Efangele ya ga Luke

18 Go tswa foo, o ne a ba bolelela setshwantsho se se tlhalosang gore ba tlhoka go rapela ka metlha le gore ba se ka ba itlhoboga,+ 2 o ne a re: “Mo motseng mongwe go ne go na le moatlhodi mongwe yo o neng a sa boife Modimo e bile a sa tlotle motho ope. 3 Gape go ne go na le motlholagadi mongwe mo motseng oo yo o neng a tlhola a ya kwa go ene a re, ‘Go na le mongwe yo ke nang le kgang le ene, tlhomamisa gore o atlhola kgang ya rona ka tshiamiso.’ 4 Go ne ga feta nako e telele a gana go dira jalo, le fa go ntse jalo, morago o ne a ipolelela jaana, ‘Le fa gone ke sa boife Modimo e bile ke sa tlotle motho ope, 5 ke tla tlhomamisa gore ke atlhola kgang ya motlholagadi yono ka tshiamiso, ka gonne o nna a ntshwenya. Ke tla dira jalo gore a se ka a tlhola a tla mo go nna mme a ntapisa ka go boaboa fano.’”*+ 6 Foo Morena o ne a re: “A lo utlwile se moatlhodi yono a neng a se bua le fa gone a le bosula? 7 Eleruri, a Modimo le ene ga a kitla a tlhomamisa gore ba a ba tlhophileng ba ba goelang kwa go ene bosigo le motshegare ba direlwa tshiamiso,+ fa a ntse a le pelotelele le bone?+ 8 Ke a lo bolelela, o tla tlhomamisa gore ba direlwa tshiamiso ka bonako. Le fa go ntse jalo, fa Morwa motho a goroga, a tota o tla fitlhela tumelo e e ntseng jalo* mo lefatsheng?”

9 Gape o ne a bua le batho ba ba neng ba itshepa thata, ba akanya gore ba siame e bile ba tsaya batho ba bangwe e se ba sepe. O ne a ba bolelela setshwantsho seno: 10 “Banna ba babedi ba ne ba ya kwa tempeleng go ya go rapela, yo mongwe e ne e le Mofarasai mme yo mongwe e le mokgethisi. 11 Mofarasai o ne a ema mme a rapela mo pelong a re, ‘Ao tlhe Modimo, ke a go leboga ka gonne ga ke tshwane le batho ba bangwe, ba ba tsayang ka dikgoka, ba ba sa siamang, ba ba dirang boaka, e bile ga ke tshwane le mokgethisi yono. 12 Ke itima dijo gabedi ka beke; ke ntsha moneelo* wa dilo tsotlhe tse ke nnang le tsone.’+ 13 Le fa go ntse jalo, mokgethisi o ne a eme kgakajana e bile a sa batle go leba kwa legodimong, mme o ne a nna a itaya sehuba sa gagwe a re, ‘Ao tlhe Modimo, nkutlwele botlhoko,* ka gonne ke moleofi.’+ 14 Ke a lo bolelela, mokgethisi yono o ne a ya kwa legaeng la gagwe mme o ne a kailwe a siame go gaisa Mofarasai yole.+ Gonne mongwe le mongwe yo o ikgodisang o tla kokobediwa, mme mongwe le mongwe yo o ikokobetsang o tla godisiwa.”+

15 Jaanong gape batho ba ne ba tlisa masea a bone kwa go ene gore a a segofatse, mme fa barutwa ba bona seo, ba ne ba ba kgalemela.+ 16 Le fa go ntse jalo, Jesu o ne a kopa gore masea ao a tlisiwe kwa go ene a re: “Tlogelang bana ba bannye bano ba tle mo go nna, mme lo se ka lwa leka go ba thibela, ka gonne Bogosi Jwa Modimo ke jwa ba ba ntseng jalo.+ 17 Ammaaruri ke a lo bolelela, ope fela yo o sa amogeleng Bogosi Jwa Modimo jaaka ngwana yo monnye yo o amogelang dilo tse a di newang, ga a kitla a tsena mo go jone gotlhelele.”+

