Baroma

9 Ke molatedi wa ga Keresete. Segakolodi sa me se kaelwa ke moya o o boitshepo e bile ke bua boammaaruri. Ga ke bue maaka fa ke re 2 ke na le khutsafalo e kgolo le kutlobotlhoko e e sa kgaotseng mo pelong ya me. 3 Fa go ne go kgonega, ke ne nka rata go amogela katlholo e e tshwanetseng bomorwarre ba Bajuda, ba ba neng ba se ka ba latela Keresete, fa e le gore go dira jalo go ne go tla ba thusa. 4 Bomorwarre bao ke Baiseraele e bile Modimo o ne a ba itseela gore e nne bana ba gagwe.+ Modimo o ne a ba bontsha kgalalelo ya gagwe a bo a ba naya dikgolagano+ le molao wa ga Moshe+ le ditsholofetso+ le tlotla ya go mo direla.+ 5 Ke ditlogolwana tsa borraaronamogolo,+ mme Keresete le ene ke setlogolo sa bone.+ E kete Modimo, yo o kwa godimo ga dilo tsotlhe, a ka bakwa ka bosakhutleng. Amen.

6 Le fa go ntse jalo, ga se gore lefoko la Modimo ga le a diragala. Gonne ga se botlhe ba ba tswang mo Iseraele, ba tota e leng Baiseraele.+ 7 Ga se botlhe ba tota e leng bana ba ga Aborahame fela ka gonne e le ditlogolwana tsa gagwe.+ Modimo o ne a raya Aborahame a re,“Se se tla bidiwang losika lwa gago se tla nna gone ka Isake.”+ 8 Seno se bontsha gore bana ba ba tsholetsweng Aborahame ga se bone tota bana ba Modimo.+ Go na le moo, bana ba ba tshotsweng ka ntlha ya tsholofetso+ ya Modimo ke bone ba ba tsewang e le losika lwa mmatota. 9 Gonne Modimo o ne a solofetsa jaana: “Ka nako eno mo ngwageng o o tlang, ke tla tla mme Sara o tla nna le ngwana wa mosimane.”+ 10 Go ne ga direga se se tshwanang fa Rebeka a ne a ima mawelana ka monna a le mongwe, e bong Isake rraaronamogolo;+ 11 gonne le e leng pele ba tsholwa mme ba ise ba dire sepe se se molemo kgotsa se se bosula, Modimo o ne a bontsha gore boikaelelo jwa gagwe ga bo a ikaega ka ditiro tsa motho mme bo ikaegile ka Ene yo o tlhophang le yo o bitsang batho. 12 Rebeka o ne a bolelelwa jaana: “Yo mogolo o tla direla yo mmotlana.”+ 13 Fela jaaka go kwadilwe, Modimo o ne a re: “Ke ne ka rata Jakobe, mme Esau ene ke ne ka mo tlhoa.”+

14 A jaanong re raya gore Modimo ga a na tshiamiso? Nnyaa, le e seng!+ 15 Gonne Modimo o raya Moshe a re: “Ke tla utlwela botlhoko ope fela yo ke batlang go mo utlwela botlhoko, e bile ke tla tlhomogela pelo ope fela yo ke batlang go mo tlhomogela pelo.”+ 16 Ka jalo, ga go a ikaega ka se motho a se eletsang kgotsa ka matsapa a a a tsayang* mme go ikaegile ka Modimo yo o kutlwelobotlhoko.+ 17 Gonne lokwalo lo raya Faro lo re: “Ke go tlogetse gore o tswelele o le gone ka lebaka leno: gore ke bontshe maatla a me ka wena le gore ke dire gore leina la me le bolelwe mo lefatsheng lotlhe.”+ 18 Ka jalo, Modimo o utlwela botlhoko ope fela yo a batlang go mo utlwela botlhoko, mme o letla ope fela yo o batlang go nna tlhogoethata gore a nne tlhogoethata.+

19 Bangwe ba ka mpotsa jaana: “Ke ka ntlha yang fa Modimo a sa ntse a re bona molato? Ke mang yo o ka ganetsanang le thato ya gagwe?” 20 Mme wena o mang go bo o araba Modimo?+ A selo se se bopilweng se ka raya motho yo o se bopileng sa re, “Ke ka ntlha yang fa o ne o ntira ka tsela eno?”+ 21 A mmopi wa letsopa ga a na tshwanelo ya go dira sejana se se kgethegileng* le sejana se se tlwaelegileng* a dirisa letsopa*+ le le lengwe? 22 Le fa gone Modimo a ne a batla go bontsha batho ba ba bosula* bogale jwa gagwe le go dira gore maatla a gagwe a itsiwe, o ne a nna pelotelele le batho bano ba ba tshwanelwang ke go atlholwa le ba ba tshwanang le dijana tse di tshwanelwang ke go senngwa. 23 O ne a dira seno gore a bontshe batho ba ba tshwanelwang ke gore a ba utlwele botlhoko kgalalelo ya gagwe mme ba ne ba tshwana le dijana+ tse a neng a di baakantse go sa le pele gore di galalediwe. 24 Dijana tseo ke rona, mme o ne a di bitsa go tswa mo ditšhabeng tse dingwe,+ e seng mo Bajudeng fela. 25 Go ntse fela jaaka a ile a bua mo go Hosea a re: “Ke tla bitsa ba e seng batho ba me+ ke re ‘batho ba me,’ le yo o neng a sa ratiwe ke re ke ‘moratwa’;+ 26 mme mo lefelong le ba neng ba tewa go twe, ‘Ga lo batho ba me,’ ba tla bidiwa ‘barwa ba Modimo yo o tshelang.’”+

27 Mo godimo ga moo, Isaia o ne a bua ka ga Iseraele a re: “Le fa batho ba* Iseraele ba ka nna jaaka motlhaba* wa lewatle, go tla bolokwa masalela fela.+ 28 Gonne Jehofa* o tla atlhola lefatshe; o tla diragatsa katlholo ya gagwe ka bonako.”+ 29 Gape, Isaia o ne a porofeta a re: “Fa Jehofa* wa masomosomo a ne a sa re tlogelela losika, re ka bo re ntse jaaka Sodoma, e bile re ka bo re tshwana le Gomora.”+

30 Jaanong re tla reng? Le fa gone batho ba ditšhaba ba ne ba sa leke go dira se se siameng,+ Modimo o ne a ba tsaya ba siame ka ntlha ya tumelo ya bone;+ 31 mme Baiseraele bone, le fa ba ne ba dira se se siameng go ya ka molao, ga ba a ka ba latela molao oo ka botlalo. 32 Ka ntlha yang? Ka gonne ba ne ba akanya gore ba tla tsewa ba siame ka ntlha ya ditiro tsa bone, e seng ka go nna le tumelo. Ba ne ba kgopiwa ke “leje le le kgopang”;+ 33 jaaka go kwadilwe go twe: “Ke tlhoma mo Siona leje+ le le kgopang le lefika le le kgopisang, mme yo o dumelang mo go lone ga a kitla a swabisiwa.”+