuthego yotlhe e ne ya phuthega e le seoposengwe* fa pele ga ga Jehofa kwa Misepa.+ 2 Ka jalo, dikgosana tsa batho botlhe le ditso tsotlhe tsa Iseraele di ne tsa tsaya maemo a tsone mo phuthegong ya batho ba Modimo. E ne e le masole a a tshotseng ditšhaka+ a le 400 000.

3 Babenjamine ba ne ba utlwela gore banna ba Iseraele ba ile kwa Misepa.

Foo banna ba Iseraele ba ne ba re: “Re boleleleng, selo seno se se bosula se diragetse jang?”+ 4 Foo monna wa Molefi,+ e bong monna wa mosadi yo o bolailweng, o ne a araba a re: “Ke ne ka tla kwa Gibea+ wa Benjamine le mogadingwana wa me gore re lale gone. 5 Mme baagi* ba Gibea ba ne ba tlhasela ntlo e ke neng ke le mo go yone bosigo. Ba ne ba batla go mpolaya, le fa go ntse jalo, ba ne ba betelela mogadingwana wa me, mme o ne a swa.+ 6 Ka jalo, ke ne ka tsaya setopo sa mogadingwana wa me mme ka se kgaoganya ke bo ke romela dikarolo tsa sone mo kgaolong nngwe le nngwe ya boswa jwa Iseraele,+ ka gonne ba ne ba dirile tiro e e bosula le e e tlhabisang ditlhong mo Iseraele. 7 Jaanong lona batho botlhe ba Iseraele, lwa reng ka kgang+ eno?”

8 Go tswa foo, batho botlhe ba ne ba ema ba le seoposengwe* ba bo ba re: “Ga go ope wa rona yo o tla yang kwa tenteng ya gagwe kgotsa yo o tla boelang kwa ntlong ya gagwe. 9 Jaanong seno ke se re tla se dirang motse wa Gibea: Re tla latlhela bola re bo re ya go o tlhasela.+ 10 Re tla tsaya banna ba le 10 mo go ba le 100 go tswa mo ditsong tsotlhe tsa Iseraele, le ba le 100 mo go ba le 1 000, le ba le 1 000 mo go ba le 10 000 gore ba phuthele masole mefago, e le gore ba ye go tlhasela motse wa Gibea wa Babenjamine, ka ntlha ya tiro ya matlhabisaditlhong e ba e dirileng mo Iseraele.” 11 Ka jalo, banna botlhe ba Iseraele ba ne ba phuthegile gore ba tlhasele motse oo ba le seoposengwe* jaaka masole a a dirileng kgolagano.

12 Go tswa foo, ditso tsa Iseraele di ne tsa romela banna kwa banneng botlhe ba lotso lwa ga Benjamine, ba re: “Goreng go diragetse selo se se bosula seno mo nageng ya lona? 13 Jaanong re neyeng banna ba ba se nang mosola ba ba tswang kwa Gibea,+ gore re ba bolaye mme re tlose se se bosula mo Iseraele.”+ Le fa go ntse jalo, Babenjamine ba ne ba gana go reetsa bomorwarraabone ba Baiseraele.

14 Go tswa foo, Babenjamine ba ne ba phuthega mmogo ba tswa mo metseng ya Gibea gore ba ye go tlhabana le banna ba Iseraele. 15 Ka letsatsi leo, Babenjamine ba ne ba phutha banna ba le 26 000 ba ba tsholang ditšhaka go tswa kwa metseng ya bone, kwantle ga banna ba le 700 ba ba tlhophilweng ba Gibea. 16 Mo masoleng ano go ne go na le banna ba ba tlhophilweng ba le 700 ba ba molema. Mongwe le mongwe wa banna bano o ne a kgona go konopa leje ka motsekedi ka nepo a bo a sa fose.