18 Mme mongwe wa babusi o ne a mmotsa a re: “Moruti yo o Molemo, ke eng se ke tshwanetseng go se dira gore ke bone botshelo jo bo sa khutleng?”+ 19 Jesu o ne a mo raya a re: “Ke ka ntlha yang fa o mpitsa yo o molemo? Ga go na ope yo o molemo, fa e se Modimo fela.+ 20 O itse ditaelo tseno: ‘O se ka wa dira boaka,+ o se ka wa bolaya motho,+ o se ka wa utswa,+ o se ka wa ntsha bosupi jwa maaka,+ tlotla rrago le mmago.’”+ 21 Foo o ne a re: “Ke dirile dilo tseno tsotlhe go tloga ke sa le mosha.” 22 Fa Jesu a sena go utlwa seo, o ne a mo raya a re: “Go sa ntse go na le selo se le sengwe se se tlhaelang ka wena: Rekisa dilo tsotlhe tse o nang le tsone mme o abele bahumanegi madi a tsone, mme o tla nna le letlotlo kwa magodimong; mme o tle o nne molatedi wa me.”+ 23 Fa a utlwa seno, o ne a hutsafala thata, ka gonne o ne a humile thata.+

24 Jesu o ne a mo leba a bo a re: “Ruri go tla nna thata tota gore ba ba nang le madi ba tsene mo Bogosing Jwa Modimo!+ 25 Tota e bile, go motlhofo gore kamela e tsene mo phatlheng ya nnale e e rokang go na le gore monna yo o humileng a tsene mo Bogosing Jwa Modimo.”+ 26 Ba ba neng ba utlwa seo ba ne ba re: “Tota ke mang yo o ka bolokwang?”+ 27 O ne a re: “Dilo tse di sa kgonegeng mo bathong, di a kgonega mo Modimong.”+ 28 Le fa go ntse jalo, Petere o ne a re: “Re tlogetse dilo tsa rona mme ra go sala morago.”+ 29 O ne a ba raya a re: “Ammaaruri ke a lo bolelela, ga go na ope yo o tlogetseng ntlo kgotsa mosadi kgotsa bomorwarraagwe kgotsa batsadi kgotsa bana ka ntlha ya Bogosi Jwa Modimo+ 30 yo o se kitlang a amogela go le gontsi thata mo nakong eno, mme mo nakong e e tlang* o tla amogela botshelo jo bo sa khutleng.”+

31 Go tswa foo, o ne a tseela baaposetoloi ba gagwe ba ba 12 kwa thoko mme a ba raya a re: “Bonang, re ya kwa Jerusalema, mme dilo tsotlhe tse baporofeti ba di kwadilweng ka Morwa motho di tla diragadiwa.*+ 32 Ka sekai, o tla tsenngwa mo diatleng tsa batho ba ditšhaba+ mme ba tla mo sotla,+ ba tla mo tshwara makgwakgwa ba bo ba mo kgwela mathe.+ 33 Mme fa ba sena go mo kgwathisa ba tla mmolaya,+ le fa go ntse jalo, mo letsatsing la boraro o tla tsoga.”+ 34 Le fa go ntse jalo, ga ba a ka ba lemoga bokao jwa dilo tseno, ka gonne ba ne ba fitlhetswe mafoko ano, e bile ga ba a ka ba tlhaloganya dilo tse di neng di buiwa.

35 Jaanong fa Jesu a fitlha gaufi le Jeriko, monna mongwe yo o foufetseng o ne a ntse go bapa le tsela a kopa.+ 36 E re ka a ne a utlwa batho ba bantsintsi ba feta, o ne a botsa gore go diragala eng. 37 Ba ne ba mo raya ba re: “Jesu wa Monasaretha o a feta!” 38 Foo o ne a goa a re: “Jesu, Morwa Dafide, nkutlwele botlhoko!” 39 Mme ba ba neng ba le kwa pele ba ne ba mo kgalemela, ba mo raya ba re a didimale, le fa go ntse jalo, o ne a goa le go feta a re: “Morwa Dafide, nkutlwele botlhoko!” 40 Foo Jesu o ne a ema mme a laela gore monna yoo a tlisiwe kwa go ene. Fa a sena go tla kwa go ene, Jesu o ne a mmotsa a re: 41 “O batla gore ke go direle eng?” O ne a re: “Morena, dira gore ke kgone go bona gape.” 42 Ka jalo, Jesu o ne a mo raya a re: “Boa o bone; tumelo ya gago e go fodisitse.”+ 43 Ka yone nako eo o ne a kgona go bona gape, mme a simolola go mo sala morago+ a galaletsa Modimo. Gape, e rile batho botlhe ba bona seno, ba ne ba baka Modimo.+