17 Banna ba Iseraele, kwantle ga Babenjamine, ba ne ba phutha banna ba le 400 000 ba ba tsholang ditšhaka,+ mme mongwe le mongwe wa bone e ne e le motlhabani yo o nang le maitemogelo. 18 Ba ne ba tswa mme ba ya kwa Bethele ba ya go botsa Modimo.+ Foo batho ba Iseraele ba ne ba re: “Ke mang mo go rona yo o tshwanetseng go etelela pele go ya go tlhabana le Babenjamine?” Jehofa o ne a araba a re: “Juda ke ene a tla lo etelelang pele.”

19 Morago ga moo, Baiseraele ba ne ba tswa mo mosong mme ba kampa gaufi le Gibea gore ba tlhabane le yone.

20 Jaanong banna ba Iseraele ba ne ba ya go tlhabana le Benjamine; ba ne ba tsamaya ka thulaganyo ba ipaakanyeditse go ya go tlhabana le bone kwa Gibea. 21 Ka jalo, Babenjamine ba ne ba tswa mo Gibea mme ba kgemetha banna ba Iseraele ba le 22 000 ka letsatsi leo. 22 Le fa go ntse jalo, masole a banna ba Iseraele, a ne a nna pelokgale mme a ipaakanyetsa ntwa gape mo lefelong leo jaaka ka letsatsi la ntlha. 23 Go tswa foo, Baiseraele ba ne ba tsamaya mme ba lela fa pele ga ga Jehofa go fitlha maitseboa mme ba botsa Jehofa jaana: “A re ye go tlhabana gape le bomorwarraarona, batho ba Benjamine?”+ Foo Jehofa o ne a araba a re: “Tsamayang lo ye go tlhabana le bone.”

24 Ka jalo, Baiseraele ba ne ba atamela gaufi le Babenjamine ka letsatsi la bobedi. 25 Benjamine le ene o ne a tswa kwa Gibea go ba kgatlhantsha ka letsatsi la bobedi mme a kgemetha Baiseraele ba bangwe+ ba le 18 000, botlhe ba tshotse ditšhaka. 26 Foo banna botlhe ba Iseraele ba ne ba ya kwa Bethele. Ba ne ba lela ba bo ba nna koo fa pele ga ga Jehofa+ mme ba itima dijo+ ka letsatsi leo go fitlha maitseboa ba bo ba isa ditlhabelo tse di fisiwang+ le ditlhabelo tsa go abelana+ fa pele ga ga Jehofa. 27 Morago ga moo, banna ba Iseraele ba ne ba botsa Jehofa,+ ka gonne letlole la kgolagano la Modimo wa boammaaruri le ne le le koo mo malatsing ao. 28 Jaanong Finease+ morwa Eliasare, morwa Arone, o ne a direla* fa pele ga lone mo malatsing ao. Ba ne ba botsa jaana: “A re ye go tlhabana gape le bomorwarraarona, banna ba Benjamine kgotsa re tlogele?”+ Jehofa o ne a araba a re: “Tsamayang, ka gonne kamoso ke tla ba tsenya mo seatleng sa lona.” 29 Go tswa foo, Iseraele o ne a tlhoma banna gore ba lalele+ Gibea go tswa mo matlhakoreng otlhe.

30 Baiseraele ba ne ba ya go tlhabana le Babenjamine ka letsatsi la boraro, mme ba ne ba tsamaya go ya ka thulaganyo ba ya go tlhasela motse wa Gibea fela jaaka mo makgetlong a mangwe.+ 31 Fa Babenjamine ba ya go kgatlhantsha masole ao, ba ne ba katogela kgakala le motse.+ Mme jaaka mo makgetlong a mangwe, ba ne ba simolola go ba tlhasela ba bo ba bolaya bangwe ba banna bao mo ditseleng tse dikgolo, tse nngwe ya tsone e yang kwa Bethele mme e nngwe kwa Gibea, ba tlogela banna ba Iseraele ba le 30 ba sule mo nageng.+ 32 Ka jalo, Babenjamine ba ne ba re: “Re ba fentse jaaka pele.”+ Mme Baiseraele ba re: “Re tla boela morago re bo re ba katosetsa kgakala le motse, re ba gogela mo ditseleng tse dikgolo.” 33 Ka jalo, banna botlhe ba Iseraele ba ne ba tswa mo mafelong a bone mme ba ema mo maemong a bone gore ba ipaakanyetse go lwa kwa Baale-tamare, fa Baiseraele ba ba neng ba laletse bone ba tlhasela go tswa mo mafelong a bone gaufi le Gibea. 34 Ka jalo, banna ba le 10 000 ba ba tlhophilweng go tswa mo Iseraele yotlhe ba ne ba tla fa pele ga Gibea, mme ntwa e ne e le maswe thata. Mme Babenjamine ba ne ba sa itse gore masetlapelo a ne a tloga a ba wela.

35 Jehofa o ne a fenya Benjamine+ fa pele ga Iseraele, mme mo letsatsing leo Baiseraele ba ne ba kgemetha banna ba le 25 100 mo Benjamine, botlhe ba ne ba tshotse ditšhaka.+

36 Le fa go ntse jalo, Babenjamine ba ne ba akanya gore banna ba Iseraele ba ne ba tla fenngwa fa ba ne ba boela morago go tswa mo Benjamine,+ mme ba ne ba boela morago ka gonne ba ikantse balaledi ba ba neng ba ba tlhomile gaufi le Gibea.+ 37 Ka bonako fela balaledi ba ne ba tlhasela go ela kwa Gibea. Foo balaledi ba ne ba phatlalala mme ba kgemetha motse otlhe ka tšhaka.

38 Jaanong banna ba Iseraele ba ne ba rulagantse gore banna ba ba neng ba laletse motse ba kuise mosi go tswa koo go ba naya sesupo sa gore ba tlhasele.

39 E rile Baiseraele ba retologela kwa tlhabanong, banna ba Benjamine ba simolola go tlhasela le go bolaya banna ba Iseraele ba ka nna 30+ mme ba ne ba re: “Ruri re ba fenya gape fela jaaka mo tlhabanong e e fetileng.”+ 40 Mme mosi o ne wa simolola go tlhatloga go tswa mo motseng o ntse jaaka pilara ya mosi. E rile banna ba Benjamine ba gadima, ba ne ba bona mosi wa motse otlhe o tlhatlogela kwa loaping. 41 Go tswa foo, banna ba Iseraele ba ne ba retologa, mme banna ba Benjamine ba ne ba tshoga ka gonne ba ne ba bona gore ba wetswe ke masetlapelo. 42 Ka jalo, ba ne ba boela morago go tswa mo banneng ba Iseraele go ela kwa nageng, mme tlhabano e ne ya ba sala morago; banna ba ba tswang mo metseng le bone ba ne ba ba kgemetha. 43 Ba ne ba ema go dikologa lefelo le Babenjamine ba neng ba le mo go lone mme ba ba lelekisa ba sa ikhutse. Ba ne ba ba bolaela fa pele ga Gibea go ela kwa botlhaba. 44 La bofelo banna ba le 18 000 ba Benjamine ba ne ba swa, batlhabani botlhe ba ba thata.+

45 Banna ba Benjamine ba ne ba retologa ba bo ba tshabela kwa nageng kwa lefikeng le legolo la Rimone,+ mme Baiseraele ba ne ba bolaya* banna ba le 5 000 ba bone mo ditseleng tse dikgolo, mme ba nna ba ba lelekisa go fitlha kwa Gidoma; ka jalo ba ne ba kgemetha banna ba bangwe gape ba le 2 000. 46 Banna botlhe ba Benjamine ba ba tsholang ditšhaka ba ba ileng ba swa mo letsatsing leo, ba ne ba le 25 000,+ botlhe e le batlhabani ba ba maatla. 47 Mme banna ba le 600 ba ne ba tshabela mo nageng kwa lefikeng le legolo la Rimone, mme ba nna mo lefikeng le legolo la Rimone dikgwedi di le nnê.

48 Mme banna ba Iseraele ba ne ba boela kwa Babenjamineng ba bo ba kgemetha ba ba leng mo motseng ka tšhaka, go simolola ka batho go ya go fitlha ka leruo, gotlhe mo go neng go setse. Gape, ba ne ba fisa metse yotlhe e e neng e le mo tseleng ya bone.